الأرْض اللِسّاع ما شالوها
1 وَ يَشُوعْ بِقِي شَايِبْ مَرَّةْ وَاحِدْ وَ اللّٰهْ قَالْ لَيَّهْ: «إِنْتَ بِقِيتْ شَايِبْ مَرَّةْ وَاحِدْ وَ الْأَرْض الْوَاجِبْ تِشِيلُوهَا كُلَ كَبِيرَةْ. 2 وَ دِي هِي الْأَرْض الْفَضَّلَتْ. شِيلُوا كُلَّ مُدِيرِيَّاتْ الْفِلِسْطِيِّينْ وَ الْقَشُورِيِّينْ 3 مِنْ وَادِي شِيحُورْ فِي حُدُودْ مَصِرْ لَحَدِّي حُدُودْ عَقْرُونْ فِي الْمُنْشَاقْ. وَ دَا تُرَابْ الْكَنْعَانِيِّينْ الْقَاعِدِينْ فَوْقَهْ خَمْسَةْ كُبَارَاتْ هَنَا الْفِلِسْطِيِّينْ. وَ هُمَّنْ كَبِيرْ غَزَّةْ وَ كَبِيرْ أَشْدُودْ وَ كَبِيرْ أَشْقَلُونْ وَ كَبِيرْ قَاتْ وَ كَبِيرْ عَقْرُونْ وَ كَبِيرْ الْعَوِّيِّينْ 4 فِي الْجُنُوبْ. وَ شِيلُوا كُلَّ أَرْض الْكَنْعَانِيِّينْ مِنْ عَارَةْ هَنَا الصَّيْدُونِيِّينْ لَحَدِّي أَفِيقْ فِي حُدُودْ الْأَمُورِيِّينْ. 5 وَ شِيلُوا بَلَدْ الْقِبَالِيِّينْ وَ كُلَّ لُبْنَانْ فِي الصَّبَاحْ مِنْ بَعَلْ قَادْ قَعَرْ جَبَلْ حَرْمُونْ لَحَدِّي لَبُو حَمَاتْ. 6 وَ شِيلُوا كُلَّ الْجَبَلْ مِنْ لُبْنَانْ لَحَدِّي مِسْرَفْوتْ مَايِمْ الْيَسْكُنْ فَوْقَهْ الصَّيْدُونِيِّينْ. وَ كُلَّ السُّكَّانْ دَوْل، أَنَا نَطْرُدْهُمْ قِدَّامْ بَنِي إِسْرَائِيلْ. وَ إِنْتَ شِيلْ الْبَلَدْ دِي وَ قَسِّمْهَا وَرَثَةْ لِبَنِي إِسْرَائِيلْ بِأَمْ عِيَيْدَاتْ مِثِلْ أَنَا أَمَرْتَكْ بَيَّهْ. 7 وَ هَسَّعْ دَا، قَسِّمْ الْبَلَدْ دِي لِبَنِي إِسْرَائِيلْ لِتَبْقَى وَرَثَتْهُمْ. تِسْعَةْ قَبَايِلْ وَ نُصّ قَبِيلَةْ مَنَسَّى يَلْقَوْا أَرْض وَرَثَتْهُمْ غَرِبْ لِبَحَرْ الْأُرْدُنْ.»
