إرْمِيا يشْكي من نجاح الفسْلين
1 يَا اللّٰهْ، إِنْتَ عَادِلْ!
وَ لَاكِنْ نِدَوْر نَشْكِي لَيْك.
أَيْوَى، نِدَوْر نِحَجِّي مَعَاكْ
فِي شَيّءْ بُخُصّ الشَّرِيعَةْ.
مَالَا الْفَسْلِينْ يَنْجَحَوْا
فِي خَطْوَاتْهُمْ؟
مَالَا الْخَايْنِينْ يَقْعُدُوا
فِي الرَّاحَةْ بِخِيَانِتْهُمْ؟
2 إِنْتَ بَسْ مَقَّنْتُهُمْ مِثِلْ شَدَرَةْ
وَ دَسَّوْا عُرُوقْهُمْ فِي التُّرَابْ
وَ كِبْرَوْا لَحَدِّي سَوَّوْا عِيَالْ.
خُشُومْهُمْ يِنَادُوا أُسْمَكْ
وَ لَاكِنْ قُلُوبْهُمْ مَا مَعَاكْ.
3 يَا اللّٰهْ! إِنْتَ تِشِيفْنِي
وَ تَكْشِفْ الْفِي قَلْبِي
وَ تَعَرِفْنِي كَدَرْ أَنَا مَعَاكْ.
وَ لَاكِنْ لِلْفَسْلِينْ دَوْل،
سُوقْهُمْ مِثِلْ غَنَمْ الْجُزُرْ
الْمُخَصَّصِينْ لِيَوْم الدَّبِحْ.
4 لَحَدِّي مَتَى الْأَرْض تَحْزَنْ
وَ يَيْبَسْ كُلَّ قَشّ الْكَدَادَةْ؟
وَ الْحَيْوَانَاتْ وَ الطُّيُورْ
يَبْقَوْا مَا فِيهُمْ
وَ دَا بِسَبَبْ فَسَالَةْ سُكَّانْهَا الْيُقُولُوا:
«هُو مَا يَعَرِفْ مُسْتَقْبَلْنَا.»
5 وَ اللّٰهْ قَالْ لَيِّ أَنَا إِرْمِيَا:
«كَنْ تَجْرِي مَعَ نَاسْ بِرِجِلَيْنَكْ وَ تَعَيَى،
كِكَّيْف تَقْدَرْ تِسَابِقْ مَعَ الْخَيْل؟
وَ كَنْ وَاجِبْ لَيْك بَلَدْ سَلَامْ لِتِعِيشْ بِأَمَانْ،
كِكَّيْف تَقْدَرْ تِعِيشْ فِي غَابَةْ الْأُرْدُنْ؟
6 «دَاهُو أَخْوَانَكْ عِيَالْ أَبُوكْ ذَاتْهُمْ يُخُونُوكْ. أَيْوَى، هُمَّنْ يِجْتَمُعُوا مَعَ نَاسْ آخَرِينْ وَرَاكْ. أَنْقَرِعْ، مَا تِآمِنْهُمْ حَتَّى كَنْ يِحَجُّوا لَيْك كَلَامْ حَلُو كُلَ.»
اللّه سلّم شعبه للعدو
7 وَ اللّٰهْ قَالْ:
«أَنَا نِخَلِّي بَيْتِي
وَ نَابَى شَعَبِي الْمِثِلْ وَرَثَتِي.
وَ أُمَّتِي الْمَحْبُوبَةْ،
أَنَا نِسَلِّمْهَا لِلْعَدُو.
8 وَ شَعَبِي بِقِي لَيِّ مِثِلْ دُودْ
فِي لُبّ الْغَابَةْ.
هُو يِكِرّ ضِدِّي
وَ بَيْدَا، أَنَا مَا نِحِبَّهْ.
9 وَ شَعَبِي مِثِلْ الصَّقُرْ الْأَرْقَطْ
الْيَهْجُمُوهْ الصُّقُورَةْ.
