كلام اللّه ضِدّ بلد مُوَاب
1 كَلَامْ بُخُصّ مُوَابْ. دَاهُو اللّٰهْ الْقَادِرْ إِلٰـهْ بَنِي إِسْرَائِيلْ قَالْ:
«يَا خَسَارَةْ حِلَّةْ نَبُو
أَشَانْ هِي أَدَّمَّرَتْ!
وَ حِلَّةْ قِرْيَتَايِمْ عَايْبَةْ وَ مَكْرُوبَةْ
وَ الْحِلَّةْ الْقَوِيَّةْ كُلَ عَايْبَةْ وَ مُبَرْجَلَةْ.
2 وَ مُوَابْ بَتَّانْ مَا تُكُونْ بَلَدْ مَعْرُوفَةْ
وَ ضِدّ مَدِينَةْ حَشْبُونْ، خَطَّطَوْا الْفَسَالَةْ.
وَ قَالَوْا: ‹يَلَّا نَمْشُوا!
نُقُشُّوهَا مِنْ أُسْط الْأُمَمْ.›
وَ إِنْتِ كُلَ، يَا حِلَّةْ مَدْمِينْ، يِسَكُّتُوكِ
وَ السَّيْف يَجْرِي وَرَاكِ.
3 وَ فِي حِلَّةْ حُرُنَايِمْ،
حِسّ يَصْرَخْ وَ يُقُولْ:
‹دَمَارْ
وَ خَرَابْ كَبِيرْ مَرَّةْ وَاحِدْ!›
4 مُوَابْ تِلْكَسَّرْ
وَ عِيَالْهَا كُرَوْرَاكْهُمْ يِنْسَمِعْ.
5 أَشَانْ بِبَكِي، الْعِيَالْ يَطْلَعَوْا
وَ فِي طَلُوعْ لُحِيتْ يَبْكُوا.
وَ وَكِتْ يَنْزُلُوا لِحِلَّةْ حُرُنَايِمْ،
هُمَّنْ يَصْرَخَوْا مِنْ الدَّمَارْ
وَ يُقُولُوا:
6 ‹عَرُّدُوا وَ نَجُّوا نُفُوسْكُو
وَ أَبْقَوْا مِثِلْ حُمَارْ الْكَدَادَةْ!›
7 يَا مُوَابْ! إِنْتِ أَتْوَكَّلْتِ
فِي أَعْمَالْكِ وَ فِي غُنَاكِ
وَ فِي شَانْ دَا، إِنْتِ كُلَ تِنْكَرْبِي.
وَ صَنَمْكِ كَمُوشْ يِوَدُّوهْ فِي الْغُرْبَةْ
مَعَ رُجَالْ الدِّينْ هِنَيْه وَ خَدَّامِينَهْ.
8 الْمُدَمِّرْ يَدْخُلْ فِي كُلِّ حِلَّةْ،
مَا فِي حِلَّةْ تَنْجَى مِنَّهْ.
الْوَادِي يِدَّمَّرْ وَ السَّهَلَةْ تَخْرَبْ
أَشَانْ أَنَا اللّٰهْ بَسْ قُلْتَهْ.
9 أَنْطُوهَا لِمُوَابْ جَنَاحَيْ
لِتِطِيرْ وَ تِبَعِّدْ.
أَشَانْ مُدُنْهَا يَخْرَبَوْا
وَ يَبْقَوْا فَاضِيِينْ مِنْ سُكَّانْهُمْ.
10 مَلْعُونْ الْيِسَوِّي عَمَلْ اللّٰهْ بِكَسَلْ
وَ مَلْعُونْ الْيَمْنَعْ سَيْفَهْ مِنْ الدَّمّ.»
11 «مُوَابْ قَاعِدَةْ فِي الرَّاحَةْ مِنْ صُبَاهَا
مِثِلْ الْخَمَرْ الْقَاعِدْ فِي رِنْدِيهْ
وَ مَا صَبَّوْه فِي مَاعُونْ آخَرْ.
هِي مَا وَدَّوْهَا فِي الْغُرْبَةْ.
هِي مِثِلْ الْخَمَرْ الطَّعَمَهْ مَا وَدَّرْ
وَ رِيحْتَهْ مَا أَلْبَدَّلَتْ.»
