اللّه حبّ بني إسرائيل
1 «وَكِتْ بَنِي إِسْرَائِيلْ مِثِلْ صَبِي، أَنَا حَبَّيْتَهْ
وَ مِنْ مَصِرْ، أَنَا نَادَيْت إِبْنِي.
2 لَاكِنْ فِي كُلِّ وَكِتْ كَنْ أَنَا نَادَيْت شَعَبِي،
هُمَّنْ يِبَعُّدُوا مِنِّي.
يِقَدُّمُوا ضَحَايَا لِإِلٰـهْ بَعَلْ
وَ يِحَرُّقُوا بَخُورْ لِلْأَصْنَامْ.
3 وَ أَنَا كَمَانْ كَرَبْت نَاسْ أَفْرَايِمْ
مِنْ إِيدَيْهُمْ وَ دَادَيْتهُمْ.
لَاكِنْ هُمَّنْ مَا عِرْفَوْا
كَدَرْ أَنَا بَسْ رَيَّسْتُهُمْ.
4 أَنَا وَدَّيْتهُمْ بِطَرِيقَةْ إِنْسَانِيَّةْ
وَ بِعَلَاقَةْ هِنْت مَحَبَّةْ.
أَنَا بِقِيتْ لَيْهُمْ مِثِلْ الْيَحْضِنْ الصَّغِيرْ
وَ يِلِمَّهْ فِي صَدْرَهْ.
أَنَا مَدَّيْت إِيدِي
وَ أَكَّلْتُهُمْ.
5 «هُمَّنْ بَتَّانْ مَا يِقَبُّلُوا مَصِرْ
وَ لَاكِنْ مَلِكْ أَشُورْ بَسْ يِحَاكِمْهُمْ
أَشَانْ هُمَّنْ أَبَوْا
مَا يِقَبُّلُوا لَيِّ أَنَا.
6 الْحَرِبْ يَدْخُلْ فِي مُدُنْهُمْ
وَ يِدَمِّرْ بِيبَانْهُمْ الْقَوِيِّينْ
وَ يَكْتُلْهُمْ بِسَبَبْ مُؤآمَرَتْهُمْ.
7 شَعَبِي أَنْرَبَطَوْا فِي كُفُرْهُمْ.
نَادَوْهُمْ لِيِشِيفُوا عَلَيِّ فَوْق
وَ لَاكِنْ وَاحِدْ مِنْهُمْ كُلَ مَا رَفَعْ رَاسَهْ.»
اللّه يحِنّ في شعبه
8 «يَا أَفْرَايِمْ، كِكَّيْف نِخَلِّيكْ؟
يَا إِسْرَائِيلْ، كِكَّيْف نِسَلِّمَكْ لِلْعَدُو؟
هَلْ نِدَمِّرَكْ
مِثِلْ دَمَّرْت حِلَّالْ أَدْمَةْ وَ صَبُويِيمْ وَلَّا؟
أَنَا أَلْحَيَّرْت
وَ قَلْبِي حَنَّ فَوْقكُو مَرَّةْ وَاحِدْ.
9 أَنَا مَا نِنَزِّلْ فَوْقكُو غَضَبِي الْمُحْرِقْ
وَ مَا نِقَبِّلْ لِنِدَمِّرْ أَفْرَايِمْ
أَشَانْ أَنَا الرَّبّ، مَا إِنْسَانِي.
أَنَا الْقُدُّوسْ وَ قَاعِدْ فِي أُسُطْكُو
وَ مَا نَجِي لَيْكُو بِغَضَبْ.
10 «نَاسْ الْفِي الْغُرْبَةْ يُقُمُّوا يِتَابُعُونِي
وَكِتْ أَنَا اللّٰهْ نِكِرّ مِثِلْ الدُّودْ.
أَيْوَى، أَنَا نَهْرِجْ وَ عِيَالِي يَرْجُفُوا
وَ يَجُوا مِنْ غَادِي لِلْبَحَرْ.
11 يَرْجُفُوا وَ يَجُوا مِنْ مَصِرْ مِثِلْ الطُّيُورْ
وَ يِقَبُّلُوا مِنْ بَلَدْ أَشُورْ مِثِلْ الْحَمَامْ
وَ أَنَا نِسَكِّنْهُمْ فِي بُيُوتْهُمْ.»
وَ دَا كَلَامْ اللّٰهْ.
شعب اللّه كدبوا و غشّوا
12 «قَبِيلَةْ أَفْرَايِمْ حَوَّقَتْنِي بِكِدِبْ،
أَيْوَى، بَنِي إِسْرَائِيلْ حَوَّقَتْنِي بِغَشّ.
وَ لَاكِنْ بَنِي يَهُوذَا يَمْشُوا وَرَايِ
وَ عِنْدُهُمْ أَمَانْ لَيِّ أَنَا الْقُدُّوسْ.»
© La Bible en arabe tchadien © Alliance biblique du Tchad, 2019
