عذاب للظالِمين
1 الْعَذَابْ لِلْيَنْوُوا الْفَسَالَةْ
وَ يِخَطُّطُوا الشَّرّ بِاللَّيْل!
بِفَجُرْ، يُقُمُّوا يِسَوُّوا خِطِّتْهُمْ
أَشَانْ عِنْدُهُمْ الْقُدْرَةْ لِيِسَوُّوهَا.
2 هُمَّنْ يَطْمَعَوْا فِي زِرَاعَةْ الْآخَرِينْ
وَ يَقْلَعَوْهُمْ
وَ يِتْمَنَّوْا الْبُيُوتْ وَ يِشِيلُوهُمْ.
يَظُلْمُوا النَّاسْ وَ عَايِلَاتْهُمْ
وَ رُجَالْ وَ وَرَثَتْهُمْ.
3 وَ فِي شَانْ دَا، دَاهُو اللّٰهْ قَالْ:
«شِيفُوا، أَنَا نَنْوِي الْفَسَالَةْ لِقَبِيلِتْكُو دِي
وَ إِنْتُو مَا تَقْدَرَوْا تِنَجُّوا نُفُوسْكُو.
مَا تَقْدَرَوْا تُرُوغُوا رَاسْكُو مَرْفُوعْ
أَشَانْ دَا وَكْت الْفَسَالَةْ.»
4 وَ فِي الْيَوْم دَا، يَضُرْبُوا فَوْقكُو مَثَلْ
وَ يُنُوحُوا نُوَاحْ وَ يُقُولُوا:
«كَمَّلَوْنَا وَ خَرَبَوْنَا!
اللّٰهْ بَدَّلْ أَرْض وَرَثَتْنَا بِبَلَدْ الْغُرْبَةْ.
وَ قَلَعْ مِنِّنَا أَرْضِنَا
وَ قَسَّمْ وَرَثَتْنَا لِعُدْوَانَّا.»
5 وَ فِي شَانْ دَا، كَنْ جَمَاعَةْ اللّٰهْ
يِقَاوُسُوا الْأَرْض بَتَّانْ،
مَا فِي نَادُمْ مِنْكُو الْيَلْقَى قِسِمْ.
الأنبياء اليتْنبّأوا بكِدِب
6 وَ نَاسْ وَاحِدِينْ قَالَوْا لَيِّ:
«مَا تِتْنَبَّأْ مِثِلْ دَا!
مَا تُقُولْ كَدَرْ نَلْقَوْا الْعَيْب.
لَا! وَدِّرِينْ الشَّرَفْ مَا يَبْقَى.»
7 يَا ذُرِّيَّةْ يَعْقُوبْ، دَا بِنْقَالْ وَلَّا؟
هَلْ صَبُرْ اللّٰهْ كَمَّلْ وَلَّا؟
وَ مِثِلْ دَا بَسْ، هُو يُقُمّ وَلَّا؟
وَ كَلَامِي مَا يِجِيبْ الْخَيْر
لِلنَّادُمْ الْيَمْشِي عَدِيلْ وَلَّا؟
8 لَحَدِّي هَسَّعْ،
إِنْتُو شَعَبِي بِقِيتُوا عُدْوَانْ اللّٰهْ.
النَّاسْ الْيِقَبُّلُوا مِنْ الْحَرِبْ
وَ يَحْسُبُوا عِنْدُهُمْ أَمَانْ،
إِنْتُو تِسِلُّوا خُلْقَانْهُمْ.
9 وَ لِعَوِينْ شَعَبِي، تَطُرْدُوهِنْ
أَيِّ وَاحِدَةْ مِنْ بَيْتهَا التِّرِيدَهْ.
وَ أَيِّ وَكِتْ، تَقْلَعَوْا مِنْ عِيَالْهِنْ
الشَّرَفْ الْاللّٰهْ أَنْطَاهُمْ.
10 يَلَّا قُمُّوا أَمْشُوا!
الْبَلَدْ دِي بَتَّانْ
مَا عِنْدَهَا لَيْكُو رَاحَةْ
أَشَانْ بِنَجَاسِتْكُو،
جِبْتُوا فَوْقهَا الدَّمَارْ
وَ دَا دَمَارْ كَامِلْ مَرَّةْ وَاحِدْ!
11 وَ كَنْ نَادُمْ يَجْرِي وَرَاءْ الرِّيحْ
وَ يِتْنَبَّأْ بِكِدِبْ وَ يُقُولْ:
«أَنَا نِتْنَبَّأْ لَيْكُو بِخَمَرْ وَ مَرِيسَةْ»،
دَا بَسْ النَّبِي الْوَاجِبْ لَيْكُو إِنْتُو الشَّعَبْ دَا!
اللّه يلِمّ شعبه
12 وَ اللّٰهْ قَالْ:
«أَكِيدْ أَنَا نِلِمُّكُو كُلُّكُو،
يَا ذُرِّيَّةْ يَعْقُوبْ
وَ نَجْمَعْكُو كُلُّكُو الْفَضَّلْتُوا
مِنْ بَنِي إِسْرَائِيلْ.
وَ نِجِيبْكُو سَوَا مِثِلْ غَنَمْ فِي الزَّرِيبَةْ
وَ مِثِلْ دَوْر فِي أُسْط الْمَرْعَى.
وَ تَبْقَوْا مَجْمُوعَةْ كَبِيرَةْ
الْعِنْدَهَا حَرَكَةْ.
13 وَ الْيُفُكّ لَيْكُو الْخُرْمَةْ
يَمْشِي قِدَّامْكُو.
إِنْتُو تُفُكُّوا الْخُرْمَةْ
وَ تُفُوتُوا بِالْبَابْ
وَ تَمُرْقُوا بَيَّهْ.
وَ مَلِكُّو يَمْشِي قِدَّامْكُو.
أَيْوَى، أَنَا اللّٰهْ عَلَيْ رَاسْكُو.»
© La Bible en arabe tchadien © Alliance biblique du Tchad, 2019
