المسيح كربوه
1 وَ وَكِتْ عِيسَى كَمَّلْ الدُّعَا دَا، هُو قَمَّ مَعَ تَلَامِيذَهْ وَ قَطَعَوْا وَادِي قِدْرُونْ. وَ جَوْا لِجِنَيْنَةْ وَاحِدَةْ وَ دَخَلَوْا فِيهَا. 2 وَ يَهُوذَا النَّادُمْ الْيُخُونْ عِيسَى كُلَ يَعَرِفْ الْبَكَانْ دَا أَشَانْ عِيسَى لَمَّ فَوْقَهْ مَعَ تَلَامِيذَهْ عِدَّةْ مَرَّاتْ. 3 وَ يَهُوذَا جَاءْ فِي الْجِنَيْنَةْ مَعَ عَسْكَرْ رَوْمَانِيِّينْ وَ الْحُرَّاسْ الرَّسَّلَوْهُمْ كُبَارَاتْ رُجَالْ الدِّينْ وَ الْفَرِيزِيِّينْ. وَ هُمَّنْ مُسَلَّحِينْ وَ شَايْلِينْ فَوَانِيسْ وَ مَشَاهِيبْ يِضَوُّوا بَيْهُمْ.
4 وَ عِيسَى عِرِفْ كُلَّ شَيّءْ الْيَبْقَى فَوْقَهْ وَ مَشَى لَيْهُمْ وَ قَالْ: «تِفَتُّشُوا يَاتُو؟» 5 وَ رَدَّوْا لَيَّهْ وَ قَالَوْا: «نِفَتُّشُوا عِيسَى الْمِنْ حِلَّةْ النَّاصِرَةْ.» وَ عِيسَى قَالْ: «أَنَا بَسْ هُو.» وَ يَهُوذَا الْخَايِنْ قَاعِدْ فِي أُسُطْهُمْ. 6 وَ وَكِتْ عِيسَى قَالْ: «أَنَا بَسْ هُو»، هُمَّنْ كَسَّوْا مِنَّهْ وَرَاءْ وَ وَقَعَوْا فِي التُّرَابْ.
7 وَ مَرَّةْ تَانِيَةْ، هُو سَأَلَاهُمْ وَ قَالْ: «تِفَتُّشُوا يَاتُو؟» وَ قَالَوْا: «عِيسَى الْمِنْ حِلَّةْ النَّاصِرَةْ.» 8 وَ عِيسَى رَدَّ لَيْهُمْ وَ قَالْ: «أَوَّلْ أَوْرَيْتكُو أَنَا بَسْ هُو. وَ خَلَاصْ كَنْ تِدَوْرُونِي، خَلُّوا النَّاسْ الْمَعَايِ يَمْشُوا.»
9 وَ هُو قَالْ الْكَلَامْ دَا أَشَانْ الْكَلَامْ الْقَالَهْ مِنْ أَوَّلْ يِتِمّ. أَوَّلْ هُو قَالْ: «مِنْ النَّاسْ الْإِنْتَ أَنْطَيْتنِي، مَا فِي نَادُمْ وَدَّرْ.»
10 وَ سِمْعَانْ بُطْرُسْ عِنْدَهْ سَيْف وَ سَلَّاهْ وَ ضَرَبْ بَيَّهْ عَبِدْ كَبِيرْ رُجَالْ الدِّينْ وَ قَطَعْ أَدَانَهْ الزَّيْنَةْ. وَ أُسُمْ الْعَبِدْ دَا مَلْخُسْ. 11 وَ عِيسَى حَجَّى لِبُطْرُسْ وَ قَالْ: «دَخِّلْ سَيْفَكْ فِي بَيْتَهْ. مَالَا مَا نَشْرَبْ مِنْ كَاسْ التَّعَبْ الْأَبُويِ أَنْطَانِي؟» 12 وَ الْعَسْكَرْ مَعَ كَبِيرْهُمْ وَ الْحُرَّاسْ الرَّسَّلَوْهُمْ كُبَارَاتْ الْيَهُودْ كَرَبَوْا عِيسَى وَ رَبَّطَوْه. 13 وَ أَوَّلْ شَيّءْ، وَدَّوْه لِحَنَانْ. وَ هُو أَبُو مَرِةْ قَيَافَا وَ قَيَافَا دَا كَبِيرْ رُجَالْ الدِّينْ فِي السَّنَةْ دِي. 14 وَ قَيَافَا دَا، هُو بَسْ النَّادُمْ الْقَالْ لِكُبَارَاتْ الْيَهُودْ أَخَيْر لَيْهُمْ كَنْ نَادُمْ وَاحِدْ يُمُوتْ لِلشَّعَبْ.
