كلام اللّه البُخُصّ البيت
1 دَاهُو اللّٰهْ قَالْ:
«السَّمَاءْ عَرْشِي
وَ الْأَرْض بَكَانْ نُخُطّ رِجِلَيْنِي.
هَلْ تَقْدَرَوْا تَبْنُوا بَيْت
الْيِشِيلْنِي وَلَّا؟
وَلَّا تَقْدَرَوْا تَبْنُوا لَيِّ
بَكَانْ لِلرَّاحَةْ؟
2 أَشَانْ كُلَّ الْأَشْيَاءْ دَوْل،
إِيدِي بَسْ سَوَّتْهُمْ
وَ مِثِلْ دَا بَسْ،
هُمَّنْ مَوْجُودِينْ.
دَاهُو النَّادُمْ الْأَنَا نَرْضَى بَيَّهْ،
هُو الْمِسْكِينْ وَ رُوحَهْ مُحَطَّمَةْ
وَ يَرْجِفْ مِنْ كَلَامِي.»
وَ دَا كَلَامْ اللّٰهْ.
3 «وَ لَاكِنْ الْيَدْبَحْ تَوْر ضَحِيَّةْ،
هُو مِثِلْ الْيَكْتُلْ إِنْسَانْ.
وَ الْيِقَدِّمْ غَنَمَايْ ضَحِيَّةْ،
هُو مِثِلْ الْيَكْسِرْ رَقَبَةْ كَلِبْ.
وَ الْيِقَدِّمْ هَدِيَّةْ هَنَا دَقِيقْ،
هُو مِثِلْ الْيِقَدِّمْ هَدِيَّةْ دَمّ هَنَا خِنْزِيرْ
وَ الْيِحَرِّقْ بَخُورْ،
هُو مِثِلْ الْيَعَبُدْ صَنَمْ.
النَّاسْ دَوْل عَزَلَوْا دَرِبْهُمْ
وَ بِمُحَرَّمَاتْهُمْ دَوْل، هُمَّنْ فَرْحَانِينْ.
4 أَنَا كُلَ نَعَزِلْ لَيْهُمْ نَتِيجَةْ عَمَلْهُمْ
وَ نِجِيبْ فَوْقهُمْ الْيِخَوِّفْهُمْ.
أَشَانْ أَنَا نَادَيْتهُمْ
وَ مَا رَدَّوْا لَيِّ
وَ كَلَّمْت لَيْهُمْ
وَ مَا سِمْعَوْا كَلَامِي.
وَ لَاكِنْ هُمَّنْ سَوَّوْا الْفَسِلْ قِدَّامِي
وَ عَزَلَوْا الْمَا نِدَوْرَهْ.»
5 أَسْمَعَوْا كَلَامْ اللّٰهْ،
إِنْتُو التَّرْجُفُوا مِنْ كَلَامَهْ:
«أَخْوَانْكُو يَكْرَهَوْكُو
وَ يِبَعُّدُوكُو
فِي شَانْ أُسْمِي أَنَا اللّٰهْ.
وَ يِشَّمَّتَوْا فَوْقكُو
وَ يُقُولُوا:
‹خَلِّي اللّٰهْ يِوَصِّفْ مَجْدَهْ
وَ نِشِيفُوا فَرَحْكُو!›
وَ لَاكِنْ هُمَّنْ بَسْ
يَلْقَوْا الْعَيْب.»
6 فِي حِسّ هَنَا عَايِطْ جَايِ مِنْ الْمَدِينَةْ
وَ حَرَكَةْ جَايَةْ مِنْ بَيْت اللّٰهْ.
وَ دَا حِسّ اللّٰهْ الْقَاعِدْ يِجَازِي عُدْوَانَهْ.
7 قَبُلْ الطَّلَقَةْ مَا تَكْرُبْهَا،
جَبَلْ صَهْيُون وِلْدَتْ.
وَ قَبُلْ الْوَجَعْ مَا يَجِيهَا،
هِي وِلْدَتْ جَابَتْ وِلَيْد.
