خِدْمة اللاوِيِّين
1 دِي هِي ذُرِّيَّةْ هَارُونْ أَخُو مُوسَى فِي الْوَكِتْ الْحَجَّى فَوْقَهْ اللّٰهْ لِمُوسَى فِي جَبَلْ سِينَاء. 2 هَارُونْ عِنْدَهْ أَرْبَعَةْ أَوْلَادْ. الْبِكِرْ أُسْمَهْ نَدَابْ وَ وَرَايَهْ أَبِيهُو وَ أَلِعَازَرْ وَ إِتَمَارْ. 3 وَ دَوْل أَوْلَادْ هَارُونْ الْمَسَحَوْهُمْ وَ دَرَّجَوْهُمْ رُجَالْ دِينْ. 4 لَاكِنْ نَدَابْ وَ أَبِيهُو مَاتَوْا فِي صَحَرَاء سِينَاء قِدَّامْ اللّٰهْ. وَ مَاتَوْا أَشَانْ هُمَّنْ قَدَّمَوْا لِلّٰهْ فِي لُبّ خَيْمَةْ الْإِجْتِمَاعْ بَخُورْ فِي نَارْ الْهُو مَا أَذَنْ بَيْهَا. وَ هُمَّنْ مَاتَوْا وَ مَا خَلَّوْا عِيَالْ. وَ أَخْوَانْهُمْ أَلِعَازَرْ وَ إِتَمَارْ كَمَانْ قَاعِدِينْ يَخْدُمُوا خِدْمَةْ رُجَالْ الدِّينْ تِحِتْ مُرَاقَبَةْ أَبُوهُمْ هَارُونْ.
5 وَ اللّٰهْ حَجَّى لِمُوسَى وَ قَالْ: 6 «قَدِّمْ نَاسْ قَبِيلَةْ لَاوِي وَ خُطُّهُمْ تِحِتْ مُرَاقَبَةْ هَارُونْ رَاجِلْ الدِّينْ أَشَانْ يَخْدُمُوا لَيَّهْ. 7 وَ يُقُمُّوا بِخِدْمَةْ الْخَيْمَةْ دِي وَ يَحَرْسُوا هَارُونْ وَ يَحْفَضَوْا كُلَّ الْمُجْتَمَعْ قِدَّامْ خَيْمَةْ الْإِجْتِمَاعْ. 8 وَ هُمَّنْ يَحْفَضَوْا كُلَّ مُعِدَّاتْ خَيْمَةْ الْإِجْتِمَاعْ وَ يَحْفَضَوْا بَنِي إِسْرَائِيلْ كُلَ وَ يَخْدُمُوا فِي خَيْمَةْ الْعِبَادَةْ. 9 وَ أَنْطِي اللَّاوِيِّينْ لِهَارُونْ وَ أَوْلَادَهْ أَشَانْ يِسَاعُدُوهُمْ. وَ هُمَّنْ يَبْقَوْا مِثِلْ عَطِيَّةْ الْجَابَوْهَا كُلَّ بَنِي إِسْرَائِيلْ. 10 وَ كَلِّفْ هَارُونْ وَ أَوْلَادَهْ لِيَحْفَضَوْا خِدْمَةْ رُجَالْ الدِّينْ دِي لَيْهُمْ هُمَّنْ بَسْ. وَ أَيِّ نَادُمْ آخَرْ كَنْ يِسَوِّي نَفْسَهْ رَاجِلْ دِينْ، وَاجِبْ يُمُوتْ.»
11 وَ بَتَّانْ اللّٰهْ حَجَّى لِمُوسَى وَ قَالْ: 12 «دَاهُو أَنَا شِلْت اللَّاوِيِّينْ مِنْ كُلَّ بَنِي إِسْرَائِيلْ فِي بَدَلْ كُلَّ أَوْلَادْ الْبِكِرْ مِنْ أَمَّهَاتْهُمْ أَشَانْ اللَّاوِيِّينْ يَبْقَوْا هِنَيّ أَنَا. 13 وَ كُلَّ أَوْلَادْ الْبِكِرْ هِنَيّ. أَشَانْ مِنْ يَوْم أَنَا كَتَلْت كُلَّ أَوْلَادْ الْبِكِرْ هَنَا الْمَصْرِيِّينْ فِي بَلَدْ مَصِرْ، أَنَا خَصَّصْت كُلَّ أَوْلَادْ الْبِكِرْ فِي إِسْرَائِيلْ مِنْ النَّاسْ وَ مِنْ الْبَهَايِمْ لِيَبْقَوْا هِنَيّ أَنَا اللّٰهْ.»
