رُؤية النبي إشَعْيا
1 دَاهُو رُؤْيَةْ إِشَعْيَا وِلَيْد أَمُّوصْ التُّخُصّ بَلَدْ يَهُوذَا وَ مَدِينَةْ الْقُدُسْ. وَ الرُّؤْيَةْ دِي كَانَتْ فِي أَيَّامْ حُكُمْ عُزِّيَّا وَ يُوتَامْ وَ أَحَازْ وَ حِزْقِيَّا مُلُوكْ مَمْلَكَةْ يَهُوذَا.
الأُمّة المُذْنِبة
2 يَا السَّمَاءْ، أَسْمَعَيْ!
وَ يَا أَرْض، أَفْتَحَيْ أَدَانْكِ!
دَاهُو كَلَامْ اللّٰهْ الْهُو قَالَهْ:
«أَنَا أَدَّبْت وَ رَبَّيْت عِيَالْ
وَ لَاكِنْ هُمَّنْ أَتْمَرَّدَوْا ضِدِّي.
3 التَّوْر يَعَرِفْ سِيدَهْ
وَ الْحُمَارْ يَعَرِفْ النَّادُمْ الْيَنْطِيهْ أَكِلْ.
لَاكِنْ بَنِي إِسْرَائِيلْ مَا يَعَرْفُونِي
وَ شَعَبِي مَا يَفْهَمَوْا.»
ناس يَهُوذَا بِقوا مِثِل ناس سَدُوم
4 الْعَذَابْ لِلْأُمَّةْ الْمُذْنِبَةْ
أَيْوَى، لِلْأُمَّةْ الشَّايْلَةْ الْخَطَا!
إِنْتُو ذُرِّيَّةْ النَّاسْ الْفَسْلِينْ،
عِيَالْ الْمُدَمَّرِينْ!
إِنْتُو أَبَيْتُوا اللّٰهْ
أَيْوَى، أَبَيْتُوا قُدُّوسْ إِسْرَائِيلْ
وَ قَبَّلْتُوا وَرَاءْ.
5 اللّٰهْ يَضْرُبْكُو وَيْن بَتَّانْ؟
أَشَانْ إِنْتُو قَاعِدِينْ تِزِيدُوا فِي عِصْيَانْكُو.
رَاسْكُو كُلَّ مَلَانْ عَوَاوِيرْ
وَ قَلِبْكُو كُلَّ تَعْبَانْ.
6 مِنْ رَاسْكُو لِرِجْلَيْكُو
مَا فِي شَيّءْ عَدِيلْ.
كُلَّ كَيْ جُرُوحْ وَ حَلَابِيبْ
وَ عَوَاوِيرْ جَدِيدِينْ.
وَ لَا مُنَضَّفِينْ وَ لَا مَلْفُوفِينْ
وَ لَا مَسَحَوْهُمْ بِدِهِنْ.
7 بَلَدْكُو خِرْبَتْ
وَ مُدُنْكُو حِرْقَوْا.
الْأَجَانِبْ يَاكُلُوا إِنْتَاجْ أَرْضُكُو قِدَّامْكُو.
هِي خِرْبَتْ وَ الْأَجَانِبْ دَمَّرَوْهَا.
8 مَدِينَةْ صَهْيُون الْمِثِلْ بِنَيَّةْ، أَبَوْهَا
وَ بِقَتْ مِثِلْ لِقْدَابَةْ فِي جِنَيْنَةْ عِنَبْ بَعَدْ الْقَطِعْ.
أَبَوْهَا مِثِلْ عِلِّيَّةْ فِي أُسُطْ زَرَعْ الْفَقُّوسْ
وَ مِثِلْ حِلَّةْ مُحَاصَرَةْ.
9 وَ كَنْ اللّٰهْ الْقَادِرْ
مَا خَلَّى لَيْنَا نَاسْ شِيَّةْ النِّجَوْا،
أَنِحْنَ نِدَّمَّرَوْا مِثِلْ نَاسْ سَدُومْ
وَ نَهْلَكَوْا مِثِلْ نَاسْ عَمُورَةْ.
