الكُبارات قمّوا ضِدّ المسيح
1 وَكِتْ عِيسَى كَمَّلْ كَلَامَهْ دَا، هُو قَالْ لِتَلَامِيذَهْ: 2 «تَعَرْفُوا بَعَدْ يَوْمَيْن، عِيدْ الْفِصْحَ يَجِي وَ يِسَلُّمُوا إِبْن الْإِنْسَانْ لِلْكُبَارَاتْ أَشَانْ يَكْتُلُوهْ فِي الصَّلِيبْ.»
3 وَ فِي الْوَكِتْ دَا، كُبَارَاتْ رُجَالْ الدِّينْ وَ الشُّيُوخْ لَمَّوْا فِي بَيْت قَيَافَا وَ هُو كَبِيرْ رُجَالْ الدِّينْ. 4 وَ أَلآمَرَوْا كِكَّيْف يَكُرْبُوا عِيسَى بِعَشِيرْ وَ يَكْتُلُوهْ. 5 وَ قَالَوْا أَمْبَيْنَاتْهُمْ: «مَا نَكُرْبُوهْ فِي أَيَّامْ الْعِيدْ أَشَانْ أَكُونْ فِتْنَةْ تَبْقَى أَمْبَيْنَاتْ الشَّعَبْ.»
المرة الصبّت عِطِر في راس المسيح
6 عِيسَى قَاعِدْ فِي حِلَّةْ أُسُمْهَا بَيْت عَنْيَا فِي بَيْت سِمْعَانْ الْمُجَدِّمْ. 7 وَ مَرَةْ وَاحِدَةْ جَاتْ لَيَّهْ وَ جَابَتْ مَاعُونْ هَنَا حَجَرْ مَلَانْ عِطِرْ غَالِي بِلْحَيْن وَ صَبَّتَهْ كُلَّ كَيْ فِي رَاسْ عِيسَى وَكِتْ هُو قَاعِدْ يِنْجَمَّ. 8 وَ وَكِتْ التَّلَامِيذ شَافَوْا الشَّيّءْ الْهِي قَاعِدَةْ تِسَوِّيهْ، زِعِلَوْا وَ قَالَوْا: «مَالَا وَدَّرَتْ الْمَالْ مِثِلْ دَا؟ 9 كَنْ بَاعَوْا الْعِطِرْ دَا، يَلْقَوْا قُرُسْ كَتِيرْ أَشَانْ يَنْطُوهْ لِلْمَسَاكِينْ.»
10 وَ عِيسَى عِرِفْ كَلَامْهُمْ وَ قَالْ لَيْهُمْ: «مَالَا تِبَشْتُنُوا الْمَرَةْ دِي؟ هِي سَوَّتْ لَيِّ شَيّءْ سَمَحْ. 11 الْمَسَاكِينْ قَاعِدِينْ مَعَاكُو دَايْماً وَ لَاكِنْ أَنَا كَمَانْ مَا نَقْعُدْ مَعَاكُو دَايْماً. 12 هِي صَبَّتْ الْعِطِرْ فِي جِسْمِي وَ بِمِثِلْ دَا، جَهَّزَتْنِي لِلْقَبُرْ. 13 نُقُولْ لَيْكُو الْحَقّ، فِي أَيِّ بَكَانْ فِي الدُّنْيَا الْيِبَلُّغُوا فَوْقَهْ الْبِشَارَةْ، يِحَجُّوا فِي الشَّيّءْ الْهِي سَوَّتَهْ وَ يِذَّكَّرَوْهَا.»
خيانة يَهُوذَا للمسيح
14 وَ فِي الْبَكَانْ دَا، وَاحِدْ مِنْ التَّلَامِيذ الْأَتْنَا عَشَرْ، أُسْمَهْ يَهُوذَا الْإِسْخَرِيَوْطِي، مَشَى لِكُبَارَاتْ رُجَالْ الدِّينْ. 15 وَ قَالْ: «تَنْطُونِي كَمْ أَشَانْ نِسَلِّمْ لَيْكُو عِيسَى؟» وَ حَسَبَوْا لَيَّهْ تَلَاتِينْ حَجَرْ فُضَّةْ. 16 وَ مِنْ الْوَكِتْ دَا، يَهُوذَا قَاعِدْ يِفَتِّشْ فُرْصَةْ أَشَانْ يِسَلِّمْ لَيْهُمْ عِيسَى.