14 وَ بَتَّانْ اللّٰهْ حَجَّى لِمُوسَى فِي صَحَرَاء سِينَاء وَ قَالْ: 15 «أَحْسِبْ الدُّكُورْ مِنْ ذُرِّيَّةْ لَاوِي حَسَبْ خُشُومْ بُيُوتْهُمْ وَ عَايِلَاتْهُمْ مِنْ وِلَيْد شَهَرْ وَ فَوْق وَ أَلْقَى عَدَدْهُمْ.» 16 وَ مُوسَى حَسَبَاهُمْ حَسَبْ كَلَامْ اللّٰهْ الْهُو أَمَرَهْ بَيَّهْ.
17 وَ دَاهُو عِيَالْ لَاوِي. هُو جَابْ قِرْشُونْ وَ قَهَاتْ وَ مَرَارِي. 18 وَ قِرْشُونْ جَابْ خُشُومْ بُيُوتْ لِبْنِي وَ شِمْعِي. 19 وَ قَهَاتْ جَابْ خُشُومْ بُيُوتْ عَمْرَامْ وَ يِصْهَارْ وَ حَبْرُونْ وَ عُزِّيِيلْ. 20 وَ مَرَارِي جَابْ خُشُومْ بُيُوتْ مَحْلِي وَ مُوشِي. وَ دَوْل كُلُّهُمْ كَيْ خُشُومْ الْبُيُوتْ وَ الْعَايِلَاتْ الْمَرَقَوْا مِنْ لَاوِي.
21 وَ مِنْ قِرْشُونْ وِلَيْد لَاوِي مَرَقَوْا خُشُومْ بُيُوتْ لِبْنِي وَ شِمْعِي. وَ هُمَّنْ بَسْ الْيِكَوُّنُوا قَبِيلَةْ قِرْشُونْ. 22 وَ حَسَبَوْا عَدَدْ الدُّكُورْ مِنْ وِلَيْد شَهَرْ وَ فَوْق وَ عَدَدْهُمْ بِقِي 7 500. 23 وَ خُشُومْ بُيُوتْ هَنَا قَبِيلَةْ قِرْشُونْ يَنْزُلُوا وَرَاءْ الْخَيْمَةْ مِنْ جِيهَةْ الْغَرِبْ. 24 وَ شَيْخ قَبِيلَةْ قِرْشُونْ أُسْمَهْ أَلِيَاسَفْ وِلَيْد لَايِيلْ. 25 وَ فِي خَيْمَةْ الْإِجْتِمَاعْ، ذُرِّيَّةْ قِرْشُونْ تَحْفَضْ خَيْمَةْ الْعِبَادَةْ وَ غِطَاهَا وَ سِتَارْ هَنَا مَدَخَلْ خَيْمَةْ الْإِجْتِمَاعْ 26 وَ السَّتَايِرْ الْمُحَوِّقِينْ بَيْهُمْ الْفَضَايْ وَ سِتَارْ بَابْ الْفَضَايْ الْمُحَوِّقَةْ خَيْمَةْ الْعِبَادَةْ وَ الْمَدْبَحْ وَ كُلَّ الْحُبَالْ. وَ قَبِيلَةْ قِرْشُونْ مَسْؤُولَة مِنْ كُلَّ الْخُمَامْ دَوْل.
