مكتوب كُورَش ملك بلد فَارِس
1 فِي السَّنَةْ الْأَوَّلْ هَنَا حُكُمْ كُورَشْ مَلِكْ بَلَدْ فَارِسْ، اللّٰهْ قَمَّ يِحَقِّقْ كَلَامَهْ الْأَوَّلْ قَالَهْ بِخَشُمْ النَّبِي إِرْمِيَا. وَ اللّٰهْ أَنْطَى فِكِرْ لِكُورَشْ مَلِكْ بَلَدْ فَارِسْ وَ بَيْدَا، كُورَشْ قَرَّرْ فِي كُلَّ مَمْلَكَتَهْ وَ كَتَبْ مَكْتُوبْ وَ قَالْ:
2 دَاهُو كَلَامِي أَنَا كُورَشْ مَلِكْ بَلَدْ فَارِسْ.اللّٰهْ رَبّ السَّمَاوَاتْ أَنْطَانِي كُلَّ مَمَالِكْ الْأَرْض وَ كَلَّفَانِي أَشَانْ نَبْنِي لَيَّهْ بَيْت فِي مَدِينَةْ الْقُدُسْ فِي بَلَدْ يَهُوذَا. 3 خَلِّي أَيِّ وَاحِدْ مِنْ شَعَبَهْ يَمْشِي فِي مَدِينَةْ الْقُدُسْ فِي بَلَدْ يَهُوذَا وَ إِلٰـهَهْ يُكُونْ مَعَايَهْ وَ هِنَاكْ يَبْنِي بَيْت اللّٰهْ إِلٰـهْ بَنِي إِسْرَائِيلْ. وَ هُو الْإِلٰـهْ الْيَعَبُدُوهْ فِي مَدِينَةْ الْقُدُسْ.4 وَ فِي أَيِّ بَكَانْ السَّاكْنِينْ فَوْقَهْ شَعَبْ بَنِي إِسْرَائِيلْ فِي الْغُرْبَةْ، خَلِّي النَّاسْ يِسَاعُدُوهُمْ وَ يَنْطُوهُمْ فُضَّةْ وَ دَهَبْ وَ مَالْ وَ بَهَايِمْ وَ هَدَايَا وَ دَا يَنْطُوهْ بِنِيِّتْهُمْ لِبَيْت اللّٰهْ فِي مَدِينَةْ الْقُدُسْ.5 وَ خَلَاصْ، كُبَارَاتْ قَبَايِلْ يَهُوذَا وَ قَبَايِلْ بَنْيَامِينْ وَ رُجَالْ الدِّينْ وَ اللَّاوِيِّينْ وَ أَيِّ نَادُمْ الْأَنْطَاهْ الرَّبّ فِكِرْ لِيِقَبِّلْ لِمَدِينَةْ الْقُدُسْ وَ يَبْنِي بَيْت اللّٰهْ، دَوْل كُلُّهُمْ قَاعِدِينْ يِجَهُّزُوا أَشَانْ يَمْشُوا. 6 وَ كُلَّ جِيرَانْهُمْ سَاعَدَوْهُمْ وَ أَنْطَوْهُمْ مُعِدَّاتْ هَنَا فُضَّةْ وَ دَهَبْ وَ مَالْ وَ خُمَامْ آخَرْ غَالِي وَ بَهَايِمْ. وَ دَا بَلَا الْمُسَاعَدَةْ الْأَنْطَوْهَا بِنِيِّتْهُمْ لِبَيْت اللّٰهْ.
7-8 وَ مُعِدَّاتْ بَيْت اللّٰهْ الْأَوَّلْ شَالَاهُمْ الْمَلِكْ نَبُوخَدْنَصَرْ مِنْ مَدِينَةْ الْقُدُسْ وَ جَابَاهُمْ، دَوْل قَاعِدِينْ فِي بَيْت إِلٰـهَاتَهْ. وَ الْمُعِدَّاتْ دَوْل كُورَشْ مَلِكْ بَلَدْ فَارِسْ أَنْطَى إِذِنْ لِمِتْرَدَاتْ مَسْؤُولْ الْمَخَازِنْ أَشَانْ يَمْرُقْهُمْ وَ يَحْسِبْهُمْ وَ يَنْطِيهُمْ لِشِشْبَصَرْ حَاكِمْ بَلَدْ يَهُوذَا. 9 وَ دَاهُو عَدَدْ الْمُعِدَّاتْ دَوْل، هُمَّنْ 30 طَاسَةْ هَنَا دَهَبْ وَ 1 000 طَاسَةْ هَنَا فُضَّةْ وَ 29 سَكِّينْ 10 وَ 30 كَاسْ هَنَا دَهَبْ وَ 410 كِيسَانْ آخَرِينْ هَنَا فُضَّةْ وَ 1 000 مُعِدَّاتْ آخَرِينْ. 11 وَ مُعِدَّاتْ الدَّهَبْ وَ الْفُضَّةْ دَوْل كُلُّهُمْ كَيْ عَدَدْهُمْ 5 400. شِشْبَصَرْ شَالَاهُمْ وَ وَدَّاهُمْ مَعَايَهْ وَكِتْ هُمَّنْ قَبَّلَوْا مِنْ بَابِلْ بَلَدْ الْغُرْبَةْ وَ مَشَوْا لِمَدِينَةْ الْقُدُسْ.
© La Bible en arabe tchadien © Alliance biblique du Tchad, 2019
