الشعب قالوا يقبُّلوا للّه
1 «تَعَالُوا نِقَبُّلُوا لِلّٰهْ
أَشَانْ هُو بَسْ الْجَرَحْنَا
وَ هُو بَسْ الْيَشْفِينَا.
هُو بَسْ الضَّرَبَانَا
وَ هُو بَسْ الْيِدَاوِي عُوَارْنَا.
2 بَعَدْ يَوْمَيْن،
هُو يَنْطِينَا الْحَيَاةْ.
أَيْوَى، فِي الْيَوْم التَّالِتْ،
يِقَوِّمْنَا وَ نِعِيشُوا قِدَّامَهْ.
3 خَلِّي نِتَابُعُوا اللّٰهْ لِنَعَرْفُوهْ.
جَيْتَهْ مُؤَكَّدَةْ مِثِلْ نُورْ الصَّبَاحْ
وَ هُو يَجِينَا مِثِلْ مَطَرْ،
مِثِلْ مَطَرْ الرِّشَاشْ الْيَزْقِي الْأَرْض.»
اللّه يريد المحبّة من الضحايا
4 «يَا نَاسْ قَبِيلَةْ أَفْرَايِمْ،
نِسَوِّي لَيْكُو شُنُو؟
يَا بَنِي يَهُوذَا،
نِسَوِّي لَيْكُو شُنُو؟
مَحَبِّتْكُو مِثِلْ سَحَابْ الْفَجُرْ الْيُفُوتْ
وَ مِثِلْ كَرَنْج الصَّبَاحْ الْمَا يِطَوِّلْ.
5 أَشَانْ دَا، أَنَا ضَرَبْتُكُو بِالْأَنْبِيَاء
وَ كَتَلْتُكُو بِكَلَامِي
وَ نُورْ شَرِيعْتِي نَوَّرْكُو
مِثِلْ نُورْ الصَّبَاحْ.
6 وَ مَحَبِّتْكُو نِدَوْرهَا
زِيَادَةْ مِنْ الضَّحَايَا.
وَ كَنْ تَعَرْفُونِي، دَا أَخَيْر لَيِّ
مِنْ الضَّحَايَا الْمُحَرَّقِينْ.
7 «نَقَضَوْا الْمُعَاهَدَةْ فِي حِلَّةْ آدَمْ
أَشَانْ فِي الْبَكَانْ دَا، خَانَوْنِي.
8 وَ قِلْعَادْ حِلَّةْ الْفَسْلِينْ
مُلَطَّخَةْ بِالدَّمّ.
9 وَ مَجْمُوعَةْ رُجَالْ الدِّينْ
بِقَوْا مِثِلْ رَبَّاطِينْ الدُّرُوبْ.
يَكْتُلُوا نَاسْ فِي دَرِبْ حِلَّةْ شَكِيمْ.
أَيْوَى، قَاعِدِينْ يِسَوُّوا فِعِلْ شَيْن.
10 «فِي أُسُطْ بَنِي إِسْرَائِيلْ،
أَنَا شِفْت فَضِيحَةْ.
فِي لُبُّهُمْ، نَاسْ أَفْرَايِمْ أَشَّرْمَطَوْا
أَيْوَى، بَنِي إِسْرَائِيلْ أَنَّجَّسَوْا.
11 وَ إِنْتُو كُلَ، يَا بَنِي يَهُوذَا،
تَلْقَوْا عِقَابِي مِثِلْ إِنْتَاجْ زِرَاعِتْكُو!»
عِقاب الشعب
«وَكِتْ نِقَبِّلْ شَعَبِي مِنْ الْغُرْبَةْ
© La Bible en arabe tchadien © Alliance biblique du Tchad, 2019