الأرْض الصباح لبحر الأُرْدُن
8 وَ النُّصّ الْآخَرْ هَنَا قَبِيلَةْ مَنَسَّى وَ قَبِيلَةْ رَأُوبِينْ وَ قَبِيلَةْ قَادْ لِقَوْا أَرْض وَرَثَتْهُمْ صَبَاحْ لِبَحَرْ الْأُرْدُنْ وَ دَا بَسْ الْأَنْطَاهْ لَيْهُمْ مُوسَى عَبْد اللّٰهْ. 9 وَ حُدُودْهُمْ مِنْ حِلَّةْ عَرُوعِرْ الْقَاعِدَةْ فِي خَشُمْ وَادِي أَرْنُونْ فِي الْجُنُوبْ وَ الْحِلَّةْ الْقَاعِدَةْ فِي أُسْط الْوَادِي وَ كُلَّ السَّهَلَةْ هَنَا مِيدْبَا لَحَدِّي دِيبُونْ. 10 وَ قِسِمْهُمْ عِنْدَهْ كُلَّ الْمُدُنْ الْحَكَمْ فَوْقهُمْ سِيحُونْ مَلِكْ الْأَمُورِيِّينْ مِنْ حَشْبُونْ لَحَدِّي حُدُودْ بَنِي عَمُّونْ. 11 وَ قِسِمْهُمْ عِنْدَهْ تُرَابْ قِلْعَادْ وَ تُرَابْ قَشُورِيِّينْ وَ الْمَعَاكِيِّينْ وَ جَبَلْ حَرْمُونْ وَ كُلَّ تُرَابْ بَاشَانْ لَحَدِّي سَلْكَةْ. 12 وَ تُرَابْ بَاشَانْ، أَوَّلْ دَا مَمْلَكَةْ عُوقْ الْحَكَمْ فِي عَشْتَرُوتْ وَ إِدْرَعِي وَ هُو آخِرْ وَاحِدْ فَضَّلْ مِنْ الرَّفَايِينْ. مُوسَى كَتَلَاهُمْ وَ شَالْ أَرْضُهُمْ. 13 وَ لَاكِنْ بَنِي إِسْرَائِيلْ مَا شَالَوْا أَرْض الْقَشُورِيِّينْ وَ لَا الْمَعَاكِيِّينْ وَ بَيْدَا، هُمَّنْ سَاكْنِينْ فِي أُسْط بَنِي إِسْرَائِيلْ لَحَدِّي الْيَوْم.
14 وَ لِقَبِيلَةْ لَاوِي، مُوسَى مَا أَنْطَاهُمْ أَرْض وَرَثَةْ. هُمَّنْ وَرَثَوْا الْهَدَايَا الْمُحَرَّقِينْ الْيِقَدُّمُوهُمْ لِلّٰهْ إِلٰـهْ بَنِي إِسْرَائِيلْ. دَا بَسْ بِقِي وَرَثَتْهُمْ مِثِلْ مُوسَى قَالَهْ لَيْهُمْ.
15 وَ مُوسَى أَنْطَى قِسِمْ لِقَبِيلَةْ رَأُوبِينْ حَسَبْ خُشُومْ بُيُوتْهُمْ. 16 وَ قِسِمْهُمْ مِنْ حِلَّةْ عَرُوعِرْ الْقَاعِدَةْ فِي خَشُمْ وَادِي أَرْنُونْ وَ الْحِلَّةْ الْقَاعِدَةْ فِي أُسْط الْوَادِي وَ كُلَّ السَّهَلَةْ هَنَا مِيدْبَا 17 لَحَدِّي حَشْبُونْ وَ كُلَّ حِلَّالْهَا الْفِي السَّهَلَةْ. وَ الْحِلَّالْ دَوْل دِيبُونْ وَ بَامَوْت بَعَلْ وَ بَيْت بَعَلْ مَاعَوْن 18 وَ يَهَاصْ وَ قَدِمُوتْ وَ مِفَعَتْ 19 وَ قِرْيَتَايِمْ وَ سِبْمَةْ وَ سَارَتْ شَهَرْ الْفِي جَبَلْ الْوَادِي 20 وَ بَيْت فَعُورْ وَ جَبَلْ الْفِسْقَةْ وَ بَيْت يَشِيمُتْ. 21 وَ قِسِمْ قَبِيلَةْ رَأُوبِينْ، هُو كُلَّ الْحِلَّالْ هَنَا السَّهَلَةْ دَوْل وَ كُلَّ مَمْلَكَةْ سِيحُونْ مَلِكْ الْأَمُورِيِّينْ الْحَكَمْ فِي حَشْبُونْ. مُوسَى كَتَلَهْ وَ كَتَلْ شُيُوخْ مِدْيَانْ وَ هُمَّنْ أَوِيَا وَ رَاقِمْ وَ صُورْ وَ حُورْ وَ رَابِعْ. دَوْل كُبَارَاتْ الْمَلِكْ سِيحُونْ السَّكَنَوْا فِي الْبَلَدْ دِي. 22 وَ أَمْبَيْن النَّاسْ الْبَنِي إِسْرَائِيلْ كَتَلَوْهُمْ بِالْسَّيْف، فِيَّهْ الشَّوَّافِي بَلْعَامْ وِلَيْد بَعُورْ. 23 وَ حُدُودْ قَبِيلَةْ رَأُوبِينْ فِي الْغَرِبْ بَحَرْ الْأُرْدُنْ وَ الْأَرْض الْجَنْبَهْ. وَ دَوْل الْمُدُنْ وَ الْحِلَّالْ اللِّقَوْهُمْ قَبِيلَةْ رَأُوبِينْ وَرَثَةْ حَسَبْ خُشُومْ بُيُوتْهُمْ.
