1 وَ دَوْل الْأُمَمْ الْخَلَّاهُمْ اللّٰهْ يَقْعُدُوا وَ بَيْهُمْ يِجَرِّبْ كُلَّ نَاسْ بَنِي إِسْرَائِيلْ الْمَا حِضْرَوْا وَكِتْ حَارَبَوْا لِيِشِيلُوا بَلَدْ كَنْعَانْ. 2 وَ هُو سَوَّى مِثِلْ كَيْ لِيِعَلِّمْ الْحَرِبْ لِلذُّرِّيَّةْ الْجَدِيدَةْ هَنَا بَنِي إِسْرَائِيلْ أَشَانْ أَوَّلْ هُمَّنْ مَا حَارَبَوْا. 3 دَاهُو الْأُمَمْ الْاللّٰهْ خَلَّاهُمْ فِي الْبَلَدْ. هُمَّنْ خَمْسَةْ كُبَارَاتْ هَنَا الْفِلِسْطِيِّينْ وَ كُلَّ الْكَنْعَانِيِّينْ وَ الصَّيْدُونِيِّينْ وَ الْحِوِّيِّينْ السَّاكْنِينْ فِي جِبَالْ لُبْنَانْ مِنْ جَبَلْ بَعَلْ حَرْمُونْ لَحَدِّي لَبُو حَمَاتْ. 4 وَ بِالْأُمَمْ دَوْل، اللّٰهْ يِجَرِّبْ بَنِي إِسْرَائِيلْ لِيَعَرِفْ كَنْ هُمَّنْ يَسْمَعَوْا وَصِيَّاتَهْ الْأَمَرْ بَيْهُمْ جُدُودْهُمْ بِوَاسِطَةْ مُوسَى. 5 وَ بَنِي إِسْرَائِيلْ سَكَنَوْا فِي أُسْط الْكَنْعَانِيِّينْ وَ الْحِتِّيِّينْ وَ الْأَمُورِيِّينْ وَ الْفِرِزِّيِّينْ وَ الْحِوِّيِّينْ وَ الْيَبُوسِيِّينْ. 6 بَنِي إِسْرَائِيلْ أَخَدَوْا بَنَاتْ الْأُمَمْ دَوْل وَ أَنْطَوْا بَنَاتْهُمْ الْحَلَالْهُمْ لِأَوْلَادْهُمْ. وَ عَبَدَوْا إِلٰـهَاتْهُمْ كُلَ.
الحاكِم عُتْنِيِيل وِلَيْد قِنَاز
7 وَ بَنِي إِسْرَائِيلْ سَوَّوْا الْفَسَالَةْ قِدَّامْ اللّٰهْ. هُمَّنْ نِسَوْا اللّٰهْ إِلٰـهُّمْ وَ عَبَدَوْا أَصْنَامْ بَعَلْ وَ أَشِيرَةْ. 8 وَ اللّٰهْ غِضِبْ غَضَبْ شَدِيدْ ضِدّ بَنِي إِسْرَائِيلْ وَ سَلَّمَاهُمْ لِكُوشَنْ رِشَعْتَايِمْ مَلِكْ أَرَامْ بَيْن الْنَّهْرَيْن. وَ بَنِي إِسْرَائِيلْ خَدَمَوْا عَبِيدْ لِكُوشَنْ رِشَعْتَايِمْ لِمُدَّةْ تَمَانَةْ سَنَةْ. 9 وَ بَنِي إِسْرَائِيلْ كَوْرَكَوْا لِلّٰهْ وَ دَوَّرَوْا الْفَزَعْ وَ اللّٰهْ رَسَّلْ لَيْهُمْ مُنَجِّي. وَ هُو عُتْنِيِيلْ وِلَيْد قِنَازْ طَرِيدَهْ لِكَالِبْ.
10 وَ رُوحْ اللّٰهْ نَزَلْ فِي عُتْنِيِيلْ وَ هُو حَكَمْ فِي بَنِي إِسْرَائِيلْ. وَ هُو مَشَى حَارَبْ كُوشَنْ رِشَعْتَايِمْ مَلِكْ بَلَدْ أَرَامْ وَ اللّٰهْ نَصَرَهْ. 11 وَ الْبَلَدْ قَاعِدَةْ فِي رَاحَةْ لِمُدَّةْ 40 سَنَةْ وَ بَعَدْ دَا، عُتْنِيِيلْ وِلَيْد قِنَازْ مَاتْ.