العشاء هنا عيد الْفِصْح
17 وَ فِي أَوَّلْ يَوْم مِنْ أَيَّامْ عِيدْ الْخُبْزَةْ بَلَا تَوَّارَةْ، تَلَامِيذ عِيسَى جَوْا لَيَّهْ وَ قَالَوْا: «تِدَوْر أَنِحْنَ نَمْشُوا وَيْن أَشَانْ نِحَصُّلُوا لَيْك عَشَاءْ عِيدْ الْفِصْحَ؟» 18 وَ رَدَّ لَيْهُمْ وَ قَالْ: «أَدْخُلُوا فِي الْمَدِينَةْ وَ أَمْشُوا فِي بَيْت نَادُمْ وَاحِدْ وَ قُولُوا لَيَّهْ: ‹الْمُعَلِّمْ يُقُولْ لَيْك: ”وَكْتِي قَرَّبْ خَلَاصْ. أَنَا نَاكُلْ عَشَاءْ عِيدْ الْفِصْحَ مَعَ تَلَامِيذِي فِي بَيْتَكْ.“›» 19 وَ التَّلَامِيذ سَوَّوْا كُلَّ شَيّءْ مِثِلْ عِيسَى قَالَهْ لَيْهُمْ وَ حَصَّلَوْا عَشَاءْ عِيدْ الْفِصْحَ.
20 وَ فِي الْمَغْرِبْ، عِيسَى مَعَ التَّلَامِيذ الْأَتْنَا عَشَرْ قَعَدَوْا لِيَاكُلُوا. 21 وَ وَكِتْ قَاعِدِينْ يَاكُلُوا، هُو قَالْ: «نُقُولْ لَيْكُو الْحَقّ، نَادُمْ وَاحِدْ مِنْكُو يُخُونِّي.» 22 وَ حِزْنَوْا بِلْحَيْن وَ أَيِّ نَادُمْ مِنْهُمْ سَأَلَهْ وَ قَالْ: «يَا سَيِّدْنَا، أَنَا وَلَّا؟» 23 وَ رَدَّ لَيْهُمْ وَ قَالْ: «النَّادُمْ الْيِدِسّ إِيدَهْ مَعَايِ فِي الْمَاعُونْ، هُو بَسْ الْيُخُونِّي. 24 أَكِيدْ إِبْن الْإِنْسَانْ يُمُوتْ مِثِلْ مَكْتُوبْ فِي الْكِتَابْ. وَ لَاكِنْ الْعَذَابْ يَرْجَى الرَّاجِلْ الْيُخُونِّي أَنَا إِبْن الْإِنْسَانْ. أَخَيْر لِلرَّاجِلْ دَا كَنْ مَا وِلْدَوْه!» 25 وَ يَهُوذَا الْخَانَهْ سَأَلَهْ وَ قَالْ: «يَا مُعَلِّمْ، أَنَا وَلَّا؟» وَ عِيسَى رَدَّ لَيَّهْ وَ قَالْ: «إِنْتَ بَسْ قُلْتَهْ.»
26 وَ وَكِتْ قَاعِدِينْ يِلْعَشَّوْا، عِيسَى شَالْ خُبْزَةْ وَاحِدَةْ وَ شَكَرْ اللّٰهْ وَ كَسَرْهَا وَ أَنْطَاهَا لِتَلَامِيذَهْ وَ قَالْ: «شِيلُوهْ وَ آكُلُوهْ. دَا جِسْمِي.» 27 وَ شَالْ كَاسْ وَ شَكَرْ اللّٰهْ وَ أَنْطَاهْ لَيْهُمْ وَ قَالْ: «كُلُّكُو أَشَرْبَوْا مِنَّهْ. 28 دَا دَمِّي هَنَا الْمُعَاهَدَةْ الْجَدِيدَةْ الْيِدَفِّقْ فِي شَانْ نَاسْ كَتِيرِينْ أَشَانْ اللّٰهْ يَغْفِرْ لَيْهُمْ ذُنُوبْهُمْ. 29 وَ نُقُولْ لَيْكُو، مِنْ الْيَوْم أَنَا مَا نَشْرَبْ بَتَّانْ عَصِيرْ الْعِنَبْ لَحَدِّي الْيَوْم النَّشْرَبْ عَصِيرْ الْعِنَبْ الْجَدِيدْ مَعَاكُو فِي مَمْلَكَةْ أَبُويِ.»
