مَثَل الوكيل الخايِن
1 وَ عِيسَى حَجَّى لِتَلَامِيذَهْ بَتَّانْ وَ قَالْ: «يَوْم مِنْ الْأَيَّامْ، فِي نَادُمْ سِيدْ الْمَالْ عِنْدَهْ وَكِيلْ. وَ سِمِعْ خَبَرْ فِي وَكِيلَهْ يُقُولُوا هُو يِتَلِّفْ مَالَهْ. 2 وَ نَادَى الْوَكِيلْ وَ قَالْ: ‹دَا شُنُو السِّمِعْتَهْ فَوْقَكْ؟ قَبِّلْ لَيِّ مَكَاتِيبْ الْحِسَابْ. مَا نِدَوْر إِنْتَ تَبْقَى بَتَّانْ وَكِيلِي.›
3 «وَ الْوَكِيلْ حَجَّى لِنَفْسَهْ وَ قَالْ: ‹نِسَوِّي شُنُو وَكِتْ سَيِّدِي يِشِيلْ مِنِّي الْوَكَالَةْ؟ مَا نَقْدَرْ نَحْرِتْ أَشَانْ مَا عِنْدِي قُدْرَةْ. وَ مَا نِدَوْر نَشْحَدْ النَّاسْ أَشَانْ الْعَيْب. 4 خَلَاصْ نَعَرِفْ الشَّيّءْ النِّسَوِّيهْ الْبِسَبَبَهْ النَّاسْ يَقْبَلَوْنِي فِي بُيُوتْهُمْ وَكِتْ يَمْرُقْنِي مِنْ الْوَكَالَةْ.›
5 «وَ هُو نَادَى النَّاسْ السَّيِّدَهْ عِنْدَهْ فَوْقهُمْ دَيْن وَ حَجَّى لَيْهُمْ وَاحِدْ بَعَدْ وَاحِدْ. وَ لِلنَّادُمْ الْأَوَّلْ قَالْ: ‹وَاجِبْ تِكَفِّي كَمْ لِسَيِّدِي؟› 6 وَ رَدَّ لَيَّهْ وَ قَالْ: ‹100 بَاقَةْ هَنَا دِهِنْ.› وَ الْوَكِيلْ قَالْ: ‹شِيلْ الْمَكْتُوبْ وَ أَقْعُدْ تِحِتْ وَ عَجَلَةْ أَكْتِبْ 50 بَاقَةْ.› 7 وَ بَعَدْ دَا، حَجَّى لِنَادُمْ آخَرْ وَ سَأَلَهْ: ‹وَاجِبْ تِكَفِّي كَمْ؟› وَ هُو قَالْ: ‹100 شُوَالْ هَنَا قَمَحْ.› وَ قَالْ لَيَّهْ: ‹شِيلْ الْمَكْتُوبْ وَ أَكْتِبْ 80 شُوَالْ.›
8 «وَ وَكِتْ سِيدْ الْمَالْ عِرِفْ الشَّيّءْ الْوَكِيلَهْ الْخَايِنْ سَوَّاهْ، هُو قَصَّدْ بِنَجَاضْتَهْ. أَشَانْ نَاسْ هَنَا الدُّنْيَا الضَّلْمَةْ دِي فَاهِمِينْ زِيَادَةْ مِنْ نَاسْ النُّورْ وَ يَعَرْفُوا كِكَّيْف يَلْقَوْا الشَّيّءْ الْيِدَوْرُوهْ مِنْ النَّاسْ الْمِثِلْهُمْ. 9 وَ نُقُولْ لَيْكُو، بِمَالْ الدُّنْيَا دِي أَكْسَبَوْا لِنُفُوسْكُو رُفْقَانْ. وَ مِثِلْ دَا وَكِتْ مَالْ الدُّنْيَا يِكَمِّلْ لَيْكُو خَلَاصْ، اللّٰهْ يَقْبَلْكُو فِي مَسْكَنَهْ الْأَبَدِي.