بُطْرُس نكر عِيسَى
15 وَ سِمْعَانْ بُطْرُسْ وَ تِلْمِيذْ آخَرْ مَشَوْا وَرَاءْ عِيسَى. وَ التِّلْمِيذْ الْآخَرْ مَعْرُوفْ لِكَبِيرْ رُجَالْ الدِّينْ وَ أَشَانْ دَا، قِدِرْ دَخَلْ فِي فَضَايَةْ الْبَيْت مَعَ عِيسَى. 16 وَ بُطْرُسْ وَقَفْ بَرَّا فِي خَشُمْ الْبَيْت. وَ التِّلْمِيذْ الْمَعْرُوفْ لِكَبِيرْ رُجَالْ الدِّينْ مَرَقْ لِلْخَدَّامَةْ الْمَسْؤُولَة فِي الْبَابْ وَ حَجَّى لَيْهَا وَ وَدَّى بُطْرُسْ دَاخَلْ. 17 وَ الْخَدَّامَةْ سَأَلَتَهْ لِبُطْرُسْ وَ قَالَتْ: «إِنْتَ كُلَ تِلْمِيذْ هَنَا الرَّاجِلْ دَا؟» وَ بُطْرُسْ قَالْ: «لَا، لَا.»
18 الْوَطَاةْ بَارْدَةْ. وَ الْخَدَّامِينْ وَ الْحُرَّاسْ أَوْقَدَوْا نَارْ فِي كَانُونْ أَشَانْ يِدَّفَّوْا. وَ بُطْرُسْ قَاعِدْ يِدَّفَّ مَعَاهُمْ. 19 وَ كَبِيرْ رُجَالْ الدِّينْ قَمَّ سَأَلْ عِيسَى مِنْ تَلَامِيذَهْ وَ مِنْ تَعَالِيمَهْ. 20 وَ عِيسَى رَدَّ لَيَّهْ وَ قَالْ: «أَنَا حَجَّيْت قِدَّامْ كُلَّ النَّاسْ. مِنْ الْأَوَّلْ، عَلَّمْت النَّاسْ فِي بُيُوتْ الصَّلَاةْ وَ فِي بَيْت اللّٰهْ وَ فِي الْبَكَانَاتْ الْكُلَّ الْيَهُودْ يِلِمُّوا فَوْقهُمْ. مَا قُلْت شَيّءْ بِعَشِيرْ. 21 مَالَا تَسْأَلْنِي؟ النَّاسْ السِّمْعَوْا كَلَامِي، أَسْأَلْهُمْ مِنْ الْكَلَامْ الْأَنَا قُلْتَهْ لَيْهُمْ. هُمَّنْ يَعَرْفُوا الْكَلَامْ الْأَنَا قُلْتَهْ.»
22 وَ وَكِتْ قَالْ الْكَلَامْ دَا، وَاحِدْ مِنْ الْحُرَّاسْ الْوَاقْفِينْ جَنْبَهْ شَدَّقَهْ وَ قَالْ: «كِكَّيْف تُرُدّ لِكَبِيرْ رُجَالْ الدِّينْ بِمِثِلْ دَا؟» 23 وَ عِيسَى رَدَّ لَيَّهْ وَ قَالْ: «كَنْ كَلَامِي كِدِبْ، أَشْهَدْ فِي الْكِدِبْ. لَاكِنْ كَنْ كَلَامِي صَحِيحْ، مَالَا ضَرَبْتِنِي؟»
24 وَ حَنَانْ وَدَّى عِيسَى مُرَبَّطْ لِقَيَافَا كَبِيرْ رُجَالْ الدِّينْ. 25 وَ سِمْعَانْ بُطْرُسْ وَاقِفْ يِدَّفَّ فِي النَّارْ. وَ قَالَوْا لَيَّهْ: «إِنْتَ كُلَ مَا وَاحِدْ مِنْ تَلَامِيذَهْ؟» وَ هُو نَكَرْ وَ قَالْ: «لَا، أَنَا مَا تِلْمِيذَهْ.» 26 وَ وَاحِدْ مِنْ خَدَّامِينْ كَبِيرْ رُجَالْ الدِّينْ حَجَّى لَيَّهْ. وَ هُو أَخُو هَنَا النَّادُمْ الْبُطْرُسْ قَطَعْ أَدَانَهْ. وَ هُو سَأَلْ بُطْرُسْ وَ قَالْ: «أَنَا مَا شِفْتَكْ مَعَايَهْ فِي الْجِنَيْنَةْ وَلَّا؟» 27 وَ بُطْرُسْ نَكَرْ بَتَّانْ وَ طَوَّالِي الدِّيكْ عَوْعَى.
