الغول لُيَاتَان المِثِل تُمْساح
1 هَلْ تَقْدَرْ تَكْرُبْ لُيَاتَانْ بِجَنْبَاتْ
وَ تَرْبُطْ لِسَانَهْ بِحَبِلْ وَلَّا؟
2 هَلْ تَقْدَرْ تِدِسّ حَبِلْ فِي مُنْخَرَهْ
وَ تِقِدّ شِدْقَهْ بِجَنْبَاتْ كَبِيرْ وَلَّا؟
3 هَلْ هُو يَقْدَرْ يَشْحَدَكْ
وَ يِحَجِّي لَيْك كَلَامْ حَلُو وَلَّا؟
4 وَ يِسَوِّي مَعَاكْ عَلَاقَةْ وَلَّا؟
إِنْتَ تَقْدَرْ تِعَبِّدَهْ لِمُدَّةْ حَيَاتَهْ وَلَّا؟
5 هَلْ تَقْدَرْ تَلْعَبْ مَعَايَهْ مِثِلْ طَيْرَايْ
وَ تَرْبُطَهْ لِبَنَاتَكْ يَلْعَبَنْ بَيَّهْ وَلَّا؟
6 هَلْ الْمُشْتَرِكِينْ يُخُطُّوهْ لِلْبَيْع
وَ يِقَسُّمُوهْ أَمْبَيْنَاتْ التُّجَّارْ وَلَّا؟
7 هَلْ تَقْدَرْ تِطَعِّنْ فَرْوِتَهْ بِحُرَابْ
وَ رَاسَهْ بِكَوْكَابْ وَلَّا؟
8 وَ لَاكِنْ كَنْ دَوَّرْت تَكُرْبَهْ بِإِيدَكْ،
تِذَّكَّرْ فَحَالِيّتَهْ
وَ بَتَّانْ مَا تِلَمِّسَهْ.
9 قِدَّامَهْ، أَيِّ نَادُمْ عَشَمَهْ يِنْقَطِعْ
وَ الْيِشِيفَهْ، الْخَوْف يَكُرْبَهْ.
10 وَ مَا فِي نَادُمْ يَقْدَرْ يُجُقَّهْ.
وَ كَنْ مِثِلْ دَا،
يَاتُو يَقْدَرْ يَقِيفْ قِدَّامِي أَنَا الرَّبّ؟
11 يَاتُو دَيَّنَانِي شَيّءْ
لِنِقَبِّلَهْ لَيَّهْ؟
أَشَانْ كُلَّ شَيّءْ الْقَاعِدْ تِحِتْ السَّمَاءْ هَنَايِ أَنَا!
12 أَنَا مَا نَسْكُتْ فِي شَانْ لُيَاتَانْ
وَ نِكَلِّمْ بِإِيدَيْنَهْ وَ رِجِلَيْنَهْ
وَ قُدُرْتَهْ الْعَظِيمَةْ وَ شَكْلَهْ الْجَمِيلْ.
13 يَاتُو يَقْدَرْ يَسْلَخْ فَرْوِتَهْ؟
وَ يَاتُو يَدْخُلْ أَمْبَيْنَاتْ سَوَالْفَهْ؟
14 وَ يَاتُو يَقْدَرْ يَفْتَحْ خَشْمَهْ؟
أَشَانْ سُنُونَهْ ذَاتَهْ بِخَوُّفُوا.
15 وَ ضَهَرَهْ مُغَطَّى
بِرِيقَانْ هَنَا دَرَقْ
الْمُلَصَّقِينْ بِنِظَامْ.
16 الْوَاحِدْ مُلَصَّقْ مَعَ الْآخَرْ
لَحَدِّي رِيحْ كُلَ مَا تُفُوتْ أَمْبَيْنَاتْهُمْ.
17 هُمَّنْ مَرْبُوطِينْ الْوَاحِدْ مَعَ الْآخَرْ
وَ لَمِّينْ أَمْبَيْنَاتْهُمْ مَا يِنْفَرْقُوا.
