إشَعْيا يكلِّم للملك أَحَاز
1 وَ رَصِينْ مَلِكْ بَلَدْ أَرَامْ وَ فَقَحْ وِلَيْد رَمَلْيَا مَلِكْ مَمْلَكَةْ إِسْرَائِيلْ قَمَّوْا ضِدّ مَدِينَةْ الْقُدُسْ لِيِحَارُبُوهَا وَ لَاكِنْ مَا قِدْرَوْا يَهْجُمُوهَا. وَ دَا فِي أَيَّامْ حُكُمْ أَحَازْ وِلَيْد يُوتَامْ وِلَيْد عُزِّيَّا مَلِكْ مَمْلَكَةْ يَهُوذَا. 2 وَ قَالَوْا لِلْمَلِكْ أَحَازْ الْمِنْ ذُرِّيَّةْ دَاوُدْ: «دَاهُو مَلِكْ أَرَامْ خَطَّ مُعَسْكَرَهْ فِي تُرَابْ قَبِيلَةْ أَفْرَايِمْ.» خَلَاصْ فِي الْبَكَانْ دَا، الْمَلِكْ وَ شَعَبَهْ بَرْجَلَوْا بِقَوْا مِثِلْ شَدَرْ الْغَابَةْ الْهَزَّتَهْ الرِّيحْ.
3 وَ اللّٰهْ قَالْ لِإِشَعْيَا: «أَمْرُقْ إِنْتَ وَ وِلَيْدَكْ شَارْ يَشُوبْ (مَعَنَاتَهْ الْفَضُّلُوا يِقَبُّلُوا). وَ قَابُلُوا الْمَلِكْ أَحَازْ. تَلْقَوْه فِي طَرَفْ مَجْرَةْ الْبِرْكَةْ الْعَالِي عَلَيْ دَرِبْ زَرَعْ الْغَسَّالِينْ. 4 وَ قُولْ لَيَّهْ:
‹أَقْعُدْ سَاكِتْ مَا تَخَافْ!
وَ خَلِّي قَلْبَكْ مَا يِبَرْجِلْ
فِي شَانْ الزَّعَلْ الشَّدِيدْ
هَنَا رَصِينْ مَلِكْ أَرَامْ وَ وِلَيْد رَمَلْيَا.
أَشَانْ هُمَّنْ مِثِلْ مَشَاهِيبْ إِتْنَيْن
الْقَاعِدِينْ يِدَخُّنُوا.
5 أَشَانْ بَلَدْ أَرَامْ
وَ تُرَابْ قَبِيلَةْ أَفْرَايِمْ وَ وِلَيْد رَمَلْيَا
دَوَّرَوْا يِسَوُّوا لَيْك الْفَسَالَةْ وَ قَالَوْا:
6 ”يَلَّا نُقُمُّوا ضِدّ بَلَدْ يَهُوذَا
وَ نَدْخُلُوا الْمَدِينَةْ.
وَ نِخَوُّفُوهَا وَ نِشِيلُوهَا
وَ نُخُطُّوا فَوْقهَا وِلَيْد طَبِيلْ مِثِلْ مَلِكْ.“›»
7 وَ دَاهُو اللّٰهْ الرَّبّ قَالْ:
«دَا مَا يُكُونْ وَ دَا مَا يَبْقَى.
8 أَشَانْ مَدِينَةْ دِمَشْق،
هِي رَاسْ بَلَدْ أَرَامْ
وَ مَلِكْ رَصِينْ،
هُو رَاسْ دِمَشْق بَسْ.
وَ بَعَدْ 65 سَنَةْ،
تُرَابْ قَبِيلَةْ أَفْرَايِمْ يِدَّمَّرْ
وَ شَعَبْهَا يَبْقَوْا مَا فِيهُمْ.
9 وَ مَدِينَةْ السَّامِرَةْ،
هِي رَاسْ تُرَابْ قَبِيلَةْ أَفْرَايِمْ
وَ وِلَيْد رَمَلْيَا،
هُو رَاسْ السَّامِرَةْ بَسْ.
كَنْ مَا تِآمُنُوا بِكَلَامِي أَنَا الرَّبّ،
أَبَداً مَا تَثْبُتُوا.»
علامة عِمَّانُوِيل
10 وَ بَتَّانْ اللّٰهْ حَجَّى لِأَحَازْ وَ قَالْ لَيَّهْ: 11 «أَطْلُبْ عَلَامَةْ مِنْ اللّٰهْ إِلٰـهَكْ كَنْ مِنْ تِحِتْ الْأَرْض وَلَّا مِنْ فَوْق فِي السَّمَاءْ.» 12 وَ أَحَازْ رَدَّ لَيَّهْ وَ قَالْ: «أَنَا مَا نَطْلُبْ شَيّءْ وَ لَا نِجَرِّبْ اللّٰهْ.»
13 وَ خَلَاصْ، إِشَعْيَا قَالْ:
«أَسْمَعَوْا، يَا ذُرِّيَّةْ دَاوُدْ.
