اللّه عزل الملك كُورَش
1 وَ دَاهُو اللّٰهْ قَالْ لِلنَّادُمْ الْهُو مَسَحَهْ وَ دَرَّجَهْ مَلِكْ:
«لَيْك إِنْتَ، يَا كُورَشْ،
أَنَا كَرَبْتَكْ مِنْ إِيدَكْ الزَّيْنَةْ
لِنَرْمِي الْأُمَمْ قِدَّامَكْ.
أَنَا نِحِلّ حِزَامْ الْمُلُوكْ
وَ نُفُكّ قِدَّامَكْ بِيبَانْ الْمُدُنْ
وَ بَتَّانْ مَا يُكُونُوا مَقْفُولِينْ.
2 أَنَا ذَاتِي نَمْشِي قِدَّامَكْ
وَ لِلْقِيزَانْ، نِسَاوِيهُمْ.
وَ لِبِيبَانْ النَّحَاسْ، نِكَسِّرْهُمْ
وَ لِقَفَلَةْ الْحَدِيدْ، نِفَلِّتْهُمْ.
3 أَنَا نَنْطِيكْ كَنْز الْمَدْفُونْ فِي الضَّلَامْ
وَ الْغُنَى الْمُلَبَّدَةْ.
وَ بَيْدَا، إِنْتَ تَعَرِفْ
كَدَرْ أَنَا اللّٰهْ بَسْ
نَادَيْتَكْ بِأُسْمَكْ،
أَنَا إِلٰـهْ بَنِي إِسْرَائِيلْ.
4 فِي شَانْ يَعْقُوبْ عَبْدِي
وَ فِي شَانْ إِسْرَائِيلْ الْأَنَا عَزَلْتَهْ،
أَنَا نَادَيْتَكْ بِأُسْمَكْ
وَ دَرَّجْتَكْ قَبُلْ مَا تَعَرِفْنِي.
5 وَ أَنَا اللّٰهْ.
لَا إِلٰـهْ إِلَّا أَنَا
وَ مَا فِي إِلٰـهْ بَلَايِ.
أَنَا رَبَطْت لَيْك حِزَامْ الْقُدْرَةْ
قَبُلْ مَا تَعَرِفْنِي.
6 دَا لِيَعَرْفُوا مِنْ طَلُوعْ الْحَرَّايْ لَحَدِّي وَقُوعْهَا
كَدَرْ مَا فِي شَيّءْ بَلَايِ.
أَنَا اللّٰهْ وَ لَا إِلٰـهْ إِلَّا أَنَا.
7 أَنَا كَوَّنْت النُّورْ
وَ خَلَقْت الضَّلَامْ.
وَ سَوَّيْت السَّلَامْ
وَ خَلَقْت الْفَسَالَةْ
وَ أَنَا اللّٰهْ نِسَوِّي كُلَّ الشَّيّءْ.
8 خَلِّي السَّمَاءْ مِنْ فَوْق تِنَزِّلْ الْكَرَنْج
وَ السَّحَابْ يِنَزِّلْ الْعَدَالَةْ.
وَ خَلِّي الْأَرْض تِنْفَتِحْ
وَ تَمْرُقْ النَّجَاةْ
وَ تِنَوِّرْ الْعَدَالَةْ.
أَنَا اللّٰهْ بَسْ خَلَقْتُهُمْ.»
9 الْعَذَابْ لِلنَّادُمْ الْيِهَارِجْ الْكَوَّنَهْ
هُو الْمِثِلْ جَرّ الطِّينَةْ فِي أُسْط الْجِرَارْ.
هَلْ الطِّينَةْ تَقْدَرْ تُقُولْ لِلْيُدُقَّهَا:
«تِسَوِّي شُنُو؟»
هَلْ الْجَرّ يَقْدَرْ يُقُولْ لِلدَّقَّاقْ:
«إِنْتَ مَا عِنْدَكْ إِيدْ وَلَّا؟»
10 الْعَذَابْ لِلْيُقُولْ لِأَبُوهْ:
«مَالَا جِبْت عِيَالْ؟»
الْعَذَابْ لِلْيُقُولْ لِأَمَّهْ:
«مَالَا وِلِدْتِ؟»
11 وَ دَاهُو اللّٰهْ قُدُّوسْ إِسْرَائِيلْ الْكَوَّنَاهُمْ قَالْ:
«أَسْأَلَوْنِي فِي أَشْيَاءْ هَنَا الْمُسْتَقْبَلْ
وَ لَاكِنْ كَنْ لِعِيَالِي
وَ الْأَشْيَاءْ السَّوَّيْتهُمْ بِإِيدِي،
خَلُّوهُمْ لَيِّ أَنَا بَسْ.
12 أَنَا بَسْ سَوَّيْت الْأَرْض
وَ خَلَقْت الْإِنْسَانْ الْيَسْكُنُوا فَوْقهَا.
بِإِيدِي أَنَا بَسْ، فَلَّيْت السَّمَاوَاتْ
وَ أَنْطَيْت أَمُرْ لِكُلَّ قُوَّاتْهَا.
13 أَنَا بَسْ جِبْت كُورَشْ لِيِسَوِّي الْعَدَالَةْ
وَ نِعَدِّلْ كُلَّ دُرُوبَهْ.
هُو يَبْنِي بَتَّانْ مَدِينْتِي
وَ شَعَبِي الْوَدَّوْهُمْ فِي الْغُرْبَةْ
يَطْلِقْهُمْ بَلَا تَمَنْ وَ لَا أُجْرَةْ.»