18 وَكِتْ يِعَطِّشْ،
يَمْرُقْ مِنَّهْ نُورْ
وَ عُيُونَهْ يِرَارُوا
مِثِلْ نُورْ الصَّبَاحْ.
19 وَ ضَيّ يَمْرُقْ مِنْ خَشْمَهْ
وَ شَرَارْ النَّارْ يَمْرُقْ مِنَّهْ.
20 وَ دُخَّانْ يَمْرُقْ مِنْ مُنْخَرَهْ
مِثِلْ بَوْخ الْبُرْمَةْ الْهَجَّوْا نَارْهَا.
21 وَ نَفَسَهْ يِقَبِّضْ نَارْ
وَ أَمْ بَلْبَالَةْ تَمْرُقْ مِنْ خَشْمَهْ.
22 وَ الْقُدْرَةْ قَاعِدَةْ فِي رَقَبَتَهْ
وَ الْخَوْف يَجْرِي قِدَّامَهْ.
23 جِلْدَهْ مُطَبَّقْ وَ مُلَصَّقْ أَمْبَيْنَاتَهْ
وَ قَاعِدْ فَوْقَهْ قَوِي مَا يِلْحَرَّكْ.
24 قَلْبَهْ قَوِي مِثِلْ الْحَجَرْ
وَ قَوِي مِثِلْ الْمُرْحَاكَةْ.
25 قِدَّامْ عَظَمَتَهْ،
الْكُبَارَاتْ يَكْرُبْهُمْ الْخَوْف
وَ مِنْ شِدَّةْ الْبَرْجَالْ،
يِعَرُّدُوا.
26 وَ الْيِقَرِّبْ لَيَّهْ،
سَيْفَهْ مَا يَنْفَعَهْ
وَ حَرِبْتَهْ وَ طَبِيقَهْ
وَ دِرْعَهْ كُلَ مَا يَنْفَعَوْه.
27 أَيْوَى! لُيَاتَانْ يَجْعَلْ الْحَدِيدْ مِثِلْ الْعَقَيْق
وَ النَّحَاسْ مِثِلْ عُودْ الْمُسَوِّسْ.
28 النُّشَّابْ مَا يَطُرْدَهْ
وَ حُجَارْ الْمِقْلَاعْ لَيَّهْ مِثِلْ عَقَيْق.
29 هُو يَجْعَلْ الْعَصَاةْ مِثِلْ عَقَيْقَايْ
وَ يِشَّمَّتْ لِصُفَّارَةْ الْحَرْبَةْ وَكِتْ تُفُوتْ.
30 فَرْوَةْ بَطْنَهْ مِثِلْ مُسْمَارْ طَرِينْ
وَ دَرْبَهْ فِي الطِّينَةْ مِثِلْ دَرِبْ الْحَرَّاتَةْ.
31 وَ يِحَرِّكْ الْأَلْمِي مِثِلْ قَاعِدْ يُفُورْ
وَ الْأَلْمِي يِلْغَيَّرْ وَ يَبْقَى رِغْوَةْ.
32 وَ يِخَلِّي وَرَايَهْ دَرِبْ وَاضِحْ
وَ أَلْمِي الْغَرِيقْ يَبْقَى أَبْيَضْ مِثِلْ صُوفْ الشَّايِبْ.
33 خَلَاصْ فِي الْأَرْض، مَا فِي مِثْلَهْ
وَ هُو مَخْلُوقْ بَلَا خَوْف.
34 وَ يَحْقِرْ
كُلَّ الْمَخْلُوقِينْ الْمُتَكَبِّرِينْ
وَ هُو مَلِكْ
فَوْق كُلَّ الْحَيْوَانَاتْ الْفَسْلِينْ.
© La Bible en arabe tchadien © Alliance biblique du Tchad, 2019