30 وَ غَنَّوْا غِنَيْ مِنْ الزَّبُورْ وَ مَرَقَوْا مِنْ الْمَدِينَةْ وَ مَشَوْا جَبَلْ الزَّيْتُونْ.
المسيح قال بُطْرُس ينْكُره
31 وَ عِيسَى قَالْ لَيْهُمْ: «اللَّيْلَةْ دِي كُلُّكُو تِخَلُّونِي أَشَانْ مَكْتُوبْ فِي الْكِتَابْ: <نَضْرُبْ الرَّاعِي وَ الْغَنَمْ يِشِتُّوا.> 32 وَ لَاكِنْ بَعَدْ أَنَا بَعَثْت، نَمْشِي قِدَّامْكُو فِي دَارْ الْجَلِيلْ.»
33 وَ بُطْرُسْ رَدَّ لَيَّهْ وَ قَالْ: «كَنْ كُلَّ الْآخَرِينْ يِخَلُّوكْ كُلَ، أَنَا أَبَداً مَا نِخَلِّيكْ.» 34 وَ عِيسَى رَدَّ لَيَّهْ وَ قَالْ: «نُقُولْ لَيْك الْحَقّ، اللَّيْلَةْ دِي قُبَّالْ الدِّيكْ مَا يِعَوْعِي، تَنْكُرْنِي تَلَاتَةْ مَرَّاتْ.» 35 وَ بُطْرُسْ قَالْ: «أَنَا كَنْ نُمُوتْ مَعَاكْ كُلَ، أَبَداً مَا نَنْكُرَكْ!» وَ كُلَّ التَّلَامِيذ قَالَوْا نَفْس الشَّيّءْ.
المسيح سأل اللّه في جَسِيمَانِي
36 وَ خَلَاصْ عِيسَى وَ تَلَامِيذَهْ مَشَوْا فِي بَكَانْ أُسْمَهْ جَسِيمَانِي وَ قَالْ لَيْهُمْ: «أَقْعُدُوا هِنِي وَ أَنَا نَمْشِي قِدَّامْ أَشَانْ نِصَلِّي.» 37 وَ شَالْ مَعَايَهْ بُطْرُسْ وَ أَوْلَادْ زَبَدِي الْإِتْنَيْن وَ بِقِي حَزْنَانْ وَ بَدَا يَتْعَبْ بِلْحَيْن. 38 وَ قَالْ لَيْهُمْ: «أَنَا حَزْنَانْ مَرَّةْ وَاحِدْ لَحَدِّي نِدَوْر الْمَوْت. أَقْعُدُوا هِنِي وَاعِيِّينْ.»
39 وَ مَشَى قِدَّامْ مِنْهُمْ شِيَّةْ وَ سَجَدْ فِي الْأَرْض وَ سَأَلْ اللّٰهْ وَ قَالْ: «يَا أَبُويِ، كَنْ دَا مُمْكِنْ، خَلِّي كَاسْ التَّعَبْ دَا يِبَعِّدْ مِنِّي. لَاكِنْ خَلِّي يَبْقَى مِثِلْ إِنْتَ تِدَوْرَهْ وَ مَا مِثِلْ أَنَا نِدَوْرَهْ.»
