بُرُنْجي الفُضّة
1 وَ اللّٰهْ حَجَّى لِمُوسَى وَ قَالْ: 2 «سَوِّي لَيْك بُرُنْجِي إِتْنَيْن مَدْقُوقِينْ مِنْ فُضَّةْ لِتِنَادِي بَيْهُمْ مُجْتَمَعْ بَنِي إِسْرَائِيلْ وَكِتْ يِلِمُّوا أَوْ وَكِتْ يِسِيرُوا حَسَبْ مُعَسْكَرَاتْهُمْ. 3 وَكِتْ يَسْمَعَوْا ضَرِبِينْ الْبُرُنْجِي الْإِتْنَيْن، كُلَّ مُجْتَمَعْ بَنِي إِسْرَائِيلْ يِلِمُّوا قِدَّامَكْ فِي مَدَخَلْ خَيْمَةْ الْإِجْتِمَاعْ. 4 وَ لَاكِنْ وَكِتْ يَسْمَعَوْا ضَرِبِينْ الْبُرُنْجِي الْوَاحِدْ، الشُّيُوخْ وَ الْكُبَارَاتْ هَنَا خُشُومْ بُيُوتْ بَنِي إِسْرَائِيلْ بَسْ يِلِمُّوا قِدَّامَكْ. 5 وَ كَنْ تَضُرْبُوا الْبُرُنْجِي عِدَّةْ مَرَّاتْ، خَلَاصْ الْمُعَسْكَرْ النَّازِلْ صَبَاحْ يُقُمّ يِسِيرْ. 6 وَ كَنْ تَضُرْبُوا الْبُرُنْجِي عِدَّةْ مَرَّاتْ ضَرْبَةْ تَانِيَةْ، الْمُعَسْكَرْ النَّازِلْ وَطِي يُقُمّ يِسِيرْ. وَ ضَرِبِينْ الْبُرُنْجِي عِدَّةْ مَرَّاتْ دَا يِوَصِّفْ الْمَسَارْ. 7 وَ لَاكِنْ وَكِتْ تِنَادُوا مُجْتَمَعْ الشَّعَبْ لِيِلِمُّوا، أَضُرْبُوا الْبُرُنْجِي مَرَّةْ وَاحِدَةْ بَسْ. 8 وَ الْبُرُنْجِي الْإِتْنَيْن دَوْل يَضُرْبُوهُمْ رُجَالْ الدِّينْ مِنْ ذُرِّيَّةْ هَارُونْ. وَ دَا يَبْقَى لَيْكُو شَرْط دَايِمْ مِنْ ذُرِّيَّةْ لِذُرِّيَّةْ.
9 «وَ وَكِتْ تَمْشُوا لِلْحَرِبْ ضِدّ عُدْوَانْكُو الْقَاعِدِينْ يَهْجُمُوكُو فِي بَلَدْكُو، أَضُرْبُوا الْبُرُنْجِي الْإِتْنَيْن عِدَّةْ مَرَّاتْ. وَ بَيْدَا، أَنَا اللّٰهْ إِلٰـهْكُو نِفَكِّرْ فَوْقكُو وَ نِنَجِّيكُو مِنْ عُدْوَانْكُو. 10 أَضُرْبُوا الْبُرُنْجِي فِي فَرَحْكُو وَ عِيدْكُو وَ فِي الْيَوْم الْأَوَّلْ هَنَا كُلِّ شَهَرْ. وَ أَضُرْبُوا الْبُرُنْجِي وَكِتْ تِقَدُّمُوا ضَحَايَا مُحَرَّقِينْ وَ ضَحَايَا السَّلَامَةْ. وَ بَيْدَا، أَنَا إِلٰـهْكُو نِفَكِّرْ فَوْقكُو. وَ أَنَا اللّٰهْ إِلٰـهْكُو.»
