عمل العاصي و عِقابه
1 وَ صُوفَرْ الْمِنْ نَعْمَةْ شَالْ الْكَلَامْ وَ قَالْ:
2 دَاهُو أَفْكَارِي الْبِخَوُّفُونِي
يَجْبُرُونِي لِنُرُدّ
وَ دَا بِسَبَبْ قِلَّةْ صَبْرِي.
3 أَنَا سِمِعْت كَلَامْ الْيِعَيِّبْنِي
وَ لَاكِنْ نَفْسِي بَسْ أَنْطَتْنِي رَدّ.
4 إِنْتَ تَعَرِفْ مِنْ زَمَانْ،
مِنْ وَكِتْ الرَّبّ خَلَقْ الْإِنْسَانْ
وَ خَطَّاهْ فِي الْأَرْض،
5 فَرَحْ الْعَاصِي مَا يِطَوِّلْ
وَ سُرُورْ الْكَافِرْ كُلَ لِوَكِتْ شِيَّةْ بَسْ.
6 حَتَّى كَانْ طُولَهْ يَلْحَقْ السَّمَاءْ
وَ رَاسَهْ يَلْمَسْ السَّحَابْ كُلَ،
7 هُو يَبْقَى مَا فِيهْ مَرَّةْ وَاحِدْ مِثِلْ هُرَارَهْ
وَ الْيَعَرْفُوهْ يُقُولُوا: «وَيْن هُو؟»
8 هُو يَبْقَى مِثِلْ حِلِمْ،
مَا يَلْقَوْا مِنَّهْ شَيّءْ
وَ يَطُرْدُوهْ مِثِلْ رُؤْيَةْ اللَّيْل.
9 وَ عَيْن الْأَوَّلْ تِشِيفَهْ
مَا تِشِيفَهْ بَتَّانْ.
وَ الْبَكَانْ السَّكَنْ فَوْقَهْ
كُلَ مَا يِشِيفَهْ بَتَّانْ.
10 عِيَالْ الْعَاصِي يِقَبُّلُوا
حُقُوقْ الْمَسَاكِينْ
وَ إِيدَيْنَهْ يِرَجُّعُوا
الْمَالْ الْهُو نَهَبَهْ.
11 عُضَامْ الْعَاصِي
عِنْدُهُمْ قُدْرَةْ فِي شَبَابَهْ
وَ لَاكِنْ يِدِسُّوهُمْ مَعَايَهْ
فِي التُّرَابْ.
12 الْفَسَالَةْ فِي خَشُمْ الْعَاصِي مِثِلْ حَلَاوَةْ،
هُو يِلَبِّدْهَا تِحِتْ لِسَانَهْ.
13 هُو يُمُصَّهَا وَ مَا يَقِيفْ
وَ يُضُمَّهَا فِي شِدْقَهْ.
14 وَ لَاكِنْ أَكْلَهْ دَا يَتْلَفْ فِي لُبّ بَطْنَهْ
وَ يَبْقَى مِثِلْ سَمّ أَمْ شِدَيْقَاتْ.
15 الْمَالْ الْهُو زَرَطَهْ يِقَدِّفَهْ
وَ الرَّبّ بَسْ يَمُرْقَهْ مِنْ بَطْنَهْ.
16 هُو قَاعِدْ يُمُصّ سَمّ الدَّابِي
وَ يَكْتُلَهْ مِثِلْ سَمّ أَمْ شِدَيْقَاتْ.
17 الرُّجُولْ وَ الْبُحُورْ
وَ الْوُدْيَانْ هَنَا الْعَسَلْ وَ الزِّبْدَةْ،
هُو أَبَداً مَا يِشِيفْهُمْ.
18 هُو يِقَبِّلْ الشَّالَهْ،
مَا يَقْدَرْ يَزُرْطَهْ.
وَ الْغُنَى الْيَلْقَاهْ مِنْ تِجَارْتَهْ،
هُو مَا يِتْمَتَّعْ بَيَّهْ.
19 أَشَانْ هُو رِحِكْ وَ أَبَى الْمَسَاكِينْ
وَ نَهَبْ بُيُوتْ بَدَلْ يَبْنِيهُمْ.
20 أَشَانْ بَطْنَهْ مَا تَعَرِفْ الشَّبَعْ
وَ شَيّءْ يَنْجَى مِنَّهْ كَيْ مَا فِيهْ.
21 مَا فِي الْيَنْجَى مِنْ طَمَعَهْ
وَ بَيْدَا، رَاحْتَهْ مَا تِطَوِّلْ.
22 فِي وَكِتْ غُنَايَهْ بَسْ،
الضِّيقَةْ تَقَعْ فَوْقَهْ
وَ كُلَّ تَقَلَةْ التَّعَبْ تَجِي فَوْقَهْ.
23 وَكِتْ هُو مَشْغُولْ بِبَطْنَهْ،
الرَّبّ يِنَزِّلْ فَوْقَهْ غَضَبَهْ الشَّدِيدْ
وَ يِنَزِّلَهْ فَوْقَهْ مِثِلْ مَطَرَةْ
وَ دَا بَسْ يَبْقَى أَكْلَهْ.
24 كَنْ يَجْرِي مِنْ سِلَاحْ الْحَدِيدْ كُلَ،
نُشَّابْ النَّحَاسْ يَطْعَنَهْ.
25 كَنْ يَمْرُقْ النُّشَّابْ مِنْ جِسْمَهْ
وَ رَاسْ النُّشَّابْ مِنْ كِبْدِتَهْ،
خَلَاصْ الْخَوْف مِنْ الْمَوْت يَكُرْبَهْ.
26 كُلَّ الضَّلَامْ مَحْفُوضْ لِغُنَايَهْ
وَ نَارْ الْمَا نَفَخْهَا نَادُمْ، تَاكُلَهْ
وَ مَصِيبَةْ تَقَعْ فِي الْفَضَّلْ فِي خَيْمِتَهْ.
27 السَّمَاءْ تَكْشِفْ ذَنْبَهْ
وَ الْأَرْض تُقُمّ ضِدَّهْ.
28 السَّيْل يَرْمِي بَيْتَهْ
وَ يِوَدِّيهْ فِي يَوْم غَضَبْ الرَّبّ.
29 خَلَاصْ، دَاهُو الْقِسِمْ
الْجَهَّزَهْ الرَّبّ لِلْعَاصِي
وَ دِي الْوَرَثَةْ
الْهُو قَرَّرْهَا لَيَّهْ.
© La Bible en arabe tchadien © Alliance biblique du Tchad, 2019