24 وَ مُوسَى أَنْطَى قِسِمْ لِقَبِيلَةْ قَادْ حَسَبْ خُشُومْ بُيُوتْهُمْ. 25 وَ قِسِمْهُمْ أَرْض يَعْزِيرْ وَ كُلَّ مُدُنْ قِلْعَادْ وَ نُصّ هَنَا أَرْض بَنِي عَمُّونْ لَحَدِّي حِلَّةْ عَرُوعِرْ الْمُقَابِلَةْ مَدِينَةْ رَبَّةْ. 26 وَ قِسِمْهُمْ مِنْ مَدِينَةْ حَشْبُونْ لَحَدِّي رَامَة الْمِصْفَةْ وَ بَطُنِيمْ وَ مِنْ مَحَنَايِمْ لَحَدِّي حُدُودْ لُودَبَارْ. 27 وَ جَنْب وَادِي الْأُرْدُنْ، أَنْطَاهُمْ بَيْت هَارَامْ وَ بَيْت نِمْرَةْ وَ سُكُّوتْ وَ صَفُونْ. وَ دَوْل الْحِلَّالْ الْفَضَّلَوْا مِنْ مَمْلَكَةْ سِيحُونْ مَلِكْ حَشْبُونْ. وَ حُدُودْهُمْ فِي الْغَرِبْ، هُمَّنْ بَحَرْ الْأُرْدُنْ وَ حَوَالَيَّهْ لَحَدِّي بَحَرْ الْجَلِيلْ فِي الْمُنْشَاقْ. كُلَّ أَرْضُهُمْ صَبَاحْ لِبَحَرْ الْأُرْدُنْ. 28 وَ دَوْل الْمُدُنْ وَ الْحِلَّالْ اللِّقَوْهُمْ قَبِيلَةْ قَادْ وَرَثَةْ حَسَبْ خُشُومْ بُيُوتْهُمْ.
29 وَ مُوسَى أَنْطَى قِسِمْ لِنُصّ قَبِيلَةْ مَنَسَّى حَسَبْ خُشُومْ بُيُوتْهُمْ. 30 وَ قِسِمْهُمْ مِنْ مَحَنَايِمْ لَحَدِّي كُلَّ تُرَابْ بَاشَانْ وَ دَا كُلَّ أَرْض مَمْلَكَةْ عُوقْ مَلِكْ بَاشَانْ وَ كُلَّ فُرْقَانْ يَيِيرْ الْقَاعِدِينْ فِي بَاشَانْ، عَدَدْهُمْ 60 فَرِيقْ. 31 وَ قِسِمْهُمْ نُصّ هَنَا مَنْطَقَةْ قِلْعَادْ وَ عَشْتَرُوتْ وَ إِدْرَعِي وَ دَوْل حِلَّالْ مَمْلَكَةْ عُوقْ فِي بَاشَانْ. كُلَّ التُّرَابْ دَا أَنْطَوْه لِنُصّ خُشُومْ بُيُوتْ مَكِيرْ وِلَيْد مَنَسَّى.
32 وَ وَكِتْ مُوسَى فِي كَدَادَةْ مُوَابْ، قَسَّمْ الْوَرَثَةْ دِي وَ هِي الْأَرْض فِي صَبَاحْ لِبَحَرْ الْأُرْدُنْ مُقَابِلْ حِلَّةْ أَرِيحَا. 33 وَ لَاكِنْ لِقَبِيلَةْ لَاوِي، مُوسَى مَا أَنْطَاهُمْ أَرْض وَرَثَةْ أَشَانْ وَرَثَتْهُمْ دِي يَخْدُمُوا لِلّٰهْ إِلٰـهْ بَنِي إِسْرَائِيلْ مِثِلْ هُو قَالَهْ لَيْهُمْ.
© La Bible en arabe tchadien © Alliance biblique du Tchad, 2019
