شُروط دخول البيت المُقدّس
1 وَ الرَّاجِلْ وَدَّانِي لِبَيْت الْمَدَخَلْ الصَّبْحَانِي هَنَا الْبَيْت الْمُقَدَّسْ وَ دَرْبَهْ الْيَفْتَحْ فِي الْفَضَايْ الدَّخْلَانِيَّةْ دَا مَسْدُودْ. 2 وَ اللّٰهْ قَالْ لَيِّ: «الدَّرِبْ دَا يِسِدُّوهْ وَ بَتَّانْ مَا يُفُكُّوهْ. وَ نَادُمْ مَا يِعَدِّي بَيَّهْ أَشَانْ أَنَا اللّٰهْ إِلٰـهْ بَنِي إِسْرَائِيلْ دَخَلْت بِالدَّرِبْ دَا وَ هَسَّعْ هُو يُكُونْ مَسْدُودْ. 3 وَ لَاكِنْ الْمَلِكْ يَقْدَرْ يَقْعُدْ فَوْقَهْ أَشَانْ هُو مَلِكْ وَ يَاكُلْ قِدَّامِي أَنَا اللّٰهْ. هُو يَدْخُلْ بِغُرْفَةْ الْمَدَخَلْ هَنَا الْبَيْت دَا وَ يَمْرُقْ بِنَفْس الدَّرِبْ الْهُو دَخَلْ بَيَّهْ.»
4 وَ بَعَدْ دَا، الرَّاجِلْ وَدَّانِي بِبَيْت الْمَدَخَلْ الْمُنْشَاقِي لَحَدِّي وِصِلْنَا قِدَّامْ الْبَيْت الْمُقَدَّسْ. وَ دَاهُو أَنَا شِفْت مَجْد اللّٰهْ مَلَا بَيْتَهْ. وَ خَلَاصْ، أَنَا وَقَعْت بِوِجْهِي فِي الْأَرْض. 5 وَ اللّٰهْ قَالْ لَيِّ: «يَا إِبْن آدَمْ، خُطّ بَالَكْ وَ أَفْتَحْ عُيُونَكْ وَ شِيفْ! وَ خُطّ أَدَانَكْ وَ أَسْمَعْ كُلَّ الْكَلَامْ النُّقُولَهْ لَيْك الْبُخُصّ الشُّرُوطْ هَنَا بَيْتِي أَنَا اللّٰهْ وَ كُلَّ قَوَانِينَهْ. وَ فَكِّرْ تَمَامْ فِي شُرُوطْ الدَّخِلِينْ وَ الْمَرِقِينْ مِنْ الْبَيْت الْمُقَدَّسْ.
6 «وَ قُولْ لِبَنِي إِسْرَائِيلْ الْعَاصِيِينْ: ‹دَاهُو اللّٰهْ الرَّبّ قَالْ: ”يَا بَنِي إِسْرَائِيلْ! كَفَاكُو مِنْ كُلَّ مُحَرَّمَاتْكُو! 7 وَكِتْ قَدَّمْتُوا لَيِّ الشَّحَمْ وَ الدَّمّ هَنَا الضَّحَايَا مِثِلْ أَكِلْ، فِي الْوَكِتْ دَا بَسْ، دَخَّلْتُوا فِي بَيْتِي الْمُقَدَّسْ أَجَانِبْ الْمَا مُطَهَّرِينْ وَ قُلُوبْهُمْ كُلَ مَا طَاهِرِينْ. وَ بَيْدَا، مَا أَحْتَرَمْتُوا بَيْتِي وَ بَتَّانْ قَطَعْتُوا مُعَاهَدَتِي بِكُلَّ مُحَرَّمَاتْكُو. 8 وَ إِنْتُو مَا حَفَضْتُوا خِدِمْتِي الْمُقَدَّسَةْ وَ لَاكِنْ خَطَّيْتُوا أَجَانِبْ فِي بَدَلْكُو لِيَحْفَضَوْا خِدِمْتِي فِي بَيْتِي الْمُقَدَّسْ.“ 9 دَاهُو اللّٰهْ الرَّبّ قَالْ: ”خَلِّي أَيِّ أَجْنَبِي الْمَا مُطَهَّرْ وَ قَلْبَهْ كُلَ مَا طَاهِرْ مَا يَدْخُلْ فِي بَيْتِي الْمُقَدَّسْ حَتَّى كَانْ هُو سَاكِنْ فِي أُسُطْ بَنِي إِسْرَائِيلْ كُلَ.“›
شُروط للاوِيِّين و رجال الدين