الحاكِم إِهُود
12 وَ بَنِي إِسْرَائِيلْ قَمَّوْا بَتَّانْ سَوَّوْا الْفَسَالَةْ قِدَّامْ اللّٰهْ. وَ فِي شَانْ دَا، اللّٰهْ أَنْطَى قُدْرَةْ لِعَقْلُونْ مَلِكْ مُوَابْ لِيُقُمّ ضِدُّهُمْ. 13 وَ عَقْلُونْ لَمَّ مَعَ بَنِي عَمُّونْ وَ الْعَمَالِقْ وَ حَارَبْ بَنِي إِسْرَائِيلْ. وَ أَنَّصَرْ فَوْقهُمْ وَ شَالْ مِنْهُمْ أَرِيحَا مَدِينَةْ النَّخَلْ. 14 وَ بَنِي إِسْرَائِيلْ خَدَمَوْا عَبِيدْ لِعَقْلُونْ مَلِكْ مُوَابْ لِمُدَّةْ 18 سَنَةْ. 15 وَ بَنِي إِسْرَائِيلْ كَوْرَكَوْا لِلّٰهْ وَ اللّٰهْ رَسَّلْ لَيْهُمْ مُنَجِّي. وَ هُو إِهُودْ الْإِسْرَايْ، وِلَيْد قِيرَا مِنْ قَبِيلَةْ بَنْيَامِينْ.
وَ بَنِي إِسْرَائِيلْ رَسَّلَوْا إِهُودْ يِوَدِّي هَدَايَا لِعَقْلُونْ مَلِكْ مُوَابْ. 16 وَ إِهُودْ سَوَّى لِنَفْسَهْ سَيْف طُولَهْ دُرَاعْ وَ طَرَّقَهْ جَايْ وَ جَايْ وَ رَبَطَهْ فِي دَارِجْتَهْ الزَّيْنَةْ بِدَاخَلْ لِخَلَقَهْ. 17 وَ وَدَّى الْهَدَايَا دَوْل لِعَقْلُونْ مَلِكْ مُوَابْ. وَ عَقْلُونْ هُو سَمِينْ مَرَّةْ وَاحِدْ. 18 وَ وَكِتْ أَنْطَى الْهَدَايَا خَلَاصْ، إِهُودْ فَاتْ مَعَ نَاسَهْ الْجَابَوْا الْهَدَايَا. 19 وَ وَكِتْ وَصَّلَوْا بَكَانْ الْأَصْنَامْ قَرِيبْ لِحِلَّةْ قِلْقَالْ، إِهُودْ قَبَّلْ لِلْمَلِكْ وَ قَالْ: «يَا الْمَلِكْ، عِنْدِي لَيْك كَلَامْ سِرّ.» وَ الْمَلِكْ أَمَرْ كُلَّ خَدَّامِينَهْ يَمْشُوا وَ هُمَّنْ مَرَقَوْا مِنْ قِدَّامَهْ. 20 وَ فِي الْوَكِتْ دَا، الْمَلِكْ قَاعِدْ فِي غُرْفِتَهْ الْبَارْدَةْ الْجَهَّزَوْهَا لَيَّهْ فَوْق. وَ إِهُودْ مَشَى قَرِيبْ لَيَّهْ وَ قَالْ: «عِنْدِي كَلَامْ مِنْ الرَّبّ نِدَوْر نُقُولَهْ لَيْك.» وَ خَلَاصْ، الْمَلِكْ قَمَّ مِنْ كُرْسِيهْ. 21 وَ طَوَّالِي بِإِيدَهْ الْإِسْرَةْ، إِهُودْ سَلَّ السَّيْف مِنْ دَارِجْتَهْ الزَّيْنَةْ وَ طَعَنَهْ لِلْمَلِكْ فِي بَطْنَهْ. 22 صَلَعَةْ السَّيْف كُلَ دَخَلَتْ فِي بَطْنَهْ وَ خَلَاصْ الشَّحَمْ سَدَّ فَوْقَهْ أَشَانْ إِهُودْ مَا سَلَّ السَّيْف مِنْ بَطُنْ الْمَلِكْ. وَ خَلَاصْ، إِهُودْ مَرَقْ مِنْ وَرَاءْ. 23 وَ قُبَّالْ مَا يُفُوتْ، هُو سَدَّ بِيبَانْ الْغُرْفَةْ وَ قَفَّلَاهُمْ.
