أيُّوب أذّكّر الحلو
1 وَ بَتَّانْ أَيُّوبْ كَلَّمْ وَ قَالْ:
2 أَنَا نِتْمَنَّى زَمَانِي الْفَاتْ يِقَبِّلْ لَيِّ
وَكِتْ الرَّبّ قَاعِدْ يَحْفَضْنِي.
3 وَ دَا وَكِتْ بَرَكَةْ الرَّبّ قَاعِدَةْ
فَوْقِي مِثِلْ فَانُوسْ
وَ نُورَهْ قَاعِدْ يِضَوِّي لَيِّ
دَرْبِي فِي الضَّلَامْ.
4 دَوْل أَحْسَنْ أَيَّامْ حَيَاتِي
وَكِتْ الرَّبّ قَاعِدْ يِفَكِّرْ فِي بَيْتِي مِثِلْ رَفِيقِي.
5 فِي الْوَكِتْ دَاكْ، لِسَّاعْ الْقَادِرْ قَاعِدْ مَعَايِ
وَ أَوْلَادِي مُحَوِّقِينِّي.
6 فِي الْوَكِتْ دَاكْ، أَنَا نِلْبَرَّدْ بِاللَّبَنْ
وَ عَصَّارَاتِي يِسِيلُوا بِالدِّهِنْ بِكَتَرَةْ.
7 وَ دَا وَكِتْ نَمْرُقْ عَلَيْ خَشُمْ بَابْ الْحِلَّةْ
وَ نَقْعُدْ فِي نَقَعَةْ الْمَلَمَّةْ.
8 وَ وَكِتْ يِشِيفُونِي،
الصُّبْيَانْ يِطَرُّفُوا
وَ الشِّيَّابْ يُقُمُّوا لَيِّ فَوْق.
9 وَ الْمَسَائِيلْ يِوَقُّفُوا كَلَامْهُمْ
وَ يُخُطُّوا إِيدَيْهُمْ فِي خُشُومْهُمْ.
10 وَ حِسّ الْكُبَارَاتْ مَا يِنْسَمِعْ
وَ لِسَانْهُمْ كُلَ مَا يَنْطَقْ.
وَ دَا كُلَّ لِيِوَصُّفُوا لَيِّ إِحْتِرَامْهُمْ.
11 الْأَدَانْ التَّسْمَعْنِي
تُقُولْ أَنَا مُبَارَكْ
وَ الْعَيْن التِّشِيفْنِي
تَشْهَدْ لَيِّ.
12 أَشَانْ نِنَجِّي الْمِسْكِينْ
الْيِكَوْرِكْ لَيِّ لِلْفَزَعْ
وَ الْأَتِيمْ الْمَا عِنْدَهْ
نَادُمْ يِسَاعِدَهْ.
13 وَ بَرَكَةْ الْقَرِيبْ لِلْمَوْت تَنْزِلْ فَوْقِي
وَ نَمْلَا قَلِبْ الْأَرْمَلَةْ بِالْفَرَحْ.
14 نَلْبَسْ الْعَدَالَةْ وَ هِي تَكْسِينِي
وَ الْحَقّ مِثِلْ خَلَقْ وَ كَدْمُولْ لَيِّ.
15 أَنَا مِثِلْ عُيُونْ لِلْعَمْيَانْ
وَ مِثِلْ رِجْلَيْ لِلْأَعْرَجْ.
16 أَنَا مِثِلْ أَبُو لِلْمَسَاكِينْ
وَ نِفَكِّرْ عَدِيلْ فِي حُقُوقْ الضَّيْف.
17 وَ نَكْسِرْ سَالْفَةْ الْمُجْرِمْ
وَ مِنْ خَشْمَهْ، نَقْلَعْ فَرِيسْتَهْ.
18 وَ خَلَاصْ، أَنَا قُلْت:
«بَعَدْ أَيَّامْ كَتِيرِينْ
مِثِلْ رَمْلَةْ هَنَا خَشُمْ الْبَحَرْ،
أَنَا نُمُوتْ فِي لُبّ عَايِلْتِي.
19 نَبْقَى مِثِلْ شَدَرَةْ
الْعُرُوقْهَا رَوْيَانِينْ أَلْمِي
وَ بِلَيْل،
التَّلَجْ يَنْزِلْ فِي فُرُوعِي.
20 شَرَفِي يِلْجَدَّدْ فَوْقِي
وَ نُبَّالِي يَبْقَى قَوِي فِي إِيدِي.»
21 وَ فِي الْوَكِتْ دَاكْ، النَّاسْ يَرْجَوْنِي
وَ يَسْكُتُوا لِيَسْمَعَوْا وَصِيّتِي.
22 بَعَدْ كَلَامِي،
هُمَّنْ مَا يِنَاقُشُوا
وَ كَلَامِي يَنْزِلْ فَوْقهُمْ
مِثِلْ مَطَرَةْ.
23 هُمَّنْ يَرْجَوْنِي
مِثِلْ يَرْجَوْا الْمَطَرْ
وَ يَرْضَوْا بِكَلَامِي
مِثِلْ أَلْمِي الرِّشَاشْ.
24 وَ أَنَا نَضْحَكْ لَيْهُمْ
وَ هُمَّنْ مَا يِصَدُّقُوهْ
وَ وَكِتْ شَافَوْا وِجْهِي ضَاوِي،
خَلَاصْ يَلْقَوْا عَشَمْ.
25 أَنَا عَزَلْت لَيْهُمْ الدَّرِبْ
وَ قَعَدْت فِي رَاسْهُمْ.
وَ بِقِيتْ مِثِلْ مَلِكْ فِي لُبّ عَسْكَرَهْ
وَ مِثِلْ نَادُمْ الْيِحَنِّسْ التَّعْبَانِينْ.
© La Bible en arabe tchadien © Alliance biblique du Tchad, 2019
