أيُّوب نادم بري
1 وَ بَتَّانْ أَيُّوبْ كَلَّمْ وَ قَالْ:
2 نَحْلِفْ بِالْإِلٰـهْ الْحَيّ الدَّحَرَانِي حُقُوقِي
وَ بِالْقَادِرْ الْجَعَلْ لَيِّ الْمُرّ!
3 كَنْ رُوحْ الرَّبّ قَاعِدَةْ فَوْقِي
وَ مُنْخَرِي تَضْرُبْ رِيحْ،
4 أَبَداً خَشْمِي مَا يُقُولْ فَسَالَةْ
وَ لِسَانِي مَا يَنْطَقْ بِغَشّ.
5 لَحَدِّي نُمُوتْ كُلَ،
أَنَا مَا نَنْطِيكُو حَقّ
وَ مَا نُقُولْ أَنَا مَا كَامِلْ.
6 أَنَا مُنْكَرِبْ فِي عَدَالْتِي،
مَا نِخَلِّيهَا!
وَ قَلْبِي مَا عِنْدَهْ شَكّ
فِي كُلَّ أَيَّامْ حَيَاتِي!
7 خَلِّي عَدُويِ يِلْعَاقَبْ مِثِلْ عَاصِي
وَ الْيُقُمّ ضِدِّي يِلْعَاقَبْ مِثِلْ مُجْرِمْ!
8 أَشَانْ إِنْتُو تُقُولُوا:
«الْكَافِرْ مَا عِنْدَهْ عَشَمْ بَعَدْ يُمُوتْ
وَكِتْ الرَّبّ يِشِيلْ رُوحَهْ.
9 هَلْ الرَّبّ يَسْمَعْ كُرَوْرَاكَهْ
فِي وَكِتْ ضِيقْتَهْ وَلَّا؟
10 هَلْ هُو يَفْرَحْ بِالْقَادِرْ وَلَّا؟
وَ يَقْدَرْ يِنَادِي الرَّبّ
فِي أَيِّ وَكِتْ وَلَّا؟»
11 أَنَا نِعَلِّمْكُو كِكَّيْف قُدْرَةْ الرَّبّ
وَ مَا نِلَبِّدْ لَيْكُو نِيَّةْ الْقَادِرْ.
12 وَ كَنْ إِنْتُو كُلُّكُو عِرِفْتُوهْ،
مَالَا تِحَجُّوا فِي الرِّيحْ سَاكِتْ؟
صُوفَر يحجّي في العاصيين
13 وَ خَلَاصْ، دَاهُو الْقِسِمْ الْجَهَّزَهْ
الرَّبّ لِلْعَاصِيِينْ
وَ دَا مِثِلْ وَرَثَةْ الْقَرَّرْهَا
الْقَادِرْ لِلْمُجْرِمِينْ.
14 كَنْ عِيَالَهْ يَكْتَرَوْا كُلَ،
يَكْتُلْهُمْ السَّيْف
وَ ذُرِّيّتَهْ مَا يَلْقَوْا أَكِلْ.
15 الْفَضَّلَوْا مِنْهُمْ يَكْتُلْهُمْ الْوَبَاءْ
وَ أَرَامِلْهُمْ مَا يَبْكَنْ لَيْهُمْ.
16 الْعَاصِي، كَنْ يِلِمّ الْفُضَّةْ مِثِلْ التُّرَابْ
وَ يِلِمّ الْخُلْقَانْ بِكَتَرَةْ كُلَ،
17 خَلِّي يِلِمُّهُمْ!
الصَّالِحْ بَسْ يَلْبَسْهُمْ
وَ الْفُضَّةْ كَمَانْ تَبْقَى قِسِمْ لِلْبَرِي.
18 الْعَاصِي بَنَى بَيْتَهْ ضَعِيفْ
مِثِلْ بَيْت الْعِتَّةْ
وَ مَا يِطَوِّلْ
مِثِلْ عِلِّيَّةْ الْيِهَاهِي الطَّيْر.
19 هُو يُنُومْ غَنِيْ وَ مَا يَلْقَى كَفَنْ.
وَ بِغَفْلَةْ، يَبْقَى مَا فِيهْ.
20 الرُّعُبْ يَجِي لَيَّهْ بِسُرْعَةْ مِثِلْ السَّيْل
وَ أَمْ زَوْبَعَانَةْ تَجِي تَخْطِفَهْ فِي أُسْط اللَّيْل.
21 رِيحْ الصَّبَاحْ تِوَدِّيهْ وَ هُو يَمْشِي
وَ تِشِيلَهْ مِنْ مَسْكَنَهْ.
22 بَلَا رَحْمَةْ، الرَّبّ يِزَرِّقَهْ بِنَشَاشِيبْ
وَ هُو يِحَاوِلْ يَخْنِسْ مِنْهُمْ.
23 وَ النَّاسْ يِصَفُّقُوا لِدَمَارَهْ
وَ يِشَّمَّتَوْا لَيَّهْ مِنْ مَارِقْ مِنْ بَيْتَهْ.
© La Bible en arabe tchadien © Alliance biblique du Tchad, 2019
