نواح الحِزِن لفِرْعَوْن و مَصِر
1 فِي الْيَوْم الْأَوَّلْ هَنَا شَهْرِي 12 فِي سَنِةْ 12 مِنْ وَدَّوْنَا فِي الْغُرْبَةْ، اللّٰهْ حَجَّى لَيِّ وَ قَالْ: 2 «يَا إِبْن آدَمْ، غَنِّي نُوَاحْ الْحِزِنْ لِفِرْعَوْن مَلِكْ مَصِرْ وَ قُولْ لَيَّهْ:
‹إِنْتَ شَبَّهْت دُودْ فِي أُسْط الْأُمَمْ
وَ إِنْتَ مِثِلْ تُمْسَاحْ فِي الْبَحَرْ.
وَ إِنْتَ قَمَّيْت فِي لُبّ الْبَحَرْ بِشِدَّةْ
وَ تِحَرِّكْ الْأَلْمِي بِرِجِلَيْنَكْ
وَ تَوَسِّخْ الْبَحَرْ.›»
3 دَاهُو اللّٰهْ الرَّبّ قَالْ:
«نُكُجّ لَيْك شَرَكِي
فِي وَكِتْ شُعُوبْ كَتِيرِينْ يِلِمُّوا
وَ هُمَّنْ يَرْمُوكْ فِي أَمْ كَجَّامْتِي.
4 أَنَا نَرْمِيكْ فِي الْأَرْض
وَ نَزْقُلَكْ فِي الْكَدَادَةْ.
نِنَزِّلْ فَوْقَكْ كُلَّ طُيُورْ السَّمَاءْ
وَ حَيْوَانَاتْ الْكَدَادَةْ يَاكُلُوا وَ يَشْبَعَوْا مِنَّكْ.
5 أَنَا نُخُطّ لَحَمْ جِلْدَكْ
فِي رُوسَيْ الْجِبَالْ
وَ نَمْلَا الْوُدْيَانْ
بِالْفَضَّلْ مِنْ رِمِّتَكْ.
6 نَزْقِي الْأَرْض بِدَمَّكْ الْيِدَفِّقْ مِنَّكْ
وَ الْجِبَالْ وَ الرُّجُولْ يِنْمَلُوا.
7 وَ وَكِتْ نُورَكْ يُمُوتْ،
أَنَا نِغَطِّي السَّمَاءْ
وَ نِضَلِّمْ النُّجُومْ.
نِغَطِّي الْحَرَّايْ بِسَحَابْ
وَ الْقَمَرْ مَا يِضَوِّي بَتَّانْ.
8 بِسَبَبَكْ إِنْتَ،
نِضَلِّمْ كُلَّ أَنْوَارْ السَّمَاءْ
وَ نِجِيبْ الضَّلَامْ فِي بَلَدَكْ.»
وَ دَا كَلَامْ اللّٰهْ الرَّبّ.
9 «وَكِتْ نِخَبِّرْ الْأُمَمْ بِدَمَارَكْ، شُعُوبْ كَتِيرِينْ يِبَرْجُلُوا لَحَدِّي فِي بُلْدَانْ الْأَوَّلْ إِنْتَ مَا تَعَرِفْهُمْ. 10 وَ بِسَبَبَكْ إِنْتَ، شُعُوبْ كَتِيرِينْ يَبْقَوْا حَزْنَانِينْ وَ مُلُوكْهُمْ يَرْجُفُوا مِنْ الْخَوْف وَكِتْ نِسِلّ سَيْفِي قِدَّامْهُمْ. فِي يَوْم إِنْتَ وَقَعْت، يَرْجُفُوا كُلَّ وَكِتْ وَ أَيِّ وَاحِدْ مِنْهُمْ يَخَافْ لِنَفْسَهْ.»
11 وَ فِي شَانْ دَا، دَاهُو اللّٰهْ الرَّبّ قَالْ:
«سَيْف مَلِكْ بَابِلْ يَجِيكْ.
12 نِجِيبْ سُيُوفْ الْفَحَلِينْ
الْهُمَّنْ مُجْرِمِينْ مِنْ الْأُمَمْ
وَ يَكْتُلُوا كُلَّ عَسْكَرَكْ.
أَيْوَى، هُمَّنْ يِوَدُّرُوا إِسْتِكْبَارْ مَصِرْ
وَ كُلَّ عَسْكَرْهَا يِدَّمَّرَوْا.
13 وَ أَنَا نِدَمِّرْ كُلَّ بَهَايِمْهَا
مِنْ جَنْب الْأَلْمِي الْكَتِيرْ.