بني إسرائيل ساروا من صحراء سِينَاء
11 وَ فِي يَوْم 20 هَنَا الشَّهَرْ التَّانِي فِي السَّنَةْ التَّانِيَةْ بَعَدْ بَنِي إِسْرَائِيلْ مَرَقَوْا مِنْ بَلَدْ مَصِرْ، السَّحَابَايْ قَمَّتْ مِنْ خَيْمَةْ الْعِبَادَةْ الْفَوْقهَا الصَّنْدُوقْ الْعِنْدَهْ لِيحَانْ الْمُعَاهَدَةْ وَ مَشَتْ. 12 وَ بَنِي إِسْرَائِيلْ كُلَ خَلَاصْ سَارَوْا مِنْ صَحَرَاء سِينَاء لَحَدِّي بَكَانْ السَّحَابَايْ نَزَلَتْ فَوْقَهْ فِي كَدَادَةْ فَارَانْ. 13 وَ دَا أَوَّلْ مَسَارْ الْأَمَرَاهُمْ بَيَّهْ اللّٰهْ بِوَاسِطَةْ مُوسَى.
14 وَ الْمَاشِي أَوَّلْ، مُعَسْكَرْ يَهُوذَا تِحِتْ رَايْتَهْ حَسَبْ مَجْمُوعْتَهْ الْعَسْكَرِيَّةْ. وَ قَايْدَهْ نَحْشُونْ وِلَيْد عَمِنَدَابْ. 15 وَ مَعَايَهْ قَبِيلَةْ يَسَّاكَرْ وَ قَايِدْهَا نَتَنِيلْ وِلَيْد صُوعَرْ. 16 وَ مَعَايَهْ بَتَّانْ قَبِيلَةْ زَبُلُونْ وَ قَايِدْهَا أَلِيَابْ وِلَيْد حِيلُونْ.
17 وَ بَعَدْ دَا، فَرْتَقَوْا خَيْمَةْ الْعِبَادَةْ. وَ ذُرِّيَّةْ قِرْشُونْ وَ ذُرِّيَّةْ مَرَارِي شَالَوْهَا وَ سَارَوْا بَيْهَا.
18 وَ بَعَدْ الْخَيْمَةْ، مُعَسْكَرْ رَأُوبِينْ سَارْ تِحِتْ رَايْتَهْ حَسَبْ مَجْمُوعْتَهْ الْعَسْكَرِيَّةْ. وَ قَايْدَهْ أَلِصُورْ وِلَيْد شَدَيُورْ. 19 وَ مَعَايَهْ قَبِيلَةْ شِمْعُونْ وَ قَايِدْهَا شَلُمِيِيلْ وِلَيْد صُرِشَدَايْ. 20 وَ مَعَايَهْ بَتَّانْ قَبِيلَةْ قَادْ وَ قَايِدْهَا أَلِيَاسَفْ وِلَيْد دَعُوِيلْ.
21 وَ بَعَدْ دَا، ذُرِّيَّةْ قَهَاتْ سَارَوْا شَايْلِينْ الْمُعِدَّاتْ الْمُقَدَّسِينْ. وَ قَبُلْ ذُرِّيَّةْ قَهَاتْ مَا يِوَصُّلُوا، اللَّاوِيِّينْ الْآخَرِينْ يَبْنُوا خَيْمَةْ الْعِبَادَةْ وَ يِجَهُّزُوهَا لَيْهُمْ.
22 وَ بَعَدْ دَا، مُعَسْكَرْ أَفْرَايِمْ سَارْ تِحِتْ رَايْتَهْ حَسَبْ مَجْمُوعْتَهْ الْعَسْكَرِيَّةْ. وَ قَايْدَهْ أَلِشَمَعْ وِلَيْد عَمِهُودْ. 23 وَ مَعَايَهْ قَبِيلَةْ مَنَسَّى وَ قَايِدْهَا قَمَلِيِيلْ وِلَيْد فَدَهْصُورْ. 24 وَ مَعَايَهْ بَتَّانْ قَبِيلَةْ بَنْيَامِينْ وَ قَايِدْهَا أَبِدَانْ وِلَيْد قِدْعُونِي.