يَلَّا لِمُّوا كُلَّ حَيْوَانَاتْ الْكَدَادَةْ
وَ أَعَزُمُوهُمْ فِي الْغَدَاءْ!
10 وَ كُبَارَاتْ الْعَدُو جَوْا دَمَّرَوْا بَلَدِي
مِثِلْ رُعْيَانْ بِمَالْهُمْ
يِدَمُّرُوا جِنَيْنِتِي هَنَا الْعِنَبْ.
وَ فَجَّقَوْهَا وَ سَوَّوْهَا صَحَرَاء خَرَابْ،
هِي الْأَوَّلْ مِثِلْ زَرْعِي الْجَمِيلْ.
11 هُمَّنْ سَوَّوْهَا خَرَابْ
وَ دَاهُو هِي قِدَّامِي يَابْسَةْ وَ خَرْبَانَةْ.
أَيْوَى، الْبَلَدْ كُلَّهَا كَيْ خَرْبَانَةْ
وَ مَا فِي نَادُمْ الْيِحِنّ فَوْقهَا.»
12 وَ فِي كُلَّ رُوسَيْ الْجِبَالْ
الْمُخَرِّبِينْ جَايِينْ مِنْ الصَّحَرَاء.
سَيْف اللّٰهْ يَضْرُبْ الْأَرْض مِنْ طَرَفْهَا لِطَرَفْهَا
وَ مَا فِي سَلَامْ لِأَيِّ إِنْسَانْ.
13 إِنْتُو تَيْرَبْتُوا الْقَمَحْ
وَ لِقِيتُوا الْحَسْكَنِيتْ بَسْ
وَ عَيَّيْتُوا نُفُوسْكُو بَلَا فَايْدَةْ.
وَ الْعَيْب كَرَبْكُو مِنْ نَتِيجَةْ خِدْمِتْكُو
وَ دَا بِسَبَبْ غَضَبْ اللّٰهْ الْمُحْرِقْ.
اللّه يهدِّد جيران شعبه
14 وَ دَاهُو اللّٰهْ قَالْ: «كُلَّ الْجِيرَانْ الْفَسْلِينْ الْيِلَمُّسُوا الْأَرْض الْأَنَا أَنْطَيْتهَا وَرَثَةْ لِشَعَبِي بَنِي إِسْرَائِيلْ، أَنَا نِمَلِّطْهُمْ مِثِلْ شَدَرَةْ مِنْ أَرْضُهُمْ. وَ بَنِي يَهُوذَا كُلَ نِمَلِّطْهُمْ مِنْ أُسُطْهُمْ. 15 وَ لَاكِنْ بَعَدْ مَلَّطْتُهُمْ، بَتَّانْ أَنَا نَرْحَمْهُمْ وَ نِقَبِّلْهُمْ أَيِّ وَاحِدْ فِي أَرْض وَرَثَتَهْ وَ أَيِّ وَاحِدْ فِي بَلَدَهْ. 16 أَوَّلْ الْأُمَمْ دَوْل عَلَّمَوْا شَعَبِي يَحَلْفُوا بِبَعَلْ. وَ لَاكِنْ هَسَّعْ، كَنْ هُمَّنْ يِتَابُعُوا دَرِبْ شَعَبِي وَ يَحَلْفُوا بِأُسْمِي أَنَا اللّٰهْ الْحَيّ، خَلَاصْ يَسْكُنُوا بِأَمَانْ فِي أُسُطْ شَعَبِي. 17 وَ لَاكِنْ الْأُمَّةْ الْمَا تَسْمَعْ كَلَامِي دَا، أَنَا نِمَلِّطْهَا مَرَّةْ وَاحِدْ وَ نِوَدِّرْهَا.» وَ دَا كَلَامْ اللّٰهْ.
© La Bible en arabe tchadien © Alliance biblique du Tchad, 2019
