أيُّوب يبرّي نفْسه آخِر مرّة
1 أَنَا سَوَّيْت عَهَدْ مَعَ نَفْسِي
مَا نِشِيفْ بِشَهْوَةْ لِبِنَيَّةْ.
2 كَنْ سَوَّيْتَهْ، شُنُو الْقِسِمْ النَّلْقَاهْ
مِنْ الرَّبّ فِي الْعَالِي؟
وَ شُنُو الْوَرَثَةْ الْيَنْطِيهَا لَيِّ
الْقَادِرْ مِنْ فَوْق؟
3 الدَّمَارْ مَا وَاجِبْ
لِلنَّادُمْ الْمُجْرِمْ وَلَّا؟
وَ الْمَصِيبَةْ مَا تَقَعْ
فِي الْيِسَوِّي الشَّرّ وَلَّا؟
4 الرَّبّ مَا يِشِيفْ دُرُوبِي وَلَّا؟
وَ مَا يَحْسِبْ كُلَّ خَطْوَاتِي وَلَّا؟
5 كَنْ أَنَا مَشَيْت بِكِدِبْ
أَوْ جَرَيْت بِسُرْعَةْ لِلْغَشّ،
6 خَلِّي الرَّبّ يَوْزِنِّي
فِي الْمِيزَانْ الْعَادِلْ
وَ يَعَرِفْ كَمَالِي.
7 كَنْ أَنَا قَبَّلْت مِنْ الدَّرِبْ الْعَدِيلْ
وَ شَهْوَةْ قَلْبِي تَابَعَتْ عُيُونِي
وَ إِيدَيْنِي أَلَّطَّخَوْا بِالنَّجَاسَةْ،
8 خَلَاصْ، نَاسْ آخَرِينْ يَاكُلُوا التَّيْرَبْتَهْ
وَ يِدَمُّرُوا ذُرِّيّتِي!
9 كَنْ قَلْبِي مَيَّلْ لِمَرَةْ
وَ حَرَسْتَهَا فِي خَشُمْ بَابْ جَارِي،
10 خَلَاصْ، خَلِّي مَرْتِي كُلَ
يِشِيلْهَا رَاجِلْ آخَرْ
وَ نَاسْ كَتِيرِينْ يَزْنَوْهَا.
11 أَشَانْ زِنَايِ دَا يَبْقَى فِعِلْ شَيْن.
أَيْوَى، دَا خَطَا الْيِجِيبْ عِقَابْ مِنْ الْقَاضِي.
12 وَ دِي نَارْ التَّاكُلْ لَحَدِّي الْآخِرَةْ
وَ تِدَمِّرْ كُلَّ إِنْتَاجِي.
13 أَنَا مَا رَفَضْت حُقُوقْ عَبْدِي أَوْ خَادْمِي
وَكِتْ يِوَدُّونِي فِي الشَّرِيعَةْ.
14 كَنْ أَوَّلْ أَنَا سَوَّيْتَهْ،
نِسَوِّي شُنُو وَكِتْ الرَّبّ يِحَاسِبْنِي؟
وَ نُقُولْ شُنُو وَكِتْ يَسْأَلْنِي؟
15 الْخَلَقَانِي أَنَا فِي بَطُنْ أَمِّي
خَلَقَاهُمْ هُمَّنْ كُلَ.
هُو نَفْس الْإِلٰـهْ
الْخَطَّانَا فِي بُطُونْ أَمَّهَاتْنَا.
16 أَنَا مَا دَحَرْت الْمِسْكِينْ
مِنْ الشَّيّءْ الْيِدَوْرَهْ
وَ مَا جَرَّيْت دُمُوعْ
عُيُونْ الْأَرْمَلَةْ.
17 أَنَا مَا أَكَلْت أَكْلِي وِحَيْدِي
وَ مَا دَحَرْت الْأَتِيمْ مَا يُدُوقَهْ.
18 لَا! أَشَانْ مِنْ صُبَايِ،
هُو كِبِرْ مَعَايِ مِثِلْ مَعَ أَبُوهْ
وَ دَايْماً أَنَا دَافَعْت لِلْأَرْمَلَةْ.
19 وَكِتْ أَنَا شِفْت نَادُمْ فَقْرِي مَا عِنْدَهْ خَلَقْ
وَ مِسْكِينْ مَا عِنْدَهْ غِطَاءْ،
20 حَتَّى كَنْ مَا شَكَرَوْنِي
بِكُلَّ قَلِبْهُمْ كُلَ،
أَنَا غَطَّيْتهُمْ بِغَطَّايْ دَافِيَةْ
مِنْ صُوفْ غَنَمِي.
21 حَتَّى كَنْ أَنَا مُهِمّ فِي خَشُمْ بَابْ الْحِلَّةْ كُلَ،
أَنَا مَا رَفَعْت إِيدِي لِنِخَوِّفْ أَتِيمْ.
