بني إسرائيل كتّروا مدابِحهم
1 بَنِي إِسْرَائِيلْ وِلْدَوْا زِيَادَةْ
مِثِلْ شَدَرَةْ عِنَبْ التَّلْدَ كَتِيرْ.
وَ لَاكِنْ وَكِتْ عِيَالْهُمْ كِتْرَوْا،
هُمَّنْ كَتَّرَوْا مَدَابِحْ لِإِلٰـهَاتْهُمْ.
وَ وَكِتْ أَرْضُهُمْ بِقَتْ جَمِيلَةْ،
جَمَّلَوْا الْحُجَارْ الْغَزَّوْهُمْ لِلْعِبَادَةْ.
2 قُلُوبْهُمْ بِقَوْا إِتْنَيْن إِتْنَيْن
وَ هَسَّعْ يِكَفُّوا تَمَنْ خَطَاهُمْ.
اللّٰهْ ذَاتَهْ يِهَدِّمْ مَدَابِحْهُمْ
وَ يَرْمِي حُجَارْهُمْ الْغَزَّوْهُمْ لِلْعِبَادَةْ.
3 وَ هَسَّعْ هُمَّنْ يُقُولُوا:
«أَنِحْنَ مَا عِنْدِنَا مَلِكْ
أَشَانْ مَا خُفْنَا مِنْ اللّٰهْ.
وَ كَنْ عِنْدِنَا مَلِكْ كُلَ،
يِسَوِّي لَيْنَا شُنُو؟»
4 هُمَّنْ يُقُولُوا كَلَامْ سَاكِتْ
وَ يَحَلْفُوا بِكِدِبْ
وَ يِسَوُّوا عَلَاقَاتْ مَا عِنْدُهُمْ فَايْدَةْ.
وَ يَجْعَلَوْا الْعَدَالَةْ
مِثِلْ بِذْرَةْ الْمُسَمَّمَةْ
فِي الزَّرَعْ الْمَحْرُوتْ.
5 وَ سُكَّانْ السَّامِرَةْ يَرْجُفُوا
فِي شَانْ صَنَمْهُمْ هَنَا الْعِجِلْ
فِي حِلَّةْ بَيْت إِيلْ الْفَسْلَةْ.
شَعَبْهَا يَحْزَنَوْا بِسَبَبْ عِجِلْهُمْ
وَ رُجَالْ دِينْهُمْ كُلَ يَرْجُفُوا
أَشَانْ يِوَدُّوا مَجْد صَنَمْهُمْ فِي الْغُرْبَةْ.
6 وَ صَنَمْهُمْ هَنَا الْعِجِلْ دَا،
يِوَدُّوهْ بَلَدْ أَشُورْ
هَدِيَّةْ لِلْمَلِكْ الْكَبِيرْ.
وَ قَبِيلَةْ أَفْرَايِمْ تَلْقَى الْإِهَانَةْ،
أَيْوَى، بَنِي إِسْرَائِيلْ يَلْقَوْا الْعَيْب
فِي شَانْ عَشَمْهُمْ فِي الصَّنَمْ دَا.
7 مَدِينَةْ السَّامِرَةْ تِدَّمَّرْ
وَ مَلِكْهَا يَبْقَى مِثِلْ قَشَّايْ عَايْمَةْ فِي الْبَحَرْ.
8 وَ الْبَكَانَاتْ الْعَالِيِينْ هَنَا الْفَسَالَةْ
الْيَذْنُبُوا فَوْقهُمْ بَنِي إِسْرَائِيلْ يِدَّمَّرَوْا.
الْحَسْكَنِيتْ وَ الشَّوْك
يُقُمُّوا فِي مَدَابِحْهُمْ.
وَ النَّاسْ يُقُولُوا: «خَلِّي الْجِبَالْ يَقَعَوْا فَوْقنَا
وَ خَلِّي الْحُجَارْ يَدْفُنُونَا.»
9 «وَ مِنْ أَيَّامْ قِبَيْعَةْ،
بَنِي إِسْرَائِيلْ أَذْنَبَوْا
وَ هُمَّنْ مَا غَيَّرَوْا حَالْهُمْ.
فِي قِبَيْعَةْ، وَاجِبْ الْحَرِبْ يَلْحَقْ الْمُجْرِمِينْ
10 وَ أَنَا نِعَاقِبْهُمْ مِثِلْ نِدَوْرَهْ.
وَ شُعُوبْ كَتِيرِينْ يُقُمُّوا ضِدُّهُمْ
وَ يِجَنْزُرُوهُمْ فِي شَانْ خَطَاهُمْ الْإِتْنَيْن.
11 قَبِيلَةْ أَفْرَايِمْ مِثِلْ بَقَرَةْ مُؤَدَّبَةْ
التِّحِبّ تِفَجِّقْ الْمَعَاشْ
فِي الْمَدَقّ لِتُدُقَّهْ.
وَ وَكِتْ نَجِي،
نُخُطّ عُودْ الْحَرَّاتَةْ
فِي رَقَبَتْهَا الْجَمِيلَةْ.
وَ قَبِيلَةْ أَفْرَايِمْ تُكُرّ الْحَرَّاتَةْ
وَ بَنِي يَهُوذَا يَحَرْتُوا
وَ ذُرِّيَّةْ يَعْقُوبْ يِشَقْلُبُوا الْأَرْض.
12 أَزْرَعَوْا الْعَدَالَةْ وَ أَقْطَعَوْا الْمَحَبَّةْ
وَ عَدُّلُوا لَيْكُو زَرَعْ جَدِيدْ.
هَسَّعْ وَاجِبْ تِتَابُعُوا اللّٰهْ
لَحَدِّي هُو يِجِيبْ فَوْقكُو الْعَدَالَةْ
مِثِلْ الْمَطَرَةْ.
13 لَاكِنْ إِنْتُو زَرَعْتُوا الشَّرّ
وَ قَطَعْتُوا الْفَسَالَةْ
وَ أَكَلْتُوا مِنْ نَتِيجَةْ الْكِدِبْ.
إِنْتُو أَتْوَكَّلْتُوا عَلَيْ قُدْرِتْكُو
وَ عَلَيْ كَتَرَةْ عَسْكَرْكُو.
14 وَ خَلَاصْ، يِنْسَمِعْ كُرَوْرَاكْ حَرِبْ فِي لُبّ شَعَبْكُو
وَ كُلَّ مُدُنْكُو الْقَوِيِّينْ يَخْرَبَوْا
مِثِلْ يَوْم الْقَايِدْ شَلْمَانْ
خَرَبْ حِلَّةْ بَيْت أَرْبِيلْ
وَ رِحِكْ الْأَمَّهَاتْ وَ عِيَالْهِنْ.
15 وَ دَا بَسْ الْيِسَوُّوهْ لَيْكُو إِنْتُو نَاسْ بَيْت إِيلْ
أَشَانْ إِنْتُو سَوَّيْتُوا الْفَسَالَةْ الْمَا عِنْدَهَا حَدّ.
وَ يَوْم وَاحِدْ فِي وَكْت الشَّقَاقْ،
مَلِكْ إِسْرَائِيلْ يِدَّمَّرْ مَرَّةْ وَاحِدْ.»
© La Bible en arabe tchadien © Alliance biblique du Tchad, 2019
