اللّه رسّل يُونُس لناس نِينَوَى
1 وَ اللّٰهْ حَجَّى لِيُونُسْ تَانِي مَرَّةْ وَ قَالْ: 2 «قُمّ أَمْشِي فِي نِينَوَى، الْمَدِينَةْ الْكَبِيرَةْ. وَ خَبِّرْ نَاسْهَا بِالْكَلَامْ النُّقُولَهْ لَيْك.» 3 وَ فِي الْبَكَانْ دَا، خَلَاصْ يُونُسْ قَمَّ مَشَى نِينَوَى مِثِلْ اللّٰهْ أَمَرَهْ بَيَّهْ. وَ نِينَوَى هِي مَدِينَةْ كَبِيرَةْ بِلْحَيْن وَ نَادُمْ مَا يَقْدَرْ يُشُقَّهَا إِلَّا فِي تَلَاتَةْ يَوْم. 4 وَ يُونُسْ وَصَّلْ فِي نِينَوَى وَ عِنْدَهْ يَوْم تَمَامْ رَايِغْ وَ يُقُولْ: «بَعَدْ أَرْبَعِينْ يَوْم، نِينَوَى تِدَّمَّرْ!»
5 وَ خَلَاصْ، نَاسْ نِينَوَى آمَنَوْا بِكَلَامْ الرَّبّ الْقَالَهْ لَيْهُمْ يُونُسْ. وَ قَرَّرَوْا أَيَّامْ هَنَا صِيَامْ وَ لِبْسَوْا خُلْقَانْ التَّوْبَةْ مِنْ الْغَنِيْ لَحَدِّي الْفَقْرِي. 6 وَ الْمَلِكْ، مِنْ سِمِعْ الْخَبَرْ دَا، طَوَّالِي قَمَّ مِنْ كُرْسِي حَقَّهْ وَ سَلَّ خَلَقَهْ هَنَا الْمُلُوكْ وَ لِبِسْ خَلَقْ التَّوْبَةْ وَ قَعَدْ فِي الرُّمَادْ.
7 وَ فِي الْبَكَانْ دَا، الْمَلِكْ مَرَقْ قَرَارْ فِي نِينَوَى الْبُقُولْ: «بِإِذْنِي أَنَا الْمَلِكْ وَ وُزَرَايِ، مَمْنُوعْ لِلنَّاسْ وَ الْبَهَايِمْ كَنْ بَقَرْ وَلَّا غَنَمْ كُلَ مَا يَاكُلُوا وَ لَا يَسْرَحَوْا وَ لَا يَشَرْبَوْا شَيّءْ. 8 وَ وَاجِبْ النَّاسْ يَلْبَسَوْا خُلْقَانْ التَّوْبَةْ وَ يِلَبُّسُوا الْبَهَايِمْ كُلَ. وَ أَيِّ وَاحِدْ يَشْحَدْ الرَّبّ بِشِدَّةْ وَ يِخَلِّي مِنَّهْ عَمَلَهْ الْفَسِلْ وَ الْعُنُفْ الْقَاعِدْ يِسَوِّيهْ. 9 وَ بَيْدَا، أَكُونْ الرَّبّ يِخَلِّي غَضَبَهْ وَ يَرْفَعَهْ مِنِّنَا وَ خَلَاصْ، مَا نُمُوتُوا.»
10 وَ الرَّبّ شَافْ نَاسْ نِينَوَى قَمَّوْا يِسَوُّوا مِثِلْ كَيْ وَ خَلَّوْا مِنْهُمْ عَمَلْهُمْ الْفَسِلْ. وَ خَلَاصْ، هُو كُلَ خَلَّى غَضَبَهْ الْأَوَّلْ قَرَّرْ يِنَزِّلَهْ فَوْقهُمْ.
© La Bible en arabe tchadien © Alliance biblique du Tchad, 2019
