بني إسرائيل دمّروا حِلّة عَاي
1 وَ اللّٰهْ قَالْ لِيَشُوعْ: «مَا تَخَافْ وَ لَا تِنْبَهِتْ. شِيلْ مَعَاكْ كُلَّ الرُّجَالْ الْمُحَارِبِينْ وَ قُمّ ضِدّ حِلَّةْ عَايْ. دَاهُو أَنَا سَلَّمْت لَيْك مَلِكْ حِلَّةْ عَايْ وَ شَعَبَهْ وَ حِلِّتَهْ وَ بَلَدَهْ. 2 وَ إِنْتَ تِسَوِّي فِي حِلَّةْ عَايْ وَ مَلِكْهَا مِثِلْ سَوَّيْت فِي أَرِيحَا وَ مَلِكْهَا. وَ لَاكِنْ هَسَّعْ تَقْدَرَوْا تِشِيلُوا غَنِيمَةْ هَنَا الْخُمَامْ وَ الْبَهَايِمْ. وَ أَرْبُطْ كَمِينْ وَرَاءْ الْحِلَّةْ.»
3 وَ يَشُوعْ وَ كُلَّ الرُّجَالْ الْمُحَارِبِينْ قَمَّوْا جَهَّزَوْا لِيَهْجُمُوا حِلَّةْ عَايْ. وَ هُو عَزَلْ 30 000 رَاجِلْ مِنْ الرُّجَالْ الْفُرَّاسْ وَ رَسَّلَاهُمْ بِاللَّيْل. 4 وَ أَمَرَاهُمْ وَ قَالْ: «أَرْبُطُوا كَمِينْ وَرَاءْ الْحِلَّةْ وَ مَا تَقْعُدُوا مِنْهَا بَعِيدْ لَاكِنْ أَقْعُدُوا جَاهِزِينْ. 5 وَ أَنَا وَ كُلَّ الدَّيْش الْمَعَايِ نِقَرُّبُوا لِلْحِلَّةْ. وَ وَكِتْ هُمَّنْ يَمُرْقُوا لِيِحَارُبُونَا، أَنِحْنَ نِعَرُّدُوا مِنْهُمْ مِثِلْ أَوَّلْ. 6 وَ يَمُرْقُوا وَرَانَا وَ أَنِحْنَ نِوَدُّوهُمْ بَعِيدْ مِنْ الْحِلَّةْ لَحَدِّي يُقُولُوا: ‹النَّاسْ دَوْل عَرَّدَوْا قِدَّامْنَا مِثِلْ أَوَّلْ.› وَ وَكِتْ أَنِحْنَ نَجْرُوا قِدَّامْهُمْ، 7 خَلَاصْ إِنْتُو تَمُرْقُوا مِنْ كَمِينْكُو وَ تِشِيلُوا الْحِلَّةْ أَشَانْ اللّٰهْ إِلٰـهْكُو يِسَلِّمْهَا لَيْكُو فِي إِيدَيْكُو. 8 وَ مِنْ تِشِيلُوهَا، حَرُّقُوهَا مِثِلْ اللّٰهْ حَجَّى لَيْكُو. وَ دَوْل بَسْ أَوَامِرِي أَنَا.»
9 وَ يَشُوعْ رَسَّلَاهُمْ فِي بَكَانْ الْكَمِينْ وَ هُمَّنْ قَعَدَوْا أَمْبَيْن بَيْت إِيلْ وَ حِلَّةْ عَايْ فِي النُّصّ الْغَرْبَانِي هَنَا حِلَّةْ عَايْ. وَ فِي اللَّيْلَةْ دِي، يَشُوعْ نَامْ مَعَ الشَّعَبْ فِي الْفَرِيقْ. 10 وَ بِفَجُرْ بَدْرِي، يَشُوعْ قَمَّ أَلْفَقَّدْ الدَّيْش. وَ بَعَدْ دَا، هُو وَ شُيُوخْ بَنِي إِسْرَائِيلْ قَمَّوْا فِي رَاسْ الدَّيْش وَ مَشَوْا لِيَهْجُمُوا حِلَّةْ عَايْ. 11 وَ كُلَّ الرُّجَالْ الْمُحَارِبِينْ الْمَعَايَهْ مَشَوْا وَ قَرَّبَوْا لِلْحِلَّةْ بِنُصَّهَا الْمُنْشَاقِي وَ نَزَلَوْا هِنَاكْ. وَ الْوَادِي قَاعِدْ أَمْبَيْنَاتْهُمْ هُمَّنْ وَ حِلَّةْ عَايْ. 12 وَ يَشُوعْ شَالْ حَوَالَيْ 5 000 رَاجِلْ وَ خَطَّاهُمْ كَمِينْ أَمْبَيْن بَيْت إِيلْ وَ حِلَّةْ عَايْ فِي النُّصّ الْغَرْبَانِي هَنَا الْحِلَّةْ. 13 وَ الدَّيْش خَطَّ مُعَسْكَرَهْ بِالنُّصّ الْمُنْشَاقِي هَنَا الْحِلَّةْ وَ الْكَمِينْ خَطَّوْه غَرِبْ لِلْحِلَّةْ. وَ فِي اللَّيْلَةْ دِي، يَشُوعْ مَشَى فِي لُبّ الْوَادِي.