وَ لَا رِجِلْ إِنْسَانْ وَ لَا ضُلُفْ بَهِيمَةْ
مَا يِبَرْجِلْ الْأَلْمِي بَتَّانْ.
14 خَلَاصْ أَلْمِي مَصِرْ يُكُونْ هَادِي
وَ رُجُولْهَا يَجْرُوا مِثِلْ الدِّهِنْ.
وَ دَا كَلَامْ اللّٰهْ الرَّبّ.15 وَكِتْ نَخْرِبْ بَلَدْ مَصِرْ
وَ نُقُشّ كُلَّ شَيّءْ الْفِي لُبَّهَا
وَ نِدَمِّرْ كُلَّ النَّاسْ السَّاكْنِينْ فَوْقهَا،
خَلَاصْ يَعَرْفُوا كَدَرْ أَنَا بَسْ اللّٰهْ.
16 «دَا نُوَاحْ الْحِزِنْ الْيِغَنُّوهْ. خَلِّي بَنَاتْ الْأُمَمْ يِغَنَّنْ بَيَّهْ. هِنَّ يِغَنَّنْ النُّوَاحْ دَا لِمَصِرْ وَ لِكُلَّ عَسْكَرْهَا.» وَ دَا كَلَامْ اللّٰهْ الرَّبّ.
نواح الحِزِن للشُعوب
17 وَ فِي يَوْم 15 هَنَا شَهْرِي 12 فِي سَنِةْ 12 مِنْ وَدَّوْنَا فِي الْغُرْبَةْ، اللّٰهْ حَجَّى لَيِّ وَ قَالْ: 18 «يَا إِبْن آدَمْ، غَنِّي نُوَاحْ الْحِزِنْ لِشَعَبْ مَصِرْ، لَيْهُمْ هُمَّنْ وَ أُمَمْ آخَرِينْ عَظِيمِينْ. خَلِّي نُوَاحَكْ يِنَزِّلْهُمْ تِحِتْ الْأَرْض مَعَ النَّزَلَوْا فِي الْقُبُورْ. 19 وَ قُولْ لَيْهُمْ:
‹يَا عَسْكَرْ مَصِرْ، إِنْتُو سَمْحِينْ
زِيَادَةْ مِنْ يَاتُو؟
أَنْزُلُوا فِي الْقُبُورْ
وَ أَرُقْدُوا مَعَ الْمَا مُطَهَّرِينْ.›
20 «أَيْوَى، الْمَصْرِيِّينْ يُمُوتُوا فِي الْحَرِبْ. وَ هَسَّعْ، السَّيْف جَاهِزْ لِلْكَتِلْ. خَلِّي يِقَدُّمُوا لَيَّهْ مَصِرْ وَ شَعَبْهَا! 21 وَ فِي بَكَانْ الْمَيْتِينْ، كُبَارَاتْ الْفُرَّاسْ وَ مُعَاوِنِينْهُمْ يِحَجُّوا لَيْهُمْ وَ يُقُولُوا: ‹هَسَّعْ، الْمَا مُطَهَّرِينْ الْمَاتَوْا فِي الْحَرِبْ نَزَلَوْا وَ رَقَدَوْا فِي الْقُبُورْ!›
22 «مَلِكْ أَشُورْ قَاعِدْ فِي الْبَكَانْ دَا مَعَ كُلَّ عَسْكَرَهْ. وَ هُو مُحَوَّقْ بِقُبُورْ عَسْكَرَهْ الْمَاتَوْا فِي الْحَرِبْ 23 وَ قُبُورْهُمْ قَاعِدِينْ تِحِتْ فِي آخِرْ الْأَرْض. وَ دَاهُو عَسْكَرَهْ وَ قُبُورْهُمْ مُحَوِّقِينَهْ. كُلُّهُمْ مَاتَوْا فِي الْحَرِبْ، هُمَّنْ الْأَوَّلْ جَابَوْا الرُّعُبْ فِي أَرْض الْحَيِّينْ.
