دَبُورَة غنّت بالنصُر
1 وَ فِي الْيَوْم دَا، دَبُورَةْ وَ بَارَاقْ وِلَيْد أَبِنُوعَمْ غَنَّوْا وَ قَالَوْا:
2 «فِي إِسْرَائِيلْ، أَيِّ رَاجِلْ جَاهِزْ لِلْحَرِبْ
وَ الشَّعَبْ يَمْشُوا لِلْحَرِبْ بِنِيَّةْ وَاحِدَةْ.
بَارَكْ اللّٰهْ!
3 «أَسْمَعَوْا، يَا الْمُلُوكْ،
وَ أَفْتَحَوْا أَدَانْكُو، يَا السَّلَاطِينْ.
أَنَا نِغَنِّي لِلّٰهْ
وَ لِلّٰهْ إِلٰـهْ بَنِي إِسْرَائِيلْ أَنَا نَحْمُدَهْ.
4 يَا اللّٰهْ، وَكِتْ إِنْتَ مَرَقْت مِنْ سَعِيرْ
وَ وَكِتْ إِنْتَ جِيتْ مِنْ بَلَدْ أَدَوْم،
الْأَرْض رَجَفَتْ
وَ مِنْ السَّمَاءْ، أَلْمِي صَبَّ شَدِيدْ
وَ السَّحَابْ نَزَّلْ مَطَرْ.
5 الْجِبَالْ مَاعَوْا مِثِلْ الْأَلْمِي
قِدَّامْ اللّٰهْ
أَيْوَى، جَبَلْ سِينَاء مَاعْ
قِدَّامْ اللّٰهْ إِلٰـهْ بَنِي إِسْرَائِيلْ.
6 «فِي أَيَّامْ شَمْقَرْ وِلَيْد عَنَاةْ
وَ فِي أَيَّامْ يَاعِلْ،
نَاسْ كَتِيرْ خَلَّوْا الدُّرُوبْ
وَ الْمُسَافِرِينْ يَمْشُوا بِدَبَالِيْ عُوُجْ.
7 سُكَّانْ الْحِلَّالْ خَلَّوْا حِلَّالْهُمْ
أَيْوَى، خَلَّوْا حِلَّالْهُمْ
لَحَدِّي أَنَا دَبُورَةْ جِيتْ
وَ بِقِيتْ مِثِلْ أَمّ لِبَنِي إِسْرَائِيلْ.
8 هُمَّنْ شَالَوْا لَيْهُمْ إِلٰـهَاتْ آخَرِينْ،
وَكِتْ الْحَرِبْ قَرَّبْ لِمَدَاخِلْ الْحِلَّالْ.
فِي الْوَكِتْ دَا، بِقِي لَيْنَا قَاسِي
لِنَلْقَوْا دَرَقَةْ أَوْ حَرْبَةْ
لِدَيْش إِسْرَائِيلْ
الْعَدَدْهُمْ 40 000 رَاجِلْ.
9 وَ قَلْبِي مَعَ قُيَّادْ إِسْرَائِيلْ
وَ مَعَ الشَّعَبْ
الْيِحَارُبُوا بِنِيَّةْ وَاحِدَةْ.
بَارَكْ اللّٰهْ!
10 «إِنْتُو الرَّاكْبِينْ فِي حَمِيرْ بُيُضْ
وَ إِنْتُو الْجَالْسِينْ فِي بُسَاطَاتْ
وَ إِنْتُو الْمَاشِينْ فِي الدُّرُوبْ،
فَكُّرُوا عَدِيلْ!
11 وَ الْيُصُبُّوا أَلْمِي فِي الْحِيطَانْ
غَنَّوْا بِعَمَلْ عَدَالَةْ اللّٰهْ.
وَ دَا النَّصُرْ الْأَنْطَاهْ اللّٰهْ
لِقُيَّادْ إِسْرَائِيلْ
وَكِتْ شَعَبْ اللّٰهْ نَزَلَوْا
فِي بِيبَانْ الْمَدِينَةْ.
