اللّه يقُمّ ضِدّ عِبادة الأصْنام
1 وَ اللّٰهْ حَجَّى لَيِّ وَ قَالْ: 2 «يَا إِبْن آدَمْ، وَجِّهْ عَلَيْ جِبَالْ إِسْرَائِيلْ وَ أَتْنَبَّأْ ضِدُّهُمْ. 3 وَ قُولْ: ‹يَا جِبَالْ إِسْرَائِيلْ! أَسْمَعَوْا كَلَامْ اللّٰهْ الرَّبّ. وَ دَاهُو اللّٰهْ الرَّبّ حَجَّى لِلْجِبَالْ وَ الْحُجَارْ وَ الرُّجُولْ وَ الْوُدْيَانْ وَ قَالْ: ”دَاهُو أَنَا نِجِيبْ لَيْكُو الْحَرِبْ وَ نِهَدِّمْ بَكَانَاتْكُو الْعَالِيِينْ هَنَا عِبَادَةْ الْأَصْنَامْ. 4 وَ مَدَابِحْكُو يَخْرَبَوْا وَ مَخَابِرْكُو يِلْكَسَّرَوْا وَ أَنَا نَرْمِي مَيْتِينْكُو قِدَّامْ أَصْنَامْكُو.“›
5 «وَ أَنَا نُخُطّ جَنَازَاتْ بَنِي إِسْرَائِيلْ قِدَّامْ أَصْنَامْكُو وَ نِشَتِّتْ عُضَامْكُو حَوَالَيْ مَدَابِحْكُو. 6 وَ فِي أَيِّ بَكَانْ التَّسْكُنُوا فَوْقَهْ، الْمُدُنْ يَخْرَبَوْا وَ الْبَكَانَاتْ الْعَالِيِينْ يِلْهَدَّمَوْا. وَ مَدَابِحْكُو يَخْرَبَوْا وَ يِدَّمَّرَوْا وَ أَصْنَامْكُو يِلْكَسَّرَوْا وَ يَقَعَوْا تِحِتْ وَ مَخَابِرْكُو يِلْكَسَّرَوْا وَ خِدْمِتْكُو تِدَّمَّرْ. 7 وَ مَيْتِينْكُو يَقَعَوْا فِي أُسُطْكُو وَ بَيْدَا، تَعَرْفُوا كَدَرْ أَنَا بَسْ اللّٰهْ.
8 «وَ لَاكِنْ أَنَا نِفَضِّلْ مِنْكُو نَاسْ حَيِّينْ مَا يُمُوتُوا فِي الْحَرِبْ وَ نِشَتِّتْهُمْ فِي أُسْط الْأُمَمْ. 9 وَ نَاسْكُو الْفَضَّلَوْا يِذَّكَّرَوْنِي فِي أُسْط الْأُمَمْ فِي الْبَكَانْ الْوَدَّوْهُمْ فَوْقَهْ فِي الْغُرْبَةْ. وَ أَنَا نِبَدِّلْ قُلُوبْهُمْ الْبَيْهُمْ بَعَّدَوْا مِنِّي وَ أَشَّرْمَطَوْا وَرَاءْ الْأَصْنَامْ وَ عُيُونْهُمْ الْبَيْهُمْ أَشَّرْمَطَوْا وَرَاءْ أَصْنَامْهُمْ. وَ الْعَيْب يَكْرُبْهُمْ بِسَبَبْ الْفَسَالَةْ السَّوَّوْهَا وَ بِسَبَبْ كُلَّ مُحَرَّمَاتْهُمْ. 10 وَ بَيْدَا، يَعَرْفُوا كَدَرْ أَنَا بَسْ اللّٰهْ وَ كَنْ قُلْت نِسَوِّي فَوْقهُمْ الْفَسَالَةْ دِي، دَا مَا كَلَامْ سَاكِتْ.»
11 وَ دَاهُو اللّٰهْ الرَّبّ قَالْ لَيِّ: «يَا حِزْقِيَالْ، أَضْرُبْ كَفَّيْنَكْ وَ أَضْرُبْ بِرِجْلَكْ فِي التُّرَابْ وَ قُولْ: ‹يَا خَسَارِتْنَا!› وَ دَا فِي شَانْ كُلَّ الْفَسَالَةْ الْمُحَرَّمَةْ السَّوَّوْهَا بَنِي إِسْرَائِيلْ. وَ هَسَّعْ، يُمُوتُوا بِالْحَرِبْ وَ الْجُوعْ وَ الْوَبَاءْ. 12 وَ الْيَمْشُوا بَعِيدْ يُمُوتُوا بِالْوَبَاءْ وَ الْقَرِيبِينْ يُمُوتُوا بِالْحَرِبْ وَ الْفَضَّلَوْا حَيِّينْ يُمُوتُوا بِالْجُوعْ لَحَدِّي نِتَمِّمْ فَوْقهُمْ غَضَبِي. 13 وَ بَيْدَا، يَعَرْفُوا كَدَرْ أَنَا بَسْ اللّٰهْ وَكِتْ يِشِيفُوا مَيْتِينْهُمْ قِدَّامْ أَصْنَامْهُمْ وَ حَوَالَيْ مَدَابِحْهُمْ وَ فَوْق أَيِّ حَجَرْ عَالِي وَ فِي رَاسْ أَيِّ جَبَلْ وَ تِحِتْ أَيِّ شَدَرَةْ خَضْرَةْ وَ أَيِّ شَدَرَةْ ضَلْمَةْ. وَ دَوْل الْبَكَانَاتْ الْقَدَّمَوْا فَوْقهُمْ ضَحَايَا لِأَصْنَامْهُمْ لِيَرْضَوْا بِرِيحِتْهُمْ. 14 أَنَا نِمِدّ إِيدِي ضِدُّهُمْ وَ ضِدّ أَيِّ بَكَانْ الْيَسْكُنُوا فَوْقَهْ. وَ الْبَلَدْ دِي مِنْ الصَّحَرَاءْ لَحَدِّي دِبْلَةْ، نِسَوِّيهَا خَرَابْ وَ جَفَافْ. وَ بَيْدَا، يَعَرْفُوا كَدَرْ أَنَا بَسْ اللّٰهْ.»
© La Bible en arabe tchadien © Alliance biblique du Tchad, 2019
