حياة العاصي تِنْتهي
1 وَ بِلْدَدْ الْمِنْ شُوحَةْ شَالْ الْكَلَامْ وَ قَالْ:
2 مَتَى تِوَقِّفْ كَلَامَكْ دَا؟
فَكِّرْ وَ بَعَدْ دَا، أَنِحْنَ نِحَجُّوا.
3 مَالَا تَجْعَلْنَا مِثِلْ بَهَايِمْ؟
وَ مَالَا تِشِيفْنَا أَنِحْنَ مِثِلْ مُغَفَّلِينْ؟
4 يَا أَيُّوبْ، إِنْتَ قَاعِدْ تِلْفَجَّرْ
مِنْ الزَّعَلْ
وَ لَاكِنْ فِي شَانَكْ إِنْتَ
الْأَرْض يِخَلُّوهَا وَلَّا؟
وَ الْجِبَالْ يِلْحَوَّلَوْا
مِنْ بَكَانْهُمْ وَلَّا؟
5 أَيْوَى! حَيَاةْ الْعَاصِي تِنْتَهِي
مِثِلْ النُّورْ الْيُمُوتْ.
6 أَيْوَى، النُّورْ قَاعِدْ يِضَلِّمْ فِي خَيْمِتَهْ
وَ الْفَانُوسْ مِنْ فَوْق لَيَّهْ يُمُوتْ.
7 وَ خَطْوَاتَهْ الْعَجِيلِينْ يَبْقَوْا تَقِيلِينْ
وَ نِيّتَهْ بَسْ تِدَمِّرَهْ.
8 أَشَانْ رِجِلَيْنَهْ يَرْمُوهْ فِي الشَّرَكْ
وَ يَدْخُلُوا فِي قُدُودَهْ.
9 الْحَبِلْ يَكُرْبَهْ مِنْ كَعَبَهْ
وَ الشَّرَكْ يَكُرْبَهْ.
10 وَ الْحَبِلْ الْيَكُرْبَهْ مُلَبَّدْ فِي التُّرَابْ
وَ أَمْ كَجَّامَةْ قَاعِدَةْ فِي دَرْبَهْ.
11 وَ الرُّعُبْ جَايِ لَيَّهْ مِنْ كُلِّ جِيهَةْ
وَ يِتَابِعَهْ مِنْ وَرَاءْ.
12 وَ الْعَاصِي، الْجُوعْ كَمَّلْ قُدُرْتَهْ
وَ الدَّمَارْ قَاعِدْ جَنْبَهْ.
13 الْمَرَضْ يَاكُلْ فَرْوِتَهْ
أَيْوَى، الْمَرَضْ الْكَاتِلْ يَاكُلْ كُلَّ جِلْدَهْ.
14 يَمُرْقُوهْ مِنْ خَيْمِتَهْ
السَّاكِنْ فَوْقَهْ بِأَمَانْ
وَ يِوَدُّوهْ لِمَلَكْ الْمَوْت.
15 إِنْتَ تَسْكُنْ فِي خَيْمِتَهْ
الْهِي بَتَّانْ مَا هِنْتَهْ
وَ يِطَهُّرُوا الْخَيْمَةْ بِكِبْرِيتْ.
16 هُو مِثِلْ شَدَرَةْ عُرُوقْهَا يِجِفُّوا مِنْ تِحِتْ
وَ فُرُوعْهَا يَيْبَسَوْا مِنْ فَوْق.
17 فِي الْبَلَدْ، مَا يِذَّكَّرَوْا الْعَاصِي دَا
وَ بَتَّانْ النَّاسْ مَا يِحَجُّوا بِأُسْمَهْ.
18 مِنْ النُّورْ، يِلِزُّوهْ لِلضَّلَامْ
أَيْوَى، مِنْ الْعَالَمْ يَمُرْقُوهْ.
19 هُو وَ لَا يِخَلِّي عِيَالْ
وَ لَا عِيَالْ فِي أُسُطْ شَعَبَهْ
وَ مَا يِفَضِّلْ نَادُمْ حَيّ فِي مَسْكَنَهْ.
20 نَاسْ الْغَرِبْ
يِلْعَجَّبَوْا مِنْ دَمَارَهْ
وَ نَاسْ الصَّبَاحْ،
خَوْف شَدِيدْ يَكْرُبْهُمْ.
21 دَوْل بَسْ مَسَاكِنْ الْمُجْرِمْ!
أَيْوَى، دَا بَسْ بَكَانْ الْكَافِرْ!
© La Bible en arabe tchadien © Alliance biblique du Tchad, 2019