27 وَ مِنْ قَهَاتْ وِلَيْد لَاوِي مَرَقَوْا خُشُومْ بُيُوتْ عَمْرَامْ وَ يِصْهَارْ وَ حَبْرُونْ وَ عُزِّيِيلْ. وَ هُمَّنْ بَسْ الْيِكَوُّنُوا قَبِيلَةْ قَهَاتْ. 28 وَ حَسَبَوْا عَدَدْ الدُّكُورْ مِنْ وِلَيْد شَهَرْ وَ فَوْق وَ عَدَدْهُمْ بِقِي 8 300. وَ هُمَّنْ يَحْفَضَوْا مُعِدَّاتْ الْبَكَانْ الْمُقَدَّسْ. 29 وَ خُشُومْ بُيُوتْ هَنَا قَبِيلَةْ قَهَاتْ يَنْزُلُوا مِنْ جِيهَةْ الْوَطِي لِخَيْمَةْ الْعِبَادَةْ. 30 وَ شَيْخ قَبِيلَةْ قَهَاتْ أُسْمَهْ أَلِصَافَنْ وِلَيْد عُزِّيِيلْ. 31 وَ هُمَّنْ مَسْؤُولِينْ مِنْ صَنْدُوقْ مُعَاهَدَةْ اللّٰهْ وَ الطَّرَبَيْزَةْ وَ الْفَانُوسْ وَ الْمَدَابِحْ وَ الْمُعِدَّاتْ الْمُخَصَّصِينْ وَ السِّتَارْ الْيِدَارِقْ صَنْدُوقْ مُعَاهَدَةْ اللّٰهْ. وَ قَبِيلَةْ قَهَاتْ مَسْؤُولَة مِنْ كُلَّ الْخُمَامْ دَوْل.
32 وَ كُبَارَاتْ اللَّاوِيِّينْ كَبِيرْهُمْ أَلِعَازَرْ وِلَيْد هَارُونْ رَاجِلْ الدِّينْ. وَ هُو مَسْؤُولْ مِنْ النَّاسْ الْيَحْفَضَوْا الْبَكَانْ الْمُقَدَّسْ.
33 وَ مِنْ مَرَارِي وِلَيْد لَاوِي مَرَقَوْا خُشُومْ بُيُوتْ مَحْلِي وَ مُوشِي. وَ هُمَّنْ بَسْ الْيِكَوُّنُوا قَبِيلَةْ مَرَارِي. 34 وَ حَسَبَوْا عَدَدْ الدُّكُورْ مِنْ وِلَيْد شَهَرْ وَ فَوْق وَ عَدَدْهُمْ بِقِي 6 200. 35 وَ شَيْخ قَبِيلَةْ مَرَارِي أُسْمَهْ صُرِيِيلْ وِلَيْد أَبِحَايِلْ. وَ هُمَّنْ يَنْزُلُوا مِنْ جِيهَةْ الْمُنْشَاقْ لِخَيْمَةْ الْعِبَادَةْ. 36 وَ هُمَّنْ مَسْؤُولِينْ مِنْ خَشَبْ الْخَيْمَةْ وَ مَرَادِيسْ وَ عَمَدْهَا وَ أَسَاسْهَا وَ كُلَّ مُعِدَّاتْهَا. وَ قَبِيلَةْ مَرَارِي مَسْؤُولَة مِنْ كُلَّ الْخُمَامْ دَوْل. 37 وَ بَتَّانْ عِنْدُهُمْ مَسْؤُولِيَّةْ فِي الْمُعِدَّاتْ الْمُحَوِّقِينْ بَيْهُمْ الْفَضَايْ مِثِلْ الْعَمَدْ وَ الْأَسَاسْ وَ الْوُتَادْ وَ الْحُبَالْ.
38 وَ مُوسَى وَ هَارُونْ وَ أَوْلَادَهْ يَنْزُلُوا قِدَّامْ خَيْمَةْ الْإِجْتِمَاعْ مِنْ جِيهَاتْ الصَّبَاحْ. وَ هُمَّنْ يَحْفَضَوْا بَنِي إِسْرَائِيلْ قِدَّامْ الْبَيْت الْمُقَدَّسْ. وَ أَيِّ نَادُمْ آخَرْ كَنْ يِقَرِّبْ لِلْبَيْت دَا وَاجِبْ يُمُوتْ.