14 وَكِتْ مَلِكْ حِلَّةْ عَايْ شَافْ دَيْش بَنِي إِسْرَائِيلْ، هُو وَ كُلَّ رُجَالْ الْحِلَّةْ قَمَّوْا لِيِحَارُبُوا بَنِي إِسْرَائِيلْ عَلَيْ وَادِي الْأُرْدُنْ. وَ لَاكِنْ هُمَّنْ مَا عِرْفَوْا كَدَرْ خَطَّوْا كَمِينْ وَرَاءْ الْحِلَّةْ. 15 وَ خَلَاصْ، يَشُوعْ وَ دَيْش بَنِي إِسْرَائِيلْ سَوَّوْا نُفُوسْهُمْ مِثِلْ أَنْهَزَمَوْا وَ قَمَّوْا عَرَّدَوْا عَلَيْ الصَّحَرَاء. 16 وَ كُلَّ رُجَالْ حِلَّةْ عَايْ لَمَّوْا سَوَّى لِيَطُرْدُوهُمْ. وَ طَارَدَوْا يَشُوعْ وَ دَيْشَهْ لَحَدِّي مَشَوْا بَعِيدْ مِنْ الْحِلَّةْ. 17 وَ فِي حِلَّةْ عَايْ وَ بَيْت إِيلْ، مَا فِي رَاجِلْ الْمَا مَرَقْ طَارَدْ بَنِي إِسْرَائِيلْ. وَ هُمَّنْ خَلَّوْا الْحِلَّةْ مَفْتُوحَةْ وَ مَشَوْا يِطَارُدُوا بَنِي إِسْرَائِيلْ.
18 وَ اللّٰهْ قَالْ لِيَشُوعْ: «مِدّ الْحَرْبَةْ الْفِي إِيدَكْ عَلَيْ حِلَّةْ عَايْ أَشَانْ نِسَلِّمْهَا لَيْك.» وَ خَلَاصْ، يَشُوعْ مَدَّ الْحَرْبَةْ الْفِي إِيدَهْ عَلَيْ الْحِلَّةْ. 19 وَ مِنْ مَدَّ إِيدَهْ، طَوَّالِي الرُّجَالْ الْفِي الْكَمِينْ قَمَّوْا وَ جَرَوْا دَخَلَوْا الْحِلَّةْ وَ شَالَوْهَا وَ حَرَّقَوْهَا.
20 وَ رُجَالْ حِلَّةْ عَايْ أَنْلَفَتَوْا وَ شَافَوْا الدُّخَّانْ قَاعِدْ يَطْلَعْ مِنْ الْحِلَّةْ. وَ خَلَاصْ، هُمَّنْ مَا عِنْدُهُمْ بَكَانْ الْيَجْرُوا عَلَيَّهْ أَشَانْ بَنِي إِسْرَائِيلْ الْمُعَرِّدِينْ قَبَّلَوْا فِي النَّاسْ الْقَاعِدِينْ يِطَارُدُوهُمْ. 21 وَ خَلَاصْ، وَكِتْ يَشُوعْ وَ دَيْش بَنِي إِسْرَائِيلْ شَافَوْا الرُّجَالْ الْفِي الْكَمِينْ شَالَوْا الْحِلَّةْ وَ الدُّخَّانْ قَاعِدْ يَطْلَعْ مِنْهَا، هُمَّنْ هَجَمَوْا رُجَالْ حِلَّةْ عَايْ وَ كَتَلَوْهُمْ. 22 وَ الرُّجَالْ السَّوَّوْا الْكَمِينْ مَرَقَوْا مِنْ حِلَّةْ عَايْ لِيِحَارُبُوهُمْ هُمَّنْ كُلَ. وَ خَلَاصْ، رُجَالْ حِلَّةْ عَايْ بِقَوْا فِي أُسُطْ بَنِي إِسْرَائِيلْ، دَوْل قِدَّامْهُمْ وَ دَوْل وَرَاهُمْ. وَ بَنِي إِسْرَائِيلْ كَتَلَوْهُمْ لَحَدِّي نَادُمْ وَاحِدْ مِنْهُمْ كُلَ مَا فَضَّلْ حَيّ وَ لَا عَرَّدْ. 23 وَ كَنْ لِمَلِكْ حِلَّةْ عَايْ كَمَانْ، كَرَبَوْه حَيّ وَ وَدَّوْه لِيَشُوعْ.
