عصاة هَارُون خضّرت
1 وَ اللّٰهْ حَجَّى لِمُوسَى وَ قَالْ: 2 «قُولْ لِبَنِي إِسْرَائِيلْ أَيِّ شَيْخ قَبِيلَةْ يِجِيبْ عَصَاةْ وَ دَا فِي عَدَدْ قَبَايِلْهُمْ الْأَتْنَا عَشَرْ. وَ أَكْتِبْ أُسُمْ أَيِّ شَيْخ فِي عَصَاتَهْ. 3 وَ فِي عَصَاةْ قَبِيلَةْ لَاوِي أَكْتِبْ أُسُمْ هَارُونْ أَشَانْ أَيِّ شَيْخ قَبِيلَةْ عِنْدَهْ عَصَاةْ وَاحِدَةْ. 4 وَ خُطّ الْعِصَيْ دَوْل فِي لُبّ خَيْمَةْ الْإِجْتِمَاعْ قِدَّامْ الصَّنْدُوقْ الْفَوْقَهْ لِيحَانْ الْمُعَاهَدَةْ فِي الْبَكَانْ الْأَنَا نِقَابِلْكُو فَوْقَهْ. 5 وَ النَّادُمْ الْعَصَاتَهْ تِخَضِّرْ وَ تِسَوِّي نُوَّارْ، هُو دَا بَسْ الْأَنَا عَزَلْتَهْ. وَ بَيْدَا، أَنَا نِوَقِّفْ اللُّوَامَةْ الْقَايْمَيْن بَيْهَا بَنِي إِسْرَائِيلْ ضِدُّكُو.»
6 وَ خَلَاصْ، مُوسَى كَلَّمْ لِبَنِي إِسْرَائِيلْ وَ كُلَّ شُيُوخْهُمْ أَيِّ وَاحِدْ جَابْ عَصَاتَهْ. وَ الشُّيُوخْ الْأَتْنَا عَشَرْ أَيِّ شَيْخ قَبِيلَةْ جَابْ عَصَاتَهْ. وَ عَصَاةْ هَارُونْ كُلَ قَاعِدَةْ فِي أُسْط الْعِصَيْ دَوْل. 7 وَ مُوسَى خَطَّ الْعِصَيْ دَوْل قِدَّامْ اللّٰهْ فِي لُبّ الْخَيْمَةْ الْفَوْقهَا الصَّنْدُوقْ الْعِنْدَهْ لِيحَانْ الْمُعَاهَدَةْ. 8 وَ أَمْبَاكِرْ فَجُرْ، مُوسَى دَخَلْ فِي الْخَيْمَةْ دِي وَ شَافْ عَصَاةْ هَارُونْ الْمِنْ قَبِيلَةْ لَاوِي خَضَّرَتْ وَ سَوَّتْ نُوَّارْ وَ عِنْدَهَا عِيَالْ نَاجْضِينْ. 9 وَ مُوسَى مَرَقْ كُلَّ الْعِصَيْ مِنْ قِدَّامْ اللّٰهْ وَ خَطَّاهُمْ قِدَّامْ بَنِي إِسْرَائِيلْ وَ أَيِّ شَيْخ شَافْ عَصَاتَهْ وَ شَالْهَا.
10 وَ اللّٰهْ قَالْ لِمُوسَى: «قَبِّلْ عَصَاةْ هَارُونْ وَ خُطَّهَا قِدَّامْ الصَّنْدُوقْ دَا وَ أَحْفَضْهَا مِثِلْ عَلَامَةْ لِلْمُعَارِضِينْ. وَ تِوَقِّفْ كَلَامْهُمْ ضِدِّي وَ بَيْدَا، مَا يُمُوتُوا.» 11 وَ مُوسَى طَبَّقْ كَلَامْ اللّٰهْ سَوَا سَوَا مِثِلْ هُو أَمَرَهْ بَيَّهْ.
12 وَ بَنِي إِسْرَائِيلْ قَالَوْا لِمُوسَى: «شِيفْ دَاهُو أَنِحْنَ كُلِّنَا كَيْ نَهْلَكَوْا وَ نُمُوتُوا! 13 وَ أَيِّ نَادُمْ الْيِقَرِّبْ لِخَيْمَةْ اللّٰهْ دَا يُمُوتْ! وَ دَا، مَا نُمُوتُوا كُلِّنَا لَحَدِّي آخِرْنَا وَلَّا؟»
© La Bible en arabe tchadien © Alliance biblique du Tchad, 2019
