التحْذير لمدينة القدس
1 مُحَاكَمَةْ فِي وَادِي الرُّؤْيَةْ.
يَا مَدِينَةْ الْقُدُسْ، مَالَا كُلَّ شَعَبْكِ
طَلَعَوْا فِي رُوسَيْ الْبُيُوتْ؟
2 مَالَا كُلَّ الْعَوَّةْ وَ الْحَرَكَةْ،
يَا إِنْتِ حِلَّةْ الْفَرَحْ؟
مَيْتِينْكِ مَا كَتَلَوْهُمْ بِالْسَّيْف
وَ مَا مَاتَوْا فِي الْحَرِبْ.
3 كُلَّ قُيَّادْكِ عَرَّدَوْا
وَ سِيَادْ النُّشَّابْ كَرَبَوْهُمْ مَسَاجِينْ.
وَ كُلَّ سُكَّانْكِ كَرَبَوْهُمْ مَسَاجِينْ
حَتَّى كَنْ هُمَّنْ عَرَّدَوْا بَعِيدْ كُلَ.
4 وَ فِي شَانْ دَا، أَنَا قُلْت:
«مَا تِشِيفُونِي!
خَلُّونِي نَبْكِي بِحُرْقَةْ.
وَ مَا تِحَاوُلُوا تِحَنُّسُونِي
أَشَانْ أُمَّتِي الْمِثِلْ بِنْت أَمِّي أَدَّمَّرَتْ.»
5 أَشَانْ دَا يَوْم هَنَا بَرْجَالْ
وَ دَمَارْ وَ شَكّ.
وَ دَا جَايِ مِنْ اللّٰهْ الرَّبّ الْقَادِرْ
فِي وَادِي الرُّؤْيَةْ.
الدُّرْدُرْ وَقَعْ
وَ الْكُرَوْرَاكْ أَنْسَمَعْ عَلَيْ الْجَبَلْ.
6 نَاسْ بَلَدْ عِلَامْ شَايْلِينْ كَلَوْتَاتْهُمْ
وَ عَرَبَاتْ الْحَرِبْ وَ سِيَادْ الْخَيْل جَايِينْ
وَ نَاسْ حِلَّةْ قِيرْ جَهَّزَوْا دُرُوعْهُمْ.
7 يَا مَدِينَةْ الْقُدُسْ!
وُدْيَانْكِ السَّمْحِينْ
أَنْمَلَوْا بِعَرَبَاتْ الْحَرِبْ.
وَ سِيَادْ الْخَيْل جَوْا وَقَفَوْا
فِي خُشُومْ بِيبَانْكِ
8 وَ دَاهُو بَلَدْ يَهُوذَا
مَا عِنْدَهَا دِفَاعْ بَتَّانْ.
وَ فِي الْيَوْم دَا،
إِنْتُو وَجَّهْتُوا عَلَيْ بَيْت الْغَابَةْ
الْفَوْقَهْ سِلَاحْكُو.
9 وَ شِفْتُوا كَدَرْ
خُرَمْ مَدِينَةْ دَاوُدْ كَتِيرِينْ.
وَ وَرَدْتُوا أَلْمِي
وَ صَبَّيْتُوهْ فِي الْخَزَّانْ التِّحِتْ.
10 وَ حَسَبْتُوا عَدَدْ بُيُوتْ مَدِينَةْ الْقُدُسْ
وَ هَدَّمْتُوا بُيُوتْ وَاحِدِينْ لِتِقَوُّوا الدُّرْدُرْ.
11 وَ سَوَّيْتُوا خَزَّانْ
أَمْبَيْنَاتْ الدَّرَادِرْ الْإِتْنَيْن
لِلْأَلْمِي هَنَا الْبِرْكَةْ الْقَدِيمَةْ.
وَ لَاكِنْ مَا وَجَّهْتُوا لِلّٰهْ
هُو الْجَابْ الْمَصِيبَةْ دِي.
وَ مَا شِفْتُوهْ عَلَيَّهْ،
هُو الْجَهَّزَاهَا مِنْ زَمَنْ بَعِيدْ.
12 وَ دَا الْيَوْم الْفَوْقَهْ اللّٰهْ الرَّبّ الْقَادِرْ
نَادَاكُو لِتَبْكُوا وَ تُنُوحُوا
وَ لِتِزَيُّنُوا رُوسَيْكُو
وَ تَلْبَسَوْا خُلْقَانْ التَّوْبَةْ.
13 وَ لَاكِنْ دَاهُو بِفَرَحْ وَ سُرُورْ،
إِنْتُو دَبَحْتُوا بَقَرْ وَ غَنَمْ.