12 وَ دَاهُو كَلَامْ اللّٰهْ: «مِثِلْ دَا، يَجِي يَوْم وَاحِدْ الْفَوْقَهْ أَنَا نِرَسِّلْ نَاسْ يُصُبُّوهْ فِي قِرَبْ آخَرِينْ وَ يِفَضُّوا قِرَبَّهْ وَ يِشَرُّطُوهُمْ. 13 وَ فِي الْوَكِتْ دَاكْ، مُوَابْ تَخْجَلْ مِنْ صَنَمْهَا كَمُوشْ مِثِلْ بَنِي إِسْرَائِيلْ خِجْلَوْا مِنْ صَنَمْهُمْ الْفِي بَيْت إِيلْ الْأَوَّلْ هُمَّنْ آمَنَوْا بَيَّهْ.»
14 «يَا نَاسْ مُوَابْ،
كِكَّيْف تَقْدَرَوْا تُقُولُوا:
‹أَنِحْنَ رُجَالْ فَحَلِينْ
وَ فُرَّاسْ هَنَا حَرِبْ؟›
15 مُوَابْ تَخْرَبْ وَ حِلَّالْهَا يَحْرَقَوْا
وَ شَبَابْهَا الْعَدِيلِينْ يَكْتُلُوهُمْ.
وَ دَا كَلَامْ الْمَلِكْ وَ هُو اللّٰهْ الْقَادِرْ.16 وَ خَرَابْ مُوَابْ قَرَّبْ يَجِي
وَ فَسَالِتْهَا جَايَةْ بِسُرْعَةْ.
17 وَ إِنْتُو كُلُّكُو الْمُحَوِّقِينْ مُوَابْ،
أَبْكُوا لَيْهَا.
إِنْتُو كُلُّكُو التَّعَرْفُوهَا،
أَسْأَلَوْا وَ قُولُوا:
‹دَا كِكَّيْف! عَصَاةْ قُدْرِتْهَا أَنْشَقَّتْ
وَ عَصَاةْ مَجْدَهَا أَلْكَسَّرَتْ؟›
18 يَا سُكَّانْ حِلَّةْ دِيبُونْ
الْمِثِلْ بِنَيَّةْ!
أَنْزُلُوا مِنْ شَرَفْكُو
وَ دُوقُوا الْعَطَشْ.
أَشَانْ مُدَمِّرْ مُوَابْ يَهْجِمْكُو إِنْتُو كُلَ
وَ يِدَمِّرْ بَكَانَاتْكُو الْقَوِيِّينْ.
19 وَ يَا سُكَّانْ حِلَّةْ عَرُوعِرْ!
أَقِيفُوا فِي الطَّرِيقْ وَ رَاقُبُوا.
وَ أَسْأَلَوْا الْجَارِيِينْ وَ الْمُعَرِّدِينْ
وَ قُولُوا: ‹شُنُو الْحَصَلْ؟›
20 وَ يُرُدُّوا وَ يُقُولُوا:
‹مُوَابْ أَدَّمَّرَتْ وَ لِقَتْ الْعَيْب.›
أَصْرَخَوْا وَ كَوْرُكُوا وَ خَبُّرُوا وَادِي أَرْنُونْ
كَدَرْ مُوَابْ خَلَاصْ أَدَّمَّرَتْ.»
21 الْمُحَاكَمَةْ جَاتْ فِي بَلَدْ السَّهَلَةْ وَ جَاتْ فِي حِلَّالْ حُلُونْ وَ يَهَاصْ وَ مِفَعَتْ 22 وَ فِي دِيبُونْ وَ نَبُو وَ بَيْت دِبْلَتَايِمْ 23 وَ فِي قِرْيَتَايِمْ وَ بَيْت قَمُولْ وَ بَيْت مَاعَوْن 24 وَ فِي قَرْيُوتْ وَ بُصْرَةْ وَ فِي كُلَّ حِلَّالْ بَلَدْ مُوَابْ الْقَرِيبِينْ وَ الْبَعِيدِينْ.
25 «وَ قَرِنْ مُوَابْ وَقَعْ
وَ قُدْرِتْهَا وَدَّرَتْ.
وَ دُرَاعْهَا أَنْكَسَرْ
وَ كَلَامْهَا كَمَّلْ.»
وَ دَا كَلَامْ اللّٰهْ.
