1 وَ قَبِيلَةْ مَنَسَّى بِكِرْ يُوسُفْ كُلَ لِقَوْا قِسِمْ الْأَرْض. وَ مَكِيرْ هُو بِكِرْ مَنَسَّى وَ أَبُو قِلْعَادْ. وَ هُو لِقِي تُرَابْ قِلْعَادْ وَ بَاشَانْ صَبَاحْ بَحَرْ الْأُرْدُنْ أَشَانْ هُو مُحَارِبْ كَبِيرْ. 2 وَ خُشُومْ بُيُوتْ الْآخَرِينْ هَنَا قَبِيلَةْ مَنَسَّى كُلَ لِقَوْا قِسِمْ الْأَرْض. وَ هُمَّنْ خُشُومْ بُيُوتْ هَنَا أَبِعَازَرْ وَ عِيَالْ حِلَقْ وَ عِيَالْ أَسْرِيِيلْ وَ عِيَالْ شَكِيمْ وَ عِيَالْ حِيفَرْ وَ عِيَالْ شَمِيدَعْ.
وَ دَوْل كُلُّهُمْ دُكُورْ هَنَا قَبِيلَةْ مَنَسَّى وِلَيْد يُوسُفْ حَسَبْ خُشُومْ بُيُوتْهُمْ.
3 وَ صَلُوفْحَدْ وِلَيْد حِيفَرْ وِلَيْد قِلْعَادْ وِلَيْد مَكِيرْ وِلَيْد مَنَسَّى مَا جَابْ وُلَادْ وَ لَاكِنْ جَابْ بَنَاتْ بَسْ. وَ بَنَاتَهْ أَسَامَيْهِنْ مَحْلَةْ وَ نُوعَةْ وَ حُقْلَةْ وَ مِلْكَةْ وَ تِرْصَةْ. 4 وَ الْبَنَاتْ دَيْل جِنْ قِدَّامْ رَاجِلْ الدِّينْ أَلِعَازَرْ وَ قِدَّامْ يَشُوعْ وِلَيْد نُونْ وَ قِدَّامْ الشُّيُوخْ وَ قَالَنْ: «اللّٰهْ أَمَرْ مُوسَى يَنْطِينَا وَرَثَةْ فِي أُسُطْ أَخْوَانَّا.» وَ خَلَاصْ حَسَبْ كَلَامْ اللّٰهْ، أَنْطَوْهِنْ وَرَثَةْ فِي لُبّ أَخْوَانْهِنْ أَوْلَادْ أَبُوهِنْ. 5 وَ قَبِيلَةْ مَنَسَّى لِقَتْ عَشَرَةْ قِسِمْ. وَ دَا بَلَا تُرَابْ قِلْعَادْ وَ بَاشَانْ صَبَاحْ لِبَحَرْ الْأُرْدُنْ 6 أَشَانْ بَنَاتْ مَنَسَّى لِقَنْ وَرَثَتْهِنْ أَمْبَيْن أَخْوَانْهِنْ. وَ لَاكِنْ تُرَابْ قِلْعَادْ لِذُرِّيَّةْ مَنَسَّى الْآخَرِينْ.