25 وَ فِي الأَخِيرْ، مُعَسْكَرْ دَانْ هُو مَشَى وَرَاءْ كُلَّ الْمُعَسْكَرَاتْ لِيَحْفَضَوْهُمْ مِنْ وَرَاءْ. وَ هُو سَارْ تِحِتْ رَايْتَهْ حَسَبْ مَجْمُوعْتَهْ الْعَسْكَرِيَّةْ. وَ قَايْدَهْ أَخِعَازَرْ وِلَيْد عَمِشَدَايْ. 26 وَ مَعَايَهْ قَبِيلَةْ أَشِيرْ وَ قَايِدْهَا فَقْعِيِيلْ وِلَيْد عُكْرَنْ. 27 وَ مَعَايَهْ بَتَّانْ قَبِيلَةْ نَفْتَالِي وَ قَايِدْهَا أَخِيرَعْ وِلَيْد عِنَانْ.
28 وَ دَا بَسْ النِّظَامْ السَّايْرِينْ بَيَّهْ بَنِي إِسْرَائِيلْ. هُمَّنْ سَايْرِينْ حَسَبْ مَجْمُوعَاتْهُمْ الْعَسْكَرِيَّةْ.
29 وَ مُوسَى قَالْ لِحُبَابْ وِلَيْد نَسِيبَهْ رَعُوِيلْ الْمِدْيَانِي: «أَنِحْنَ سَايْرِينْ لِلْبَكَانْ الْاللّٰهْ قَالْ يَنْطِيهْ لَيْنَا. تَعَالْ نَمْشُوا سَوَا وَ نِسَوُّوا لَيْك الْخَيْر أَشَانْ اللّٰهْ قَالْ يِسَوِّي لِبَنِي إِسْرَائِيلْ الْخَيْر.» 30 وَ هُو قَالْ: «لَا! أَنَا مَا نَمْشِي مَعَاكُو. أَنَا نَمْشِي لِبَلَدِي وَ أَهَلِي.» 31 وَ مُوسَى قَالْ لَيَّهْ: «لَا! مَا تِخَلِّينَا وِحَيْدنَا أَشَانْ إِنْتَ تَعَرِفْ الْبَكَانْ الْعَدِيلْ فِي الْكَدَادَةْ الْأَنِحْنَ نَنْزُلُوا فَوْقهَا. تَعَالْ أَبْقَى لَيْنَا قِيدْ. 32 وَ كَنْ مَشَيْت مَعَانَا نَنْطُوكْ مِنْ الْخَيْر الْاللّٰهْ يَنْطِينَا.»
33 وَ قَمَّوْا مِنْ جَبَلْ اللّٰهْ وَ مَشَوْا مَسَافَةْ تَلَاتَةْ يَوْم. وَ صَنْدُوقْ مُعَاهَدَةْ اللّٰهْ وَدَّوْه قِدَّامْهُمْ أَشَانْ يَعَرْفُوا الْبَكَانْ الْيَنْزُلُوا فَوْقَهْ. 34 وَ سَحَابَايِةْ اللّٰهْ مُغَطِّيَيْهُمْ بِنَهَارْ وَكِتْ يِسِيرُوا مِنْ فَرِيقْهُمْ.
35 وَ وَكِتْ صَنْدُوقْ مُعَاهَدَةْ اللّٰهْ يُقُمّ لِلْمَسَارْ، مُوسَى يُقُولْ: «قُمّ، يَا اللّٰهْ! عُدْوَانَكْ يِشِتُّوا وَ خُصْمَانَكْ يَجْرُوا قِدَّامَكْ!» 36 وَ وَكِتْ الصَّنْدُوقْ يَنْزِلْ، مُوسَى يُقُولْ: «قَبِّلْ، يَا اللّٰهْ، لِشَعَبَكْ بَنِي إِسْرَائِيلْ الْعَدَدْهُمْ كَتِيرِينْ.»
© La Bible en arabe tchadien © Alliance biblique du Tchad, 2019