قَلَّلْتُوا صَبُرْ النَّاسْ دَا شِيَّةْ لَيْكُو وَلَّا؟
هَلْ تَقْدَرَوْا تِقَلُّلُوا صَبُرْ إِلٰـهِي؟
14 وَ فِي شَانْ دَا،
الرَّبّ هُو ذَاتَهْ يَنْطِيكُو عَلَامَةْ.
دَاهُو الْبِنَيَّةْ غَلْبَانَةْ
وَ تَلْدَ وِلَيْد
وَ تِسَمِّيهْ عِمَّانُوِيل
(مَعَنَاتَهْ اللّٰهْ مَعَانَا).
15 هُو يَشْرَبْ لَبَنْ رَايِبْ وَ يَاكُلْ عَسَلْ
لَحَدِّي يَكْبُرْ
وَ يَعَرِفْ الزَّيْن وَ الْفَسِلْ.
16 وَ لَاكِنْ قُبَّالْ الْوِلَيْد دَا
مَا يَعَرِفْ الزَّيْن وَ الْفَسِلْ،
تُرَابْ الْمُلُوكْ الْإِتْنَيْن دَوْل يَبْقَى خَلَاءْ.
17 وَ اللّٰهْ يِجِيبْ فَوْقَكْ إِنْتَ، يَا الْمَلِكْ أَحَازْ،
وَ فِي شَعَبَكْ وَ عَايِلْتَكْ
أَيَّامْ الْأَبَداً مَا جَوْا
مِنْ يَوْم تُرَابْ أَفْرَايِمْ أَنْفَرَقْ
مِنْ تُرَابْ يَهُوذَا.
وَ الْأَيَّامْ الْفَسْلِينْ دَوْل يَجُوا لَيْك
بِسَبَبْ مَلِكْ بَلَدْ أَشُورْ.»
18 فِي الْيَوْم دَا،
اللّٰهْ يِصَفِّرْ لِيِنَادِي عَسْكَرْ مَصِرْ
وَ هُمَّنْ يَجُوا كَتِيرِينْ مِثِلْ دُبَّانْ
مِنْ كُلَّ مَجَارِي مَصِرْ.
وَ يِنَادِي عَسْكَرْ مِنْ بَلَدْ أَشُورْ
وَ هُمَّنْ يَجُوا كَتِيرِينْ مِثِلْ نَحَلَةْ.
19 وَ هُمَّنْ يَجُوا كُلُّهُمْ
وَ يَنْزُلُوا فِي كَرْكَوْ الْوُدْيَانْ
وَ فِي شُقُوقْ الْجِبَالْ
وَ فِي كُلَّ الشَّدَرْ الْعِنْدُهُمْ شَوْك
وَ فِي كُلَّ الْمَرَاعِي.
20 وَ فِي الْيَوْم دَا، الرَّبّ يِأَجِّرْ مُوسْ
وَ هُو مَلِكْ بَلَدْ أَشُورْ.
وَ يِجِيبَهْ
مِنْ غَادِي لِبَحَرْ الْفُرَاتْ.
وَ بَيَّهْ الرَّبّ يِزَيِّنْ الرَّاسْ
وَ كُلَّ صُوفْ الْجِلِدْ
وَ الدِّقِنْ كُلَ يِسِلَّهَا.
21 وَ فِي الْيَوْم دَا،
أَيِّ نَادُمْ يِرَبِّي عِجْلَةْ مِنْ الدَّوْر
وَ غَنَمْ إِتْنَيْن.
22 وَ مِنْ كَتَرَةْ اللَّبَنْ،
النَّاسْ يَشَرْبَوْا اللَّبَنْ الرَّايِبْ.
أَيْوَى، النَّاسْ الْفَضَّلَوْا فِي الْبَلَدْ
يِعِيشُوا بِاللَّبَنْ الرَّايِبْ وَ الْعَسَلْ بَسْ.
23 وَ فِي الْيَوْم دَا،
الْبَكَانْ الْأَوَّلْ عِنْدَهْ 1 000 شَدَرَةْ هَنَا عِنَبْ
التَّمَنَهْ 1 000 حَجَرْ فُضَّةْ،
يِخَلُّوهْ فِي الشَّوْك وَ الْحَسْكَنِيتْ.
24 وَ يَدْخُلُوا فَوْقَهْ بِحُرَابْ
وَ نُبَّالْ
أَشَانْ كُلَّ الْبَلَدْ تَبْقَى كَدَادَةْ،
مَلَانَةْ بِالشَّوْك وَ الْحَسْكَنِيتْ.
25 كَنْ لِلْجِبَالْ الْأَوَّلْ حَرَتَوْهُمْ بِجَرَّايْ،
بَتَّانْ مَا يَحَرْتُوهُمْ
مِنْ كَتَرَةْ الشَّوْك وَ الْحَسْكَنِيتْ
وَ إِلَّا الْبَقَرْ وَ الْغَنَمْ بَسْ
يَسْرَحَوْا فَوْقهُمْ.
© La Bible en arabe tchadien © Alliance biblique du Tchad, 2019
