يَعْقُوب خاف من أخوه عِيسُو
1 وَ يَعْقُوبْ تَابَعْ سَفَرَهْ وَ مَلَائِكَةْ اللّٰهْ بَانَوْا لَيَّهْ. 2 وَ وَكِتْ يَعْقُوبْ شَافَاهُمْ قَالْ: «دَا بَكَانْ الْقَاعِدِينْ فَوْقَهْ عَسْكَرْ الرَّبّ.» وَ سَمَّى الْبَكَانْ دَا مَحَنَايِمْ (مَعَنَاتَهْ مُعَسْكَرَاتْ إِتْنَيْن).
3 وَ يَعْقُوبْ رَسَّلْ نَاسْ قِدَّامَهْ أَشَانْ يَمْشُوا لِأَخُوهْ عِيسُو فِي تُرَابْ سَعِيرْ فِي بَلَدْ أَدَوْم. 4 وَ وَصَّاهُمْ وَ قَالْ لَيْهُمْ: «قُولُوا لِسِيدِي عِيسُو: ‹دَاهُو كَلَامْ عَبْدَكْ يَعْقُوبْ: ”أَنَا سَكَنْت فِي بَكَانْ لَابَانْ وَ قَعَدْت مَعَايَهْ لَحَدِّي الْيَوْم. 5 وَ هَسَّعْ عِنْدِي بَقَرْ وَ حَمِيرْ وَ غَنَمْ وَ عَبِيدْ وَ خَدَّامَاتْ. وَ أَنَا رَسَّلْت نَاسْ لَيْك لِيِخَبُّرُوكْ إِنْتَ سِيدِي عِيسُو لِتَرْضَى لَيِّ.“›»
6 وَ بَعَدْ دَا، وَكِتْ النَّاسْ الْيَعْقُوبْ رَسَّلَاهُمْ قَبَّلَوْا، هُمَّنْ قَالَوْا لَيَّهْ: «أَنِحْنَ لَمَّيْنَا مَعَ أَخُوكْ عِيسُو وَ هُو ذَاتَهْ جَايِ لِيِقَابِلَكْ. وَ لَاكِنْ عِنْدَهْ مَعَايَهْ 400 رَاجِلْ!» 7 وَ يَعْقُوبْ خَافْ خَوْف شَدِيدْ وَ قَمَّ قَسَّمْ النَّاسْ الْقَاعِدِينْ مَعَايَهْ وَ الْغَنَمْ وَ الْبَقَرْ وَ الْجُمَالْ عَلَيْ مَجْمُوعْتَيْن. 8 وَ قَالْ فِي قَلْبَهْ: «كَنْ عِيسُو لَمَّ مَعَ الْمَجْمُوعَةْ الْوَاحِدَةْ وَ ضَرَبَاهَا كُلَ، الْمَجْمُوعَةْ الْآخَرَةْ تَنْجَى.» 9 وَ قَالْ: «يَا اللّٰهْ رَبّ جِدِّي إِبْرَاهِيمْ وَ أَبُويِ إِسْحَاقْ! يَا اللّٰهْ! إِنْتَ الْقُلْت لَيِّ: ‹قَبِّلْ بَلَدَكْ فِي بَكَانْ أَهَلَكْ وَ نِسَوِّي لَيْك الْخَيْر.› 10 وَ أَنَا صَغَيَّرْ قِدَّامْ الرَّحْمَةْ وَ الْأَمَانْ الْإِنْتَ أَنْطَيْتَهْ لَيِّ أَنَا عَبْدَكْ. أَشَانْ وَكِتْ أَنَا شَقَّيْت بَحَرْ الْأُرْدُنْ مَا عِنْدِي شَيّءْ إِلَّا عَصَاتِي. وَ هَسَّعْ دَاهُو عِنْدِي فُرْقَانْ إِتْنَيْن. 11 نَشْحَدَكْ تِنَجِّينِي مِنْ أَخُويِ عِيسُو أَشَانْ أَنَا خَايِفْ هُو يَجِي يَكْتُلْنَا أَنَا وَ الْعَوِينْ وَ الْعِيَالْ. 