1 دَاهُو كِتَابْ رُؤْيَةْ نَاحُومْ الْمِنْ حِلَّةْ أَلِقُوشْ. وَ دِي مُحَاكَمَةْ مَدِينَةْ نِينَوَى.
اللّه يوصِّف قُدُرْته و غضبه
2 اللّٰهْ هُو غَيُّورْ.
أَيْوَى، مَا يِدَوْر يَعَبُدُوا إِلٰـهْ آخَرْ بَلَايَهْ
وَ يِشِيلْ التَّارْ.
أَيْوَى، اللّٰهْ هُو الْيِشِيلْ التَّارْ
وَ سِيدْ الْغَضَبْ الشَّدِيدْ.
هُو يِشِيلْ التَّارْ فِي خُصْمَانَهْ
وَ يَغْضَبْ لِعُدْوَانَهْ.
3 اللّٰهْ هُو الصَّبُورْ
وَ الْعَظِيمْ وَ الْقَادِرْ.
وَ لَاكِنْ لِلْمُذْنِبْ،
مَا يَجْعَلَهْ بَرِي.
وَ يِسَوِّي دَرْبَهْ فِي رِيحْ أَمْ زَوْبَعَانَةْ
وَ السَّحَابْ دَا عَجَاجَهْ الْهُو يِقَوِّمَهْ.
4 هُو يُقُمّ ضِدّ الْبَحَرْ وَ يِجَفِّفَهْ
وَ أَلْمِي الْوُدْيَانْ كُلَ يِكَمِّلَهْ.
وَ مَرَاعِي بَاشَانْ وَ جَبَلْ الْكَرْمَلْ يَيْبَسَوْا
وَ الزُّهُورْ فِي جِبَالْ لُبْنَانْ يِدَفُّقُوا.
5 الْجِبَالْ يَرْجُفُوا قِدَّامَهْ
وَ الْحُجَارْ يُمُوعُوا.
وَ قِدَّامَهْ، الْأَرْض تِزَّلْزَلْ
وَ كُلَّ سُكَّانْهَا يِفَتْفُتُوا.
6 وَ يَاتُو يَقْدَرْ يَحْمَلْ زَعَلَهْ؟
وَ مِنْ شِدَّةْ غَضَبَهْ،
يَاتُو يَقْدَرْ يَقِيفْ قِدَّامَهْ؟
غَضَبَهْ يِنْصَبَّ مِثِلْ النَّارْ
حَتَّى الْجِبَالْ يِشَّقَّقَوْا قِدَّامَهْ.
7 اللّٰهْ هُو الرَّحِيمْ
وَ هُو الْمَلْجَأْ فِي يَوْم الضِّيقَةْ
وَ يَحْفَضْ النَّاسْ الْيَلْجَأَوْا لَيَّهْ.
8 مِثِلْ سَيْل،
يِجِيبْ دَمَارْ كَامِلْ فِي بَكَانْ عُدْوَانَهْ
وَ يِطَارِدْهُمْ لَحَدِّي فِي ضَلَامْ الْقُبُورْ.
اللّه يجيب الدمار في نِينَوَى
9 يَا سُكَّانْ نِينَوَى،
مَالَا شِلْتُوا نِيَّةْ فَسْلَةْ ضِدّ اللّٰهْ؟
هُو يِجِيبْ فَوْقكُو دَمَارْ كَامِلْ
الْبَتَّانْ مَا يِتَنِّي بِضِيقَةْ آخَرَةْ.
10 إِنْتُو مِثِلْ الشَّوْك الشَّابِكْ
وَ مِثِلْ السَّكَّارَى السِّكْرَوْا.
النَّارْ تَاكُلْهُمْ بِالْكَامِلْ
مِثِلْ الْقَشّ الْيَابِسْ.
11 وَ مِنْكُو إِنْتُو بَسْ مَرَقْ نَادُمْ
الْخَطَّطْ الْفَسَالَةْ ضِدّ اللّٰهْ
وَ مُسْتَشَارْ الْمَا نَافِعْ.
12 وَ دَاهُو اللّٰهْ قَالْ:
«يَا شَعَبْ بَلَدْ يَهُوذَا،
كَنْ عُدْوَانْكُو لَمَّوْا وَ كِتْرَوْا كُلَ،
يَنْقُصُوا وَ يِكَمُّلُوا.
وَ كَنْ أَوَّلْ أَنَا ضَايَقْتُكُو كُلَ
بَتَّانْ مَا نِضَايِقْكُو.
13 وَ هَسَّعْ نَمْرُقْكُو مِنْ إِيدْ عُدْوَانْكُو الْقَوِيَّةْ
وَ نِقَطِّعْ قُيُودْكُو.»
14 وَ دَاهُو كَلَامْ اللّٰهْ ضِدُّكُو، يَا سُكَّانْ نِينَوَى:
«أَبَداً مَا تَلْقَوْا ذُرِّيَّةْ
تِشِيلْ أُسُمْكُو.
وَ فِي بُيُوتْكُو هَنَا الْعِبَادَةْ،
أَنَا نِكَسِّرْ أَصْنَامْكُو
هَنَا الْحَطَبْ وَ الْحَدِيدْ.
وَ نِجَهِّزْ قُبُورْكُو
أَشَانْ قِدَّامِي أَنَا،
إِنْتُو بَتَّانْ مَا تَنْفَعَوْا.»
15 يَا شَعَبْ يَهُوذَا، دَاهُو فِي الْجِبَالْ
نَادُمْ مَاشِي بِرِجِلَيْنَهْ
وَ يِبَشِّرْ وَ يِبَلِّغْ السَّلَامْ.
عَيُّدُوا وَ حَقِّقُوا نَذِرْكُو
أَشَانْ عَدُوكُو الْمَا نَافِعْ
مَا يُشُقّ بَلَدْكُو بَتَّانْ.
وَ خَلَاصْ، كَلَامَهْ كَمَّلْ!
© La Bible en arabe tchadien © Alliance biblique du Tchad, 2019