الأمين و الخايِن
10 «أَكِيدْ، كَنْ نَادُمْ أَمِينْ وَكِتْ هُو مَسْؤُولْ فِي شَيّءْ شِيَّةْ، هُو يُكُونْ أَمِينْ بَتَّانْ وَكِتْ هُو مَسْؤُولْ فِي شَيّءْ كَتِيرْ. وَ كَنْ نَادُمْ خَايِنْ وَكِتْ هُو مَسْؤُولْ فِي شِيَّةْ، هُو يَبْقَى خَايِنْ بَتَّانْ وَكِتْ هُو مَسْؤُولْ فِي كَتِيرْ. 11 وَ كَنْ أَوَّلْ إِنْتُو مَا أَمِينِينْ فِي مَالْ هَنَا الدُّنْيَا دِي، كِكَّيْف اللّٰهْ يِكَلِّفْكُو بِشُغُلْ عِنْدَهْ قِيمَةْ زِيَادَةْ مِنَّهْ؟ 12 وَ كَنْ أَوَّلْ إِنْتُو مَا أَمِينِينْ فِي الْخُمَامْ الْإِنْتُو وَكَّلَوْكُو فَوْقَهْ، كِكَّيْف اللّٰهْ يَنْطِيكُو شَيّءْ الْيَبْقَى حَلَالْكُو؟ 13 مَا فِي عَبِدْ الْيَقْدَرْ يَخْدِمْ لِسِيَادْ إِتْنَيْن أَشَانْ هُو يَكْرَهْ الْوَاحِدْ وَ يِرِيدْ التَّانِي وَلَّا يِحِبَّهْ لِلْأَوَّلْ بِكُلَّ قَلْبَهْ وَ يَحْقِرْ الْآخَرْ. وَ إِنْتُو كَمَانْ مَا تَقْدَرَوْا تَبْقَوْا عَبِيدْ لِلّٰهْ وَ عَبِيدْ لِلْمَالْ.»
14 الْفَرِيزِيِّينْ سِمْعَوْا الْكَلَامْ دَا وَ أَشَّمَّتَوْا لِعِيسَى أَشَانْ هُمَّنْ يِحِبُّوا الْمَالْ. 15 وَ هُو رَدَّ لَيْهُمْ وَ قَالْ: «إِنْتُو تِسَوُّوا نُفُوسْكُو صَالِحِينْ قِدَّامْ النَّاسْ وَ لَاكِنْ مَا تَقْدَرَوْا تُغُشُّوا اللّٰهْ وَ هُو يَعَرِفْ قُلُوبْكُو. أَيْوَى، الشَّيّءْ النَّاسْ يَشْكُرُوكُو فَوْقَهْ دَا، اللّٰهْ يَجْعَلَهْ حَرَامْ.
16 «وَ بَلَّغَوْا لَيْكُو كَلَامْ اللّٰهْ فِي التَّوْرَاةْ وَ كُتُبْ الْأَنْبِيَاء لَحَدِّي يَحْيَى جَاءْ. وَ مِنْ يَحْيَى جَاءْ، نِبَلُّغُوا بِشَارَةْ مَمْلَكَةْ اللّٰهْ وَ أَيِّ نَادُمْ يِجَاهِدْ أَشَانْ يَدْخُلْ فِيهَا بِشِدَّةْ. 17 وَ وَقَعَانْ السَّمَاءْ وَ الْأَرْض يَبْقَى هَيِّنْ مِنْ نُقْطَةْ وَاحِدَةْ هَنَا التَّوْرَاةْ تِنْقَشَّ. 18 وَ كُلِّ نَادُمْ الْيِطَلِّقْ مَرْتَهْ أَشَانْ يَاخُدْ مَرَةْ آخَرَةْ، هُو زَانِي. وَ النَّادُمْ الْيَاخُدْ الْمَرَةْ الْمُطَلَّقَةْ، هُو كُلَ زَانِي.»
مَثَل لَعَازَر و الغني
19 وَ بَتَّانْ، عِيسَى قَالْ: «يَوْم مِنْ الْأَيَّامْ، فِي نَادُمْ غَنِيْ مَرَّةْ وَاحِدْ. وَ هُو لَابِسْ خُلْقَانْ غَالِيِّينْ بِلْحَيْن وَ كُلَّ يَوْم هُو يَفْرَحْ وَ يَاكُلْ أَكِلْ حَلُو مَرَّةْ وَاحِدْ. 20 وَ نَاسْ خَطَّوْا نَادُمْ مِسْكِينْ أُسْمَهْ لَعَازَرْ فِي خَشُمْ بَيْتَهْ وَ جِلْدَهْ كُلَ عَوَاوِيرْ. 21 وَ هُو قَرْمَانْ يَاكُلْ مِنْ الْأَكِلْ الْيِدَفِّقْ مِنْ صُفْرَةْ الْغَنِيْ. وَ الْكُلابْ يَجُوا وَ يَلْحَسَوْا عَوَاوِيرَهْ.