12 «يَلَّا قُمِّي!
يَلَّا قُمِّي، يَا دَبُورَةْ.
يَلَّا قُمِّي!
يَلَّا قُمِّي وَ غَنِّي.
يَلَّا قُمّ، يَا بَارَاقْ وِلَيْد أَبِنُوعَمْ!
وَ جِيبْ مَسَاجِينَكْ.
13 «خَلَاصْ الْفَضَّلَوْا حَيِّينْ
نَزَلَوْا عَلَيْ الْكُبَارَاتْ
وَ شَعَبْ اللّٰهْ قَمَّوْا فِي شَانِي
مِثِلْ الْفُرَّاسْ.
14 الدَّمَّرَوْا الْعَمَالِقْ
مَرَقَوْا مِنْ قَبِيلَةْ أَفْرَايِمْ
وَ مَعَاهُمْ قَبِيلَةْ بَنْيَامِينْ مَعَ عَسْكَرْهُمْ.
وَ مِنْ خَشُمْ بَيْت مَكِيرْ
مَرَقَوْا الْقُيَّادْ
وَ مِنْ قَبِيلَةْ زَبُلُونْ
مَرَقَوْا كُبَارَاتْ الْعَسْكَرْ.
15 وَ كُبَارَاتْ قَبِيلَةْ يَسَّاكَرْ
أَنْضَمَّوْا لِدَبُورَةْ
وَ رُجَالْ يَسَّاكَرْ تَابَعَوْا بَارَاقْ
وَ مَشَوْا وَرَايَهْ فِي الْوَادِي.
وَ لَاكِنْ أَمْبَيْنَاتْ خُشُومْ بُيُوتْ رَأُوبِينْ
قَمَّوْا مَشَاكِلْ بَلَا حَدّ.
16 وَ مَالَا إِنْتُو قَعَدْتُوا جَنْب الزَّرَايِبْ
لِتَسْمَعَوْا بَكِي الْبَهَايِمْ
وَ تَسْمَعْ بَكِي الْمَالْ؟
وَ أَمْبَيْنَاتْ خُشُومْ بُيُوتْ رَأُوبِينْ
قَمَّوْا مَشَاكِلْ بَلَا حَدّ.
17 وَ نَاسْ قِلْعَادْ
قَعَدَوْا فِي أَرْضُهُمْ صَبَاحْ لِبَحَرْ الْأُرْدُنْ.
وَ مَالَا قَبِيلَةْ دَانْ
قَعَدَتْ جَنْب سُفُنْهَا؟
وَ قَبِيلَةْ أَشِيرْ
قَعَدَتْ فِي خَشُمْ الْبَحَرْ
وَ مَا قَمَّتْ مِنْ بَكَانْهَا فَوْقَهْ.
18 وَ لَاكِنْ قَبِيلَةْ زَبُلُونْ
دَسَّوْا نُفُوسْهُمْ فِي الْخُطُورَةْ
وَ قَبِيلَةْ نَفْتَالِي
خَاطَرَوْا بِحَيَاتْهُمْ فِي بَكَانْ الْحَرِبْ.
19 «وَ جَوْا مُلُوكْ وَ حَارَبَوْا.
خَلَاصْ، مُلُوكْ كَنْعَانْ كُلَ حَارَبَوْا.
فِي تَعْنَكْ قَرِيبْ لِأَلْمِي مَقِدُّو،
مَا لِقَوْا غَنِيمَةْ هَنَا فُضَّةْ.
20 وَ مِنْ السَّمَاءْ،
النُّجُومْ شَارَكَوْا فِي الْحَرِبْ
وَ مِنْ بَكَانْهُمْ الْبَعِيدْ،
حَارَبَوْا سِيسْرَا.
21 وَ وَادِي قِيشُونْ شَالَاهُمْ،
هُو الْوَادِي الْقَدِيمْ، وَادِي قِيشُونْ.
أَمْشِي، يَا نَفْسِي، بِقُدْرَةْ!