24 «وَ مَلِكْ عِلَامْ قَاعِدْ فِي الْبَكَانْ دَا مَعَ كُلَّ عَسْكَرَهْ. وَ هُو مُحَوَّقْ بِقُبُورْ عَسْكَرَهْ الْمَاتَوْا فِي الْحَرِبْ. هُمَّنْ الْمَا مُطَهَّرِينْ الْأَوَّلْ جَابَوْا الرُّعُبْ فِي أَرْض الْحَيِّينْ. وَ هَسَّعْ بِإِهَانَةْ، نَزَلَوْا تِحِتْ الْأَرْض مَعَ كُلَّ النَّزَلَوْا فِي الْقُبُورْ. 25 أَيْوَى، مَلِكْ عِلَامْ رَقَدْ فِي أُسُطْ عَسْكَرَهْ الْمَاتَوْا فِي الْحَرِبْ وَ هُو مُحَوَّقْ بِقُبُورْهُمْ. وَ كُلَّ الْمَا مُطَهَّرِينْ دَوْل مَاتَوْا فِي الْحَرِبْ، هُمَّنْ الْأَوَّلْ جَابَوْا الرُّعُبْ فِي أَرْض الْحَيِّينْ. وَ هَسَّعْ، عَابَوْا مَعَ كُلَّ النَّزَلَوْا فِي الْقُبُورْ. شَالَوْا بَكَانْهُمْ أَمْبَيْن الْمَاتَوْا فِي الْحَرِبْ.
26 «وَ مَلِكْ مَاشَكْ وَ مَلِكْ تُوبَلْ قَاعِدِينْ فِي الْبَكَانْ دَا مَعَ كُلَّ عَسْكَرْهُمْ. وَ هُمَّنْ مُحَوَّقِينْ بِقُبُورْ عَسْكَرْهُمْ. وَ كُلَّ الْمَا مُطَهَّرِينْ دَوْل مَاتَوْا فِي الْحَرِبْ، هُمَّنْ الْأَوَّلْ جَابَوْا الرُّعُبْ فِي أَرْض الْحَيِّينْ. 27 مَا رَقَدَوْا مَعَ الْفُرَّاسْ الْفَحَلِينْ الْمَاتَوْا زَمَانْ، هُمَّنْ الْأَوَّلْ جَابَوْا الرُّعُبْ فِي أَرْض الْحَيِّينْ. وَ هُمَّنْ دَوْل نَزَلَوْا فِي بَكَانْ الْمَيْتِينْ بِسِلَاحْهُمْ هَنَا الْحَرِبْ. خَطَّوْا سُيُوفْهُمْ تِحِتْ رُوسَيْهُمْ وَ دَرَقْهُمْ مِنْ فَوْق لَيْهُمْ. 28 وَ إِنْتَ كُلَ، يَا فِرْعَوْن، تُمُوتْ مَعَ الْمَا مُطَهَّرِينْ وَ تَرْقُدْ مَعَ الْمَاتَوْا فِي الْحَرِبْ.
29 «وَ الْأَدَوْمِيِّينْ وَ مُلُوكْهُمْ وَ كُلَّ شُيُوخْهُمْ قَاعِدِينْ فِي الْبَكَانْ دَا. بِفَحَالِيِّتْهُمْ كُلَ، خَطَّوْهُمْ مَعَ الْآخَرِينْ الْمَاتَوْا فِي الْحَرِبْ. يَرُقْدُوا مَعَ الْمَا مُطَهَّرِينْ وَ مَعَ النَّزَلَوْا فِي الْقُبُورْ.
30 «وَ كُلَّ كُبَارَاتْ الْمُنْشَاقْ قَاعِدِينْ فِي الْبَكَانْ دَا مَعَ كُلَّ نَاسْ بَلَدْ صَيْدَا النَّزَلَوْا مَعَ الْمَيْتِينْ. هُمَّنْ عِنْدُهُمْ عَيْب أَشَانْ جَابَوْا الرُّعُبْ بِفَرَاسِيِّتْهُمْ. وَ هَسَّعْ، الْمَا مُطَهَّرِينْ دَوْل يَرُقْدُوا مَعَ الْمَاتَوْا فِي الْحَرِبْ وَ شَايْلِينْ عَيْبهُمْ مَعَ النَّزَلَوْا فِي الْقُبُورْ.
31 «وَكِتْ فِرْعَوْن يِشِيفْ الْمَيْتِينْ دَوْل، يِصَبِّرْ نَفْسَهْ بِمَوْت عَسْكَرَهْ الْكَتِيرِينْ. أَيْوَى فِرْعَوْن وَ كُلَّ عَسْكَرَهْ مَاتَوْا فِي الْحَرِبْ. وَ دَا كَلَامْ اللّٰهْ الرَّبّ. 32 أَيْوَى، أَنَا بَسْ خَلَّيْتَهْ يِجِيبْ الرُّعُبْ فِي أَرْض الْحَيِّينْ وَ لَاكِنْ هَسَّعْ، فِرْعَوْن وَ كُلَّ عَسْكَرَهْ يَرُقْدُوا فِي أُسْط الْمَا مُطَهَّرِينْ الْمَاتَوْا فِي الْحَرِبْ.» وَ دَا كَلَامْ اللّٰهْ الرَّبّ.
© La Bible en arabe tchadien © Alliance biblique du Tchad, 2019