8 يَاتُو السِّمِعْ بِشَيّءْ مِثِلْ دَا؟
وَ يَاتُو الشَّافْ شَيّءْ مِثِلْ دَا؟
فِيَّهْ بَلَدْ الْوِلْدَوْهَا
فِي يَوْم وَاحِدْ وَلَّا؟
فِي أُمَّةْ يَلْدَوْهَا
فِي وَكِتْ وَاحِدْ وَلَّا؟
لَاكِنْ وَكِتْ قَرِيبْ تِطَالِقْ،
صَهْيُون وِلْدَتْ أَوْلَادْهَا خَلَاصْ.
9 وَ اللّٰهْ قَالْ:
«أَنَا نَفْتَحْ بَطُنْ الْأَمّ
وَ مَا نِخَلِّيهَا تَلْدَ وَلَّا؟»
أَيْوَى، إِلٰـهَكْ قَالْ:
«أَنَا النِّوَلِّدْ،
نَدْحَرْ الصَّغِيرْ مَا يَمْرُقْ وَلَّا؟»
10 «أَفْرَحَوْا مَعَ مَدِينَةْ الْقُدُسْ وَ أَنْبَسْطُوا بَيْهَا،
إِنْتُو كُلُّكُو التِّحِبُّوهَا!
أَفْرَحَوْا مَعَاهَا بِسُرُورْ،
إِنْتُو كُلُّكُو الْحِزِنْتُوا فِي شَانْهَا.
11 أَشَانْ إِنْتُو تَرْضَعَوْا مِنْ دَيْدهَا وَ تَرْوَوْا
وَ تَلْقَوْا مَحَنِّتْهَا.
أَشَانْ تُمُصُّوا وَ تَفْرَحَوْا
مِنْ ضَرِّتْهَا الْمَلَانَةْ بِلَبَنْ.»
12 وَ دَاهُو اللّٰهْ قَالْ:
«أَنَا نَنْطِي السَّلَامْ لِمَدِينَةْ الْقُدُسْ
مِثِلْ أَلْمِي الْبَحَرْ.
وَ نِجِيبْ لَيْهَا مَجْد الْأُمَمْ
مِثِلْ وَادِي الْجَارِي.
وَ يِرَضُّعُوكُو وَ يِشِيلُوكُو فِي حُضُونْهُمْ
وَ يِدَادُلُوكُو فِي الرِّكَبُّهُمْ.
13 وَ مِثِلْ أَمّ تِصَبِّرْ وِلَيْدهَا،
أَنَا كُلَ نِصَبِّرْكُو.
أَيْوَى! فِي مَدِينَةْ الْقُدُسْ تَصْبُرُوا.»
14 وَ إِنْتُو تِشِيفُوا وَ قُلُوبْكُو يَفْرَحَوْا
وَ عُضَامْكُو يِقَوُّوا مِثِلْ الْقَشّ الْيِخَضِّرْ.
وَ عَبِيدْ اللّٰهْ يَعَرْفُوا قُدُرْتَهْ
وَ عُدْوَانَهْ يَعَرْفُوا لَعَنْتَهْ.
15 أَشَانْ دَاهُو اللّٰهْ جَايِ فِي النَّارْ
وَ عَرَبَاتَهْ هِنْت الْحَرِبْ مِثِلْ أَمْ زَوْبَعَانَةْ.
يَجِي لِيِنَزِّلْ غَضَبَهْ بِزَعَلْ شَدِيدْ
وَ تَهْدِيدَهْ فِي نَارْ أَمْ لَهِيبْ.
16 أَشَانْ بِالنَّارْ، اللّٰهْ يِعَاقِبْ
وَ بِسَيْفَهْ يِحَاكِمْ كُلَّ النَّاسْ
وَ اللّٰهْ يَكْتُلْهُمْ كَتِيرِينْ.
17 «وَ النَّاسْ الْيِخَصُّصُوا نُفُوسْهُمْ
وَ يِطَّهَّرَوْا لِيَدْخُلُوا فِي الْجِنَيْنَاتْ
لِيَمْشُوا يَعَبُدُوا الصَّنَمْ الْقَاعِدْ أُسُطْ،
هُمَّنْ دَوْل الْيَاكُلُوا لَحَمْ الْخِنْزِيرْ وَ الْفَارْ
وَ كُلَّ شَيّءْ نِجِسْ مَرَّةْ وَاحِدْ،
هُمَّنْ دَوْل كُلُّهُمْ يِدَّمَّرَوْا!»