39 وَ حَسَبْ كَلَامْ اللّٰهْ، مُوسَى وَ هَارُونْ حَسَبَوْا كُلَّ اللَّاوِيِّينْ الدُّكُورْ مِنْ وِلَيْد شَهَرْ وَ فَوْق حَسَبْ خُشُومْ بُيُوتْهُمْ. وَ عَدَدْهُمْ بِقِي 22 000.
40 وَ بَتَّانْ اللّٰهْ قَالْ لِمُوسَى: «أَحْسِبْ كُلَّ أَوْلَادْ الْبِكِرْ الدُّكُورْ مِنْ بَنِي إِسْرَائِيلْ الْعُمُرْهُمْ مِنْ شَهَرْ وَ فَوْق وَ سَجِّلْ أَسَامَيْهُمْ. 41 وَ أَجْعَلْ اللَّاوِيِّينْ لَيِّ أَنَا اللّٰهْ فِي بَدَلْ كُلَّ أَوْلَادْ الْبِكِرْ مِنْ بَنِي إِسْرَائِيلْ. وَ أَجْعَلْ بَهَايِمْ اللَّاوِيِّينْ فِي بَدَلْ كُلَّ أَوْلَادْ الْبِكِرْ هَنَا بَهَايِمْ بَنِي إِسْرَائِيلْ.»
42 وَ مُوسَى حَسَبْ كُلَّ أَوْلَادْ الْبِكِرْ مِنْ بَنِي إِسْرَائِيلْ مِثِلْ اللّٰهْ أَمَرَهْ بَيَّهْ. 43 وَ سَجَّلْ أَسَامَيْ كُلَّ أَوْلَادْ الْبِكِرْ الدُّكُورْ الْعُمُرْهُمْ مِنْ شَهَرْ وَ فَوْق. وَ عَدَدْهُمْ بِقِي 22 273.
اللّه خصّص اللاوِيِّين لنفْسه
44 وَ اللّٰهْ حَجَّى لِمُوسَى وَ قَالْ: 45 «أَجْعَلْ اللَّاوِيِّينْ فِي بَدَلْ كُلَّ أَوْلَادْ الْبِكِرْ مِنْ بَنِي إِسْرَائِيلْ وَ بَهَايِمْ اللَّاوِيِّينْ فِي بَدَلْ بَهَايِمْهُمْ. وَ اللَّاوِيِّينْ يَبْقَوْا هِنَيّ أَنَا اللّٰهْ. 46 وَ لَاكِنْ أَوْلَادْ الْبِكِرْ مِنْ بَنِي إِسْرَائِيلْ عَدَدْهُمْ بِقِي 273 زِيَادَةْ مِنْ عَدَدْ اللَّاوِيِّينْ. وَ النَّاسْ الزِّيَادَةْ دَوْل وَاجِبْ تَفْدَوْهُمْ. 47 وَ لِفَدَيَانْهُمْ، تِشِيلْ 5 حَجَرْ فُضَّةْ لِأَيِّ وَاحِدْ. وَ حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ، أَيِّ حَجَرْ فُضَّةْ يَوْزِنْ 12 غِرَامْ. 48 وَ الْفُضَّةْ الْيَفْدَوْا بَيْهَا النَّاسْ الزِّيَادَةْ دِي، أَنْطِيهَا لِهَارُونْ وَ أَوْلَادَهْ.»
49 وَ مُوسَى لَمَّ فُضَّةْ الْفَدَيَانْ هَنَا النَّاسْ الْعَدَدْهُمْ زِيَادَةْ مِنْ عَدَدْ اللَّاوِيِّينْ. 50 وَ مُوسَى شَالْ مِنْ أَوْلَادْ الْبِكِرْ هَنَا بَنِي إِسْرَائِيلْ 1 365 حَجَرْ فُضَّةْ حَسَبْ الْوَزِنْ الرَّسْمِي هَنَا الْبَكَانْ الْمُقَدَّسْ. 51 وَ مُوسَى أَنْطَى فُضَّةْ الْفَدَيَانْ دِي لِهَارُونْ وَ أَوْلَادَهْ مِثِلْ اللّٰهْ أَمَرَهْ بَيَّهْ.
© La Bible en arabe tchadien © Alliance biblique du Tchad, 2019