اللّه أبى ضحايا الكدّابين
10 يَا بَنِي يَهُوذَا، قُيَّادْكُو فَسْلِينْ
مِثِلْ قُيَّادْ سَدُومْ.
أَسْمَعَوْا كَلَامْ اللّٰهْ
الْيُقُولَهْ لَيْكُو!
يَا بَنِي يَهُوذَا، شَعَبْكُو فَسْلِينْ
مِثِلْ نَاسْ عَمُورَةْ.
خُطُّوا أَدَانْكُو لِوَصَايَا إِلٰـهْنَا!
11 اللّٰهْ قَالْ:
«ضَحَايَاكُو الْكَتِيرِينْ دَوْل،
نِسَوِّي بَيْهُمْ شُنُو؟
كَفَانِي مِنْ الضَّحَايَا الْمُحَرَّقِينْ
هَنَا كُبْشَانْكُو وَ شَحَمْ عَجَّالْكُو.
أَيْوَى، دَمّ تِيرَانْكُو وَ حُمْلَانْكُو
وَ تُيُوسْكُو كُلَ، مَا نَرْضَى بَيَّهْ.
12 وَكِتْ تَجُوا وَ تَقِيفُوا قِدَّامِي،
يَاتُو قَالْ لَيْكُو تِفَجُّقُوا فَضَايْتِي؟
13 وَقُّفُوا مَا تِجِيبُوا لَيِّ بَتَّانْ
ضَحَايَاكُو الْمَكْرُوهِينْ
وَ بَخُورْكُو دَا
مُحَرَّمْ لَيِّ!
وَقُّفُوا ضَحَايَاكُو
هَنَا أَوَّلْ يَوْم فِي كُلِّ شَهَرْ
وَ هَنَا كُلِّ يَوْم سَبْت
وَ مَلَمَّاتْكُو
أَشَانْ أَنَا مَا نَقْبَلْ
الْفَسَالَةْ فِي مَلَمَّاتْكُو الْخَاصِّينْ.
14 أَنَا نَكْرَهْ ضَحَايَاكُو
هَنَا أَوَّلْ يَوْم فِي كُلِّ شَهَرْ.
وَ أَعْيَادْكُو، مَا نَحْمَلْهُمْ!
بِقِي لَيِّ كَتِيرْ.
15 وَكِتْ تِمِدُّوا إِيدَيْكُو لَيِّ بِدُعَاكُو،
أَنَا مَا نِوَجِّهْ عَلَيْكُو.
وَ وَكِتْ تِكَتُّرُوا صَلَاوَاتْكُو كُلَ،
مَا نَسْمَعْكُو
أَشَانْ إِيدَيْكُو مَلَانِينْ بِدَمّ.
16 أَلْبَرَّدَوْا وَ طَهُّرُوا نُفُوسْكُو
وَ بَعُّدُوا مِنْ قِدَّامِي عَمَلْكُو الْفَسِلْ
وَ خَلُّوا مِنْكُو الْفَسَالَةْ.
17 أَلْعَلَّمَوْا الْعَدِيلْ وَ فَتُّشُوا الْعَدَالَةْ
قَبُّلُوا الظَّالِمْ مِنْ دَرْبَهْ هَنَا الظُّلُمْ.
سَوُّوا الْعَدِلْ لِلْأَتِيمْ
وَ دَافُعُوا لِلْأَرْمَلَةْ.»
18 اللّٰهْ قَالْ:
«تَعَالُوا نِنَاقُشُوا.
كَنْ ذُنُوبْكُو حُمُرْ كُلَ،
يَبْقَوْا بُيُضْ كَرّ مِثِلْ اللَّبَنْ.
وَ كَنْ حُمُرْ تُشْو مِثِلْ الدَّمّ كُلَ،
يَبْقَوْا بُيُضْ كَرّ مِثِلْ الْقُطُنْ.
19 وَ كَنْ قَصَّدْتُوا وَ سِمِعْتُوا كَلَامِي،
تَاكُلُوا مِنْ أَحْسَنْ إِنْتَاجْ الْأَرْض.
20 لَاكِنْ كَنْ أَبَيْتُوا وَ عِصِيتُونِي،
السَّيْف يَبْقَى مِثِلْ نَارْ يَاكُلْكُو!»
