أيُّوب يدافِع لنفْسه
1 دَاهُو كُلَّ الشَّافَتَهْ عَيْنِي
وَ سِمْعَتَهْ أَدَانِي وَ أَنَا فِهِمْتَهْ.
2 الْإِنْتُو تَعَرْفُوهْ، أَنَا كُلَ نَعَرْفَهْ
وَ أَنَا كُلَ مَا نَاقِصْ مِنْكُو!
3 لَاكِنْ نِدَوْر نِحَجِّي لِلرَّبّ الْقَادِرْ
وَ نِدَوْر نِدَافِعْ لِنَفْسِي قِدَّامْ الرَّبّ.
4 كَنْ لَيْكُو إِنْتُو، تَهَمْتُونِي بِكِدِبْ!
إِنْتُو مِثِلْ دَكَاتِيرْ الْمَا نَافْعِينْ!
5 يَاتُو يَقْدَرْ يِسَكِّتْكُو
لِتَبْقَوْا حَكِيمِينْ؟
6 أَسْمَعَوْا حُجِّتِي
وَ خُطُّوا أَدَانْكُو لِكَلَامْ لِسَانِي.
7 هَلْ تَحْسُبُوا إِنْتُو تِدَافُعُوا
لِلرَّبّ وَلَّا؟
وَ لَيَّهْ هُو، تِحَجُّوا
بِغَشّ وَلَّا؟
8 هَلْ مَعَايَهْ هُو إِنْتُو تِلِمُّوا وَلَّا؟
وَلَّا لِلرَّبّ إِنْتُو تِدَافُعُوا؟
9 وَ عَدِيلْ كَنْ هُو يِجَرِّبْكُو إِنْتُو وَلَّا؟
وَلَّا تُغُشُّوهْ
مِثِلْ تُغُشُّوا النَّاسْ؟
10 أَكِيدْ، هُو يُلُومْكُو
حَتَّى كَانْ تِلِمُّوا مَعَايَهْ بِسِرّ كُلَ!
11 وَ عَظَمَتَهْ مَا تَبْهَتْكُو وَلَّا؟
وَ الْخَوْف مِنَّهْ مَا يَقَعْ فَوْقكُو وَلَّا؟
12 وَ كَلَامْكُو خَفِيفْ
مِثِلْ كَوْم الرُّمَادْ
وَ رَدُّكُو مَا قَوِي
مِثِلْ دُرْدُرْ الطِّينَةْ اللَّيِّنْ!
13 أَسْكُتُوا! أَنَا بَسْ نِحَجِّي
حَتَّى كَانْ يَقَعْ لَيِّ فِي رَاسِي كُلَ!
14 مَالَا نِعَرِّدْ نَفْسِي لِلْخَطَرْ
وَ نِشِيلْ رُوحِي فِي إِيدِي؟
15 حَتَّى كَانْ يَكْتُلْنِي كُلَ،
أَنَا نُخُطّ عَشَمِي فَوْقَهْ.
لَاكِنْ نِدَافِعْ قِدَّامَهْ هُو
لِدَرْبِي الشِّلْتَهْ.
16 وَ دَا بَسْ الْيَقْدَرْ يِنَجِّينِي
أَشَانْ الْكَافِرْ مَا يَجِي قِدَّامَهْ.
17 أَسْمَعَوْا! أَسْمَعَوْا كَلَامِي!
وَ خُطُّوا أَدَانْكُو لِحَدِيثِي.
18 دَاهُو أَنَا جَهَّزْت لِشَرِيعْتِي
وَ نَعَرِفْ كَدَرْ نَلْقَى الْحَقّ.
19 يَاتُو مَضْلُومْ فَوْقِي؟
كَنْ أَنَا خَاطِي، نَسْكُتْ وَ نُمُوتْ.
20 يَا رَبّ! أَشْيَاءْ تِنَيْن مَا تِسَوِّيهُمْ فَوْقِي
وَ أَنَا كُلَ مَا نِلَّبَّدْ مِنَّكْ.
21 أَرْفَعْ مِنِّي إِيدَكْ التِّتَعِّبْنِي
وَ مَا تَبْهَتْنِي وَ لَا تِخَوِّفْنِي زِيَادَةْ.
22 وَ خَلَاصْ، نَادِينِي وَ أَنَا نُرُدّ لَيْك
أَوْ أَنَا نِحَجِّي وَ إِنْتَ تِكَلِّمْ مَعَايِ.
23 كَمْ خَطَا وَ ذَنِبْ أَنَا سَوَّيْتهُمْ؟
عَرِّفْنِي جَرِيمْتِي وَ ذَنْبِي!
24 مَالَا مَا تِوَجِّهْ وِجْهَكْ عَلَيِّ؟
مَالَا تَجْعَلْنِي مِثِلْ عَدُوكْ؟
25 هَلْ تِرَجِّفْ وَرْشَالَايْ
الشَّايْلَيْهَا الرِّيحْ؟
هَلْ تِطَارِدْ قَشَّايْ
يَابْسَةْ وَلَّا؟
26 تَتْهَمْنِي بِتُهْمَةْ مُرَّةْ
وَ تِعَاقِبْنِي بِذُنُوبْ صُبَايِ.
27 وَ تِقّيِّدْنِي بِقُيُودْ
وَ تِرَاقِبْ كُلَّ دُرُوبِي
وَ تِرَاقِبْ خَطْوَاتِي.
28 لَاكِنْ أَنَا قِدِمْت وَ سَوَّسْت
وَ بِقِيتْ مِثِلْ خَلَقْ
الْأَكَلَتَهْ الْعِتَّةْ.
© La Bible en arabe tchadien © Alliance biblique du Tchad, 2019
