في النِهاية، الربّ يبرّي أيُّوب
1 وَ أَيُّوبْ شَالْ الْكَلَامْ وَ قَالْ:
2 الْيَوْم، أَنَا مُعَارِضْ لِلرَّبّ
وَ نِتَابِعْ فِي شَكْوِتِي.
وَ إِيدِي تَقِيلَةْ فَوْقِي
وَ لَاكِنْ مَا تَقْدَرْ تِوَقِّفْ قَنِيتِي.
3 يَارَيْت! كَنْ نَعَرِفْ بَكَانْ نَلْقَاهْ
وَ كَنْ نَقْدَرْ نَوْصَلْ فِي بَكَانْ مَسْكَنَهْ،
4 خَلَاصْ نَقْدَرْ نِوَصِّفْ لَيَّهْ كَدَرْ أَنَا بَرِي
وَ نَمْلَا خَشْمِي بِالْحُجَجْ.
5 وَ بَيْدَا، نَعَرِفْ الْكَلَامْ
الْيُرُدَّهْ لَيِّ
وَ نَقْدَرْ نَفْهَمْ الْيُقُولَهْ.
6 هَلْ يِحَاكِمْنِي بِكُلَّ قُدُرْتَهْ وَلَّا؟
لَا! يَسْمَعْنِي.
7 وَ هُو يَعَرِفْ
كَدَرْ أَنَا خَصِيمَهْ، صَالِحْ.
وَ هُو الْيِشَارِعْنِي،
فِي النِّهَايَةْ يِبَرِّينِي.
8 وَ لَاكِنْ كَنْ أَنَا مَشَيْت
عَلَيْ الصَّبَاحْ، هُو مَا فِيهْ
وَ فِي الْغَرِبْ، أَنَا مَا نِشِيفَهْ.
9 كَنْ هُو مَشْغُولْ فِي الْمُنْشَاقْ،
مَا نِشِيفَهْ
وَ وَكِتْ هُو يِنْلَفِتْ وَطِي،
مَا نِشِيفَهْ.
أيُّوب خاف قِدّام الربّ
10 وَ لَاكِنْ لِدَرْبِي أَنَا،
هُو يَعَرْفَهْ.
وَ كَنْ كَشَفْنِي،
يَلْقَانِي صَافِي مِثِلْ الدَّهَبْ.
11 رِجْلِي تِتَابِعْ خَطْوَاتَهْ
وَ أَنَا حَفَضْت دَرْبَهْ، مَا طَلَقْتَهْ.
12 أَنَا مَا خَلَّيْت وَصِيَّاتَهْ
وَ حَفَضْت قَوَانِينَهْ زِيَادَةْ
مِنْ الْأَكِلْ الْفِي خَشْمِي.
13 وَ كَنْ هُو بَسْ قَرَّرْ،
يَاتُو يَقْدَرْ يِفَشِّلَهْ؟
أَيْوَى، الْهُو يِدَوْرَهْ، يِحَقِّقَهْ.
14 هُو يِنَفِّذْ الْهُو قَرَّرَهْ لَيِّ
مِثِلْ قَرَارَاتَهْ الْآخَرِينْ كُلَ.
15 فِي شَانْ دَا قِدَّامَهْ هُو، أَنَا نِنْبَهِتْ
وَ كَنْ فَكَّرْت فَوْقَهْ، نَرْجِفْ.
16 الرَّبّ، هُو الْوَدَّرْ شَجَاعْتِي
وَ الْقَادِرْ مَلَانِي بِالرُّعُبْ.
17 وَ دَا، مَا ضَلَامْ السَّكَّتْنِي
وَ لَا سَوَادْ الْغَطَّانِي.
© La Bible en arabe tchadien © Alliance biblique du Tchad, 2019
