أوّل كلام بِلْدَد
1 وَ بِلْدَدْ الْمِنْ شُوحَةْ شَالْ الْكَلَامْ وَ قَالْ:
2 لَحَدِّي مَتَى
تُقُولْ الْكَلَامْ دَا؟
وَ لَحَدِّي مَتَى
كَلَامْ خَشْمَكْ يَمْرُقْ
مِثِلْ رِيحْ شَدِيدَةْ؟
القادِر ما يعوِّج الشريعة
3 هَلْ الرَّبّ يِعَوِّجْ الشَّرِيعَةْ وَلَّا؟
أَيْوَى، الرَّبّ الْقَادِرْ يِعَوِّجْ الْعَدَالَةْ وَلَّا؟
4 أَشَانْ أَوْلَادَكْ أَذْنَبَوْا
وَ هُو عَاقَبْهُمْ حَسَبْ عِصْيَانْهُمْ.
5 وَ لَاكِنْ كَنْ تِفَتِّشْ الرَّبّ
وَ كَنْ تَشْحَدْ الرَّبّ الْقَادِرْ
6 وَ كَنْ إِنْتَ صَافِي وَ عَدِيلْ،
خَلَاصْ هُو يِفَكِّرْ فَوْقَكْ
وَ يِثَبِّتَكْ فِي عَدَالْتَكْ.
7 وَ تِشِيفْ الْعِنْدَكْ فِي الْبِدَايَةْ
شِيَّةْ بَسْ!
أَكِيدْ، فِي مُسْتَقْبَلَكْ تَلْقَى
زِيَادَةْ مِنَّهْ!
وصيّة الجُدود
8 أَسْأَلْ الذُّرِّيَّاتْ الْفَاتَوْا
وَ أَحْفَضْ عَدِيلْ تَجْرِبَةْ جُدُودْهُمْ.
9 أَشَانْ أَنِحْنَ نَاسْ هَنَا أَمِسْ بَسْ،
مَا نَعَرْفُوا شَيّءْ.
وَ أَيَّامْنَا فِي الْأَرْض
يُفُوتُوا عَجَلَةْ مِثِلْ الضُّلّ.
10 لَاكِنْ الْجُدُودْ دَوْل يِعَلُّمُوكْ
وَ يِكَلُّمُوا لَيْك.
وَ مِنْ دَاخَلْ قَلِبْهُمْ
يَمْرُقْ كَلَامْ الْبُقُولْ:
11 «هَلْ الْبِرْدِي يُقُمّ بَرَّا
مِنْ الرَّهَدْ وَلَّا؟
التِّبِنْ يَقْدَرْ يِزِيدْ
بَلَا أَلْمِي وَلَّا؟
12 لَا! كَنْ أَخْضَرْ كُلَ قُبَّالْ مَا يَقْطَعَوْه،
بَلَا أَلْمِي هُو يَيْبَسْ عَجَلَةْ مِنْ كُلَّ الْقَشّ.»
13 وَ يُكُونْ مِثِلْ دَا،
لِكُلَّ الْيَنْسَوْا دَرِبْ الرَّبّ.
أَيْوَى، عَشَمْ الْكَافِرْ يِنْقَطِعْ.
14 هُو خَطَّ عَشَمَهْ
فِي شَيّءْ مَا مَضْمُونْ
وَ أَمَّنْ نَفْسَهْ لِشَيّءْ خَفِيفْ
مِثِلْ بَيْت أَبُنْ شَبَشْ.
15 هُو يِرَّكَّزْ فِي بَيْتَهْ
وَ الْبَيْت دَا يَقَعْ.
هُو يِلْعَلَّقْ فَوْقَهْ
وَ لَاكِنْ الْبَيْت مَا يَثْبِتْ.
16 الْكَافِرْ أَخْضَرْ مِثِلْ شَدَرَةْ
تِحِتْ الْحَرَّايْ.
هِي مَدَّتْ فُرُوعْهَا
وَ غَطَّتْ بَيْهُمْ الْجِنَيْنَةْ.
17 وَ عُرُوقْهَا يِشَّرْبَكَوْا فِي كَوْم الْحَصْحَصْ
وَ يُشُقُّوا الْحُجَارْ.
18 وَ لَاكِنْ كَنْ يِمَلُّطُوهُمْ
مِنْ بَكَانْهُمْ،
الْبَكَانْ دَا يِغَالِطْ وَ يُقُولْ:
«أَنَا مَا شِفْتَهْ.»
19 دَاهُو فَرْحِتَهْ فِي حَيَاتَهْ.
وَ مِنْ التُّرَابْ دَا،
يُقُمّ نَبَاتْ آخَرْ.
20 شِيفْ! الرَّبّ مَا يَكْرَهْ النَّادُمْ الْعَدِيلْ
وَ مَا يِشَجِّعْ النَّاسْ الْفَسْلِينْ.
21 قَرِيبْ، هُو يَمْلَا قَلْبَكْ بِالضِّحِكْ
وَ حَلْقُومَكْ بِالرَّقْرَاقْ.
22 الْيَكْرَهَوْك الْعَيْب يِغَطِّيهُمْ،
وَ خِيَمْ الْعَاصِيِينْ يَبْقَوْا مَا فِيهُمْ.
© La Bible en arabe tchadien © Alliance biblique du Tchad, 2019