7 وَ حُدُودْ مَنَسَّى يَمْشُوا مِنْ أَشِيرْ لَحَدِّي مِكْمَتَةْ مُقَابِلْ شَكِيمْ وَ يَمْشُوا عَلَيْ الْجُنُوبْ لَحَدِّي بَكَانْ سُكَّانْ عَيْن تَفُوحْ. 8 وَ أَرْض تَفُوحْ هِي هَنَا مَنَسَّى وَ لَاكِنْ حِلَّةْ تَفُوحْ الْفِي حُدُودْ مَنَسَّى، هِي هَنَا قَبِيلَةْ أَفْرَايِمْ. 9 وَ الْحُدُودْ يَمْشُوا لِوَادِي قَانَةْ فِي الْوَطِي. وَ الْحِلَّالْ هَنَا الْبَكَانْ دَا، أَنْطَوْهُمْ لِقَبِيلَةْ أَفْرَايِمْ كَنْ قَاعِدِينْ فِي أَرْض قَبِيلَةْ مَنَسَّى كُلَ. وَ حُدُودْ قَبِيلَةْ مَنَسَّى يَمْشُوا مُنْشَاقْ لِلْوَادِي وَ يَقِيفُوا فِي الْبَحَرْ الْأَبْيَضْ. 10 وَ بَيْدَا، قَبِيلَةْ أَفْرَايِمْ عَلَيْ الْوَطِي وَ قَبِيلَةْ مَنَسَّى عَلَيْ الْمُنْشَاقْ وَ حُدُودْهُمْ فِي الْغَرِبْ الْبَحَرْ الْأَبْيَضْ. وَ مُنْشَاقْ لِأَرْض قَبِيلَةْ مَنَسَّى فِي أَرْض قَبِيلَةْ أَشِيرْ وَ أَرْض قَبِيلَةْ يَسَّاكَرْ فِي الصَّبَاحْ. 11 وَ قَبِيلَةْ مَنَسَّى لِقَوْا مُدُنْ فِي أَرْض يَسَّاكَرْ وَ أَرْض أَشِيرْ. وَ الْمُدُنْ دَوْل هُمَّنْ بَيْت شَانْ وَ يِبْلَعَامْ وَ الْحِلَّالْ التَّابْعِينْ لَيْهُمْ وَ دُورْ وَ عَيْن دُورْ وَ تَعْنَكْ وَ مَقِدُّو وَ سُكَّانْهُمْ وَ الْحِلَّالْ التَّابْعِينْ لَيْهُمْ. وَ دَا، تَلَاتَةْ مَنَاطِقْ. 12 وَ لَاكِنْ قَبِيلَةْ مَنَسَّى مَا قِدْرَتْ تِشِيلُوا الْمُدُنْ دَوْل وَ الْكَنْعَانِيِّينْ قَعَدَوْا فِي الْبَلَدْ دِي. 13 وَ وَكِتْ بَنِي إِسْرَائِيلْ بِقَوْا قَوِيِّينْ، قِدْرَوْا عَبَّدَوْا الْكَنْعَانِيِّينْ. وَ لَاكِنْ مَا قِدْرَوْا شَالَوْا مِنْهُمْ أَرْضُهُمْ.
14 وَ ذُرِّيَّةْ يُوسُفْ قَالَوْا لِيَشُوعْ: «مَالَا تَنْطِينَا وَرَثَةْ قِسِمْ وَاحِدْ بَسْ كَنْ أَنِحْنَ نَاسْ كَتِيرِينْ أَشَانْ اللّٰهْ بَارَكَانَا؟» 15 وَ يَشُوعْ قَالْ لَيْهُمْ: «كَنْ إِنْتُو نَاسْ كَتِيرِينْ وَ جِبَالْ أَفْرَايِمْ ضَيِّقْ لَيْكُو، أَمْشُوا فِي الْغَابَةْ وَ شِيلُوا لِنُفُوسْكُو بَكَانْ فِي بَلَدْ الْفِرِزِّيِّينْ وَ الرَّفَايِينْ.» 16 وَ ذُرِّيَّةْ يُوسُفْ قَالَوْا لَيَّهْ: «صَحِيحْ الْجِبَالْ وِحَيْدهُمْ مَا يِتِمُّونَا وَ لَاكِنْ الْكَنْعَانِيِّينْ السَّاكْنِينْ فِي السَّهَلَةْ هَنَا الْبَلَدْ دِي عِنْدُهُمْ عَرَبَاتْ هَنَا حَدِيدْ وَ نَاسْ الْقَاعِدِينْ فِي بَيْت شَانْ وَ حِلَّالْهَا التَّابْعِينْ لَيْهَا وَ الْفِي وَادِي يَزْرَعِيلْ كُلَ.» 17 وَ يَشُوعْ قَالْ لِذُرِّيَّةْ يُوسُفْ يَعْنِي قَبِيلَةْ أَفْرَايِمْ وَ قَبِيلَةْ مَنَسَّى: «إِنْتُو نَاسْ كَتِيرِينْ وَ عِنْدُكُو قُدْرَةْ زِيَادَةْ. مَا وَاجِبْ قِسِمْكُو يَبْقَى وَاحِدْ. 18 وَ هَسَّعْ دَا، شِيلُوا بَلَدْ الْجِبَالْ حَتَّى كَانْ هِي غَابَةْ كُلَ أَقْطَعَوْا شَدَرْهَا وَ أَقْعُدُوا فَوْقهَا. وَ أَطُرْدُوا الْكَنْعَانِيِّينْ حَتَّى كَانْ هُمَّنْ عِنْدُهُمْ عَرَبَاتْ هَنَا حَدِيدْ وَ قُدْرَةْ كُلَ.»
© La Bible en arabe tchadien © Alliance biblique du Tchad, 2019
