نِهاية بَابِل قرّبت
1 مُحَاكَمَةْ بَابِلْ الشَّافْهَا إِشَعْيَا وِلَيْد أَمُّوصْ فِي رُؤْيَةْ. 2 الرَّبّ قَالْ:
«غُزُّوا رَايَةْ فِي الْجَبَلْ الْأَمْلَسْ
وَ نَادُوا لِلْعَسْكَرْ.
وَ وَصُّفُوهُمْ بِإِيدَيْكُو
لِيَدْخُلُوا الْمَدِينَةْ
بِبِيبَانْ الْحُكَّامْ.
3 أَنَا أَنْطَيْت أَمُرْ لِمُخَصَّصِينْ هِنَيّ
وَ بَتَّانْ نَادَيْت فُرَّاسِي الْيِنَفُّذُوا غَضَبِي،
الْيَفْرَحَوْا بِعَظَمَتِي.»
4 أَسْمَعَوْا الْحَرَكَةْ الْكَتِيرَةْ فِي الْجِبَالْ
مِثِلْ شَعَبْ كَتِيرِينْ!
وَ دَا حِسّ حَرَكَةْ الْمَمَالِكْ
أَيْوَى، حَرَكَةْ مَلَمَّةْ الْأُمَمْ!
اللّٰهْ الْقَادِرْ يِجَهِّزْ
دَيْشَهْ الْيِحَارِبْ.
5 هُمَّنْ يَجُوا مِنْ بَلَدْ بَعِيدَةْ
مِنْ آخِرْ الْأَرْض.
اللّٰهْ وَ سِلَاحْ غَضَبَهْ
يِسَبُّبُوا دَمَارْ هَنَا كُلَّ الْبَلَدْ.
6 أَبْكُوا بِحِزِنْ أَشَانْ يَوْم اللّٰهْ قَرَّبْ
وَ دَا يَوْم هَنَا دَمَارْ شَدِيدْ
الْجَايِ مِنْ الْقَادِرْ.
7 وَ بِسَبَبْ دَا، كُلَّ الْإِيدَيْن يِنْرَخُوا
وَ أَيِّ نَادُمْ قَلْبَهْ يِنْقَطِعْ.
8 هُمَّنْ يِنْبَهْتُوا
وَ يَكْرُبْهُمْ وَجَعْ وَ طَلَقَةْ
وَ يِتَّنَّوْا
مِثِلْ مَرَةْ الْقَاعِدَةْ تِطَالِقْ.
وَ الْوَاحِدْ يِشِيفْ الْآخَرْ
كُلُّهُمْ مُنْبَهِتِينْ
وَ يِسَلُّلُوا عُيُونْهُمْ مِنْ الْخَوْف.
9 دَاهُو يَوْم اللّٰهْ جَايِ،
يَوْم هَنَا غَضَبْ مُخِيفْ وَ زَعَلْ شَدِيدْ
الْفَوْقَهْ اللّٰهْ يَخْرِبْ الْأَرْض
وَ يُقُشّ مِنْهَا الْمُذْنِبِينْ.
10 وَ بَيْدَا، نُجُومْ السَّمَاءْ وَ الصَّبِي الْمَغْمِي
نُورْهُمْ مَا يِبِينْ.
وَ مِنْ طَلُوعْهَا،
الْحَرَّايْ تَبْقَى ضَلْمَةْ
وَ الْقَمَرْ كُلَ،
نُورَهْ مَا يِضَوِّي.
11 وَ الرَّبّ قَالْ:
«أَنَا نِعَاقِبْ الدُّنْيَا فِي شَانْ فَسَالِتْهَا
وَ الْعَاصِيِينْ فِي شَانْ خَطَاهُمْ.
وَ نِوَقِّفْ إِسْتِكْبَارْ الْمُسْتَكْبِرِينْ
وَ نِنَزِّلْ فَشَارْ سِيَادْ الْعُنُفْ.