40 وَ قَبَّلْ لِلتَّلَامِيذ وَ لِقِيهُمْ نَايْمِينْ وَ قَالْ لِبُطْرُسْ: «سَاعَةْ وَاحِدَةْ كُلَ مَا قِدِرْتُوا تَقْعُدُوا مَعَايِ وَاعِيِّينْ؟ 41 أَقْعُدُوا وَاعِيِّينْ وَ أَسْأَلَوْا اللّٰهْ أَشَانْ التَّعَبْ مَا يِجَرِّبْ إِيمَانْكُو وَ يِتَلِّفَهْ. أَشَانْ الْإِنْسَانْ عِنْدَهْ نِيَّةْ لَاكِنْ مَا عِنْدَهْ قُدْرَةْ.»
42 وَ مَرَّةْ تَانِيَةْ طَرَّفْ مِنْهُمْ وَ سَأَلْ اللّٰهْ وَ قَالْ: «يَا أَبُويِ، كَنْ مَا مُمْكِنْ كَاسْ التَّعَبْ يِبَعِّدْ مِنِّي إِلَّا نَشَرْبَهْ، خَلَاصْ خَلِّي يَبْقَى مِثِلْ إِنْتَ تِدَوْرَهْ.» 43 وَ قَبَّلْ لِلتَّلَامِيذ وَ بَتَّانْ لِقِيهُمْ نَايْمِينْ أَشَانْ نَوْم شَدِيدْ شَالَاهُمْ.
44 وَ عِيسَى خَلَّاهُمْ وَ مَشَى سَأَلْ اللّٰهْ تَالِتْ مَرَّةْ وَ قَالْ نَفْس الشَّيّءْ مِثِلْ أَوَّلْ. 45 وَ بَعَدْ دَا، قَبَّلْ لِتَلَامِيذَهْ وَ قَالْ: «إِنْتُو لِسَّاعْكُو نَايْمِينْ وَلَّا؟ تِدَوْرُوا تِنْجَمَّوْا؟ خَلَاصْ، الْوَكِتْ قَرَّبْ. إِبْن الْإِنْسَانْ خَانَوْه وَ يِسَلُّمُوهْ لِلْمُذْنِبِينْ! 46 قُمُّوا نَمْشُوا! شِيفُوا، الْيُخُونِّي جَايِ!»
المسيح كربوه
47 وَ عِيسَى لِسَّاعْ مَا كَمَّلْ الْكَلَامْ دَا بَسْ، يَهُوذَا جَاءْ. هُو وَاحِدْ مِنْ التَّلَامِيذ الْأَتْنَا عَشَرْ وَ جَابْ مَعَايَهْ نَاسْ كَتِيرِينْ عِنْدُهُمْ سُيُوفْ وَ عِصَيْ. كُبَارَاتْ رُجَالْ الدِّينْ وَ الشُّيُوخْ رَسَّلَوْهُمْ. 48 وَ الْخَايِنْ أَنْطَاهُمْ عَلَامَةْ مِنْ أَوَّلْ وَ قَالْ: «النَّادُمْ النِّحِبَّهْ، دَا بَسْ هُو. أَكُرْبُوهْ!»
49 وَ عَجَلَةْ، مَشَى لِعِيسَى وَ قَالْ: «يَا سَيِّدْنَا، السَّلَامْ عَلَيْك.» وَ حَبَّاهْ. 50 وَ عِيسَى قَالْ لَيَّهْ: «يَا رَفِيقِي، مَالَا إِنْتَ جِيتْ؟» وَ جَوْا كَرَبَوْا عِيسَى.
51 وَ وَاحِدْ مِنْ النَّاسْ الْقَاعِدِينْ مَعَ عِيسَى مَدَّ إِيدَهْ وَ سَلَّ سَيْفَهْ وَ ضَرَبْ عَبِدْ هَنَا كَبِيرْ رُجَالْ الدِّينْ وَ قَطَعْ أَدَانَهْ. 52 وَ عِيسَى قَالْ لَيَّهْ: «دَخِّلْ سَيْفَكْ فِي بَيْتَهْ أَشَانْ أَيِّ نَادُمْ الْيِسِلّ السَّيْف يُمُوتْ بِالْسَّيْف. 53 وَ فِكِرْكُو شُنُو؟ مَا نَقْدَرْ نَسْأَلْ مُسَاعَدَةْ مِنْ أَبُويِ أَشَانْ يِرَسِّلْ لَيِّ أُلُوفْ مِنْ الْمَلَائِكَةْ وَ يِدَاوُسُوا لَيِّ وَلَّا؟ 54 وَ لَاكِنْ كَنْ سَوَّيْت كَيْ، كِكَّيْف الْكَلَامْ الْمَكْتُوبْ فِي الْكِتَابْ يِتِمّ؟ الْكِتَابْ يُقُولْ الشَّيّءْ الْقَاعِدْ يَبْقَى هِنِي لَابُدَّ يِتِمّ.»
