1 دَاهُو كَلَامْ اللّٰهْ الْقَالَهْ لِهُوشَعْ وِلَيْد بِيرِي. وَ دَا فِي أَيَّامْ حُكُمْ عُزِّيَّا وَ يُوتَامْ وَ أَحَازْ وَ حِزْقِيَّا مُلُوكْ مَمْلَكَةْ يَهُوذَا وَ فِي أَيَّامْ حُكُمْ يَرُبَعَامْ وِلَيْد يَهُآشْ مَلِكْ مَمْلَكَةْ إِسْرَائِيلْ.
هُوشَع ياخُد مرة شرْموطة
2 دَاهُو بِدَايَةْ كَلَامْ اللّٰهْ الْقَالَهْ بِوَاسِطَةْ النَّبِي هُوشَعْ. اللّٰهْ قَالْ لِهُوشَعْ:
«أَمْشِي آخُدْ لَيْك مَرَةْ شَرْمُوطَةْ
وَ أَلْدَ مِنْهَا عِيَالْ زِنَى.
أَشَانْ نَاسْ الْبَلَدْ أَشَّرْمَطَوْا مَعَ الْأَصْنَامْ
وَ أَبَوْنِي أَنَا اللّٰهْ.»
3 وَ خَلَاصْ، هُوشَعْ مَشَى أَخَدْ قُومَرْ بِنَيَّةْ دِبْلَايِمْ وَ هِي بِقَتْ غَلْبَانَةْ وَ وِلْدَتْ لَيَّهْ وِلَيْد. 4 وَ اللّٰهْ قَالْ لِهُوشَعْ:
«سَمِّي وِلَيْدَكْ يَزْرَعِيلْ
أَشَانْ بَعَدْ وَكِتْ شِيَّةْ،
أَنَا نَطْلُبْ مِنْ ذُرِّيَّةْ يَاهُو
الدَّمّ الْجِدُّهُمْ يَاهُو
دَفَّقَهْ فِي وَادِي يَزْرَعِيلْ.
وَ نُقُشّ مَمْلَكَةْ إِسْرَائِيلْ.
5 وَ فِي الْيَوْم دَا،
نَكْسِرْ نُبَّالْ دَيْش إِسْرَائِيلْ
فِي وَادِي يَزْرَعِيلْ.»
6 وَ مَرِةْ هُوشَعْ بَتَّانْ بِقَتْ غَلْبَانَةْ وَ وِلْدَتْ بِنَيَّةْ. وَ اللّٰهْ قَالْ لِهُوشَعْ:
«سَمِّي بِنَيِّتَكْ مَا نَرْحَمْهَا
أَشَانْ بَتَّانْ أَنَا مَا نَرْحَمْ بَنِي إِسْرَائِيلْ
وَ مَا نَغْفِرْ لَيْهُمْ أَبَداً.
7 لَاكِنْ نَرْحَمْ بَنِي يَهُوذَا
وَ أَنَا اللّٰهْ إِلٰـهُّمْ، نِنَجِّيهُمْ.
أَيْوَى، نِنَجِّيهُمْ بَلَا نُبَّالْ وَ لَا سَيْف وَ لَا حَرِبْ
وَ بَلَا خَيْل وَ لَا سِيَادْ خَيْل.»
8 وَ مَرِةْ هُوشَعْ فَرَدَتْ مَا نَرْحَمْهَا. وَ بَعَدْ دَا، بَتَّانْ بِقَتْ غَلْبَانَةْ وَ وِلْدَتْ وِلَيْد. 9 وَ اللّٰهْ قَالْ:
«سَمِّي وِلَيْدَكْ مَا شَعَبِي
أَشَانْ إِنْتُو مَا شَعَبِي
وَ أَنَا كُلَ مَا إِلٰـهْكُو.»
اللّه أنْطى عشم لشعبه
10 عَدَدْ بَنِي إِسْرَائِيلْ يَبْقَى مِثِلْ رَمْلَةْ هَنَا خَشُمْ الْبَحَرْ
الْمَا تِنْوَزِنْ وَ لَا تِنْحَسِبْ.
وَ فِي الْبَكَانْ الْأَوَّلْ اللّٰهْ قَالْ فَوْقَهْ:
«إِنْتُو مَا شَعَبِي»،
فِي نَفْس الْبَكَانْ، هُو يُقُولْ لَيْهُمْ:
«إِنْتُو عِيَالِي أَنَا اللّٰهْ الْحَيّ.»
11 بَنِي يَهُوذَا وَ بَنِي إِسْرَائِيلْ يِلِمُّوا سَوَا
وَ يِدَرُّجُوا نَادُمْ وَاحِدْ كَبِيرْ فَوْقهُمْ.
وَ يَكْتَرَوْا فِي أَرْضُهُمْ
فِي يَوْم كَبِيرْ الْبِنَادُوهْ يَزْرَعِيلْ
(مَعَنَاتَهْ اللّٰهْ يَزْرَعْ).
© La Bible en arabe tchadien © Alliance biblique du Tchad, 2019