26 سَكُّرُوا مُوَابْ لَحَدِّي تِلْمَرْمَغْ فِي قَدِيفْهَا وَ تَبْقَى مَضْحَكَةْ أَشَانْ هِي سَوَّتْ نَفِسْهَا عَالِيَةْ مِنْ اللّٰهْ. 27 وَ إِنْتِ، يَا مُوَابْ، مَا ضِحِكْتِ لِبَنِي إِسْرَائِيلْ وَلَّا؟ هَلْ لِقِيتِ بَنِي إِسْرَائِيلْ مَعَ السَّرَارِيقْ وَلَّا؟ وَ كَنْ لَا! مَالَا كُلَّ وَكِتْ تِحَجِّي بَيْهُمْ وَ تِهِزِّي رَاسْكِ؟
28 يَا سُكَّانْ مُوَابْ!
أَمُرْقُوا مِنْ الْمُدُنْ
وَ أَسْكُنُوا فِي الْجِبَالْ.
أَبْقَوْا مِثِلْ الْحَمَامَةْ
التِّسَوِّي عُشَّهَا فِي خَشُمْ الْكَرْكُورْ.
29 أَنِحْنَ سِمِعْنَا بِإِسْتِكْبَارْ مُوَابْ،
بَلَدْ مُسْتَكْبِرَةْ مِثِلْهَا كَيْ مَا فِي.
وَ سِمِعْنَا بَتَّانْ هِي تِتْكَبَّرْ وَ تِسْتَكْبَرْ
وَ هِي تِكَوْلِفْ وَ تِفَاشِرْ.
30 وَ دَاهُو كَلَامْ اللّٰهْ:
«أَنَا نَعَرِفْ كَدَرْ هِي تَرْفَعْ رَاسْهَا
وَ لَاكِنْ هِي تِفَاشِرْ سَاكِتْ فِي الرِّيحْ
وَ كُلُوفِيِّتْهَا كُلَ بَلَا فَايْدَةْ.»
31 وَ فِي شَانْ دَا، أَنَا نَبْكِي
وَ نُنُوحْ لِمُوَابْ كُلَّهَا
وَ نَقْنِتْ فِي شَانْ نَاسْ قِيرْ حَارَسْ.
32 يَا جِنَيْنَةْ الْعِنَبْ هَنَا سِبْمَةْ،
نَبْكِي لَيْكِ زِيَادَةْ مِنْ بَكِيِّ لِيَعْزِيرْ.
وَ فُرُوعْكِ فَاتَوْا الْبَحَرْ
وَ لِحْقَوْا بَحَرْ يَعْزِيرْ.
وَ لَاكِنْ الْمُخَرِّبْ قَمَّ يَقْطَعْ عِنَبْكِ
وَ يِلَقِّطْ كِشَّيْبكِ.
33 وَ الْفَرَحْ وَ السُّرُورْ بِقَوْا مَا فِيهُمْ
فِي بَلَدْ مُوَابْ الْخَضْرَةْ.
أَنَا وَقَّفْت الْخَمَرْ،
مَا يَمْرُقْ مِنْ الْعَصَّارَةْ.
بَتَّانْ مَا يَعَصُرُوا الْعِنَبْ
وَ يِفَجُّقُوهْ بِرَقْرَاقْ
وَ زَغْرَاطْ الْفَرَحْ
مَا يِنْسَمِعْ بَتَّانْ.
34 وَ كُرَوْرَاكْ الْفَزَعْ مِنْ مَدِينَةْ حَشْبُونْ يِنْسَمِعْ لَحَدِّي فِي أَلِعَالَةْ وَ لَحَدِّي فِي يَهَاصْ. وَ يِنْسَمِعْ مِنْ صُوغَرْ لَحَدِّي حُرُنَايِمْ وَ لَحَدِّي عَقْلَتْ شَلِيشَةْ. حَتَّى عُيُونْ أَلْمِي هَنَا نِمْرِيمْ كُلَ يَيْبَسَوْا.
35 «أَنَا نِدَمِّرْ فِي مُوَابْ النَّاسْ الْيِقَدُّمُوا ضَحَايَا فِي الْبَكَانْ الْعَالِي وَ يِحَرُّقُوا بَخُورْ لِإِلٰـهَاتْهُمْ.» وَ دَا كَلَامْ اللّٰهْ.
