اللّه يكسِّر مدينة القدس
1 وَ دَاهُو اللّٰهْ قَالْ لِإِرْمِيَا: «أَمْشِي لِدَقَّاقْ الْجِرَارْ وَ أَشْرِي لَيْك إِبْرِيقْ هَنَا طِينَةْ. وَ شِيلْ مَعَاكْ مِنْ كُبَارَاتْ الشَّعَبْ وَ مِنْ كُبَارَاتْ رُجَالْ الدِّينْ. 2 وَ أَمْشِي مَعَاهُمْ عَلَيْ وَادِي بَنِي هِنُّومْ فِي خَشُمْ بَابْ الشِّقَفْ وَ هِنَاكْ بَلِّغْ بِالْكَلَامْ الْأَنَا نُقُولَهْ لَيْك.
3 «وَ قُولْ: ‹يَا مُلُوكْ بَلَدْ يَهُوذَا وَ يَا سُكَّانْ مَدِينَةْ الْقُدُسْ، أَسْمَعَوْا كَلَامْ اللّٰهْ. دَاهُو اللّٰهْ الْقَادِرْ إِلٰـهْ بَنِي إِسْرَائِيلْ قَالْ: ”أَنَا نِجِيبْ فِي الْبَكَانْ دَا فَسَالَةْ وَ أَيِّ نَادُمْ الْيَسْمَعْ بَيْهَا يِنْبَهِتْ. 4 أَشَانْ هُمَّنْ أَبَوْنِي وَ نَكَرَوْا الْبَكَانْ دَا وَ حَرَّقَوْا بَخُورْ لِإِلٰـهَاتْ آخَرِينْ الْأَوَّلْ مَا يَعَرْفُوهُمْ وَ لَا هُمَّنْ وَ لَا جُدُودْهُمْ وَ لَا مُلُوكْ يَهُوذَا. وَ هُمَّنْ دَفَّقَوْا دَمّ الْبَرِيِّينْ وَ مَلَوْا بَيَّهْ الْبَكَانْ دَا. 5 وَ بَنَوْا مَدْبَحْ لِيِقَدُّمُوا فَوْقَهْ أَوْلَادْهُمْ ضَحَايَا مُحَرَّقِينْ لِإِلٰـهْ بَعَلْ. وَ دَا، أَنَا مَا أَمَرْتُهُمْ بَيَّهْ وَ لَا كَلَّمْتُهُمْ بَيَّهْ وَ لَا فَكَّرْت فَوْقَهْ يَوْم وَاحِدْ. 6 وَ فِي شَانْ دَا يَجِي يَوْم وَاحِدْ، بَتَّانْ مَا يِنَادُوا الْبَكَانْ دَا تُوفَةْ وَ لَا وَادِي بَنِي هِنُّومْ. وَ لَاكِنْ يِنَادُوهْ وَادِي الْجَنَازَاتْ.“› وَ دَا كَلَامْ اللّٰهْ.
7 «وَ فِي الْبَكَانْ دَا بَسْ، أَنَا نِفَشِّلْ شَوْرَةْ نَاسْ بَلَدْ يَهُوذَا وَ سُكَّانْ مَدِينَةْ الْقُدُسْ. وَ يُمُوتُوا فِي الْحَرِبْ قِدَّامْ عُدْوَانْهُمْ وَ بِإِيدَيْن النَّاسْ الْيِدَوْرُوا مَوْتهُمْ. وَ نَنْطِي جَنَازَاتْهُمْ لِلصُّقُورَةْ وَ الْمَرَافْعِينْ يَاكُلُوهُمْ. 8 وَ نِسَوِّي الْمَدِينَةْ دِي تَبْقَى خَرَابْ وَ بَهِيتَةْ وَ أَيِّ نَادُمْ الْيُفُوتْ جَنْبَهَا يِلْعَجَّبْ وَ يِصَفِّرْ مِنْ الدَّمَارْ الْفَوْقهَا. 9 وَ أَنَا نِنَزِّلْ لَيْهُمْ جُوعْ شَدِيدْ لَحَدِّي يَاكُلُوا أَوْلَادْهُمْ وَ بَنَاتْهُمْ وَ أَيِّ وَاحِدْ يَاكُلْ أَخُوهْ تِحِتْ الْحِصَارْ وَ الضِّيقَةْ. وَ عُدْوَانْهُمْ الْيِدَوْرُوا مَوْتهُمْ يِضَايُقُوهُمْ.
10 «وَ إِنْتَ، يَا إِرْمِيَا، كَسِّرْ الْإِبْرِيقْ الشَّرَيْتَهْ دَا قِدَّامْ الْكُبَارَاتْ الْمَشَوْا مَعَاكْ. 11 وَ قُولْ لَيْهُمْ: ‹دَاهُو اللّٰهْ الْقَادِرْ قَالْ: ”أَنَا نِكَسِّرْ الشَّعَبْ دَا وَ الْمَدِينَةْ دِي مِثِلْ كَسَّرْت الْإِبْرِيقْ دَا وَ هُو بَتَّانْ مَا يِلْعَدَّلْ. وَ يَدْفُنُوا الْجَنَازَاتْ فِي تُوفَةْ لَحَدِّي تِنْمَلِي وَ مَا تَقْدَرْ تِشِيلْهُمْ. 12 وَ دَا بَسْ الشَّيّءْ النِّسَوِّيهْ فِي الْمَدِينَةْ دِي وَ فِي سُكَّانْهَا. وَ نِسَوِّي الْمَدِينَةْ دِي مِثِلْ تُوفَةْ. وَ دَا كَلَامْ اللّٰهْ. 13 وَ بُيُوتْ مَدِينَةْ الْقُدُسْ وَ قُصُورْ مُلُوكْ يَهُوذَا يَبْقَوْا نِجْسِينْ مِثِلْ تُوفَةْ. أَشَانْ فِي رُوسَيْ الْبُيُوتْ دَوْل، حَرَّقَوْا بَخُورْ لِكُلَّ قُوَّاتْ السَّمَاءْ وَ قَدَّمَوْا هَدَايَا شَرَابْ لِإِلٰـهَاتْ آخَرِينْ.“›»
14 وَ إِرْمِيَا قَبَّلْ مِنْ تُوفَةْ وَ دَا الْبَكَانْ الرَّسَّلَهْ اللّٰهْ لِيِتْنَبَّأْ فَوْقَهْ. وَ بَعَدْ دَا، جَاءْ وَقَفْ فِي الْفَضَايْ هَنَا بَيْت اللّٰهْ وَ قَالْ لِكُلَّ الشَّعَبْ: 15 «دَاهُو اللّٰهْ الْقَادِرْ إِلٰـهْ بَنِي إِسْرَائِيلْ قَالْ: ‹أَكِيدْ أَنَا نِجِيبْ فِي الْمَدِينَةْ دِي وَ فِي كُلَّ الْحِلَّالْ التَّابْعِينْ لَيْهَا الْفَسَالَةْ الْقُلْت نِجِيبْهَا فَوْقهُمْ. أَشَانْ سُكَّانْهُمْ قَوَّوْا رُوسَيْهُمْ وَ مَا دَوَّرَوْا يَسْمَعَوْا كَلَامِي.›»
© La Bible en arabe tchadien © Alliance biblique du Tchad, 2019
