يجي ملك عادِل من ذُرّية دَاوُد
1 وَ يَجِي وَاحِدْ مِنْ ذُرِّيَّةْ يَسَّى
مِثِلْ فِرِعْ الْيَبْذُرْ مِنْ دُنْبُرْ
وَ مِنْ قَعَرَهْ تُقُمّ
بِذْرَةْ التِّسَوِّي عِيَالْ.
2 وَ فِي النَّادُمْ دَا، يَنْزِلْ رُوحْ اللّٰهْ
وَ دَا رُوحْ الْحِكْمَةْ وَ الْمَعْرَفَةْ
وَ الشَّوْرَةْ وَ الْفَحَالِيَّةْ
وَ الْعِلِمْ وَ الْخَوْف مِنْ اللّٰهْ.
3 وَ هُو يَفْرَحْ بِالْخَوْف مِنْ اللّٰهْ
وَ مَا يَحْكِمْ بِالشَّافَتَهْ عَيْنَهْ
وَ مَا يِقَرِّرْ بِالسِّمْعَتَهْ أَدَانَهْ.
4 وَ يَحْكِمْ لِلْفَقْرَانِينْ بِالْعَدَالَةْ
وَ يِقَرِّرْ بِالْعَدِلْ لِمَسَاكِينْ الْبَلَدْ.
وَ كَلَامَهْ، مِثِلْ بِعَصَاةْ يَضْرُبْ الْبَلَدْ
وَ بِكِلْمَةْ وَاحِدَةْ، يَكْتُلْ الْعَاصِي.
5 وَ الْعَدَالَةْ مِثِلْ حِزَامْ صُلْبَهْ
وَ الصَّحِيحْ مِثِلْ حِزَامْ بَطْنَهْ.
ما في دمار في جبل اللّه
6 وَ الْبَعَشَوْم يَسْكُنْ مَعَ الْحَمَلْ
وَ النِّمِرْ يَرْقُدْ جَنْب السَّخَلْ.
وَ الْعِجِلْ وَ فَرْخ الدُّودْ يَاكُلُوا سَوَا
وَ وِلَيْد صَغَيَّرْ يُقُودْهُمْ.
7 وَ الْبَقَرَةْ وَ الدُّبّ يَسْرَحَوْا سَوَا
وَ عِيَالْهُمْ يَرُقْدُوا بَكَانْ وَاحِدْ.
وَ الدُّودْ يَبْقَى مِثِلْ التَّوْر،
يَاكُلْ الْقَشّ.
8 الطِّفِلْ يَلْعَبْ بِعُشّ أَبُنْ دَرَقْ
أَيْوَى، الصَّغِيرْ يِدِسّ إِيدَهْ فِي نُقْرَةْ الدَّابِي.
9 وَ مَا تُكُونْ فَسَالَةْ وَ لَا دَمَارْ
فِي كُلَّ جَبَلِي الْمُقَدَّسْ
أَشَانْ الْأَرْض تِنْمَلِي بِمَعْرَفَةْ اللّٰهْ
مِثِلْ الْبَحَرْ يِنْمَلِي بِأَلْمِي.
قبِّلين كل بني إسرائيل
10 وَ فِي الْيَوْم دَا،
عِرِقْ يَسَّى يَبْقَى مِثِلْ رَايَةْ لِلشُّعُوبْ.
وَ الْأُمَمْ يِفَتُّشُوهْ
وَ بَكَانَهْ الْيِنْجَمَّ فَوْقَهْ عَظِيمْ.
11 وَ فِي الْيَوْم دَا،
الرَّبّ يِمِدّ إِيدَهْ لِتَانِي مَرَّةْ
لِيَفْدَى الْفَضَّلَوْا مِنْ شَعَبَهْ
الْقَاعِدِينْ فِي بُلْدَانْ أَشُورْ وَ مَصِرْ
وَ فَتْرُوسْ وَ الْحَبَشَةْ وَ عِلَامْ
وَ شِنْعَارْ وَ حَمَاتْ
وَ فِي جَزَايِرْ الْبَحَرْ.
12 هُو يَرْفَعْ رَايَةْ لِلْأُمَمْ
وَ يِلِمّ بَنِي إِسْرَائِيلْ الْمَطْرُودِينْ
وَ يَجْمَعْ بَنِي يَهُوذَا الْمُشَتَّتِينْ
فِي الْأَرْبَعَةْ جِيهَاتْ هَنَا الْأَرْض.
13 وَ حُسُدْ أَفْرَايِمْ يَبْقَى مَا فِيهْ
وَ خُصْمَانْ يَهُوذَا يِكَمُّلُوا.
وَ أَفْرَايِمْ مَا يَحْسِدْ يَهُوذَا بَتَّانْ
وَ يَهُوذَا مَا يَبْقَى أَبَداً
خَصِيمْ أَفْرَايِمْ.
14 وَ هُمَّنْ يِنْصَبَّوْا
فِي الْفِلِسْطِيِّينْ فِي الْغَرِبْ
وَ سَوَا يَنْهَبَوْا
الْقَاعِدِينْ فِي الصَّبَاحْ.
وَ فِي بُلْدَانْ أَدَوْم وَ مُوَابْ،
يَحْكُمُوا
وَ لِبَنِي عَمُّونْ،
يَمُلْكُوهُمْ.
15 وَ اللّٰهْ يِيَبِّسْ رِجِلْ بَحَرْ مَصِرْ
وَ يَرْفَعْ إِيدَهْ لِيَضْرُبْ بَحَرْ الْفُرَاتْ
بِشِدَّةْ نَفْخَتَهْ.
وَ يِقَسِّمَهْ سَبْعَةْ وُدْيَانْ دُقَاقْ
الْيَقْدَرَوْا يَقْطَعَوْهُمْ بِرِجْلَيْهُمْ.
16 وَ هِنَاكْ، هُو يِسَوِّي دَرِبْ
لِلْفَضَّلَوْا مِنْ شَعَبَهْ فِي بَلَدْ أَشُورْ
مِثِلْ زَمَانْ سَوَّى دَرِبْ لِبَنِي إِسْرَائِيلْ
يَوْم مَرَقَوْا مِنْ بَلَدْ مَصِرْ.
© La Bible en arabe tchadien © Alliance biblique du Tchad, 2019