24 وَ بَعَدْ بَنِي إِسْرَائِيلْ كَتَلَوْا بِالْسَّيْف كُلَّ سُكَّانْ حِلَّةْ عَايْ فِي الْكَدَادَةْ وَ فِي الصَّحَرَاء وَ فِي أَيِّ بَكَانْ الطَّرَدَوْهُمْ فَوْقَهْ، هُمَّنْ قَبَّلَوْا فِي الْحِلَّةْ وَ كَتَلَوْا كُلَّ نَاسْهَا بِالْسَّيْف. 25 وَ فِي الْيَوْم دَا، كُلَّ سُكَّانْ حِلَّةْ عَايْ مَاتَوْا وَ عَدَدْهُمْ 12 000 رُجَالْ وَ عَوِينْ. 26 أَشَانْ يَشُوعْ مَا دَلَّى إِيدَهْ الْمَدَّ بَيْهَا الْحَرْبَةْ لَحَدِّي دَمَّرَوْا كُلَّ سُكَّانْ عَايْ. 27 وَ بَنِي إِسْرَائِيلْ شَالَوْا غَنِيمَةْ هَنَا الْبَهَايِمْ وَ الْخُمَامْ مِنْ الْحِلَّةْ دِي حَسَبْ كَلَامْ اللّٰهْ الْقَالَهْ لِيَشُوعْ. 28 وَ يَشُوعْ حَرَّقْ حِلَّةْ عَايْ وَ بِقَتْ كَوْم هَنَا تُرَابْ دَايِمْ وَ خَرَابْ لَحَدِّي الْيَوْم. 29 وَ يَشُوعْ شَنَقْ مَلِكْ حِلَّةْ عَايْ فِي شَدَرَةْ وَ خَلَّاهْ مُعَلَّقْ فَوْقهَا لَحَدِّي الْعَشِيَّةْ. وَ وَكِتْ الْحَرَّايْ وَقَعَتْ، يَشُوعْ أَمَرْ يِدَلُّوا جَنَازْتَهْ. وَ وَكِتْ دَلَّوْهَا، زَقَلَوْهَا فِي خَشُمْ بَابْ الْحِلَّةْ وَ سَوَّوْا فَوْقهَا كَوْم كَبِيرْ هَنَا حُجَارْ الْقَاعِدْ لَحَدِّي الْيَوْم.
يَشُوع بنى مدْبح في جبل عِبَال
30 وَ بَعَدْ دَا، يَشُوعْ بَنَى مَدْبَحْ لِلّٰهْ إِلٰـهْ بَنِي إِسْرَائِيلْ فِي جَبَلْ عِبَالْ 31 مِثِلْ مُوسَى عَبْد اللّٰهْ أَمَرْ بَنِي إِسْرَائِيلْ وَ مِثِلْ مَكْتُوبْ فِي تَوْرَاةْ مُوسَى. قَالْ وَاجِبْ يَبْنُوا مَدْبَحْ بِحُجَارْ كَامِلِينْ الْأَبَداً مَا قَطَعَوْهُمْ بِحَدِيدْ. وَ فِي الْمَدْبَحْ دَا، قَدَّمَوْا ضَحَايَا مُحَرَّقِينْ لِلّٰهْ وَ ضَحَايَا سَلَامَةْ. 32 وَ فِي الْحُجَارْ دَوْل، يَشُوعْ كَتَبْ تَوْرَاةْ مُوسَى الْأَوَّلْ هُو كَتَبْهَا لِبَنِي إِسْرَائِيلْ. 33 وَ شَعَبْ بَنِي إِسْرَائِيلْ وَ شُيُوخْهُمْ وَ مَسَائِيلْهُمْ وَ قُضْيَاهُمْ وَقَفَوْا جَايْ وَ جَايْ لِصَنْدُوقْ مُعَاهَدَةْ اللّٰهْ قِدَّامْ رُجَالْ الدِّينْ اللَّاوِيِّينْ الشَّالَوْا الصَّنْدُوقْ دَا. الْأَجَانِبْ وَ الْمُوَاطِنِينْ كُلُّهُمْ قَاعِدِينْ. نُصُّهُمْ وَقَفَوْا قِدَّامْ جَبَلْ قَرِزِيمْ وَ نُصُّهُمْ وَقَفَوْا قِدَّامْ جَبَلْ عِبَالْ مِثِلْ مُوسَى عَبْد اللّٰهْ أَمَرَاهُمْ لِيِبَارُكُوا أَوَّلاً كَيْ بَنِي إِسْرَائِيلْ. 34 وَ بَعَدْ دَا، يَشُوعْ قَرَى بِحِسّ عَالِي كُلَّ كَلَامْ كِتَابْ التَّوْرَاةْ هَنَا مُوسَى هَنَا الْبَرَكَةْ وَ اللَّعَنَةْ حَسَبْ كُلَّ شَيّءْ الْمَكْتُوبْ فِي الْكِتَابْ دَا. 35 وَ مِنْ كُلَّ الْكَلَامْ الْكَتَبَهْ مُوسَى، مَا فِي كَلَامْ الْيَشُوعْ مَا قَرَاهْ قِدَّامْ كُلَّ مُجْتَمَعْ بَنِي إِسْرَائِيلْ وَ الْعَوِينْ وَ الْعِيَالْ وَ الْأَجَانِبْ الْقَاعِدِينْ مَعَاهُمْ.
© La Bible en arabe tchadien © Alliance biblique du Tchad, 2019