وَ دَا كَلَامْ اللّٰهْ.
اللّه يبين لكل الأُمم
18 «أَنَا نَعَرِفْ عَمَلْهُمْ وَ فِكِرْهُمْ. وَ يَجِي وَكِتْ الْيِلِمُّوا فَوْقَهْ كُلَّ الْأُمَمْ وَ كُلَّ اللُّغَّاتْ وَ هُمَّنْ يَجُوا وَ يِشِيفُوا مَجْدِي. 19 وَ نُخُطّ فِي لُبُّهُمْ عَلَامَةْ. وَ مِنْ الْفَضَّلَوْا، نِرَسِّلْ نَاسْ وَاحِدِينْ لِلْأُمَمْ الْيَعَرْفُوا يِسْتَعْمَلَوْا النُّشَّابْ يَعْنِي فِي تَرْشِيشْ وَ فُولْ وَ لُودْ. وَ نِرَسِّلْهُمْ بَتَّانْ لِنَاسْ تُوبَلْ وَ بَلَدْ يَوَانْ وَ بَعِيدْ فِي الْجَزَايِرْ فِي بَكَانْ الْفَوْقَهْ أَبَداً مَا سِمْعَوْا بَيِّ وَ لَا شَافَوْا مَجْدِي. وَ هِنَاكْ يِعَرُّفُوا مَجْدِي لِلْأُمَمْ دَوْل.»
20 وَ اللّٰهْ قَالْ: «النَّاسْ يِقَبُّلُوا كُلَّ أَخْوَانْكُو مِنْ كُلَّ الْأُمَمْ بِخَيْل وَ عَرَبَاتْ وَ كَارَّوْ مُغَطَّيِينْ وَ بِغَالْ وَ جُمَالْ لَحَدِّي مَدِينَةْ الْقُدُسْ فِي جَبَلِي الْمُقَدَّسْ. وَ يِقَدُّمُوهُمْ مِثِلْ هَدِيَّةْ لَيِّ أَنَا اللّٰهْ. وَ دَا يَبْقَى مِثِلْ بَنِي إِسْرَائِيلْ يِقَدُّمُوا هَدَايَاهُمْ فِي مَوَاعِينْ طَاهِرِينْ لِبَيْت اللّٰهْ. 21 وَ نَعَزِلْ وَاحِدِينْ مِنْهُمْ رُجَالْ دِينْ وَ لَاوِيِّينْ.» وَ دَا، اللّٰهْ بَسْ قَالَهْ.
22 وَ دَاهُو كَلَامْ اللّٰهْ:
«مِثِلْ السَّمَاءْ الْجَدِيدْ وَ الْأَرْض الْجَدِيدَةْ
الْأَنَا سَوَّيْتهُمْ قَاعِدِينْ قَوِيِّينْ قِدَّامِي،
مِثِلْ دَا، ذُرِّيِّتْكُو وَ أُسُمْكُو كُلَ
يَقْعُدُوا ثَابْتِينْ قِدَّامِي.
23 وَ أَوَّلْ يَوْم فِي كُلِّ شَهَرْ
وَ فِي كُلِّ يَوْم السَّبْت،
كُلَّ النَّاسْ يَجُوا يَسْجُدُوا قِدَّامِي.
وَ دَا، اللّٰهْ بَسْ قَالَهْ.24 وَ وَكِتْ يَمُرْقُوا،
يِشِيفُوا جَنَازَاتْ النَّاسْ الْقَمَّوْا ضِدِّي.
وَ الدُّودْ الْيَاكُلْهُمْ مَا يُمُوتْ
وَ النَّارْ التَّحْرِقْهُمْ كُلَ مَا تُمُوتْ
وَ يَبْقَوْا مَثَلْ مُخِيفْ لِكُلَّ النَّاسْ.»
© La Bible en arabe tchadien © Alliance biblique du Tchad, 2019