22 كَنْ أَوَّلْ أَنَا سَوَّيْتَهْ،
خَلِّي إِيدِي تِنْقَطِعْ مِنْ كِتْفِي
وَ دُرَاعِي يِنْقَطِعْ مِنْ كُوعِي.
23 أَشَانْ الدَّمَارْ الْجَايِ مِنْ الرَّبّ
يِسَبِّبْ لَيِّ رُعُبْ
وَ فِي شَانْ عَظَمَتَهْ،
مَا عِنْدِي قُدْرَةْ.
24 أَنَا مَا خَطَّيْت أَمَانِي فِي الدَّهَبْ
وَ مَا قُلْت لَيَّهْ: «نِتْوَكَّلْ عَلَيْك».
25 وَ مَا فِرِحْت بِكَتَرَةْ غُنَايِ
وَ لَا بِخُمَامِي اللَّمَّتَهْ إِيدِي.
26 وَ مَا شِفْت نُورْ الْحَرَّايْ وَكِتْ طَلَعْت
وَ الْقَمَرْ وَكِتْ قَاعِدْ يَزْحَفْ بِكُلَّ جَمَالَهْ،
27 وَ قَلْبِي مَا مَيَّلْ لَيْهُمْ بِعَشِيرْ
وَ أَنَا مَا جَعَلْتُهُمْ مِثِلْ إِلٰـهَاتْ لِنَعَبُدْهُمْ.
28 كَنْ أَوَّلْ أَنَا سَوَّيْتَهْ،
دَا خَطَا وَاجِبْ لَيِّ الْعِقَابْ،
أَشَانْ أَنَا خُنْت الرَّبّ فِي الْعَالِي.
29 أَنَا مَا فِرِحْت بِدَمَارْ
الْعَدُو الْيَكْرَهْنِي
وَ مَا نَطَّيْت مِنْ الْفَرْحَةْ
وَكِتْ الشَّرّ وَقَعْ فَوْقَهْ.
30 لَا! أَشَانْ مَا وَاجِبْ لِسَانِي يِسَوِّي ذَنِبْ
وَ لَا نَطْلُبْ مَوْتَهْ بِلَعَنَةْ.
31 لَاكِنْ النَّاسْ الْقَاعِدِينْ فِي خَيْمِتِي بُقُولُوا:
«يَاتُو الْمَا شِبِعْ مِنْ اللَّحَمْ فِي بَيْت أَيُّوبْ؟»
32 أَبَداً، أَنَا مَا رَقَّدْت الضَّيْف بَرَّا
وَ بَابِي دَايْماً فَاتِحْ لِلْمُسَافِرِينْ.
33 أَنَا مَا مِثِلْ كُلَّ النَّاسْ،
نِلَبِّدْ عِصْيَانِي
وَ خَطَايِ كُلَ مَا دَسَّيْتَهْ تِحْتِي
وَ قَعَدْت فَوْقَهْ.
34 وَ دَا أَشَانْ أَنَا خُفْت مِنْ كَلَامْ النَّاسْ
وَ كَرَاهِيَّةْ الْقَبَايِلْ خَوَّفَتْنِي
لَحَدِّي أَنَا سَكَتّْ
وَ مَا مَرَقْت مِنْ بَيْتِي.
أيُّوب يدَوْر الربّ يرُدّ ليه
35 فِي نَادُمْ الْيَسْمَعْنِي وَلَّا؟
وَ دَا كَلَامِي الْأَخِيرْ.
خَلِّي الْقَادِرْ يُرُدّ لَيِّ!
كَنْ فِي شَكْوَةْ مِنْ عَدُويِ
مَكْتُوبَةْ ضِدِّي،
36 خَلَاصْ أَنَا نِشِيلْهَا فِي كِتْفِي
وَ نَلْبَسْهَا مِثِلْ تَاجْ فِي رَاسِي.
37 كَنْ مِثِلْ دَا خَلَاصْ،
نِقَدِّمْ لِلرَّبّ كُلَّ حِسَابْ خَطْوَاتِي
وَ نِقَرِّبْ لَيَّهْ بِفَرَحْ مِثِلْ مَلِكْ.
38 كَنْ الْأَرْض شَكَتْ مِنِّي
وَ جُرُوفْهَا أَنْضَلَمَوْا فَوْقِي
39 أَشَانْ أَنَا أَكَلْت إِنْتَاجْهَا
الْأَنَا مَا شَرَيْتَهْ،
وَ كَنْ ظَلَمْت سِيَادَهْ،
40 خَلَاصْ، خَلِّي أَرْضِي تِقَوِّمْ حَسْكَنِيتْ
فِي بَدَلْ الْقَمَحْ الْأَحْمَرْ
وَ أَنْدِرَيْسَةْ
فِي بَدَلْ الْقَمَحْ الْأَبْيَضْ!
وَ دَا كَلَامْ أَيُّوبْ الْأَخِيرْ.
© La Bible en arabe tchadien © Alliance biblique du Tchad, 2019