المسيح قِدّام بِلَاطُس
28 وَ مَرَقَوْا عِيسَى مِنْ بَيْت قَيَافَا وَ وَدَّوْه فِي قَصِرْ الْوَالِي. الْوَطَاةْ بِقَتْ فَجُرْ. الْكُبَارَاتْ ذَاتْهُمْ مَا دَخَلَوْا فِي قَصِرْ الْوَالِي الرَّوْمَانِي أَشَانْ دَا يَوْم الْعِيدْ. وَ كَنْ دَخَلَوْا فِي بَيْت نَادُمْ مَا يَهُودِي، يِنَجُّسُوا نُفُوسْهُمْ وَ مَا يَقْدَرَوْا يَاكُلُوا عَشَاءْ عِيدْ الْفِصْحَ. 29 وَ أَشَانْ دَا، بِلَاطُسْ الْوَالِي مَرَقْ لَيْهُمْ وَ قَالْ: «شُنُو التُّهْمَةْ الْخَطَّيْتُوهَا فِي النَّادُمْ دَا؟» 30 وَ رَدَّوْا لَيَّهْ وَ قَالَوْا: «النَّادُمْ دَا كَنْ مَا مُجْرِمْ، مَا نِسَلُّمُوهْ لَيْك.» 31 وَ بِلَاطُسْ قَالْ: «شِيلُوهْ وَ شَارُعُوهْ حَسَبْ قَانُونْكُو.» وَ الْيَهُودْ قَالَوْا: «قَانُونَكْ مَا يَسْمَحْ لَيْنَا أَشَانْ نَحْكُمُوا لِأَيِّ نَادُمْ بِالْمَوْت.» 32 بِمِثِلْ دَا، الْكَلَامْ الْعِيسَى قَالَهْ فِي الطَّرِيقَةْ الْيُمُوتْ بَيْهَا بَدَا يِلْحَقَّقْ.
33 وَ بِلَاطُسْ قَبَّلْ فِي قَصْرَهْ وَ نَادَى عِيسَى. وَ سَأَلَهْ وَ قَالْ: «إِنْتَ مَلِكْ الْيَهُودْ وَلَّا؟» 34 وَ عِيسَى رَدَّ لَيَّهْ وَ قَالْ: «السُّؤَالْ دَا، سُؤَالَكْ إِنْتَ وَلَّا؟ وَلَّا سُؤَالْ هَنَا نَاسْ آخَرِينْ؟» 35 وَ بِلَاطُسْ رَدَّ لَيَّهْ وَ قَالْ: «هَايْ! أَنَا يَهُودِي وَلَّا؟ قَبِيلْتَكْ إِنْتَ بَسْ وَ كُبَارَاتْ رُجَالْ الدِّينْ سَلَّمَوْك لَيِّ. شُنُو الشَّيّءْ الْإِنْتَ سَوَّيْتَهْ؟»
36 عِيسَى رَدَّ لَيَّهْ وَ قَالْ: «مَمْلَكَتِي مَا مَمْلَكَةْ هَنَا الدُّنْيَا. كَنْ مَمْلَكَتِي هَنَا الدُّنْيَا، خَدَّامِينِي يُقُمُّوا يِدَاوُسُوا أَشَانْ الْيَهُودْ مَا يَكُرْبُونِي. وَ لَاكِنْ مُلْكِي مَا جَايِ مِنْ الدُّنْيَا.» 37 وَ بِلَاطُسْ قَالْ: «هَا، إِنْتَ مَلِكْ؟»
وَ عِيسَى رَدَّ لَيَّهْ وَ قَالْ: «مِثِلْ إِنْتَ قُلْتَهْ. وَ بِالصَّحِيحْ، فِي شَانْ دَا بَسْ أَنَا مَوْلُودْ وَ جِيتْ فِي الدُّنْيَا، أَشَانْ نَشْهَدْ لِلْحَقّ. أَيِّ نَادُمْ الْيِرِيدْ الْحَقّ يَسْمَعْ كَلَامِي.» 38 وَ بِلَاطُسْ قَالْ: «شُنُو الْحَقّ؟»
وَ وَكِتْ قَالْ الْكَلَامْ دَا، بِلَاطُسْ مَرَقْ لِلْيَهُودْ وَ قَالْ لَيْهُمْ: «أَنَا مَا لِقِيتْ فَوْق النَّادُمْ دَا أَيِّ جَرِيمَةْ. 39 لَاكِنْ فِي عَادِتْكُو وَاجِبْ نَطْلِقْ مَسْجُونْ وَاحِدْ فِي عِيدْ الْفِصْحَ. تِدَوْرُوا نَطْلِقْ لَيْكُو مَلِكْ الْيَهُودْ وَلَّا؟» 40 وَ عَاطَوْا بِحِسّ شَدِيدْ وَ قَالَوْا: «لَا، مَا هُو! أَطْلِقْ لَيْنَا بَرَابَاسْ!» وَ بَرَابَاسْ دَا، هُو ثَوْرِي.
© La Bible en arabe tchadien © Alliance biblique du Tchad, 2019
