كلام اللّه ضِدّ جبل سَعِير في أَدَوْم
1 وَ اللّٰهْ حَجَّى لَيِّ وَ قَالْ: 2 «يَا إِبْن آدَمْ، وَجِّهْ عَلَيْ جَبَلْ سَعِيرْ وَ سُكَّانَهْ وَ أَتْنَبَّأْ ضِدَّهْ. 3 وَ قُولْ لَيَّهْ: ‹دَاهُو اللّٰهْ الرَّبّ قَالْ:
”أَكِيدْ أَنَا نُقُمّ ضِدَّكْ،
يَا جَبَلْ سَعِيرْ،
وَ نَرْفَعْ إِيدِي ضِدَّكْ
وَ نِسَوِّيكْ خَرَابْ وَ يَبَاسْ.
4 وَ نِسَوِّي مُدُنَكْ كَوْم هَنَا تُرَابْ
وَ إِنْتَ تَبْقَى خَرَابْ.
وَ بَيْدَا، إِنْتَ تَعَرِفْ كَدَرْ أَنَا بَسْ اللّٰهْ.
5 «‹”إِنْتَ عِنْدَكْ عَدَاوَةْ دَايْمَةْ وَ رَمَيْت بَنِي إِسْرَائِيلْ فِي الْحَرِبْ فِي وَكِتْ ضِيقِتْهُمْ، وَكِتْ ذُنُوبْهُمْ لِحْقَوْا حَدُّهُمْ.“›»
6 وَ فِي شَانْ دَا، دَاهُو كَلَامْ اللّٰهْ الرَّبّ: «أَنَا نَحْلِفْ بِأُسْمِي الْحَيّ، نَمْلَاكْ بِدَمّ وَ الدَّمّ يِطَارِدَكْ. أَكِيدْ إِنْتَ مَا خُفْت مِنْ الدِّمَّةْ وَ هَسَّعْ، الدَّمّ يِطَارِدَكْ. 7 يَا جَبَلْ سَعِيرْ، نِسَوِّيكْ خَرَابْ وَ يَبَاسْ وَ نَمْنَعْ النَّاسْ مَا يُفُوتُوا بَيْك. 8 وَ نَمْلَا جِبَالَكْ بِالْجَنَازَاتْ. وَ فِي حُجَارَكْ وَ وُدْيَانَكْ وَ كُلَّ رُجُولَكْ، نَاسَكْ يُمُوتُوا فِي الْحَرِبْ. 9 وَ أَنَا نِسَوِّيكْ خَرَابْ إِلَى الْأَبَدْ وَ مُدُنَكْ مَا يَسْكُنُوا فَوْقهُمْ. وَ بَيْدَا، تَعَرِفْ كَدَرْ أَنَا بَسْ اللّٰهْ.
10 «إِنْتَ قُلْت: ‹الْأُمَمْ الْإِتْنَيْن هَنَا إِسْرَائِيلْ وَ يَهُوذَا وَ شَعَبْهُمْ، أَنَا نِشِيلْهُمْ وَ يَبْقَوْا هِنَيّ أَنَا، حَتَّى كَانْ اللّٰهْ قَاعِدْ فَوْقهُمْ كُلَ.› 11 وَ فِي شَانْ دَا، دَاهُو كَلَامْ اللّٰهْ الرَّبّ: ‹أَنَا نَحْلِفْ بِأُسْمِي الْحَيّ، نِسَوِّي فَوْقَكْ حَسَبْ زَعَلَكْ وَ حُسْدَكْ وَ كَرَاهِيّتَكْ الْإِنْتَ قَمَّيْت بَيْهُمْ ضِدّ الْمَمَالِكْ دَوْل. وَ وَكِتْ نِنَزِّلْ عِقَابِي فَوْقَكْ، خَلَاصْ هُمَّنْ يَعَرْفُونِي! 12 وَ بَيْدَا، إِنْتَ كُلَ تَعَرِفْ كَدَرْ أَنَا بَسْ اللّٰهْ وَ أَنَا سِمِعْت كُلَّ الْمُعْيَارْ الْإِنْتَ عَيَّرْت بَيَّهْ جِبَالْ إِسْرَائِيلْ وَكِتْ قُلْت: ”جِبَالْ إِسْرَائِيلْ بِقَوْا خَرَابْ! خَلَاصْ، أَنْطَوْهُمْ لَيْنَا مِثِلْ مَعَاشْ وَ أَنِحْنَ نَاكُلُوهُمْ!“ 13 إِنْتَ حَجَّيْت فَوْقِي بِإِسْتِكْبَارْ وَ كَتَّرْت كَلَامَكْ ضِدِّي وَ أَنَا سِمِعْتَهْ.›»
14 وَ دَاهُو اللّٰهْ الرَّبّ قَالْ: «وَكِتْ نَخَرْبَكْ، كُلَّ الْبُلْدَانْ يَفْرَحَوْا. 15 وَكِتْ أَرْض وَرَثَةْ بَنِي إِسْرَائِيلْ خِرْبَتْ، إِنْتَ فِرِحْت وَ فِي شَانْ دَا، أَنَا نِسَوِّيكْ مِثِلْهَا. يَا جَبَلْ سَعِيرْ، إِنْتَ تَخْرَبْ وَ كُلَّ بَلَدْ أَدَوْم كُلَ. وَ بَيْدَا، كُلَّ النَّاسْ يَعَرْفُوا كَدَرْ أَنَا بَسْ اللّٰهْ.»
© La Bible en arabe tchadien © Alliance biblique du Tchad, 2019