أَيْوَى، دَا كَلَامْ اللّٰهْ الْقَالَهْ.
اللّه يطهِّر مدينة القدس
21 كِكَّيْف الْمَدِينَةْ الْأَمِينَةْ بِقَتْ شَرْمُوطَةْ؟
أَوَّلْ هِي مَلَانَةْ بِالْعَدَالَةْ.
أَيْوَى، أَوَّلْ الْعَدَالَةْ سَاكْنَةْ فَوْقهَا
لَاكِنْ هَسَّعْ سَاكْنِينْ فَوْقهَا
كَتَّالِينْ دِمَمْ.
22 يَا مَدِينَةْ الْقُدُسْ!
فُضِّتْكِ مَلَانَةْ بِالْوَسَخْ
وَ خَمَرْكِ السَّمَحْ مُخَلْبَطْ بِأَلْمِي.
23 مَسَائِيلْكِ بِقَوْا حَرَامِيِّينْ
وَ مُنْرَبِطِينْ مَعَ السَّرَارِيقْ.
وَ يِحِبُّوا الرَّشْوَةْ
وَ يَجْرُوا وَرَاءْ الْفَايْدَةْ.
هُمَّنْ مَا يِدَافُعُوا لِحُقُوقْ الْأَتِيمْ
وَ مَا لَمَّاهُمْ بِشَكْوَةْ الْأَرْمَلَةْ.
24 فِي شَانْ كُلَّ الشَّيّءْ دَا، دَاهُو كَلَامْ اللّٰهْ الرَّبّ الْقَادِرْ، جَبَّارْ إِسْرَائِيلْ. هُو قَالْ:
«الْعَذَابْ لَيْكِ، يَا مَدِينَةْ الْقُدُسْ!
نِشِيلْ التَّارْ فَوْقكِ، إِنْتِ خَصِيمْتِي
أَيْوَى نِكَمِّلْكِ، إِنْتِ عَدُويِ.
25 بَتَّانْ نُقُمّ ضِدِّكِ
وَ نَقْطَعْكِ فِي النَّارْ.
وَ نِصَفِّيكِ وَ نَمْرُقْ وَسَخْكِ
مِثِلْ غَسَّلَوْكِ بِصَابُونْ.
26 نِجِيبْ لَيْكِ قُضْيَاءْ مِثِلْ أَوَّلْ
وَ مُسْتَشَارِينْ مِثِلْ فِي الْبِدَايَةْ.
وَ بَعَدْ دَا، يِنَادُوكِ
مَدِينَةْ الْعَدَالَةْ
وَ حِلَّةْ الْأَمَانْ.
27 صَهْيُون تَنْجَى بِالْعَدَالَةْ
وَ سُكَّانْهَا الْيِقَبُّلُوا يَنْجَوْا بِالْحَقّ.
28 الْعَاصِيِينْ وَ الْمُذْنِبِينْ
يِدَّمَّرَوْا سَوَا
وَ الْأَبَوْا اللّٰهْ،
يِكَمُّلُوا.
29 أَيْوَى، إِنْتُو تَلْقَوْا عَيْب
مِنْ شَدَرْكُو الْكُبَارْ
الْقَاعِدِينْ تِتْمَنَّوْه.
وَ تَبْقَوْا خَجْلَانِينْ فِي شَانْ الْجِنَيْنَاتْ
الْعَزَلْتُوهُمْ لِعِبَادَةْ أَصْنَامْكُو.
30 خَلَاصْ، إِنْتُو تَبْقَوْا
مِثِلْ شَدَرَةْ الْوَرَقْهَا يِبِسْ
وَ جِنَيْنَةْ الْأَلْمِيهَا كَمَّلْ.
31 الرَّاجِلْ الشَّدِيدْ يَبْقَى مِثِلْ قَشّ
وَ عَمَلَهْ يَبْقَى مِثِلْ شَرَارَةْ.
هُو وَ عَمَلَهْ يَحْرَقَوْا سَوَا
وَ مَا فِي نَادُمْ الْيَكْتُلْ النَّارْ مِنْهُمْ.»
© La Bible en arabe tchadien © Alliance biblique du Tchad, 2019