55 وَ عِيسَى حَجَّى لِلنَّاسْ وَ قَالْ: «كِكَّيْف إِنْتُو جِيتُوا تَكُرْبُونِي بِسَيْف وَ عَصَاةْ دَا؟ أَنَا مُجْرِمْ وَلَّا؟ كُلَّ يَوْم أَنَا قَاعِدْ فِي فَضَايَةْ بَيْت اللّٰهْ وَ قَاعِدْ نِعَلِّمْ النَّاسْ وَ إِنْتُو مَا كَرَبْتُونِي. 56 وَ لَاكِنْ بِقِي مِثِلْ دَا أَشَانْ كُلَّ شَيّءْ الْأَنْبِيَاء كَتَبَوْه يِتِمّ.»
وَ خَلَاصْ كُلَ تَلَامِيذَهْ خَلَّوْه وَ جَرَوْا. 57 وَ النَّاسْ الْكَرَبَوْا عِيسَى وَدَّوْه فِي بَيْت قَيَافَا كَبِيرْ رُجَالْ الدِّينْ. الْعُلَمَاءْ وَ الشُّيُوخْ لَمَّوْا فِي بَيْتَهْ وَ قَاعِدِينْ يَرْجَوْهُمْ. 58 وَ بُطْرُسْ تَابَعَهْ مِنْ بَعِيدْ لَحَدِّي بَيْت كَبِيرْ رُجَالْ الدِّينْ وَ أَنْدَسَّ وَ قَعَدْ تِحِتْ بَيْن الْعَسْكَرْ أَشَانْ يِشِيفْ الشَّيّءْ الْيَبْقَى.
المسيح قِدّام الشريعة
59 وَ كُبَارَاتْ رُجَالْ الدِّينْ وَ كُلَّ نَاسْ هَنَا الْمَجْلَسْ الْكَبِيرْ لَمَّوْا وَ أَشَّاوَرَوْا. وَ فَتَّشَوْا شُهُودْ كَدَّابِينْ أَشَانْ يَحْكُمُوا لِعِيسَى بِالْمَوْت. 60 وَ شُهُودْ كَدَّابِينْ كَتِيرِينْ جَوْا وَ لَاكِنْ مَا لِقَوْا نَاسْ إِتْنَيْن الْكَلَامْهُمْ وَاحِدْ. وَ بَعَدْ وَكِتْ طَوِيلْ، نَاسَيْن قَمَّوْا 61 وَ قَالَوْا: «النَّادُمْ دَا قَالْ: ‹أَنَا نَقْدَرْ نِكَسِّرْ بَيْت اللّٰهْ وَ فِي تَلَاتَةْ يَوْم نَبْنِيهْ بَتَّانْ.›»
62 وَ كَبِيرْ رُجَالْ الدِّينْ قَمَّ وَ سَأَلْ عِيسَى وَ قَالْ: «مَا تُرُدّ لَيْنَا وَلَّا؟ مَا سِمِعْت شَهَادِتْهُمْ فَوْقَكْ وَلَّا؟» 63 وَ عِيسَى قَاعِدْ سَاكِتْ بَسْ. وَ كَبِيرْ رُجَالْ الدِّينْ سَأَلَهْ بَتَّانْ وَ قَالْ: «نَحَلِّفَكْ بِأُسُمْ اللّٰهْ الْحَيّ. قُولْ لَيْنَا! إِنْتَ الْمَسِيحْ إِبْن اللّٰهْ وَلَّا؟» 64 وَ عِيسَى رَدَّ لَيَّهْ وَ قَالْ: «مِثِلْ إِنْتَ قُلْتَهْ. وَ نُقُولْ لَيْكُو يَوْم وَاحِدْ يَجِي تِشِيفُوا إِبْن الْإِنْسَانْ فِي كُرْسِي جَنْب اللّٰهْ الْقَادِرْ فِي نُصَّهْ الزَّيْنَايْ وَ تِشِيفُوهْ جَايِ فِي سَحَابْ السَّمَاءْ. »
