دَبُورَة و بَارَاق
1 وَ بَعَدْ إِهُودْ مَاتْ، بَنِي إِسْرَائِيلْ قَمَّوْا بَتَّانْ سَوَّوْا الْفَسَالَةْ قِدَّامْ اللّٰهْ. 2 وَ اللّٰهْ سَلَّمَاهُمْ لِيَابِينْ مَلِكْ كَنْعَانْ الْحَاكِمْ فِي مَدِينَةْ حَاصُورْ. وَ قَايِدْ دَيْشَهْ أُسْمَهْ سِيسْرَا وَ سِيسْرَا دَا سَاكِنْ فِي حَرُوشَةْ قُويِمْ. 3 وَ بَنِي إِسْرَائِيلْ صَرَخَوْا لِلّٰهْ أَشَانْ سِيسْرَا عِنْدَهْ 900 عَرَبَةْ هِنْت حَدِيدْ وَ هُو ظَلَمْهُمْ لِبَنِي إِسْرَائِيلْ ظُلُمْ شَدِيدْ لِمُدَّةْ 20 سَنَةْ.
4 وَ فِي الْوَكِتْ دَاكْ، دَبُورَةْ النَّبِيَّةْ قَاعِدَةْ تَحْكِمْ فِي بَنِي إِسْرَائِيلْ. وَ رَاجِلْهَا أُسْمَهْ لَفِيدُوتْ. 5 وَ هِي سَكَنَتْ تِحِتْ نَخَلْ الْبِنَادُوهْ دَبُورَةْ أَمْبَيْن حِلَّةْ الرَّامَةْ وَ حِلَّةْ بَيْت إِيلْ فِي جِبَالْ أَفْرَايِمْ. وَ بَنِي إِسْرَائِيلْ يَمْشُوا لَيْهَا وَ هِي تِسَوِّي لَيْهُمْ شَرِيعَةْ أَمْبَيْنَاتْهُمْ.
6 وَ يَوْم وَاحِدْ، هِي رَسَّلَتْ نَادَتْ بَارَاقْ وِلَيْد أَبِنُوعَمْ مِنْ قَدَشْ تُرَابْ نَفْتَالِي وَ قَالَتْ لَيَّهْ: «اللّٰهْ إِلٰـهْ بَنِي إِسْرَائِيلْ أَمَرَكْ بِالْكَلَامْ دَا: ‹يَلَّا قُمّ أَمْشِي لِجَبَلْ تَابُورْ وَ شِيلْ مَعَاكْ 10 000 رَاجِلْ مِنْ قَبَايِلْ نَفْتَالِي وَ زَبُلُونْ. 7 وَ أَنَا نِلِزّ سِيسْرَا قَايِدْ دَيْش يَابِينْ لِيِحَارِبْكُو هُو وَ كُلَّ عَسْكَرَهْ وَ عَرَبَاتَهْ هَنَا الْحَرِبْ وَ نِجِيبْهُمْ فِي وَادِي قِيشُونْ. وَ نِسَلِّمْهُمْ لَيْك فِي إِيدَيْنَكْ.›» 8 وَ بَارَاقْ قَالْ لِدَبُورَةْ: «كَنْ تَمْشِي مَعَايِ، نَمْشِي. وَ لَاكِنْ كَنْ مَا تَمْشِي مَعَايِ، أَنَا مَا نَمْشِي.» 9 وَ هِي قَالَتْ لَيَّهْ: «خَلَاصْ أَنَا نَمْشِي مَعَاكْ. وَ لَاكِنْ فِي الطَّرِيقْ التَّمْشِي فَوْقَهْ، الشَّرَفْ مَا يُكُونْ لَيْك إِنْتَ أَشَانْ اللّٰهْ يِسَلِّمْ سِيسْرَا فِي إِيدَيْن هَنَا مَرَةْ بَسْ.» وَ خَلَاصْ، دَبُورَةْ قَمَّتْ مَشَتْ لِبَارَاقْ فِي قَدَشْ. 10 وَ فِي قَدَشْ، بَارَاقْ نَادَى رُجَالْ قَبَايِلْ زَبُلُونْ وَ نَفْتَالِي وَ هُمَّنْ مَشَوْا مَعَايَهْ وَ عَدَدْهُمْ 10 000 رَاجِلْ. وَ دَبُورَةْ كُلَ مَشَتْ مَعَاهُمْ.
11 وَ فِي الْوَكِتْ دَا، حَابَرْ الْقِينِي أَنْفَرَقْ مِنْ الْقِينِيِّينْ الْآخَرِينْ الْمِنْ عِيَالْ حُبَابْ نَسِيبْ مُوسَى. وَ بَنَى خَيْمِتَهْ جَنْب الشَّدَرَةْ الْكَبِيرَةْ هَنَا صَعْنَنِيمْ قَرِيبْ لِقَدَشْ.