36 وَ بَتَّانْ قَلْبِي يَحْزَنْ وَ يُنُوحْ مِثِلْ الصُّفَّارَةْ لِمُوَابْ وَ لِنَاسْ قِيرْ حَارَسْ أَشَانْ الْغُنَى اللَّمَّوْهَا وَدَّرَتْ. 37 وَ بَيْدَا، حِزْنَوْا وَ زَيَّنَوْا رُوسَيْهُمْ وَ قَطَّعَوْا دُقُونْهُمْ وَ جَرَّحَوْا إِيدَيْهُمْ وَ لِبْسَوْا خُلْقَانْ الْحِزِنْ. 38 وَ فِي رُوسَيْ كُلَّ بُيُوتْ مُوَابْ وَ فِي كُلَّ شَوَارِعْهَا مَا فِي شَيّءْ آخَرْ إِلَّا النُّوَاحْ.
«أَنَا كَسَّرْت مُوَابْ مِثِلْ جَرّ الْمَا يَنْفَعْ.» وَ دَا كَلَامْ اللّٰهْ.
39 دَا كِكَّيْف مُوَابْ أَدَّمَّرَتْ! عِيطُوا وَ قُولُوا: «شِيفُوا! مُوَابْ دَنْقَرَتْ رَاسْهَا مِنْ الْعَيْب. وَ هِي بِقَتْ مَضْحَكَةْ وَ مُخِيفَةْ لِكُلَّ الْجِيرَانْهَا الْمُحَوِّقِينْهَا.»
40 أَشَانْ دَاهُو اللّٰهْ قَالْ:
«أَيْوَى! الْعَدُو يِنْرَخِي فِي مُوَابْ مِثِلْ صَقُرْ
الْجَهَّزْ جَنَاحَيْ لِيَضْرُبْهَا.
41 حِلَّةْ قَرْيُوتْ يِشِيلُوهَا
وَ بَكَانَاتْهَا الْقَوِيِّينْ يَكُرْبُوهُمْ.
وَ فِي الْيَوْم دَا، قَلِبْ عَسْكَرْ مُوَابْ
يَبْقَى مِثِلْ قَلِبْ الْمَرَةْ الْقَاعِدَةْ تِطَالِقْ.
42 وَ مُوَابْ تَخْرَبْ،
مَا تَبْقَى شَعَبْ
أَشَانْ هِي سَوَّتْ نَفِسْهَا
عَالِيَةْ مِنْ اللّٰهْ.
43 يَا سُكَّانْ مُوَابْ!
الْخَوْف وَ النُّقْرَةْ وَ الشَّرَكْ
يُكُونُوا فِي لُبُّكُو.
وَ دَا كَلَامْ اللّٰهْ.44 وَ الْيِعَرِّدْ مِنْ الْخَوْف
يَقَعْ فِي النُّقْرَةْ
وَ الْيِدَوْر يَمْرُقْ مِنْ النُّقْرَةْ،
الشَّرَكْ يَكُرْبَهْ.
أَشَانْ دَا كُلَّ أَنَا بَسْ جِبْتَهْ فِي مُوَابْ،
فِي سَنِةْ عِقَابْهَا.
وَ دَا كَلَامْ اللّٰهْ.45 وَ الْيِعَرُّدُوا مَا عِنْدُهُمْ قُدْرَةْ
وَ يِدَوْرُوا يِنْجَمَّوْا فِي ضُلّ مَدِينَةْ حَشْبُونْ.
لَاكِنْ مِنْ حَشْبُونْ تَمْرُقْ نَارْ
وَ مِنْ بَلَدْ سِيحُونْ، أَمْ بَلْبَالَةْ.
وَ تَحْرِقْ مُوَابْ بَلَدْ الْعُنُفْ
مِنْ طَرَفْهَا لَحَدِّي أُسُطْهَا.
46 الْعَذَابْ لَيْكُو، يَا نَاسْ مُوَابْ!
يَا إِنْتُو شَعَبْ صَنَمْ كَمُوشْ، تِوَدُّرُوا.
أَشَانْ صُبْيَانْكُو وَ بَنَاتْكُو
يَكُرْبُوهُمْ وَ يِوَدُّوهُمْ فِي الْغُرْبَةْ.
47 وَ لَاكِنْ فِي الأَخِيرْ،
نِقَبِّلْ نَاسْ مُوَابْ
الْوَدَّوْهُمْ فِي الْغُرْبَةْ.»
وَ دَا كَلَامْ اللّٰهْ.
وَ خَلَاصْ، هِنِي بَسْ كَمَّلَتْ مُحَاكَمَةْ اللّٰهْ لِمُوَابْ.
© La Bible en arabe tchadien © Alliance biblique du Tchad, 2019