22 «وَ الْمِسْكِينْ دَا مَاتْ وَ الْمَلَائِكَةْ شَالَوْه وَ قَعَّدَوْه جَنْب النَّبِي إِبْرَاهِيمْ. وَ الْغَنِيْ كُلَ مَاتْ وَ دَفَنَوْه. 23 وَ فِي الْهَاوِيَةْ، هُو قَاعِدْ فِي عَذَابْ شَدِيدْ. وَ رَفَعْ رَاسَهْ وَ شَافْ إِبْرَاهِيمْ فِي بَكَانْ بَعِيدْ مِنَّهْ وَ لَعَازَرْ مَعَايَهْ. 24 وَ صَرَخْ لَيَّهْ وَ قَالْ: ‹أَبُونَا إِبْرَاهِيمْ، أَرْحَمْنِي! رَسِّلْ لَيِّ لَعَازَرْ. خَلِّي يِبِلّ رَاسْ أُصْبَعَهْ فِي أَلْمِي بَارِدْ وَ يِبَرِّدْ بَيَّهْ لِسَانِي. أَشَانْ أَنَا فِي عَذَابْ شَدِيدْ فِي أَمْ لَهِيبْ دِي.›
25 «وَ إِبْرَاهِيمْ قَالْ: ‹لَا، يَا وِلَيْدِي. فَكِّرْ فِي كِكَّيْف عِشْت فِي الدُّنْيَا. أَوَّلْ إِنْتَ عِشْت فِي الْحَلُو وَ لَعَازَرْ عَاشْ فِي التَّعَبْ. وَ لَاكِنْ هَسَّعْ هُو عِنْدَهْ رَاحَةْ هِنِي وَ إِنْتَ عِنْدَكْ عَذَابْ. 26 وَ بَتَّانْ فِي هَاوِيَةْ كَبِيرَةْ بِلْحَيْن بَيْنَّا وَ بَيْنكُو. وَ أَشَانْ دَا، النَّاسْ الْيِدَوْرُوا يُقُمُّوا مِنْ هِنِي يَمْشُوا لَيْكُو مَا يَقْدَرَوْا. وَ مَا فِي نَادُمْ الْيَقْدَرْ يُقُمّ مِنْ هِنَاكْ وَ يَجِي لَيْنَا هِنِي.›
27 «وَ الْغَنِيْ قَالْ: ‹أَبَّ، نَطْلُبْ مِنَّكْ تِرَسِّلْ لَعَازَرْ لِبَيْت أَبُويِ. 28 هِنَاكْ عِنْدِي خَمْسَةْ أَخْوَانْ. خَلِّي يِحَذِّرْهُمْ أَشَانْ مَا يَجُوا فِي بَكَانْ الْعَذَابْ دَا، مِثْلِي أَنَا.› 29 وَ إِبْرَاهِيمْ رَدَّ لَيَّهْ وَ قَالْ: ‹عِنْدُهُمْ كَلَامْ مُوسَى وَ كَلَامْ الْأَنْبِيَاء. خَلِّي يَسْمَعَوْه.› 30 وَ الْغَنِيْ رَدَّ لَيَّهْ وَ قَالْ: ‹لَا، يَا أَبَّ إِبْرَاهِيمْ! مَا تُقُولْ كَيْ. كَنْ نَادُمْ يَبْعَثْ مِنْ أُسْط الْمَيْتِينْ وَ يَمْشِي لَيْهُمْ، أَكِيدْ يُتُوبُوا مِنْ ذُنُوبْهُمْ.›
31 «وَ إِبْرَاهِيمْ قَالْ: ‹كَنْ مَا يِدَوْرُوا يَسْمَعَوْا كَلَامْ مُوسَى وَ الْأَنْبِيَاء، أَكِيدْ نَادُمْ الْبَعَثْ مِنْ أُسْط الْمَيْتِينْ كُلَ مَا يَقْدَرْ يِجِيبْهُمْ فِي الدَّرِبْ الْعَدِيلْ.›»
© La Bible en arabe tchadien © Alliance biblique du Tchad, 2019
