أيُّوب يدَوْر العاصيين يلْعاقبوا
1 مَالَا الْقَادِرْ مَا قَطَعْ وَكِتْ
لِلْعِقَابْ؟
وَ مَالَا الْيَعَرْفُوهْ
مَا شَافَوْا أَيَّامَهْ؟
2 الْعَاصِيِينْ يِحَوُّلُوا عَلَامَاتْ الْحُدُودْ
وَ يَسُرْقُوا الْبَقَرْ
وَ يَسْرَحَوْا بَيْهُمْ.
3 هُمَّنْ يِشِيلُوا حُمَارْ الْأَتَامَا
وَ يَكُرْبُوا فِي الضَّمَانْ تَوْر الْأَرْمَلَةْ.
4 يَطُرْدُوا الْمَسَاكِينْ مِنْ الدَّرِبْ
وَ فَقْرَانِينْ الْبَلَدْ يِلَّبَّدَوْا مِنْهُمْ.
5 أَيْوَى! الْمَسَاكِينْ يَمْشُوا لِخِدْمِتْهُمْ
مِثِلْ حَمِيرْ الْكَدَادَةْ يِفَتُّشُوا أَكِلْ فِي الصَّحَرَاء.
هُمَّنْ يِأَكُّلُوا عِيَالْهُمْ
فِي أَرْض جَفَافْ.
6 فِي الزِّرَاعَةْ، الْمَسَاكِينْ يِلِمُّوا عَلْفَةْ
وَ فِي جِنَيْنَةْ الْعَاصِي، يِلِمُّوا عِنَبْ.
7 طُولْ اللَّيْل، هُمَّنْ عَرْيَانِينْ بَلَا خُلْقَانْ
وَ مَا عِنْدُهُمْ غِطَاءْ مِنْ الْبَرْدَايْ.
8 مَطَرْ الْيَنْزِلْ فِي الْجِبَالْ يِبِلُّهُمْ
وَ مِنْ قِلَّةْ الْمَسْكَنْ،
يِتَّاكَوْا فِي الْحَجَرْ.
9 وَ الْعَاصِيِينْ يَقْلَعَوْا الْأَتِيمْ
بِقُوءْ مِنْ أَمَّهْ
وَ يَكُرْبُوا ضَمَانْ
مِنْ الْفَقْرَانِينْ.
10 الْمَسَاكِينْ مَاشِينْ عَرْيَانِينْ
مَا عِنْدُهُمْ خُلْقَانْ
وَ بِجُوعْهُمْ، يَنْقُلُوا الْقَشّ.
11 فِي لُبّ الزَّرَايِبْ، يَعَصُرُوا دِهِنْ
وَ يَعَصُرُوا الْعِنَبْ
وَ لَاكِنْ مَا عِنْدُهُمْ حَقّ يُدُوقُوهْ.
12 وَ فِي دَاخَلْ الْمَدِينَةْ،
التَّعْبَانِينْ يَقُنْتُوا
وَ الْمَجْرُوحِينْ يِكَوْرُكُوا لِلْفَزَعْ
وَ لَاكِنْ الرَّبّ مَا يَسْمَعْهُمْ.
عمل العاصيين
13 وَ الْعَاصِيِينْ مُعَارِضِينْ لِنُورْ النَّهَارْ
وَ مَا يَعَرْفُوا طُرُقَهْ
وَ مَا يَمْشُوا فِي دُرُوبَهْ.
14 وَ الْكَاتِلْ يُقُمّ فِي وَكْت الشَّقَاقْ
يَكْتُلْ الْمِسْكِينْ وَ الْفَقْرَانْ
وَ يَسْرِقْ بِاللَّيْل.
15 الزَّانِي يَرْجَى اللَّيْل وَ يُقُولْ:
«مَا فِي نَادُمْ يِشِيفْنِي.»
هُو يِغَطِّي وِجْهَهْ
أَشَانْ مَا يَعَرْفُوهْ.
16 فِي الضَّلَامْ،
يَسْرِقْ الْبُيُوتْ
وَ بِالنَّهَارْ،
يِنْسَدَّ دَاخَلْ مَا يِدَوْر النُّورْ.
17 أَيْوَى، لَيْهُمْ هُمَّنْ كُلُّهُمْ
الضَّلَامْ الْهَالِكْ مِثِلْ الصَّبَاحْ
أَشَانْ هُمَّنْ وَالَفَوْا
بِرُعُبْ اللَّيْل.
كلام صُوفَر في العاصيين
18 وَ إِنْتُو تُقُولُوا:
«هُمَّنْ مِثِلْ التِّبِنْ
الشَّايْلَهْ أَلْمِي.
نَاسْ الْبَلَدْ يَلْعَنَوْا تُرَابْهُمْ
وَ مَا فِي الْيَخْدِمْ فِي جِنَيْنَاتْ عِنَبْهُمْ.»
19 وَ تُقُولُوا:
«مِثِلْ الْجَفَافْ وَ الْحَمُو
يِمَوُّعُوا التَّلَجْ
مِثِلْ دَا، الْمَوْت يِشِيلْ الْمُذْنِبْ.
20 وَ أَمَّهْ الْوِلْدَتَهْ كُلَ تَنْسَاهْ
وَ جَنَازْتَهْ تِعَفِّنْ
وَ تَبْقَى لَذِيذَةْ لِلدُّودْ.
نَاسْ أَبَداً مَا يِذَّكَّرَوْه
وَ ظُلْمَهْ يِدَّمَّرْ
مِثِلْ شَدَرَةْ الْوَقَعَتْ.»
21 لَاكِنْ هُو يِسَوِّي الْفَسَالَةْ
لِلْمَرَةْ الْعَاقْرَةْ الْمَا عِنْدَهَا عِيَالْ
وَ مَا يَرْحَمْ الْأَرْمَلَةْ.
22 لَاكِنْ الرَّبّ بِقُدُرْتَهْ،
هُو بَسْ الْيَمْرُقْ سِيَادْ الْعُنُفْ.
وَكِتْ يُقُمّ،
هُمَّنْ دَوْل مَا يَلْقَوْا الْحَيَاةْ.
23 الرَّبّ يِخَلِّيهُمْ فِي الْأَمَانْ
وَ لَاكِنْ هُو يِرَاقِبْ دُرُوبْهُمْ.
24 وَ الْعَاصِيِينْ بِقَوْا عَالِيِينْ
وَ بَعَدْ شِيَّةْ، يَبْقَوْا مَا فِيهُمْ.
هُمَّنْ يِدَفُّقُوا مِثِلْ النُّوَّارْ
وَ يَقْطَعَوْهُمْ مِثِلْ يَقْطَعَوْا الْقَنَادِيلْ.
25 وَ كَنْ مِثِلْ دَا، يَاتُو يِكَدِّبْنِي؟
وَ يَاتُو يُقُولْ كَلَامِي دَا مَا صَحِيحْ؟
© La Bible en arabe tchadien © Alliance biblique du Tchad, 2019