65 وَ كَبِيرْ رُجَالْ الدِّينْ شَقَّ خَلَقَهْ مِنْ الزَّعَلْ وَ قَالْ: «خَلَاصْ! هُو أَشْرَكْ! وَ بَتَّانْ مَا نِدَوْرُوا شَاهِدْ آخَرْ. إِنْتُو ذَاتْكُو سِمِعْتُوا كَلَامْ الْمُشْرِكْ دَا! 66 قَرَارْكُو شُنُو؟» وَ رَدَّوْا لَيَّهْ وَ قَالَوْا: «هُو خَاطِي وَ وَاجِبْ لَيَّهْ الْمَوْت!» 67 وَ بَزَّقَوْا فِي وِجْهَهْ وَ ضَرَبَوْه وَ وَاحِدِينْ شَدَّقَوْه 68 وَ قَالَوْا: «يَا الْمَسِيحْ، أَوْرِينَا يَاتُو الضَّرَبَكْ!»
بُطْرُس نكر المسيح
69 وَ فِي الْوَكِتْ دَاكْ، بُطْرُسْ قَاعِدْ بَرَّا فِي الْحَوْش. وَ خَدَّامَةْ وَاحِدَةْ جَاتْ لَيَّهْ وَ قَالَتْ: «إِنْتَ كُلَ مَعَ عِيسَى الْمِنْ دَارْ الْجَلِيلْ!» 70 وَ قِدَّامْ كُلَّ النَّاسْ بُطْرُسْ نَكَرَهْ وَ قَالْ: «كَلَامْكِ دَا مَا نَعَرْفَهْ.»
71 وَ مَشَى فِي خَشُمْ الْحَوْش وَ خَدَّامَةْ آخَرَةْ كُلَ شَافَتَهْ وَ عِرْفَتَهْ وَ حَجَّتْ لِلنَّاسْ الْقَاعِدِينْ هِنَاكْ وَ قَالَتْ: «النَّادُمْ دَا كُلَ مَعَ عِيسَى الْمِنْ النَّاصِرَةْ.» 72 وَ تَانِي مَرَّةْ بُطْرُسْ نَكَرْ الْكَلَامْ وَ حَلَفْ وَ قَالْ: «أَنَا مَا نَعَرِفْ الرَّاجِلْ دَا.»
73 وَ بَعَدْ شِيَّةْ، النَّاسْ الْوَاقْفِينْ هِنَاكْ جَوْا لَيَّهْ وَ قَالَوْا: «صَحِيحْ، إِنْتَ وَاحِدْ مِنْهُمْ! نَعَرْفُوكْ أَشَانْ رَطِينَكْ مِثِلْ رَطِينْهُمْ.» 74 وَ بُطْرُسْ قَمَّ حَلَفْ وَ قَالْ: «خَلِّي اللّٰهْ يَلْعَنِّي كَنْ كَلَامِي مَا صَحِيحْ. أَبَداً مَا نَعَرِفْ الرَّاجِلْ دَا!» وَ طَوَّالِي الدِّيكْ عَوْعَى. 75 وَ بُطْرُسْ فَكَّرْ فِي الْكَلَامْ الْعِيسَى قَالَهْ: «قُبَّالْ الدِّيكْ مَا يِعَوْعِي، تَنْكُرْنِي تَلَاتَةْ مَرَّاتْ.» وَ خَلَاصْ، بُطْرُسْ مَرَقْ مِنْ الْبَيْت وَ بَكَى بَكِي شَدِيدْ.
© La Bible en arabe tchadien © Alliance biblique du Tchad, 2019