12 وَ أَوَّلْ إِنْتَ قُلْت لَيِّ: ‹نِسَوِّي لَيْك الْخَيْر وَ نِسَوِّي ذُرِّيّتَكْ كَتِيرَةْ مِثِلْ رَمْلَةْ هَنَا خَشُمْ الْبَحَرْ النَّادُمْ مَا يَقْدَرْ يَحْسِبْهَا مِنْ الْكَتَرَةْ.›»
13 وَ فِي اللَّيْلَةْ دِي، يَعْقُوبْ قَعَدْ فِي الْبَكَانْ دَا. وَ شَالْ مِنْ الْمَالْ الْجَاءْ بَيَّهْ لِيِقَدِّمَهْ هَدِيَّةْ لِأَخُوهْ عِيسُو. 14 وَ الْمَالْ دَا 200 عَنْزَايْ وَ 20 تَيْس وَ 200 نَعَجَةْ وَ 20 كَبِشْ 15 وَ 30 نَاقَةْ بِعِيَالْهُمْ وَ 40 بَقَرَةْ وَ 10 تَوْر وَ 20 حُمَارَةْ وَ 10 حُمَارْ. 16 وَ أَمَّنْ الْبَهَايِمْ دَوْل لِخَدَّامِينَهْ وَ قَسَّمَاهُمْ أَمْبَيْنَاتْهُمْ. وَ أَيِّ وَاحِدْ كَلَّفَهْ بِدَوْر هَنَا بَهَايِمْ وَ قَالْ لَيْهُمْ: «قَدُّمُوا قِدَّامِي وَ خَلُّوا فَرَقَةْ أَمْبَيْنَاتْكُو.»
17 وَ أَنْطَى أَمُرْ لِخَدَّامَهْ الْمَاشِي أَوَّلْ وَ قَالْ لَيَّهْ: «كَنْ أَخُويِ عِيسُو لَاقَاكْ وَ سَأَلَكْ قَالْ لَيْك: ‹إِنْتَ يَاتُو وَ مَاشِي وَيْن وَ الْبَهَايِمْ الْمَاشِي بَيْهُمْ دَوْل هَنَا يَاتُو؟› 18 قُولْ لَيَّهْ: ‹الْبَهَايِمْ دَوْل هَنَا عَبْدَكْ يَعْقُوبْ وَ هُو رَسَّلَاهُمْ هَدِيَّةْ لِسِيدَهْ عِيسُو. وَ هُو ذَاتَهْ جَايِ وَرَانَا.›»
19 وَ أَنْطَى نَفْس الْأَمُرْ لِخَدَّامَهْ التَّانِي وَ التَّالِتْ وَ لِكُلَّ النَّاسْ الْمَاشِينْ مَعَ الْبَهَايِمْ وَ قَالْ لَيْهُمْ: «كَنْ لَمَّيْتُوا مَعَ عِيسُو، قُولُوا لَيَّهْ الْكَلَامْ دَا. 20 وَ بَتَّانْ قُولُوا لَيَّهْ: ‹دَاهُو عَبْدَكْ يَعْقُوبْ ذَاتَهْ جَايِ وَرَانَا.›»
أَشَانْ هُو فَكَّرْ وَ قَالْ: «خَلِّي نِدَلِّي قَلْبَهْ بِالْهَدِيَّةْ الْمَشَتْ قِدَّامِي دِي. وَ بَعَدْ دَا، كَنْ قَابَلْنَا مَعَايَهْ وِجِهْ بِوِجِهْ كُلَ، أَكُونْ يِقَابِلْنِي بِفَرَحْ.» 21 وَ الْهَدِيَّةْ مَشَتْ قِدَّامَهْ. وَ يَعْقُوبْ كَمَانْ، قَعَدْ فِي فَرِيقَهْ.
