غِنَي المدينة القويّة
1 وَ فِي الْيَوْم دَا، يِغَنُّوا الْغِنَيْ دَا فِي بَلَدْ يَهُوذَا:
«أَنِحْنَ عِنْدِنَا مَدِينَةْ قَوِيَّةْ.
وَ اللّٰهْ أَنْطَانَا النَّجَاةْ
وَ يَحْمِينَا مِثِلْ دَرَادِرْهَا الْقَوِيِّينْ.
2 أَفْتَحَوْا الْبِيبَانْ
أَشَانْ تَدْخُلْ الْأُمَّةْ الصَّالْحَةْ وَ حَافْضَةْ أَمَانْهَا.
3 يَا رَبّ! لِلنَّادُمْ الثَّابِتْ،
إِنْتَ تِجِيبْ السَّلَامْ
أَشَانْ هُو يِتْوَكَّلْ عَلَيْك.
4 أَتْوَكَّلَوْا عَلَيْ اللّٰهْ دَايْماً.
أَيْوَى! اللّٰهْ الرَّبّ
هُو الْجَبَلْ الدَّايِمْ.
5 أَشَانْ هُو رَمَى سُكَّانْ الْحِلَّةْ الْفِي الْجَبَلْ.
هُو رَمَى الْحِلَّةْ الْقَاعِدَةْ فَوْق.
هُو رَمَاهَا فِي الْأَرْض وَ ضَرَبَاهَا
لَحَدِّي وَقَعَتْ فِي التُّرَابْ.
6 وَ هِي يِفَجُّقُوهَا بِالرِّجْلَيْ
تِحِتْ رِجْلَيْ الْمَسَاكِينْ
وَ تِحِتْ قَدَمْ الضَّعِيفِينْ.»
صلاة العشم في اللّه
7 يَا رَبّ، دَرِبْ الصَّالِحْ يَمْشِي عَدِيلْ
أَيْوَى، إِنْتَ تِعَدِّلْ دَرِبْ الصَّالِحْ.
8 أَيْوَى فِي طَرِيقْ عَدَالْتَكْ،
نُخُطُّوا عَشَمْنَا فَوْقَكْ، يَا اللّٰهْ!
أَنِحْنَ مُشْتَاقِينْ لِنِنَادُوا أُسْمَكْ
وَ نِذَّكَّرَوْك.
9 وَ نَفْسِي تَقْرَمْ لَيْك بِاللَّيْل
وَ رُوحِي فِي دَاخِلِي تِفَتِّشَكْ.
أَشَانْ وَكِتْ عَدَالْتَكْ تَقْعُدْ فِي الْأَرْض،
خَلَاصْ سُكَّانْ الْعَالَمْ يِلْعَلَّمَوْا الْحَقّ.
10 لَاكِنْ كَنْ يِحِنُّوا فِي الْعَاصِي،
هُو مَا يِلْعَلَّمْ الْعَدَالَةْ.
فِي بَلَدْ الْحَقّ كُلَ،
هُو يِسَوِّي الْفَسَالَةْ
وَ مَا يِشِيفْ عَظَمَةْ اللّٰهْ.
11 يَا اللّٰهْ! إِيدَكْ مَرْفُوعَةْ فَوْق
وَ هُمَّنْ مَا شَافَوْهَا.
يِشِيفُوا مَحَبِّتَكْ الشَّدِيدَةْ لِشَعَبَكْ
وَ الْعَيْب يَكْرُبْهُمْ
وَ النَّارْ الْجَهَّزْتَهَا لِعُدْوَانَكْ
تَاكُلْهُمْ.
12 يَا اللّٰهْ، إِنْتَ بَسْ ثَبَّتّْ لَيْنَا السَّلَامْ
أَشَانْ كُلَّ أَعْمَالْنَا،
إِنْتَ بَسْ تِحَقِّقْهُمْ لَيْنَا.
13 يَا اللّٰهْ إِلٰـهْنَا،
سِيَادْ آخَرِينْ بَلَاكْ إِنْتَ
مَلَكَوْا فَوْقنَا
لَاكِنْ أُسْمَكْ إِنْتَ وِحَيْدَكْ بَسْ،
أَنِحْنَ نَذْكُرُوهْ.
14 الْمَيْتِينْ دَوْل مَا يَحْيَوْا بَتَّانْ
النَّاسْ الْأَتْوَفَّوْا مَا يُقُمُّوا.
أَشَانْ إِنْتَ دَمَّرْتُهُمْ
وَ عَاقَبْتُهُمْ
وَ قَشَّيْت كُلَّ ذِكِرْهُمْ.
15 يَا اللّٰهْ، إِنْتَ كَتَّرْت الْأُمَّةْ
أَيْوَى، إِنْتَ كَتَّرْت أُمَّتَكْ
وَ وَصَّفْت مَجْدَكْ
وَ وَسَّعْت كُلَّ حُدُودْ الْبَلَدْ.
16 يَا اللّٰهْ، فِي الضِّيقَةْ هُمَّنْ فَتَّشَوْك
وَ أَلْخَالَوْا بِدُعَاهُمْ تِحِتْ تِحِتْ
وَكِتْ إِنْتَ عَاقَبْتُهُمْ.
17 مِثِلْ مَرَةْ الْغَلْبَانَةْ الْقَرَّبَتْ لِلْوَالُودَةْ
قَاعِدَةْ تِتَّنَّ وَ تَصْرَخْ مِنْ وَجَعْ الطَّلَقَةْ،
دِي بَسْ حَالِتْنَا أَنِحْنَ
قِدَّامَكْ إِنْتَ، يَا اللّٰهْ.
18 أَنِحْنَ غِلِبْنَا وَ الطَّلَقَةْ كَرَبَتْنَا
لَاكِنْ دَا مِثِلْ وِلِدْنَا الرِّيحْ بَسْ.
مَا جِبْنَا النَّجَاةْ فِي الْأَرْض
وَ لَا جِبْنَا سُكَّانْ جَدِيدِينْ فِي الْعَالَمْ.
19 يَا اللّٰهْ! خَلِّي مَيْتِينَكْ يَحْيَوْا
وَ جَنَازَاتْهُمْ يَبْعَثَوْا.
قُمُّوا وَ زَغْرُطُوا،
يَا إِنْتُو السَّاكْنِينْ فِي لُبّ الْأَرْض!
أَشَانْ اللّٰهْ يِنَزِّلْ النُّورْ مِثِلْ الْكَرَنْج
وَ بَيَّهْ الْمَيْتِينْ يَبْعَثَوْا.
اللّه يحاسِب سُكّان الأرْض
20 أَمْشُوا، يَا شَعَبِي، قَبُّلُوا بُيُوتْكُو
وَ سِدُّوا بِيبَانْكُو.
وَ أَلَّبَّدَوْا شِيَّةْ
لَحَدِّي الزَّعَلْ دَا يُفُوتْ.
21 أَشَانْ دَاهُو اللّٰهْ مَارِقْ مِنْ بَكَانَهْ
وَ يِحَاسِبْ سُكَّانْ الْأَرْض بِسَبَبْ خَطَاهُمْ.
وَ الْأَرْض تِبَيِّنْ الدَّمّ الدَّفَّقْ فَوْقهَا
وَ مَا تِلَبِّدْ الْمَكْتُولِينْ.
© La Bible en arabe tchadien © Alliance biblique du Tchad, 2019