10 «وَ كَنْ لِلَّاوِيِّينْ الْبَعَّدَوْا مِنِّي وَكِتْ بَنِي إِسْرَائِيلْ أَبَوْنِي وَ قَبَّلَوْا تَابَعَوْا إِلٰـهَاتْهُمْ، هَسَّعْ هُمَّنْ يِلْحَمَّلَوْا نَتِيجَةْ خَطَاهُمْ. 11 يَقْدَرَوْا يُكُونُوا فِي بَيْتِي الْمُقَدَّسْ وَ يَحْفَضَوْا بِيبَانْ الْبَيْت وَ يَخْدُمُوا فِي لُبّ الْبَيْت. وَ هُمَّنْ بَسْ يَدْبَحَوْا الْبَهَايِمْ هَنَا الضَّحَايَا الْمُحَرَّقِينْ وَ الضَّحَايَا الْيِقَدُّمُوهُمْ الشَّعَبْ. وَ يَقْعُدُوا جَاهِزِينْ لِيَخْدُمُوا لِلشَّعَبْ. 12 وَ لَاكِنْ أَوَّلْ، هُمَّنْ دَبَحَوْا ضَحَايَا الشَّعَبْ لِأَصْنَامْهُمْ وَ رَمَوْا بَنِي إِسْرَائِيلْ فِي الْخَطَا. وَ بِسَبَبْ دَا، أَنَا نَرْفَعْ إِيدِي ضِدُّهُمْ وَ هُمَّنْ يِلْحَمَّلَوْا نَتِيجَةْ خَطَاهُمْ. وَ دَا كَلَامْ اللّٰهْ الرَّبّ. 13 وَ هُمَّنْ مَا يِقَرُّبُوا لَيِّ لِيِسَوُّوا خِدْمَةْ رُجَالْ الدِّينْ وَ مَا يِقَرُّبُوا لِكُلَّ خِدِمْتِي الْمُقَدَّسَةْ وَ لَا لِلْبَكَانْ الْمُقَدَّسْ مَرَّةْ وَاحِدْ. وَ هُمَّنْ يِلْحَمَّلَوْا نَتِيجَةْ إِهَانِتْهُمْ وَ الْمُحَرَّمَاتْ السَّوَّوْهُمْ. 14 وَ أَنَا نِكَلِّفْهُمْ بِخِدْمَةْ صَغَيْرَةْ بَسْ فِي بَيْتِي الْمُقَدَّسْ وَ هُمَّنْ يِسَوُّوا كُلَّ خِدِمْتَهْ وَ كُلَّ شَيّءْ الْوَاجِبْ يَخْدُمُوهْ.
15 «وَ كَنْ لِرُجَالْ الدِّينْ اللَّاوِيِّينْ الْمِنْ ذُرِّيَّةْ صَدُوقْ، هُمَّنْ حَفَضَوْا خِدْمَةْ بَيْتِي الْمُقَدَّسْ وَكِتْ بَنِي إِسْرَائِيلْ أَبَوْنِي. وَ هَسَّعْ، هُمَّنْ دَوْل بَسْ يِقَرُّبُوا لَيِّ وَ يَخْدُمُوا لَيِّ. وَ يَقِيفُوا قِدَّامِي وَ يِقَدُّمُوا لَيِّ شَحَمْ وَ دَمّ الضَّحَايَا. وَ دَا كَلَامْ اللّٰهْ الرَّبّ. 16 وَ هُمَّنْ دَوْل يَدْخُلُوا فِي بَيْتِي الْمُقَدَّسْ وَ يِقَرُّبُوا لِطَرَبَيْزِتِي لِيَخْدُمُوا لَيِّ وَ يَحْفَضَوْا خِدِمْتِي.
17 «وَ خَلَاصْ وَكِتْ يَدْخُلُوا بِبُيُوتْ مَدَاخِلْ هَنَا الْفَضَايْ الدَّخْلَانِيَّةْ، هُمَّنْ يَلْبَسَوْا خُلْقَانْ هَنَا كَتَّانْ. مَا يَلْبَسَوْا خُلْقَانْ هَنَا صُوفْ وَكِتْ يَخْدُمُوا فِي الْفَضَايْ الدَّخْلَانِيَّةْ وَ فِي الْبَيْت الْمُقَدَّسْ. 18 وَ يُكُجُّوا كَدَامِيلْ هَنَا كَتَّانْ وَ يَلْبَسَوْا سَرَاوِيلْ دُقَاقْ هَنَا كَتَّانْ وَ مَا يَلْبَسَوْا أَيِّ شَيّءْ الْيِجِيبْ لَيْهُمْ الْوَغَرْ. 19 وَ وَكِتْ يِدَوْرُوا يَمُرْقُوا فِي الْفَضَايْ الْبَرَّانِيَّةْ عَلَيْ الشَّعَبْ، يِسِلُّوا الْخُلْقَانْ الْخَدَمَوْا بَيْهُمْ وَ يُخُطُّوهُمْ فِي الْغُرَفْ جَنْب الْبَيْت الْمُقَدَّسْ. وَ يَلْبَسَوْا خُلْقَانْ عَادِيِّينْ أَشَانْ مَا يِخَصُّصُوا الشَّعَبْ بِخُلْقَانْهُمْ الْمُخَصَّصِينْ. 20 وَ مَا يِزَيُّنُوا رُوسَيْهُمْ وَ لَا يِخَلُّوا شَعَرْهُمْ يَبْقَى طُوَالْ لَاكِنْ يُقُصُّوهْ بِنِظَامْ. 21 وَ أَيِّ رَاجِلْ دِينْ مَا وَاجِبْ يَشْرَبْ خَمَرْ وَكِتْ يَدْخُلْ فِي الْفَضَايْ الدَّخْلَانِيَّةْ. 22 وَ مَا يَاخُدُوا مَرَةْ أَرْمَلَةْ وَ لَا مُطَلَّقَةْ. يَاخُدُوا إِلَّا بَنَاتْ عُدْرِيَّاتْ مِنْ قَبِيلَةْ بَنِي إِسْرَائِيلْ أَوْ مَرَةْ أَرْمَلَةْ الرَّاجِلْهَا رَاجِلْ دِينْ.