اللّه غيّر أُسُم يَعْقُوب
22 وَ بِاللَّيْل، يَعْقُوبْ قَمَّ شَالْ عَوِينَهْ الْإِتْنَيْن وَ خَدَّامَاتَهْ الْإِتْنَيْن وَ أَوْلَادَهْ الْإِحْدَى عَشَرْ وَ قَطَّعَاهُمْ وَادِي يَبُّوقْ. 23 وَ بَعَدْ شَالَاهُمْ وَ قَطَّعَاهُمْ الْبَحَرْ وَ قَطَّعْ كُلَّ شَيّءْ الْعِنْدَهْ، 24 هُو فَضَّلْ هِنَاكْ وِحَيْدَهْ.
وَ رَاجِلْ وَاحِدْ جَاءْ صَارَعَهْ لَحَدِّي قَرِيبْ صَبَاحْ. 25 وَ وَكِتْ الرَّاجِلْ عِرِفْ كَدَرْ هُو مَا يَقْدَرْ يَغَلْبَهْ فِي الصِّرَاعْ دَا، قَمَّ ضَرَبْ يَعْقُوبْ فِي وِرْكَهْ وَ وِرْكَهْ مَرَقْ. 26 وَ الرَّاجِلْ قَالْ لِيَعْقُوبْ: «خَلِّينِي نَمْشِي أَشَانْ الْوَطَاةْ قَرِيبْ تَصْبِحْ.» وَ يَعْقُوبْ قَالْ لَيَّهْ: «أَنَا مَا نِخَلِّيكْ تَمْشِي كَنْ مَا بَارَكْتِنِي!»
27 وَ الرَّاجِلْ سَأَلْ يَعْقُوبْ وَ قَالْ لَيَّهْ: «أُسْمَكْ يَاتُو؟» وَ هُو قَالْ: «أُسْمِي يَعْقُوبْ.» 28 وَ الرَّاجِلْ قَالْ: «بَعَدْ الْيَوْم، مَا يِنَادُوكْ يَعْقُوبْ، خَلِّي يِنَادُوكْ إِسْرَائِيلْ (مَعَنَاتَهْ صَارَعْ مَعَ الرَّبّ). أَشَانْ إِنْتَ صَارَعْت مَعَ الرَّبّ وَ مَعَ النَّاسْ وَ إِنْتَ أَنَّصَرْت.» 29 وَ يَعْقُوبْ سَأَلْ الرَّاجِلْ وَ قَالْ لَيَّهْ: «مِنْ فَضْلَكْ، أَوْرِينِي أُسْمَكْ.» وَ الرَّاجِلْ قَالْ: «مَالَا تَسْأَلْنِي مِنْ أُسْمِي؟» وَ فِي الْبَكَانْ دَا، هُو بَارَكْ يَعْقُوبْ.
30 وَ يَعْقُوبْ سَمَّى الْبَكَانْ دَا فَنِيِيلْ (مَعَنَاتَهْ وِجِهْ الرَّبّ) أَشَانْ هُو قَالْ: «أَنَا شِفْت الرَّبّ وِجِهْ بِوِجِهْ وَ لَاكِنْ أَنَا نِجِيتْ مِنْ الْمَوْت!»
31 وَ الْحَرَّايْ طَلَعَتْ لَيَّهْ وَكِتْ هُو فَاتْ مِنْ فَنُوِيلْ. وَ قَاعِدْ يَضْلَعْ أَشَانْ وِرْكَهْ مَرَقْ. 32 وَ فِي شَانْ دَا لَحَدِّي الْيَوْم، بَنِي إِسْرَائِيلْ مَا يَاكُلُوا لَحَمْ الْوِرْك أَشَانْ يَعْقُوبْ وِرْكَهْ مَرَقْ.
© La Bible en arabe tchadien © Alliance biblique du Tchad, 2019
