الشعب كدبوا إرْمِيا
1 وَ إِرْمِيَا كَمَّلْ مِنْ كَلَامَهْ لِكُلَّ الشَّعَبْ وَ دَا كُلَّ كَلَامْ اللّٰهْ إِلٰـهُّمْ الْكَلَّفَهْ لِيُقُولَهْ لَيْهُمْ. 2 وَ عَزَرْيَا وِلَيْد هُشَاعْيَا وَ يُوحَنَانْ وِلَيْد قَارِحْ وَ كُلَّ الرُّجَالْ الْمُسْتَكْبِرِينْ دَوْل قَالَوْا لِإِرْمِيَا: «كَلَامَكْ دَا كِدِبْ! مَا صَحِيحْ. وَ اللّٰهْ إِلٰـهْنَا كُلَ مَا كَلَّفَاكْ لِتُقُولْ لَيْنَا مَا نَمْشُوا مَصِرْ لِنَسْكُنُوا هِنَاكْ. 3 وَ لَاكِنْ دَا بَرُوكْ وِلَيْد نَرِيَّا بَسْ قَاعِدْ يِحَرِّشَكْ لِتِسَوِّي لَيْنَا الْفَسَالَةْ وَ تِسَلِّمْنَا لِلْبَابِلِيِّينْ. وَ هُمَّنْ يَكْتُلُونَا أَوْ يِوَدُّونَا فِي الْغُرْبَةْ فِي بَابِلْ.»
4 وَ خَلَاصْ، يُوحَنَانْ وِلَيْد قَارِحْ وَ كُلَّ كُبَارَاتْ الرُّجَالْ الْمُسَلَّحِينْ وَ كُلَّ الشَّعَبْ مَا سِمْعَوْا أَمُرْ اللّٰهْ الْقَالْ يَسْكُنُوا فِي بَلَدْ يَهُوذَا. 5 وَ يُوحَنَانْ وِلَيْد قَارِحْ وَ كُلَّ كُبَارَاتْ الرُّجَالْ الْمُسَلَّحِينْ شَالَوْا كُلَّ الْفَضَّلَوْا مِنْ بَنِي يَهُوذَا الْقَبَّلَوْا مِنْ الْبُلْدَانْ الْهُمَّنْ مُشَتَّتِينْ فَوْقهُمْ وَ سَاكْنِينْ فِي بَلَدْ يَهُوذَا. 6 وَ شَالَوْا بَتَّانْ الرُّجَالْ وَ الْعَوِينْ وَ الْعِيَالْ وَ بَنَاتْ الْمَلِكْ وَ كُلَّ النَّاسْ النَّبُوزَرَدَانْ كَبِيرْ الْحُرَّاسْ أَمَّنَاهُمْ لِقَدَالْيَا وِلَيْد أَخِقَامْ وِلَيْد شَافَانْ. وَ شَالَوْا مَعَاهُمْ بَتَّانْ النَّبِي إِرْمِيَا وَ بَرُوكْ وِلَيْد نَرِيَّا. 7 النَّاسْ دَوْل مَشَوْا لِحِلَّةْ تَحْفَنِيسْ فِي مَصِرْ أَشَانْ هُمَّنْ مَا سِمْعَوْا كَلَامْ اللّٰهْ.
نَبُوخَدْنَصَر يجي مَصِر
8 وَ خَلَاصْ، اللّٰهْ حَجَّى لِإِرْمِيَا فِي حِلَّةْ تَحْفَنِيسْ وَ قَالْ: 9 «أَمْشِي شِيلْ حُجَارْ إِتْنَيْن كُبَارْ وَ أَدْفِنْهُمْ فِي الْفَضَايْ قِدَّامْ مَدَخَلْ قَصِرْ فِرْعَوْن فِي تَحْفَنِيسْ. وَ الْحُجَارْ دَوْل أَدْفِنْهُمْ قِدَّامْ بَنِي يَهُوذَا. 10 وَ قُولْ لَيْهُمْ: ‹دَاهُو اللّٰهْ الْقَادِرْ إِلٰـهْ بَنِي إِسْرَائِيلْ قَالْ: ”أَنَا نِرَسِّلْ نِجِيبْ عَبْدِي نَبُوخَدْنَصَرْ مَلِكْ بَابِلْ وَ نُخُطّ كُرْسِيهْ هَنَا الْمُلُكْ فِي الْحُجَارْ الْمُلَبَّدِينْ دَوْل. وَ هُو يُخُطّ ضَلَّالْتَهْ فِي الْبَكَانْ دَا. 11 وَ هُو يَجِي يِحَارِبْ بَلَدْ مَصِرْ. وَ الْوَاجِبْ لَيَّهْ الْمَوْت، يَكْتُلُوهْ وَ الْوَاجِبْ لَيَّهْ الْعُبُودِيَّةْ، يِعَبُّدُوهْ وَ الْوَاجِبْ لَيَّهْ ضَرِبِينْ السَّيْف، يَضُرْبُوهْ. 12 وَ أَنَا نَحْرِقْ بُيُوتْ الْإِلٰـهَاتْ فِي مَصِرْ بِإِيدْ نَبُوخَدْنَصَرْ وَ هُو يَحْرِقْ الْأَصْنَامْ أَوْ يِوَدِّيهُمْ مَسَاجِينْ. وَ هُو يَنْهَبْ بَلَدْ مَصِرْ وَ يِلَقِّطْ خُمَامْهَا مِثِلْ الرَّاعِي يِلَقِّطْ الْقَمُلْ مِنْ خَلَقَهْ. وَ بَعَدْ دَا، يَمْرُقْ مِنْهَا بِالسَّلَامْ. 13 هُو يَرْمِي الْعَمَدْ الْغَزَّوْهُمْ فِي بَيْت عِبَادَةْ الْحَرَّايْ فِي مَصِرْ وَ يَحْرِقْ بُيُوتْ إِلٰـهَاتْ مَصِرْ.“›»
© La Bible en arabe tchadien © Alliance biblique du Tchad, 2019