23 «وَ رُجَالْ الدِّينْ يِعَلُّمُوا شَعَبِي الْفَرَقَةْ بَيْن الْمُقَدَّسْ وَ الْمَا مُقَدَّسْ وَ يِعَرُّفُوهُمْ الْفَرَقَةْ بَيْن الطَّاهِرْ وَ النِّجِسْ. 24 وَ كَنْ فِي مُشْكِلَةْ، هُمَّنْ بَسْ يَبْقَوْا قُضْيَاءْ وَ يِشَارُعُوا حَسَبْ شَرِيعْتِي. وَ يِطَبُّقُوا شُرُوطِي الْفِي التَّوْرَاةْ وَ قَوَانِينِي وَ يَحْفَضَوْا كُلَّ أَعْيَادِي وَ يَوْمِي هَنَا السَّبْت، يَجْعَلَوْه مُقَدَّسْ.
25 «وَ أَيِّ رَاجِلْ دِينْ مَا يِقَرِّبْ لِنَادُمْ مَيِّتْ أَشَانْ دَا يِسَوِّيهْ نِجِسْ. وَ لَاكِنْ يَقْدَرْ يِقَرِّبْ وَ يَبْقَى نِجِسْ بِجَنَازَةْ أَبُوهْ أَوْ أَمَّهْ أَوْ وِلَيْدَهْ أَوْ بِنْتَهْ أَوْ أَخُوهْ أَوْ أَخْتَهْ اللِّسَّاعْهَا مَا أَخَدَتْ. 26 وَ بَعَدْ يِطَّهَّرْ، يَقْعُدْ سَبْعَةْ يَوْم حَتَّى يَجِي. 27 وَ يَوْم هُو يَجِي فِي الْفَضَايْ الدَّخْلَانِيَّةْ هَنَا الْبَيْت الْمُقَدَّسْ، هُو يِقَدِّمْ ضَحِيّتَهْ لِكَفَّارَةْ الذَّنِبْ قُبَّالْ مَا يِسَوِّي خِدْمَةْ الْبَيْت. وَ دَا كَلَامْ اللّٰهْ الرَّبّ.
28 «وَ رُجَالْ الدِّينْ يَخْدُمُوا لَيِّ أَنَا وَ أَنَا بَسْ وَرَثَتْهُمْ. إِنْتُو مَا تَنْطُوهُمْ أَرْض فِي بَلَدْ إِسْرَائِيلْ أَشَانْ أَنَا بَسْ وَرَثَتْهُمْ. 29 وَ هُمَّنْ يَاكُلُوا الْهَدَايَا وَ الضَّحَايَا لِكَفَّارَةْ الذَّنِبْ وَ الضَّحَايَا لِكَفَّارَةْ الْخَطَا. وَ كُلَّ شَيّءْ الْيِخَصُّصُوهْ لَيِّ بَنِي إِسْرَائِيلْ، أَنَا نَنْطِيهْ لَيْهُمْ. 30 وَ كُلَّ الْإِنْتَاجْ الْأَوَّلْ وَ كُلَّ زَكَاتْكُو يَبْقَوْا لِرُجَالْ الدِّينْ. وَ أَنْطُوا لِرُجَالْ الدِّينْ أَوَّلْ دَقِيقْكُو وَ بَيْدَا، بُيُوتْكُو يُكُونُوا مُبَارَكِينْ. 31 وَ مَا وَاجِبْ رُجَالْ الدِّينْ يَاكُلُوا رِمَّةْ وَ لَا جِيفَةْ كَنْ تَبْقَى هِنْت طَيْر أَوْ حَيْوَانْ كُلَ.»
© La Bible en arabe tchadien © Alliance biblique du Tchad, 2019