12 وَ نِسَوِّي الْإِنْسَانْ غَالِي مَا يِنْلَقِي
مِثِلْ الدَّهَبْ الصَّافِي.
أَيْوَى، بَنِي آدَم يَبْقَى غَالِي مَا يِنْلَقِي
مِثِلْ دَهَبْ بَلَدْ أُفِيرْ.
13 «وَ بِسَبَبْ دَا، نِهِزّ السَّمَاءْ
وَ نِرَجِّفْ الْأَرْض مِنْ أَسَاسْهَا.
وَ دَا مِنْ شِدَّةْ زَعَلِي أَنَا اللّٰهْ الْقَادِرْ
فِي يَوْم غَضَبِي الْمُحْرِقْ.
14 خَلَاصْ، مِثِلْ الْغَزَالَةْ الْمَطْرُودَةْ
وَ مِثِلْ الْغَنَمْ الْمَا عِنْدُهُمْ رَاعِي،
أَيِّ وَاحِدْ يِقَبِّلْ لِشَعَبَهْ
وَ أَيِّ وَاحِدْ يِعَرِّدْ لِبَلَدَهْ.
15 وَ أَيِّ وَاحِدْ الْيَلْقَوْه، يَطْعَنَوْه
وَ أَيِّ وَاحِدْ الْيَكُرْبُوهْ، يَكْتُلُوهْ بِالْسَّيْف.
16 وَ أَطْفَالْهُمْ يَرْحَكَوْهُمْ قِدَّامْهُمْ
وَ يَنْهَبَوْا خُمَامْ بُيُوتْهُمْ
وَ يَرُقْدُوا مَعَ عَوِينْهُمْ بِقُوءْ.»
17 وَ الرَّبّ قَالْ:
«دَاهُو نِقَوِّمْ الْمَادِيِّينْ ضِدُّهُمْ
الْمَا يِفَكُّرُوا فِي الْفُضَّةْ
وَ الدَّهَبْ كُلَ مَا يَعَجِبْهُمْ.
18 وَ بِنُشَّابْهُمْ،
يَكْتُلُوا الشَّبَابْ
وَ مَا يَرْحَمَوْا الطِّفِلْ
وَ مَا يِحِنُّوا فِي الْعِيَالْ الدُّقَاقْ.»
19 زَمَانْ، مَدِينَةْ بَابِلْ جَمَالْ الْمَمَالِكْ
وَ زِينَةْ الْبَابِلِيِّينْ.
وَ هَسَّعْ، هِي تَبْقَى
مِثِلْ سَدُومْ وَ عَمُورَةْ
الدَّمَّرَاهُمْ الرَّبّ.
20 هِي مَا يَسْكُنُوهَا إِلَى الْأَبَدْ
وَ مِنْ ذُرِّيَّةْ لِذُرِّيَّةْ كُلَ،
مَا يَسْكُنُوهَا.
الْعَرَبْ الْيِسِيرُوا
مَا يَبْنُوا خِيَمْهُمْ هِنَاكْ
وَ الرُّعْيَانْ مَا يِسَوُّوا
زَرَايِبْهُمْ هِنَاكْ.
21 حَيْوَانَاتْ الْكَدَادَةْ يَسْكُنُوهَا
وَ طُيُورْ أَمْ قُقُّمْ يَمْلَوْا بُيُوتْهَا.
وَ النَّعَامْ يَسْكُنْهَا
وَ تُيُوسْ الْحَجَرْ يَلْعَبَوْا فَوْقهَا.
22 الْمَرَافْعِينْ يَبْكُوا فِي بُيُوتْهَا السَّمْحِينْ
وَ الْبَعَاشِيمْ فِي قُصُورْهَا الْكُبَارْ.
وَكِتْهَا قَرِيبْ يَجِي
وَ أَيَّامْهَا مَحْسُوبِينْ.
© La Bible en arabe tchadien © Alliance biblique du Tchad, 2019