12 وَ جَوْا خَبَّرَوْه لِسِيسْرَا كَدَرْ بَارَاقْ وِلَيْد أَبِنُوعَمْ وَ دَيْشَهْ طَلَعَوْا فِي جَبَلْ تَابُورْ. 13 وَ خَلَاصْ سِيسْرَا لَمَّ كُلَّ عَرَبَاتَهْ هَنَا الْحَدِيدْ الْعَدَدْهُمْ 900 وَ كُلَّ دَيْشَهْ. وَ قَمَّ مِنْ حَرُوشَةْ قُويِمْ وَ مَشَى لِوَادِي قِيشُونْ. 14 وَ دَبُورَةْ قَالَتْ لِبَارَاقْ: «يَلَّا قُمّ! الْيَوْم بَسْ اللّٰهْ يِسَلِّمْ لَيْك سِيسْرَا فِي إِيدَيْنَكْ. أَيْوَى، اللّٰهْ مَشَى قِدَّامَكْ.»
وَ خَلَاصْ، بَارَاقْ نَزَلْ مِنْ جَبَلْ تَابُورْ وَ مَعَايَهْ 10 000 رَاجِلْ. 15 وَ اللّٰهْ هَزَمْ سِيسْرَا بِعَرَبَاتَهْ وَ عَسْكَرَهْ قِدَّامْ بَارَاقْ وَ دَيْشَهْ. وَ سِيسْرَا أَدَّلَّ مِنْ عَرَبَتَهْ وَ عَرَّدْ بِرِجِلَيْنَهْ. 16 وَ بَارَاقْ تَابَعْ الْعَرَبَاتْ وَ الْعَسْكَرْ لَحَدِّي حَرُوشَةْ قُويِمْ. وَ كُلَّ عَسْكَرْ سِيسْرَا كَتَلَوْهُمْ بِالْسَّيْف وَ وَاحِدْ كُلَ مِنْهُمْ مَا فَضَّلْ.
17 وَ لَاكِنْ سِيسْرَا عَرَّدْ بِرِجِلَيْنَهْ لَحَدِّي خَيْمَةْ يَاعِلْ مَرِةْ حَابَرْ الْقِينِي أَشَانْ فِي سَلَامْ أَمْبَيْن يَابِينْ مَلِكْ حَاصُورْ وَ عَايِلَةْ حَابَرْ الْقِينِي. 18 وَ يَاعِلْ مَرَقَتْ لَاقَتْ سِيسْرَا وَ قَالَتْ لَيَّهْ: «تَعَالْ أَدْخُلْ هِنِي فِي بَكَانِي، يَا سَيِّدِي. وَ مَا تَخَافْ.» وَ هُو دَخَلْ فِي خَيْمِتْهَا وَ هِي غَطَّتَهْ بِغَطَّايْ وَ لَبَّدَتَهْ. 19 وَ هُو قَالْ لَيْهَا: «أَنَا عَطْشَانْ. مِنْ فَضُلْكِ، أَنْطِينِي أَلْمِي شِيَّةْ نَشْرَبْ.» وَ يَاعِلْ شَالَتْ بُخْسَةْ مَلَانَةْ لَبَنْ وَ أَنْطَتَهْ شِرِبْ مِنْهَا. وَ بَعَدْ دَا، غَطَّتَهْ بَتَّانْ بِالْغَطَّايْ. 20 وَ هُو قَالْ لَيْهَا: «أَقْعُدِي فِي مَدَخَلْ الْخَيْمَةْ. أَكُونْ نَادُمْ يَسْأَلْكِ وَ يُقُولْ: ‹فِي نَادُمْ هِنِي وَلَّا؟› خَلَاصْ، قُولِي لَيَّهْ: ‹لَا! مَا فِيهْ.›»
21 وَ لَاكِنْ وَكِتْ سِيسْرَا نَايِمْ مِنْ الْعَيَا، يَاعِلْ مَرِةْ حَابَرْ شَالَتْ وِتِدْ مِنْ وُتَادْ الْخَيْمَةْ وَ مِطْرَقَةْ وَ دَخَلَتْ بِشَيْش جَنْبَهْ. وَ هِي طَعَنَتَهْ بِالْوِتِدْ فِي رَاسَهْ لَحَدِّي الْوِتِدْ أَنْدَفَنْ فِي التُّرَابْ. وَ بَيْدَا، سِيسْرَا مَاتْ. 22 وَ وَكِتْ بَارَاقْ شَايِلْ دَرِبْ سِيسْرَا جَاءْ، يَاعِلْ مَرَقَتْ لَيَّهْ لَاقَتَهْ وَ قَالَتْ: «تَعَالْ، نِوَصِّفَكْ الرَّاجِلْ الْإِنْتَ قَاعِدْ تِفَتِّشَهْ.» وَ وَكِتْ دَخَلْ فِي بَيْتهَا، هُو لِقِي سِيسْرَا وَاقْعِ مَيِّتْ وَ الْوِتِدْ فِي رَاسَهْ.
23 وَ فِي الْيَوْم دَا، الرَّبّ هَزَمْ يَابِينْ مَلِكْ كَنْعَانْ قِدَّامْ بَنِي إِسْرَائِيلْ. 24 وَ قُدْرَةْ بَنِي إِسْرَائِيلْ قَاعِدَةْ تِزِيدْ ضِدّ يَابِينْ مَلِكْ كَنْعَانْ لَحَدِّي كَتَلَوْه.
© La Bible en arabe tchadien © Alliance biblique du Tchad, 2019