22 «حَرَكَةْ رِجْلَيْ الْخَيْل أَنْسَمَعَتْ
وَكِتْ قَاعِدِينْ يَجْرُوا،
يَجْرُوا مِثِلْ خَيْل السَّبَقْ.
23 وَ مَلَكْ اللّٰهْ قَالْ:
‹أَلْعَنَوْا حِلَّةْ مِرُوزْ
وَ أَلْعَنَوْا سُكَّانْهَا لَعَنَةْ شَدِيدَةْ.
أَشَانْ هُمَّنْ مَا جَوْا حَارَبَوْا لِلّٰهْ
وَ مَا جَوْا فَزَعَوْا الْفُرَّاسْ.›
24 «يَا يَاعِلْ، مَرِةْ حَابَرْ الْقِينِي،
اللّٰهْ يِبَارِكِّ مِنْ كُلَّ الْعَوِينْ.
أَيْوَى، خَلِّي اللّٰهْ يِبَارِكِّ،
مِنْ كُلَّ الْعَوِينْ السَّاكْنَاتْ فِي الْخِيَمْ.
25 وَكِتْ سِيسْرَا سَأَلْهَا أَلْمِي،
هِي أَنْطَتَهْ لَبَنْ
وَ أَنْطَتَهْ زِبْدَةْ فِي كَاسْ الْفُرَّاسْ.
26 وَ هِي شَالَتْ وِتِدْ الْخَيْمَةْ
بِإِيدْهَا الْإِسْرَةْ
وَ بِإِيدْهَا الزَّيْنَةْ،
شَالَتْ مِطْرَقَةْ الْخَدَّامْ.
وَ هِي ضَرَبَتْ سِيسْرَا
وَ رِحْكَتْ رَاسَهْ
وَ طَعَنَتَهْ فِي رَاسَهْ.
27 قِدَّامْهَا، هُو بَرَكْ
وَ وَقَعْ قِدَّامْهَا وَ رَقَدْ.
وَ الْبَكَانْ الْوَقَعْ فَوْقَهْ،
دَا بَسْ مَاتْ فَوْقَهْ.
28 «مِنْ الشُّبَّاكْ،
أَمّ سِيسْرَا قَاعِدَةْ تِشِيفْ
وَ مِنْ الشُّبَّاكْ، هِي تُقُولْ:
‹مَالَا عَرَبَاتَهْ هَنَا الْحَرِبْ مَا جَوْا؟
مَالَا عَرَبَةْ وِلَيْدِي هَنَا الْحَرِبْ أَخَّرَتْ؟›
29 وَ الْعِنْدِهِنْ حِكْمَةْ مِنْ عَوِينْ الْكُبَارَاتْ
يِكَلِّمَنْ لَيْهَا
وَ هِي تِرَدِّدْ فِي نَفِسْهَا كَلَامْهِنْ
وَ تُقُولْ:
30 ‹أَكِيدْ لِقَوْا غَنِيمَةْ
وَ قَاعِدِينْ يِقَسُّمُوهَا.
بِنْت وَاحِدَةْ أَوْ بَنَاتْ إِتْنَيْن
لِكُلِّ مُحَارِبْ.
تَوْب مُلَوَّنْ وَ مُكَلَّفْ لِسِيسْرَا
وَ كَدْمُولْ مُكَلَّفْ الْيَرْبُطُوهْ فِي رَقَبَةْ الْمُنَّصِرْ.›
31 «يَا اللّٰهْ، خَلِّي كُلَّ عُدْوَانَكْ
يِدَّمَّرَوْا مِثِلْ سِيسْرَا
وَ الْيِحِبُّوكْ
يَبْقَوْا مِثِلْ ضَيّ الْحَرَّايْ وَكِتْ تَطْلَعْ.»
وَ بَعَدْ دَا، الْبَلَدْ قَاعِدَةْ فِي رَاحَةْ لِمُدَّةْ 40 سَنَةْ.
© La Bible en arabe tchadien © Alliance biblique du Tchad, 2019
