ندامة أيُّوب
1 وَ خَلَاصْ، أَيُّوبْ رَدَّ لِلّٰهْ وَ قَالْ:
2 أَنَا نَعَرِفْ
إِنْتَ تَقْدَرْ تِسَوِّي كُلَّ شَيّءْ
وَ مَا فِي وَاحِدَةْ مِنْ أَفْكَارَكْ
الْمَا تِلْحَقَّقْ.
3 إِنْتَ سَأَلْتِنِي وَ قُلْت:
«يَاتُو الْمَا يِخَلِّي نِيّتِي تَبْقَى وَاضْحَةْ بَلَا مَعْرَفَةْ؟»
صَحِيحْ، أَنَا بَلَا فِهِمْ قُلْت أَشْيَاءْ عَجِيبِينْ
الْيُفُوتُونِي وَ مَا نَعَرِفْهُمْ.
4 إِنْتَ سَأَلْتِنِي وَ قُلْت:
«أَسْمَعْنِي، أَنَا نِكَلِّمْ لَيْك
وَ نَسْأَلَكْ وَ إِنْتَ تُرُدّ لَيِّ.»
5 أَنَا سِمِعْتَكْ بِأَدَانِي
وَ شِفْتَكْ بِعَيْنِي.
6 فِي شَانْ دَا، أَنَا نِدِمْت لِكَلَامِي وَ تُبْت
وَ صَبَّيْت فِي رَاسِي تُرَابْ وَ رُمَادْ.
الرُفْقان يقدُّموا ضحيّة
7 وَ بَعَدْ اللّٰهْ قَالْ الْكَلَامْ دَا لِأَيُّوبْ، هُو وَجَّهْ كَلَامَهْ لِأَلِفَازْ مِنْ بَلَدْ تَيْمَانْ وَ قَالْ: «غَضَبِي بِقِي شَدِيدْ ضِدَّكْ إِنْتَ وَ ضِدّ رُفْقَانَكْ الْإِتْنَيْن أَشَانْ إِنْتُو مَا حَجَّيْتُوا بَيِّ بِكَلَامْ صَحِيحْ مِثِلْ كَلَامْ عَبْدِي أَيُّوبْ. 8 وَ بِسَبَبْ دَا، شِيلُوا سَبْعَةْ تَوْر وَ سَبْعَةْ كَبِشْ وَ أَمْشُوا أَلْقَوْه لِعَبْدِي أَيُّوبْ وَ قَدُّمُوا الْبَهَايِمْ دَوْل ضَحِيَّةْ مُحَرَّقَةْ. وَ عَبْدِي أَيُّوبْ يَسْأَلْ لَيْكُو. وَ فِي شَانَهْ هُو بَسْ، أَنَا مَا نِسَوِّي فَوْقكُو حَسَبْ طَمَاسِتْكُو. وَ إِنْتُو مَا حَجَّيْتُوا بَيِّ بِكَلَامْ صَحِيحْ مِثِلْ كَلَامْ عَبْدِي أَيُّوبْ.» 9 وَ خَلَاصْ، أَلِفَازْ مِنْ بَلَدْ تَيْمَانْ وَ بِلْدَدْ مِنْ شُوحَةْ وَ صُوفَرْ مِنْ نَعْمَةْ مَشَوْا وَ سَوَّوْا مِثِلْ اللّٰهْ الرَّبّ أَمَرَاهُمْ بَيَّهْ. وَ اللّٰهْ قِبِلْ سُؤَالْ أَيُّوبْ.
اللّه بارك أيُّوب بتان
10 وَ وَكِتْ أَيُّوبْ سَأَلْ اللّٰهْ فِي شَانْ رُفْقَانَهْ، اللّٰهْ قَبَّلْ لَيَّهْ كُلَّ خُمَامَهْ مِثِلْ أَوَّلْ دَا، مَرَّتَيْن. 11 وَ كُلَّ أَخْوَانَهْ وَ أَخْوَاتَهْ وَ نَاسْ مَعْرَفَتَهْ الزَّمَانْ جَوْا زَارَوْه. هُمَّنْ أَكَلَوْا مَعَايَهْ فِي بَيْتَهْ وَ حَنَّوْا فَوْقَهْ وَ كَفَّرَوْا لَيَّهْ مِنْ كُلَّ الْبَلَاءْ النَّزَّلَهْ فَوْقَهْ اللّٰهْ. وَ أَيِّ وَاحِدْ مِنْهُمْ أَنْطَاهْ لِأَيُّوبْ حَجَرْ فُضَّةْ وَ خَاتِمْ هَنَا دَهَبْ.
12 وَ اللّٰهْ بَارَكْ السِّنِينْ الْأَخِيرِينْ هَنَا أَيُّوبْ زِيَادَةْ مِنْ سِنِينَهْ الْأَوَّلْ وَ هُو لِقِي 14 000 غَنَمْ وَ 6 000 جُمَالْ وَ 2 000 جَوْز هَنَا بَقَرْ وَ 1 000 حَمِيرْ أَنَاتِي. 13 وَ بَتَّانْ وِلِدْ وَ جَابْ سَبْعَةْ أَوْلَادْ وَ تَلَاتَةْ بَنَاتْ. 14 الْأَوَّلْ سَمَّاهَا يَمِيمَةْ وَ التَّانِي سَمَّاهَا قَصِيعَةْ وَ التَّالِتْ سَمَّاهَا قَرْن هَفُوكْ. 15 وَ فِي كُلَّ الْبَلَدْ، مَا فِي عَوِينْ جَمِيلَاتْ مِثِلْ بَنَاتْ أَيُّوبْ وَ أَبُوهِنْ أَنْطَاهِنْ وَرَثَةْ مَعَ أَخْوَانْهِنْ.
16 وَ بَعَدْ دَا، أَيُّوبْ عَاشْ 140 سَنَةْ وَ هُو شَافْ عِيَالَهْ وَ عِيَالْ عِيَالَهْ لَحَدِّي الذُّرِّيَّةْ الرَّابْعَةْ. 17 وَ وَكِتْ بِقِي شَايِبْ وَ شِبِعْ مِنْ الدُّنْيَا، هُو مَاتْ.
© La Bible en arabe tchadien © Alliance biblique du Tchad, 2019