وَ دَا، اللّٰهْ الْقَادِرْ بَسْ قَالَهْ.
14 وَ دَاهُو اللّٰهْ قَالْ:
«نَتِيجَةْ مَصِرْ
وَ رِبِحْ مِنْ بَلَدْ الْحَبَشَةْ
وَ رُجَالْ سَبَأ الطُّوَالْ،
كُلَّ الْأَشْيَاءْ دَوْل يَوْصَلَوْا لَيْك وَ يَبْقَوْا هَنَاكْ.
النَّاسْ دَوْل يَمْشُوا وَرَاكْ.
هُمَّنْ دَوْل يَمْشُوا مُجَنْزَرِينْ
وَ يَسْجُدُوا قِدَّامَكْ
وَ يَشْحَدَوْك وَ يُقُولُوا:
‹صَحِيحْ اللّٰهْ مَعَاكْ
وَ مَا فِي إِلٰـهْ إِلَّا هُو
وَ مَا فِي إِلٰـهْ آخَرْ.›»
15 أَكِيدْ، إِنْتَ إِلٰـهْ الْمَا تِنْشَافْ
وَ إِنْتَ إِلٰـهْ بَنِي إِسْرَائِيلْ الْمُنَجِّي!
16 وَ الْيَصْنَعَوْا الْأَصْنَامْ،
كُلُّهُمْ عَايْبِينْ وَ خَجْلَانِينْ
وَ كُلُّهُمْ سَوَا مَاشِينْ فِي الْخَجْلَةْ.
17 لَاكِنْ كَنْ لِبَنِي إِسْرَائِيلْ، اللّٰهْ يِنَجِّيهُمْ
وَ النَّجَاةْ دِي إِلَى الْأَبَدْ.
وَ بَتَّانْ إِنْتُو مَا تَبْقَوْا عَايْبِينْ وَ لَا خَجْلَانِينْ،
دَايْماً وَ إِلَى الْأَبَدْ.
18 أَشَانْ دَاهُو كَلَامْ اللّٰهْ، خَالِقْ السَّمَاوَاتْ وَ هُو الْإِلٰـهْ السَّوَّى الْأَرْض وَ كَوَّنْهَا وَ ثَبَّتْهَا. هُو مَا خَلَقَاهَا لِتَقْعُدْ فَاضِيَةْ لَاكِنْ كَوَّنْهَا لِيَسْكُنُوهَا. هُو قَالْ:
«أَنَا اللّٰهْ وَ مَا فِي إِلٰـهْ إِلَّا أَنَا.
19 أَنَا مَا حَجَّيْت بِسِرّ
فِي بَكَانْ أَضْلَمْ فِي الْأَرْض.
وَ أَنَا مَا قُلْت لِذُرِّيَّةْ يَعْقُوبْ:
‹فَتُّشُونِي فِي الْفَاضِي!›
أَنَا اللّٰهْ نِحَجِّي بِالْعَدَالَةْ
وَ نِكَلِّمْ بِالْحَقّ.
20 لِمُّوا وَ تَعَالُوا!
قَرُّبُوا سَوَا، إِنْتُو الْفَضَّلْتُوا مِنْ الْأُمَمْ!
إِنْتُو مَا تَعَرْفُوا شَيّءْ،
إِنْتُو الشَّايْلِينْ أَصْنَامْكُو هَنَا حَطَبْ
وَ تَسْأَلَوْا إِلٰـهَاتْكُو الْمَا يِنَجُّوكُو.
21 خَبُّرُوا وَ قَرُّبُوا
وَ لِمُّوا سَوَا وَ أَشَّاوَرَوْا!
يَاتُو حَجَّى بَيَّهْ مِنْ زَمَانْ
وَ خَبَّرْ بَيَّهْ مِنْ الْوَكِتْ الْفَاتْ؟
مَا أَنَا اللّٰهْ وَلَّا؟
وَ لَا إِلٰـهْ إِلَّا أَنَا!
أَنَا إِلٰـهْ الصَّادِقْ وَ الْمُنَجِّي
وَ مَا فِي إِلٰـهْ آخَرْ إِلَّا أَنَا.
22 إِنْتُو كُلُّكُو الْفِي آخِرْ الْأَرْض،
وَجُّهُوا عَلَيِّ أَنَا وَ تَنْجَوْا!
أَشَانْ أَنَا اللّٰهْ
وَ لَا إِلٰـهْ إِلَّا أَنَا.
23 أَنَا حَلَفْت بِنَفْسِي وَ قُلْت
مِنْ خَشْمِي يَمْرُقْ كَلَامْ الْعَدَالَةْ
وَ الْكَلَامْ دَا مَا يِنَّقِضْ.
كُلَّ رُكْبَةْ تَبْرُكْ قِدَّامِي
وَ أَيِّ لِسَانْ يَشْهَدْ كَدَرْ أَنَا اللّٰهْ.
24 وَ يِحَجُّوا بَيِّ وَ يُقُولُوا:
‹فِي اللّٰهْ بَسْ يِنْلَقُوا
النَّصُرْ وَ الْقُدْرَةْ.›
كُلَّ الْقَمَّوْا بِزَعَلْ ضِدِّي
يَجُوا قِدَّامِي عَايْبِينْ.
25 وَ بَيِّ أَنَا اللّٰهْ، كُلَّ ذُرِّيَّةْ إِسْرَائِيلْ
يَبْقَوْا صَالِحِينْ وَ يَحْمُدُونِي.»
© La Bible en arabe tchadien © Alliance biblique du Tchad, 2019
