سُكّان قِبْعُون غشّوا يَشُوع
1 وَ كُلَّ مُلُوكْ الْبَلَدْ سِمْعَوْا بِنَصُرْ بَنِي إِسْرَائِيلْ وَ هُمَّنْ سَاكْنِينْ غَرِبْ لِبَحَرْ الْأُرْدُنْ فِي الْجِبَالْ وَ فِي السَّهَلَةْ وَ فِي خَشُمْ الْبَحَرْ الْأَبْيَضْ لَحَدِّي لُبْنَانْ. وَ هُمَّنْ مُلُوكْ الْحِتِّيِّينْ وَ الْأَمُورِيِّينْ وَ الْكَنْعَانِيِّينْ وَ الْفِرِزِّيِّينْ وَ الْحِوِّيِّينْ وَ الْيَبُوسِيِّينْ. 2 وَ كُلَّ الْمُلُوكْ دَوْل أَسْتَفَقَوْا أَشَانْ يِحَارُبُوا سَوَا ضِدّ يَشُوعْ وَ بَنِي إِسْرَائِيلْ.
3 وَ سُكَّانْ قِبْعُونْ مِنْ حِوِّيِّينْ سِمْعَوْا بِالشَّيّءْ السَّوَّاهْ يَشُوعْ فِي حِلَّالْ أَرِيحَا وَ حِلَّةْ عَايْ. 4 وَ هُمَّنْ كُلَ قَمَّوْا أَنَّاجَضَوْا. شَدَّوْا فِي حَمِيرْهُمْ شُوَالَاتْ قَدِيمِينْ وَ قِرَبْ هَنَا خَمَرْ مُشَرَّطِينْ وَ مُخَيَّطِينْ. 5 وَ لِبْسَوْا نِعْلَيْ قَدِيمِينْ وَ مُخَيَّطِينْ وَ لِبْسَوْا خُلْقَانْ مُشَرَّطِينْ وَ شَالَوْا خُبْزَةْ يَابْسَةْ وَ مُكَسَّرَةْ.
6 وَ مَشَوْا لِقَوْا يَشُوعْ فِي الْفَرِيقْ فِي قِلْقَالْ وَ قَالَوْا لَيَّهْ وَ لِبَنِي إِسْرَائِيلْ: «أَنِحْنَ جِينَا مِنْ بَعِيدْ. وَ هَسَّعْ، سَوُّوا مَعَانَا عَلَاقَةْ.» 7 وَ رُجَالْ بَنِي إِسْرَائِيلْ قَالَوْا لِلْحِوِّيِّينْ دَوْل: «مُمْكِنْ إِنْتُو سَاكْنِينْ فِي أُسُطْنَا! وَ بَيْدَا، مَا نَقْدَرَوْا نِسَوُّوا مَعَاكُو عَلَاقَةْ.» 8 وَ لَاكِنْ هُمَّنْ قَالَوْا لِيَشُوعْ: «أَنِحْنَ عَبِيدَكْ.»
وَ يَشُوعْ سَأَلَاهُمْ وَ قَالْ لَيْهُمْ: «إِنْتُو يَاتُمَّنْ وَ جَايِينْ مِنْ وَيْن؟» 9 وَ هُمَّنْ قَالَوْا لَيَّهْ: «أَنِحْنَ عَبِيدَكْ جَايِينْ مِنْ بَلَدْ بَعِيدَةْ مَرَّةْ وَاحِدْ فِي شَانْ أُسُمْ اللّٰهْ إِلٰـهَكْ أَشَانْ سِمِعْنَا بِأُسْمَهْ وَ بِكُلَّ شَيّءْ السَّوَّاهْ فِي مَصِرْ. 10 وَ سِمِعْنَا بَتَّانْ بِكُلَّ شَيّءْ السَّوَّاهْ فِي الْمُلُوكْ الْإِتْنَيْن هَنَا الْأَمُورِيِّينْ الْقَاعِدِينْ غَادِي لِبَحَرْ الْأُرْدُنْ وَ هُمَّنْ سِيحُونْ مَلِكْ حَشْبُونْ وَ عُوقْ مَلِكْ بَاشَانْ السَّاكِنْ فِي عَشْتَرُوتْ. 11 وَ كُبَارَاتْنَا وَ كُلَّ سُكَّانْ بَلَدْنَا قَالَوْا لَيْنَا: ‹شِيلُوا مَعَاكُو زَادْ لِلدَّرِبْ وَ أَمْشُوا قَابُلُوهُمْ وَ قُولُوا لَيْهُمْ: ”أَنِحْنَ عَبِيدْكُو وَ هَسَّعْ سَوُّوا مَعَانَا عَلَاقَةْ.“› 12 وَ شِيفُوا الْخُبْزَةْ هِنْت زَادْنَا! وَكِتْ مَرَقْنَا لِنَجُوا لَيْكُو، شِلْنَاهَا حَامِيَةْ وَ لَاكِنْ هَسَّعْ، دِي هِي يَابْسَةْ وَ مُكَسَّرَةْ. 13 وَ الْقِرَبْ دَوْل كُلَ، وَكِتْ مَلَيْنَاهُمْ خَمَرْ هُمَّنْ جُدَادْ. وَ لَاكِنْ هَسَّعْ شِيفُوا كِكَّيْف هُمَّنْ أَشَّرَّطَوْا. وَ خُلْقَانَّا وَ نِعْلَيْنَا كُلَ قِدْمَوْا أَشَانْ سَافَرْنَا وَ جِينَا لَيْكُو مِنْ بَعِيدْ.»