وَ أَكَلْتُوا لَحَمْ
وَ شِرِبْتُوا خَمَرْ وَ قُلْتُوا:
«يَلَّا! نَاكُلُوا وَ نَشَرْبَوْا
أَشَانْ أَمْبَاكِرْ، خَلَاصْ نُمُوتُوا!»
14 وَ اللّٰهْ الْقَادِرْ بَيَّنْ لَيِّ وَ قَالْ:
«خَطَاكُو دَا، أَبَداً مَا عِنْدَهْ كَفَّارَةْ
لَحَدِّي تُمُوتُوا.»
وَ دَا، اللّٰهْ الرَّبّ الْقَادِرْ بَسْ قَالَهْ.
تحْذير لشَبْنَا المسْؤول
15 وَ دَاهُو اللّٰهْ الرَّبّ الْقَادِرْ قَالْ:
«أَمْشِي أَلْقَاهْ لِشَبْنَا
الْمَسْؤُولْ فِي قَصِرْ الْمَلِكْ
وَ قُولْ لَيَّهْ:
16 ‹عِنْدَكْ شُنُو هِنِي؟
وَ عِنْدَكْ يَاتُو هِنِي؟
مَالَا تَنْكُتْ لَيْك قَبُرْ
فِي الْبَكَانْ دَا؟
وَ مَالَا تَحْفِرْ قَبُرْ فِي الْعَالِي
وَ تِعَدِّلْ لَيْك قَبُرْ فِي الْجَبَلْ لِتِنْجَمَّ فَوْقَهْ؟
17 يَا الرَّاجِلْ الشَّدِيدْ،
دَاهُو اللّٰهْ يَرْمِيكْ بَعِيدْ
وَ يَكُرْبَكْ بِشِدَّةْ وَ يَطْوِيكْ.
18 وَ يِدَكْرِمَكْ مِثِلْ كُورَايْ
وَ يَزْقُلَكْ فِي بَلَدْ وَسِيعَةْ.
وَ هِنَاكْ تُمُوتْ مَعَ عَرَبَاتْ شَرَفَكْ،
إِنْتَ الْجِبْت الْعَيْب لِبَيْت سِيدَكْ.
19 «‹أَيْوَى! أَنَا نَرْمِيكْ مِنْ بَكَانَكْ
وَ نَطُرْدَكْ مِنْ مَسْؤُولِيّتَكْ.
20 وَ فِي الْيَوْم دَا، نِنَادِي عَبْدِي
أَلِيَاقِيمْ وِلَيْد حِلْقِيَّا.
21 أَنَا نِلَبِّسَهْ خَلَقَكْ
وَ نَرْبُطْ صُلْبَهْ بِحِزَامَكْ
وَ مَسْؤُولِيّتَكْ،
نَنْطِيهَا لَيَّهْ فِي إِيدَيْنَهْ.
وَ هُو يَبْقَى أَبُو
لِسُكَّانْ مَدِينَةْ الْقُدُسْ
وَ لِبَنِي يَهُوذَا.
22 وَ مَسْؤُولِيَّةْ مُفْتَاحْ قَصِرْ الْمَلِكْ دَاوُدْ،
نُخُطَّهَا تِحِتْ سُلْطِتَهْ.
وَ كَنْ هُو يَفْتَحْ الْبَابْ،
مَا فِي الْيَقْدَرْ يِسِدَّهْ
وَ كَنْ هُو يِسِدَّهْ،
مَا فِي الْيَقْدَرْ يَفْتَحَهْ.
23 وَ أَنَا نِمَكِّنَهْ
مِثِلْ وِتِدْ فِي بَكَانْ قَوِي
وَ هُو يِجِيبْ الشَّرَفْ لِبَيْت أَبُوهْ.
24 وَ كُلَّ تَقَلَةْ شَرَفْ بَيْت أَبُوهْ،
الْكُبَارْ وَ الصُّغَارْ كُلَ،
يُخُطُّوهَا فَوْقَهْ.
وَ هُو يَبْقَى مِثِلْ شِعْبَةْ
الْيِعَلُّقُوا فَوْقهَا
كُلَّ الْمُعِدَّاتْ الصُّغَارْ
مِنْ الْغَرَارِيفْ لَحَدِّي الْقِرَبْ.›»
25 وَ دَاهُو كَلَامْ اللّٰهْ الْقَادِرْ:
«فِي الْيَوْم دَا، الْوِتِدْ الْمُمَكَّنْ فِي الْبَكَانْ الْقَوِي
يِنْتَنِي وَ يِنْكَسِرْ وَ يَقَعْ
وَ التَّقَلَةْ الشَّايِلْهَا تِدَّمَّرْ.»
وَ دَا كَلَامْ اللّٰهْ الْهُو قَالَهْ.
© La Bible en arabe tchadien © Alliance biblique du Tchad, 2019