24 وَ بَعَدْ هُو مَرَقْ، خَدَّامِينْ الْمَلِكْ جَوْا وَ لِقَوْا بِيبَانْ الْغُرْفَةْ الْفَوْق مُقَفَّلِينْ وَ قَالَوْا: «أَكِيدْ الْمَلِكْ قَاعِدْ يَقْضِي حَاجْتَهْ فِي الْغُرْفَةْ الْبَارْدَةْ.» 25 وَ هُمَّنْ أَرَّجَّوْه وَكِتْ طَوِيلْ وَ لَاكِنْ هُو مَا فَتَحْ لَيْهُمْ بِيبَانْ غُرْفِتَهْ. وَ بَعَدْ دَا، هُمَّنْ شَالَوْا الْمُفْتَاحْ وَ فَتَحَوْا الْبَابْ وَ لِقَوْا سِيدْهُمْ وَاقْعِ فِي التُّرَابْ وَ مَيِّتْ.
26 وَ وَكِتْ هُمَّنْ قَاعِدِينْ يَرْجَوْا دَا، إِهُودْ أَنْبَلَصْ وَ فَاتْ غَادِي لِبَكَانْ الْأَصْنَامْ وَ عَرَّدْ عَلَيْ سَعِيرَةْ. 27 وَ وَكِتْ وِصِلْ هِنَاكْ، ضَرَبْ الْبُوقْ فِي جِبَالْ أَفْرَايِمْ. وَ كُلَّ بَنِي إِسْرَائِيلْ نَزَلَوْا مَعَايَهْ مِنْ الْجِبَالْ وَ هُو مَاشِي قِدَّامْهُمْ. 28 وَ قَالْ لَيْهُمْ: «تَابُعُونِي أَشَانْ اللّٰهْ سَلَّمْ لَيْكُو عُدْوَانْكُو الْمُوَابِيِّينْ فِي إِيدَيْكُو.» وَ هُمَّنْ نَزَلَوْا وَرَايَهْ وَ شَالَوْا الْمَعَدّ هَنَا بَحَرْ الْأُرْدُنْ مِنْ الْمُوَابِيِّينْ وَ مَا خَلَّوْا نَادُمْ وَاحِدْ كُلَ يُشُقّ الْبَحَرْ دَا. 29 وَ فِي الْوَكِتْ دَا، كَتَلَوْا مِنْ الْمُوَابِيِّينْ قَرِيبْ 10 000 رَاجِلْ، كُلُّهُمْ عِنْدُهُمْ قُدْرَةْ وَ فَحَلِينْ. وَ نَادُمْ وَاحِدْ كُلَ مِنْهُمْ مَا نِجِي.
30 وَ مِنْ الْيَوْم دَا، الْمُوَابِيِّينْ قَعَدَوْا تِحِتْ حُكُمْ بَنِي إِسْرَائِيلْ وَ الْبَلَدْ قَاعِدَةْ فِي رَاحَةْ لِمُدَّةْ 80 سَنَةْ.
الحاكِم شَمْقَر
31 وَ بَعَدْ إِهُودْ، حَكَمْ شَمْقَرْ وِلَيْد عَنَاةْ. وَ شَمْقَرْ دَا كَتَلْ 600 رَاجِلْ مِنْ الْفِلِسْطِيِّينْ بِكَوْكَابْ هَنَا قَرِنْ تَوْر وَ هُو كُلَ نَجَّى بَنِي إِسْرَائِيلْ.
© La Bible en arabe tchadien © Alliance biblique du Tchad, 2019