14 وَ بَنِي إِسْرَائِيلْ قَصَّدَوْا بِعَلَاقِتْهُمْ وَ أَكَلَوْا مِنْ زَادْهُمْ وَ لَاكِنْ مَا سَأَلَوْا اللّٰهْ لِيَعَرْفُوا الْهُو يِدَوْرَهْ. 15 وَ خَلَاصْ، يَشُوعْ سَوَّى مَعَاهُمْ سَلَامْ وَ عَلَاقَةْ التَّضْمَنْ لَيْهُمْ حَيَاتْهُمْ. وَ شُيُوخْ الْمُجْتَمَعْ كُلَ حَلَفَوْا لَيْهُمْ.
16 وَ لَاكِنْ تَلَاتَةْ يَوْم بَعَدْ سَوَّوْا مَعَاهُمْ الْعَلَاقَةْ، بَنِي إِسْرَائِيلْ سِمْعَوْا كَدَرْ النَّاسْ دَوْل جِيرَانْهُمْ وَ سَاكْنِينْ فِي أُسُطْهُمْ. 17 وَ بَنِي إِسْرَائِيلْ قَمَّوْا سَافَرَوْا. وَ فِي الْيَوْم التَّالِتْ، وَصَّلَوْا فِي حِلَّالْهُمْ وَ هُمَّنْ حِلَّالْ قِبْعُونْ وَ كَفِيرَةْ وَ بِيرُوتْ وَ قَرْيَةْ يَعَرِيمْ. 18 وَ بَنِي إِسْرَائِيلْ مَا ضَرَبَوْهُمْ أَشَانْ شُيُوخْ الْمُجْتَمَعْ حَلَفَوْا لَيْهُمْ بِاللّٰهْ إِلٰـهْ بَنِي إِسْرَائِيلْ. وَ لَاكِنْ كُلَّ الْمُجْتَمَعْ قَاعِدِينْ يِحَجُّوا تِحِتْ تِحِتْ ضِدّ الشُّيُوخْ. 19 وَ كُلَّ الشُّيُوخْ قَالَوْا لِكُلَّ الْمُجْتَمَعْ: «أَنِحْنَ حَلَفْنَا لَيْهُمْ بِأُسُمْ اللّٰهْ إِلٰـهْ بَنِي إِسْرَائِيلْ. بَتَّانْ مَا نَقْدَرَوْا نِسَوُّوا لَيْهُمْ شَيّءْ فَسِلْ. 20 وَ دَاهُو الشَّيّءْ النِّسَوُّوهْ لَيْهُمْ. نِخَلُّوهُمْ حَيِّينْ أَشَانْ غَضَبْ اللّٰهْ مَا يَنْزِلْ فَوْقنَا بِسَبَبْ الْحَلِيفَةْ الْحَلَفْنَاهَا لَيْهُمْ.» 21 وَ الشُّيُوخْ قَالَوْا بَتَّانْ لِشَعَبْهُمْ: «نِخَلُّوهُمْ حَيِّينْ أَشَانْ يِشَقُّقُوا الْحَطَبْ وَ يَوْرُدُوا أَلْمِي لِكُلَّ الْمُجْتَمَعْ.» وَ دَا بَسْ كَلَامْ الشُّيُوخْ.
22 وَ يَشُوعْ نَادَاهُمْ لِسُكَّانْ قِبْعُونْ وَ قَالْ لَيْهُمْ: «مَالَا غَشَّيْتُونَا وَ قُلْتُوا إِنْتُو جَايِينْ مِنْ بَعِيدْ وَ تَارِي إِنْتُو سَاكْنِينْ فِي أُسُطْنَا؟ 23 وَ بَيْدَا، إِنْتُو خَلَاصْ مَلْعُونِينْ وَ تَبْقَوْا دَايْماً عَبِيدْ. وَ تِشَقُّقُوا الْحَطَبْ وَ تَوْرُدُوا أَلْمِي لِبَيْت اللّٰهْ.» 24 وَ هُمَّنْ رَدَّوْا لَيَّهْ وَ قَالَوْا: «أَنِحْنَ عَبِيدَكْ. سِمِعْنَا كَدَرْ اللّٰهْ إِلٰـهْكُو أَمَرْ عَبْدَهْ مُوسَى يَنْطِيكُو الْبَلَدْ دِي وَ يَكْتُلْ سُكَّانْهَا قِدَّامْكُو. وَ أَنِحْنَ خُفْنَا زِيَادَةْ مِنْكُو وَ أَشَانْ دَا بَسْ، سَوَّيْنَا الشَّيّءْ دَا. 25 وَ هَسَّعْ، دَاهُو أَنِحْنَ فِي إِيدَكْ. سَوِّي فَوْقنَا أَيِّ شَيّءْ التِّدَوْرَهْ.»
26 وَ بِمِثِلْ دَا، يَشُوعْ نَجَّاهُمْ مِنْ بَنِي إِسْرَائِيلْ مَا كَتَلَوْهُمْ. 27 وَ فِي الْيَوْم دَا، يَشُوعْ خَدَّمَاهُمْ وَ هُمَّنْ شَقَّقَوْا الْحَطَبْ وَ وَرَدَوْا الْأَلْمِي لِكُلَّ الْمُجْتَمَعْ وَ لِمَدْبَحْ اللّٰهْ. وَ ذُرِّيِّتْهُمْ يِسَوُّوا الْخِدْمَةْ دِي لَحَدِّي الْيَوْم، فِي بَكَانْ الْعِبَادَةْ الْاللّٰهْ عَزَلَهْ لِشَعَبَهْ.
© La Bible en arabe tchadien © Alliance biblique du Tchad, 2019
