اللّه عرّف إرْمِيا بمَثَل
1 وَ نَبُوخَدْنَصَرْ مَلِكْ بَابِلْ شَالْ يُيَكِينْ وِلَيْد يَهُويَقِمْ مَلِكْ يَهُوذَا وَ كُبَارَاتْ يَهُوذَا وَ الصِّنَاعِيِينْ وَ الْحَدَّادْ وَ وَدَّاهُمْ فِي الْغُرْبَةْ فِي بَابِلْ. وَ بَعَدْ دَا، اللّٰهْ شَوَّفَانِي إِتْنَيْن قُفَفْ مَلَانِينْ بِفَوَاكِهْ التِّينْ وَ قَاعِدِينْ قِدَّامْ بَيْت اللّٰهْ. 2 وَ الْقُفَّةْ الْوَاحِدَةْ مَلَانَةْ بِتِينْ سَمَحْ مِنْ النَّوْع الْعَدِيلْ. وَ لَاكِنْ الْقُفَّةْ الْآخَرَةْ مَلَانَةْ بِتِينْ مُعَفَّنْ، أَبَداً مَا بِنْأَكِلْ.
3 وَ خَلَاصْ، اللّٰهْ قَالْ لَيِّ: «يَا إِرْمِيَا، قَاعِدْ تِشِيفْ شُنُو؟» وَ أَنَا قُلْت: «قَاعِدْ نِشِيفْ تِينْ. وَ التِّينْ الْوَاحِدْ دَا سَمَحْ مَرَّةْ وَاحِدْ مِنْ النَّوْع الْعَدِيلْ. وَ التِّينْ الْآخَرْ دَا مُعَفَّنْ، أَبَداً مَا بِنْأَكِلْ.» 4 وَ خَلَاصْ، اللّٰهْ حَجَّى لَيِّ وَ قَالْ: 5 «دَاهُو اللّٰهْ إِلٰـهْ بَنِي إِسْرَائِيلْ قَالْ: ‹التِّينْ السَّمَحْ دَا، هُو يِمَثِّلْ شَعَبْ يَهُوذَا الْأَنَا مَرَقْتُهُمْ مِنْ الْبَلَدْ دِي وَ وَدَّيْتهُمْ فِي الْغُرْبَةْ فِي بَابِلْ وَ دَا لِخَيْرهُمْ. 6 وَ أَنَا نِرَاقِبْهُمْ بِرَحْمَةْ لَحَدِّي نِقَبِّلْهُمْ فِي بَلَدْهُمْ وَ نَبْنِيهُمْ مِثِلْ بَيْت وَ أَبَداً مَا نَخْرِبْهُمْ. وَ نِثَبِّتْهُمْ وَ أَبَداً مَا نَمْرُقْهُمْ. 7 وَ نَنْطِيهُمْ فِكِرْ ثَابِتْ الْبَيَّهْ يَقْدَرَوْا يَعَرْفُونِي كَدَرْ أَنَا بَسْ اللّٰهْ. وَ هُمَّنْ يَبْقَوْا شَعَبِي وَ أَنَا نَبْقَى إِلٰـهُّمْ. وَ يِقَبُّلُوا لَيِّ بِكُلَّ قُلُوبْهُمْ.›»
8 وَ دَاهُو كَلَامْ اللّٰهْ الْبُخُصّ صِدْقِيَّا مَلِكْ يَهُوذَا وَ كُبَارَاتَهْ وَ كُلَّ الْفَضَّلَوْا فِي مَدِينَةْ الْقُدُسْ وَ كُلَّ الْفَضَّلَوْا فِي الْبَلَدْ دِي وَ كُلَّ السَّاكْنِينْ فِي بَلَدْ مَصِرْ. هُو قَالْ: «نِسَوِّيهُمْ مِثِلْ التِّينْ الْمُعَفَّنْ الْمَا بِنْأَكِلْ. 9 وَ يَبْقَوْا مَثَلْ الْبِخَوِّفْ كُلَّ مَمَالِكْ الْأَرْض وَ فِي كُلَّ بَكَانْ النِّشَتِّتْهُمْ فَوْقَهْ، هُمَّنْ يَبْقَوْا حِجَّيَّة وَ مَضْحَكَةْ لِلنَّاسْ وَ مُعْيَارْ وَ لَعَنَةْ. 10 وَ أَنَا نِجِيبْ فَوْقهُمْ الْحَرِبْ وَ الْجُوعْ وَ الْوَبَاءْ لَحَدِّي يِنْقَشَّوْا مَرَّةْ وَاحِدْ مِنْ الْأَرْض الْأَنَا أَنْطَيْتهَا لَيْهُمْ وَ لِجُدُودْهُمْ.»
© La Bible en arabe tchadien © Alliance biblique du Tchad, 2019
